Wa Tsundzuka Xana?

Xana u swi tsakerile ku hlaya minkandziyiso leya ha ku humaka ya Xihondzo xo Rindza? Loko swi ri tano, vona loko u nga swi kota ku hlamula swivutiso leswi landzelaka:

• Hi tihi tindlela tin’wana leti Rhuti a veke xikombiso lexinene ha tona?

A a ri xikombiso lexinene hileswi a a rhandza Yehovha, hileswi a a rhandza Nawomi hi mbilu ya yena hinkwayo, nileswi a kombiseke migingiriko ni ku titsongahata. A swi fanerile leswi vanhu a a va n’wi teka a ri “wansati lonene ngopfu.” (Rhuti 3:11)—4/15, matluka 23-6.

• Hi swi tivisa ku yini leswaku Yehovha wa va khathalela vanhu lava tolovelekeke?

U byele Vaisrayele lava khomiweke hi tihanyi aEgipta leswaku va nga khomi swisiwana hi tihanyi. (Eksoda 22:21-24) Yesu loyi a tekeleleke Tata wa yena, u kombise nkhathalelo wa xiviri eka vanhu lava tolovelekeke, naswona vavanuna lava a va hlawuleke leswaku va va vaapostola a va ri vanhu “lava nga dyondzekangiki, lava tolovelekeke.” (Mintirho 4:13; Matewu 9:36) Hi nga tekelela Xikwembu hi ku khathala hi vanhu van’wana, vo tanihi vantshwa.—4/15, matluka 28-31.

• Hi nga tiyiseka njhani leswaku Yehovha wa swi vona leswi hi swi endlaka?

Bibele yi kombisa leswaku Yehovha wa yi vona mintirho leyi endliwaka hi vanhu va nyama. U lemuke xitlhavelo xa Avele, naswona u xiya ‘xitlhavelo xa hina xa ku dzunisa, ku nga mbhandzu wa milomu.’ (Vaheveru 13:15) Yehovha u swi xiyile leswaku Enoko u tikarhate swinene leswaku a n’wi tsakisa hi ku va ni mahanyelo lamanene. Naswona Xikwembu xi yi xiyile ndlela leyi noni ya le Sarepta leyi nga riki Muisrayele yi n’wi aveleke ha yona muprofeta Eliya swilo switsongo leswi a yi ri na swona. Yehovha u tlhela a vona swiendlo swa hina swa ripfumelo.—5/1, matluka 28-31.

• Ha yini ku nga vuriwaka leswaku endzhaku ka Pentekosta ya 33 C.E., Vayuda lava veke Vakreste a va fanele va tinyiketela eka Xikwembu?

Hi 1513 B.C.E., Israyele wa khale u ve ni vuxaka lebyikulu na Yehovha. (Eksoda 19:3-8) Ku sukela hi nkarhi wolowo ku ya emahlweni, Vayuda a va tswariwa erixakeni rero leri tinyiketeleke leri a ri ri ehansi ka ntwanano wa Nawu. Kambe Yehovha u suse ntwanano wa Nawu hi rifu ra Kreste hi 33 C.E. (Vakolosa 2:14) Endzhaku ka sweswo, Vayuda lava lavaka ku tirhela Xikwembu hi ndlela leyi amukelekaka a va fanele va tinyiketela eka xona kutani va khuvuriwa hi vito ra Yesu Kreste.—5/15, matluka 30-1.

• Xana swi fanerile ku hisa mirhi ya risuna evugandzerini bya ntiyiso namuntlha?

Ku tirhisa murhi wa risuna a swi tolovelekile evugandzerini bya ntiyiso le Israyele wa khale. (Eksoda 30:37, 38; Levhitika 16:12, 13) Kambe ntwanano wa Nawu, ku katsa ni ku tirhisa mirhi ya risuna, swi hele loko Kreste a dlayiwa. Vakreste va nga ha tiendlela xiboho hi voxe loko va lava ku tirhisa mirhi ya risuna ku nga ri hi xikongomelo xa vukhongeri, kambe a yi tirhisiwi evugandzerini bya ntiyiso namuntlha. Munhu u fanele a anakanyela van’wana leswaku a papalata ku va khunguvanyisa.—6/1, matluka 28-30.

• Hi wihi nchumu lowa ha ku kumiwaka lowu susumeteleke vanhu vo tala leswaku va anakanyisisa hi mhaka ya leswaku Yesu u tshame a hanya emisaveni?

Ku nyikeriwe rungula ro tala malunghana ni bokisi leri kumiweke eIsrayele. Swi vonaka onge i ra lembe-xidzana ro sungula, naswona ri ni marito lama kovotliweke eka rona lama nge: “Yakobo, n’wana wa Yosefa, makwavo wa Yesu.” Van’wana va ri teka ri ri “vumbhoni bya vuyimburi bya khale swinene lebyi nga humiki eBibeleni,” lebyi vulavulaka hileswaku Yesu u tshame a hanya emisaveni.—6/15, matluka 3-4.

• Xana munhu u swi dyondza njhani ku kombisa rirhandzu?

Vanhu va dyondza ku kombisa rirhandzu eka xikombiso ni ndzetelo wa vatswari va vona. Loko wanuna ni wansati va rhandzana va tlhela va xiximana, vana va nga dyondza ku kombisa rirhandzu. (Vaefesa 5:28; Tito 2:4) Hambiloko munhu a huma endyangwini lowu nga kombisaniki rirhandzu, a nga dyondza ku kombisa rirhandzu hi ku amukela vukongomisi bya Yehovha lebyi fanaka ni bya tatana, hi ku pfuniwa hi moya lowo kwetsima, na hi ku vuyeriwa hi nseketelo wa vamakwavo lava nga Vakreste.—7/1, matluka 4-7.

• Eusebius a a ri mani, naswona hi nga dyondza yini eka vutomi bya yena?

Eusebius a a ri n’wamatimu wa khale loyi hi 324 C.E., a heteke ku tsala tivholumo ta khume ta buku leyi nge History of the Christian Church. Hambileswi a a pfumela leswaku Tatana u ve kona emahlweni ka N’wana, Eusebius u pfumelelane ni vonelo ro hambana ra huvo ya le Nicaea. Swi tikomba onge u xi be hi makatla xilaveko xa Yesu xa leswaku valandzeri va Yena va “[nga vi] xiphemu xa misava.” (Yohane 17:16)—7/15, matluka 29-31.

• Xana Yehovha u ri cincile langutelo ra yena hi tshengwe?

Doo, Yehovha a nga ri cincanga langutelo ra yena hi tshengwe. (Malakiya 3:6) Xikongomelo xa Xikwembu hi wanuna wo sungula a ku ri leswaku a “namarhela nsati wakwe” nileswaku va va nyama yin’we. (Genesa 2:24) Yesu u vule leswaku loko munhu a tshika nsati wakwe handle ka xivangelo xa vumbhisa kutani a teka un’wana u endla vuoswi. (Matewu 19:4-6, 9) Yehovha u herise ku teka tshengwe loko ku simekiwa vandlha ra Vukreste.—8/1, tluka 28.