Xana U Lava Yehovha Hi Mbilu Ya Wena Hinkwayo?

WANUNA un’wana wa Mukreste a a swi navela hi mbilu hinkwayo ku chumayela mahungu lamanene ya Bibele eka vanhu lava a a hlangana na vona exitimeleni. (Marka 13:10) Kambe a a chava. Xana u lan’wile? Doo, u khongele hi mbilu hinkwayo kutani a tikarhatela ku dyondza ku sungula bulo. Yehovha Xikwembu u hlamule xikombelo xa munhu loyi kutani a n’wi nyika matimba yo nyikela vumbhoni.

Ku tiyimisela ko tano i ka nkoka loko hi lava Yehovha ni nkateko wa yena. Muapostola Pawulo u te: “La tshinelelaka Xikwembu u fanele a kholwa leswaku xi kona ni leswaku hi xona muhakeri wa lava va xi lavaka hi mbilu hinkwayo.” (Vaheveru 11:6) A swi enelanga ku lava Yehovha ntsena. Riendli ra Xigriki leri hundzuluxeriweke ri ku ‘lava hi mbilu hinkwayo’ ri vula ku tikarhata lokukulu. Leswi swi katsa mbilu ya munhu hinkwayo, mianakanyo hinkwayo, moya-xiviri hinkwawo ni matimba hinkwawo. Loko hi lava Yehovha hi mbilu hinkwayo a hi khondli mavoko. Ku ri na sweswo, hi kombisa ku hiseka ka xiviri loko hi ri karhi hi n’wi lava.—Mintirho 15:17.

Lava Va Laveke Yehovha Hi Mbilu Hinkwayo

EMatsalweni ku ni swikombiso swo tala swa lava va tikarhateke swinene loko va lava Yehovha. Un’wana wa vanhu volavo a ku ri Yakobe, loyi a tshwimbirisaneke ni ntsumi ya Xikwembu leyi a yi tihundzule munhu wa nyama, kukondza ku va vurhonga. Hikwalaho, Yakobe u thyiwe vito ra Israyele (Loyi A Tshwimbirisaneke Ni Xikwembu) hikuva u “tshwimbirisane” na Xikwembu kumbe ku xi sindzisa. Ntsumi yi n’wi katekisile hikwalaho ka ku tiyimisela ka yena hi mbilu hinkwayo.—Genesa 32:24-30.

EGaleliya a ku ri ni wansati un’wana loyi vito ra yena ri nga boxiwangiki, loyi a karhatiweke hi vuvabyi byo khuluka ngati ku ringana malembe ya 12, lebyi a byi n’wi vangela “switlhavi swo tala.” A a nga fanelanga a khumba vanhu loko a ri exiyin’weni lexi. Kambe, u kanye mbilu a ya eka Yesu. A a hambeta a ku: “Loko ndzo khumba ntsena tinguvu takwe ta le handle, ndzi ta hola.” N’wi anakanye a ri karhi a manyukuta exikarhi ka ‘ntshungu lowu a wu landzela Yesu wu ri karhi wu kamanyetelana eka yena.’ Loko a khumbe nguvu ya le handle ya Yesu, u swi twile leswaku ‘nseledyana wakwe wa ngati wu phyile’—vuvabyi bya yena a byi tshunguriwile! Loko Yesu a vutisile a ku “I mani la nga khumba tinguvu ta mina ta le handle?” wansati loyi u sungule ku chava. Kambe Yesu u n’wi byele hi rirhandzu a ku: “N’wananga, ripfumelo ra wena ri ku hanyisile. Famba hi ku rhula, naswona u hanya swinene evuvabyini bya wena bya khombo.” Matshalatshala ya yena ma n’wi vuyerisile.—Marka 5:24-34; Levhitika 15:25-27.

Siku rin’wana, wansati wa Mufenikiya u kombele Yesu hi mbilu hinkwayo leswaku a horisa n’wana wa yena wa nhwanyana. Yesu u n’wi  byele leswaku a swi nga fanelanga ku teka swakudya swa vana a swi nyika swimbyanyana. A a vula leswaku a a nga ta khathalela vanhu lava nga riki Vaisrayele kutani a honisa Vayuda. Loko a xiya yinhla ya xifaniso xa yena, wansati loyi u kombele a ku: “Ina, Hosi; kambe entiyisweni swimbyanyana swi dya mahlanhla lawa ma waka etafuleni ra vini va swona.” Ripfumelo ra yena lerikulu ri susumetele Yesu ku vula leswi: “Wena wansati, ripfumelo ra wena i rikulu; a swi endleke hilaha u navelaka hakona.”—Matewu 15:22-28.

Xana a ku ta va ku endleke yini eka vanhu lava loko a va nga phikelelanga? Xana a va ta va va yi kumile mikateko loko a va nga phikelelanga? Doo! Swikombiso leswi swi yi kombisa kahle yinhla leyi Yesu a yi dyondziseke, ku nga leswaku swi fanerile ‘ku phikelela hi vurhena’ naswona i swa nkoka ngopfu loko u lava Yehovha.—Luka 11:5-13.

Hi Ku Ya Hi Ku Rhandza Ka Xona

Eka marungula lama boxiweke laha henhla ya lava va horisiweke hi singita, xana a ko laveka ku tiyimisela ntsena leswaku va hanyisiwa? E-e, swikombelo swa vona a swi fanele swi fambisana ni ku rhandza ka Xikwembu. Yesu a a nyikiwe matimba ya ku endla masingita leswaku a ta swi kombisa erivaleni leswaku a a ri N’wana wa Xikwembu, Mesiya la tshembisiweke. (Yohane 6:14; 9:33; Mintirho 2:22) Ku tlula kwalaho, masingita lama endliweke hi Yesu a ko va xikombiso ntsena xa mikateko leyikulu leyi nga ta va kona laha misaveni leyi Yehovha a nga ta yi chululela vanhu hi nkarhi wa ku Fuma ka Kreste ka Gidi ra Malembe.—Nhlavutelo 21:4; 22:2.

Xikwembu a xa ha swi tsakeli leswaku vanhu va vukhongeri bya ntiyiso va endla masingita, yo tanihi ku hanyisa ni ku vulavula tindzimi. (1 Vakorinto 13:8, 13) Enkarhini wa hina ku rhandza ka xona ku katsa leswaku mahungu lamanene ya Mfumo ma twarisiwa emisaveni hinkwayo leswaku ‘vanhu va mixaka hinkwayo va fikelela vutivi lebyi kongomeke bya ntiyiso.’ (1 Timotiya 2:4; Matewu 24:14; 28:19, 20) Swi fanerile leswaku malandza ya Xikwembu ma langutela leswaku swikhongelo swa wona leswi humaka embilwini swi twiwa loko ma endla matshalatshala lamakulu leswaku ma hanya hi ku pfumelelana ni ku rhandza ka xona.

Van’wana va nga ha tivutisa, ‘Ha yini ndzi fanele ndzi tikarhata kasi xikongomelo xa Xikwembu xi ta hetelela xi hetisisiwile?’ Hambileswi ku nga ntiyiso leswaku Yehovha u ta hetisisa xikongomelo xakwe handle ka matshalatshala ya vanhu, kambe wa tsaka loko a vona vanhu va endla ku rhandza ka yena. Yehovha a nga ha fanisiwa ni wanuna la akaka yindlu. Muaki u ni pulani ya yindlu ya kona, kambe u hlawula ku aka hi swilo leswi nga kona etikweni rero. Hilaha ku fanaka, ku ni ntirho lowu Yehovha a faneleke a wu hetisisa namuntlha, naswona u tsakela ku tirhisa malandza ya yena, lama tinyikelaka hi ku swi rhandza.—Pisalema 110:3; 1 Vakorinto 9:16, 17.

 Anakanya hi ntokoto wa muntshwa la vuriwaka Toshio. Loko a fika exikolweni xa le henhla, u lave ku chumayela ngopfu ensin’wini ya yena yo hlawuleka. A a tshama a ri ni Bibele yakwe naswona a a tikarhata swinene leswaku a va Mukreste la nga xikombiso lexinene. Loko lembe ro sungula ri ya eku heleni, u pfulekeriwe hi nkarhi wa ku vulavula emahlweni ka tlilasi. Toshio u khongele eka Yehovha leswaku a n’wi pfuna naswona u tsake ngopfu loko a vona tlilasi hinkwayo yi rhiye ndleve eka nkulumo ya yena leyi a yi ku “Pakani Ya Mina Yo Endla Vuphayona Byi Va Ntirho-vutomi.” U hlamusele leswaku u lava ku va mutirheli wa nkarhi hinkwawo wa Timbhoni ta Yehovha. Xichudeni xin’wana xi pfumele ku dyondza Bibele na yena naswona xi endle nhluvuko xi kala xi khuvuriwa. Matshalatshala lamakulu ya Toshio lawa a ma fambisana ni swikhongelo swa yena ma hakeriwe hi ndlela leyikulu.

Xana U Tiyimisele Ku Fikela Kwihi?

U nga swi kombisa hi tindlela to hambana-hambana leswaku u lava Yehovha hi mbilu ya wena hinkwayo swin’we ni mikateko ya yena. Xo sungula, ku ni swilo swa nkoka leswi u nga swi endlaka, swo tanihi ku lunghiselela kahle loko u ya eminhlanganweni ya Vukreste. Loko u nyikela tinhlamulo leti lunghiseleriweke kahle, tinkulumo leti khutazaka ni minkombiso leyi pfunaka, u kombisa leswaku u lava Yehovha hi mbilu ya wena hinkwayo. U nga tlhela u kombisa ku tiyimisela ka wena hi ku antswisa ndlela leyi u tirhaka ha yona ensin’wini. Ha yini u nga ringeti ku va ni xinghana eka n’wini wa muti u tlhela u tirhisa swingheniso leswi tirhaka ensin’wini ya ka n’wina? (Vakolosa 3:23) Loko wanuna la nga Mukreste a tiyimisele hi mbilu hinkwayo, a nga swi kota ku amukela swiavelo swo tanihi ku va nandza wa vutirheli kumbe nkulu. (1 Timotiya 3:1, 2, 12, 13) Loko u pfumela ku tirhisiwa, u nga kuma ntsako wo nyika. U nga ha endla xikombelo xo ya tirha laha ku akiwaka kona rhavi kumbe ehofisini ya rhavi ra Timbhoni ta Yehovha. Loko u ri wanuna la nga tekangiki la fanelekaka, u nga ha lava ku ya eXikolweni xa Ndzetelo wa Vutirheli, lexi hlomiselaka vavanuna lava wupfeke hi tlhelo ra moya leswaku va va varisi lavanene. Loko u tekile kumbexana u nga ha kombisa ku swi navela ka wena hi mbilu hinkwayo ku tirhela Yehovha hilaha ku engetelekeke hi ku nghenela ntirho wa vurhumiwa. Kumbexana u nga ha rhurhela laha ku nga ni xilaveko lexikulu xa vachumayeri va Mfumo.—1 Vakorinto 16:9.

Lexi nga xa nkoka swinene i moya lowu u endlaka xiavelo xa wena ha wona. Ku nga khathariseki leswaku u nyikiwe vutihlamuleri byihi, byi hetisise hi mbilu hinkwayo, hi ku hiseka ni hi “mbilu yo tshembeka.” (Mintirho 2:46; Varhoma 12:8) U fanele u teka xiavelo xin’wana ni  xin’wana xi ri ndlela ya ku kombisa ku tiyimisela ka wena ku dzunisa Yehovha. Khongela nkarhi hinkwawo u lava mpfuno wa Yehovha, naswona u endla hinkwaswo leswi nga ematimbeni ya wena. Kutani u ta kuma hakelo leyikulu.

Matshalatshala Lamakulu Ma Hakeriwa

Xana wa ha n’wi tsundzuka wanuna wa Mukreste la khongeleke leswaku a hlula ku chava ka yena leswaku a ta chumayela vanhu lava a hlanganaka na vona exitimeleni? Yehovha u katekise ku navela ka yena. Makwerhu loyi u ringete ku va ni xinghana loko a vulavurisana ni vanhu a tlhela a hlawula tinhloko-mhaka letinene to sungula mabulo ha tona. U kote ku tirhisa Bibele hi ndlela leyi humelelaka kutani a nyikela vumbhoni eka wanuna loyi a a karhatekile hileswi vanhu va nga hanyisaniki hi ku rhula. Leswi a buleke ni wanuna loyi hi masiku yo hlayanyana exitimeleni mabulo wolawo ma endle leswaku a sungula dyondzo ya le kaya ya Bibele na yena. Hakunene Yehovha u n’wi katekisile hikwalaho ka matshalatshala ya yena lamakulu!

Na wena u nga ha kuma vuyelo lebyi fanaka loko u hambeta u lava Yehovha hi mbilu hinkwayo. Loko u phikelela hi ku titsongahata u tlhela u endla ntirho wun’wana ni wun’wana wa swa le tilweni hi mbilu hinkwayo, Yehovha u ta ku tirhisa hi ku pfumelelana ni swikongomelo swa yena a tlhela a ku katekisa swinene.

[Xifaniso lexi nga eka tluka 26]

Xana a ku ta va ku humelele yini eka wansati loyi loko a a nga phikelelanga?

[Xifaniso lexi nga eka tluka 27]

Xana wa phikelela loko u kombela nkateko wa Yehovha?

[Swifaniso leswi nga eka tluka 28]

U nga swi kombisa njhani leswaku u lava Yehovha hi mbilu ya wena hinkwayo?