Dzunisa Yehovha “eXikarhi Ka Nhlengeletano”

MINHLANGANO ya Vukreste i lunghiselelo leri humaka eka Yehovha ro hlayisa vanhu vakwe va tiyile hi tlhelo ra moya. Loko hi ya eminhlanganweni minkarhi hinkwayo, hi kombisa leswaku ha ma tlangela malunghiselelo ya Yehovha. Ku tlula kwalaho, hi kota ku “[khutaza vamakwerhu] erirhandzwini ni le mintirhweni leyinene,” ku nga ndlela ya nkoka yo kombisa ku rhandzana. (Vaheveru 10:24; Yohane 13:35) Kambe, hi nga va khutaza njhani vamakwerhu eminhlanganweni?

Tiphofule eRivaleni

Hosi Davhida u tsarile malunghana na yena n’wini: “Ndzi ta vula vito ra wena eka vamakwerhu; ndzi ta ku dzunisa exikarhi ka nhlengeletano. Ku dzunisa ka mina loku humaka eka wena ku ta va enhlengeletanweni leyikulu.” “Ndzi ta ku vonga enhlengeletanweni leyikulu; ndzi ta ku dzunisa exikarhi ka vanhu vo tala.” “Ndzi vule mahungu lamanene ya ku lulama enhlengeletanweni leyikulu. Waswivo! Nomu wa mina a ndzi wu siveli.”—Pisalema 22:22, 25; 35:18; 40:9.

Enkarhini wa muapostola Pawulo, loko Vakreste va hlengeletana leswaku va ta gandzela, na vona a va ri vula erivaleni ripfumelo ra vona malunghana na Yehovha ni ku kwetsima ka yena. Hi ndlela leyi va khutazanile erirhandzwini ni le mintirhweni leyinene. Enkarhini wa hina, malembe-xidzana yo tala endzhaku ka Davhida na Pawulo, hakunene ‘ha swi vona leswaku siku ra Yehovha  ra tshinela.’ (Vaheveru 10:24, 25) Mafambiselo ya swilo ya Sathana ma le kusuhi ni ku lovisiwa, naswona swiphiqo swi hambeta swi kula. Ku tlula rini na rini, “ku laveka leswaku [hi] tiyisela.” (Vaheveru 10:36) I mani un’wana loyi a nga hi khutazaka leswaku hi tiyisela loko ku nga ri vamakwerhu?

Ku fana ni le minkarhini ya khale, namuntlha mupfumeri ha un’we u endleriwe malunghiselelo yo vula ripfumelo ra yena “exikarhi ka nhlengeletano.” Lunghelo rin’wana leri pfulekeleke vanhu hinkwavo i ra ku hlamula loko vayingiseri va vutisiwa swivutiso eminhlanganweni ya vandlha. U nga byi tekeli ehansi vuyelo lebyi hetisisiwaka hi ku hlamula koloko. Hi xikombiso, tinhlamulo leti kombisaka ndlela yo hlula kumbe yo papalata swiphiqo ti kurisa ku tiyimisela ka vamakwerhu ku landzela misinya ya milawu ya Bibele. Tinhlamulo leti hlamuselaka tindzimana ta Bibele leti kombisiweke kambe ti nga tshahiwanga kumbe leti katsaka ni rungula leri munhu a ri kumeke loko a tiendlela ndzavisiso, ti nga ha khutaza van’wana leswaku va va ni mikhuva leyinene yo dyondza.

Ku tiva leswaku hina swin’we ni van’wana hi ta vuyeriwa loko hi hlamula eminhlanganweni swi fanele swi khutaza Timbhoni ta Yehovha hinkwato leswaku ti hlula ku chava ku vulavula. I swa nkoka swinene leswaku vakulu ni malandza ya vutirheli va hlamula eminhlanganweni, tanihi leswi va languteriweke leswaku va rhangela eku hlamuleni ni ku va kona eminhlanganweni. Kambe, xana munhu a nga antswisa njhani loko a kuma leswaku xilaveko lexi xa Vakreste xa ku hlamula xa n’wi tikela?

Swiringanyeto Swo Antswisa

Tsundzuka leswaku ku hlamula i xiphemu xa vugandzeri bya hina eka Yehovha. Wansati un’wana wa Mukreste la tshamaka le Jarimani u hlamusela ndlela leyi a ku tekaka ha yona ku hlamula. “I nhlamulo ya mina eka matshalatshala ya Sathana yo sivela vanhu va Xikwembu leswaku va nga phofuli ripfumelo ra vona.” Makwerhu loyi a ha ku khuvuriwaka loyi a hlanganyelaka evandlheni leri fanaka u ri: “Ku hlamula eminhlanganweni i mhaka leyi ndzi yi khongelelaka hi matimba.”

Lunghiselela kahle. Loko u nga lunghiseleli, swi ta ku tikela ku hlamula naswona tinhlamulo ta wena a ti nge pfuni ngopfu. Swiringanyeto swo hlamula eminhlanganweni ya vandlha swi kumeka ebukwini leyi nge Vuyeriwa Eka Vuleteri Bya Xikolo Xa Vutirheli Bya Le Tilweni, tluka 70. *

Tivekele pakani ya ku hlamula hambi ko va kan’we eka nhlangano wun’wana ni wun’wana. Leswi swi vula leswaku u fanele u lunghiselela tinhlamulo to hlayanyana, tanihi leswi makwerhu la fambisaka dyondzo a nga ha ku kombaka loko u yimisa voko ko tala. U nga ha tsakela ku n’wi byela ka ha ri na nkarhi leswaku hi swihi swivutiso leswi u lavaka ku hlamula eka swona. Leswi swi pfuna ngopfu loko wa ha sungula. Tanihi leswi swi nga ha ku chavisaka ku yimisa voko ‘evandlheni lerikulu,’ loko u swi tiva leswaku yoleyo i ndzimana leyi u faneleke u hlamula eka yona ni leswaku makwerhu la fambisaka nhlangano u ta va a langutele ku vona voko ra wena, swi ta ku khutaza leswaku u hlamula.

 Hlamula to ho suka. Ntirho wo tika a wu nge olovi loko wu tshamela ku tlheriseriwa endzhaku. Ku hlamula loko nhlangano wa ha ku sungula swi nga pfuna swinene. U ta hlamala loko u xiya leswaku swi olova swinene ku hlamula ra vumbirhi kumbe ra vunharhu endzhaku ka loko u hlule xihinga xo hlamula ro sungula.

Tshama endhawini leyi faneleke. Van’wana swa va olovela ku hlamula loko va tshamele eswitulwini swa le mahlweni eHolweni ya Mfumo. Loyi a fambisaka dyondzo u hatla a va vona loko va yimise mavoko. Loko u ri karhi u ringeta mhaka leyi, u fanele u tsundzuka ku vulavulela ehenhla leswaku vanhu hinkwavo va ku twa, ngopfu-ngopfu loko vandlha ri nga ri na swikurisa marito.

Yingiserisisa. Leswi swi ta ku pfuna ku papalata ku phindha leswa ha ku vuriwaka hi un’wana. Nakambe, tinhlamulo ta van’wana ti nga ha ku tsundzuxa tsalwa kumbe yinhla leyi nga fambisanaka swinene ni leswi swa ha ku vuriwaka. Minkarhi yin’wana, u nga ha vula ntokoto wo koma lowu fambisanaka ni yinhla leyi ku buriwaka ha yona. Tinhlamulo to tano ti pfuna swinene.

Dyondza ku hlamula hi marito ya wena n’wini. Ku hlaya nhlamulo ya wena enkandziyisweni lowu dyondziwaka swi nga ha kombisa leswaku u kume nhlamulo leyi faneleke, naswona ku nga ha va ndlela leyinene yo sungula ku hlamula. Kambe loko u hambeta u hlamula hi marito ya wena n’wini swi kombisa leswaku u twisisa yinhla leyi ku buriwaka ha yona. Minkandziyiso ya hina a yi endleriwanga ku tlhela yi tshahiwa. Timbhoni ta Yehovha a ti tlheli ti phindha leswi tibuku ta tona ti swi vulaka.

U nga humi emhakeni. Tinhlamulo leti nga fambisaniki ni mhaka kumbe leti susaka mianakanyo eka tinhla-nkulu leti ku buriwaka ha tona a ti fanelanga. Leswi swi vula leswaku tinhlamulo ta wena ti fanele ti fambisana ni mhaka leyi ku buriwaka ha yona. Kutani ti ta endla leswaku mhaka leyi ku buriwaka ha yona yi aka hi tlhelo ra moya.

Tiyimisele ku khutaza. Tanihi leswi xivangelo-nkulu xa ku hlamula ku nga ku khutaza van’wana, hi fanele hi ringeta ku papalata ku vula swilo leswi nga va hetaka matimba. Ku tlula kwalaho, u nga hlanganisi ndzimana hinkwayo lerova van’wana va nga saleriwi hi nchumu xo xi vula. Tinhlamulo to leha kumbe leti rharhanganeke ti tala ku tumbeta mongo. Tinhlamulo to koma leti nga riki na marito yo tala ti nga pfuna swinene, naswona ti ta khutaza vanhu lavantshwa ku nyikela tinhlamulo to koma.

Xiphemu Lexi Hetisisiwaka Hi Lava Va Fambisaka Minhlangano

Loyi a fambisaka nhlangano u ni vutihlamuleri lebyikulu byo khutaza. Loko a yingiserisisa a tlhela a languta munhu loyi a hlamulaka ematshan’weni yo tiendlela swilo swin’wana loko ku ri karhi ku hlamuriwa, u kombisa leswaku u ni mhaka ni nhlamulo yin’wana ni yin’wana leyi nyikeriwaka. A swi nge languteki loko a nga yingiserisisi ivi endzhaku ka sweswo a tlhela a phindha leswa ha ku vuriwaka kumbe a vutisa xivutiso lexa ha ku hlamuriwaka!

Swi nga ha heta matimba loko loyi a fambisaka dyondzo nkarhi na nkarhi a phindha nhlamulo leya ha ku nyikeriwaka hi ndlela leyi hambanekenyana, onge hiloko a ringanyeta leswaku nhlamulo yoleyo a yi nga fanelanga. Hi hala tlhelo, swa khutaza loko tinhlamulo ti endla leswaku ku ndlandlamuxiwa yinhla  ya nkoka. Swivutiso leswi khutazaka leswaku vanhu va nyikela tinhlamulo leti akaka hi leswi nge, ‘Hi nga swi tirhisa njhani leswi evandlheni ra ka hina?’ kumbe, ‘Endzimaneni leyi hi rihi tsalwa leri seketelaka leswa ha ku vuriwaka?’

Ina, vanhu lava ha riki vantshwa kumbe lava nga ni tingana va fanele va bumabumeriwa swinene loko va hlamula. U nga ha va bumabumela ha un’we-un’we endzhaku ka dyondzo leswaku u papalata ku va khomisa tingana, naswona sweswo swi nga ha nyika mufambisi nkarhi wa ku nyikela swiringanyeto loko swi fanerile.

Eka bulo leri tolovelekeke, munhu la vulavulaka ngopfu u endla leswaku vanhu va loloha ku vulavula. Vayingiseri va yena va vona ku nga ri na xilaveko xo tiphofula. A va n’wi yingiseli hi mbilu hinkwayo. Ku nga ha endleka nchumu lowu fanaka loko mufambisi a vulavula ngopfu. Hambiswiritano, loyi a fambisaka nhlangano a nga pfa a lava ku twa mavonelo ya vayingiseri kutani a va khutaza hi ku va vutisa swivutiso leswi engetelekeke. Swivutiso swo tano a swi fanelanga swi vutisiwa ngopfu.

Loyi a fambisaka dyondzo a nge kombi munhu la yimisaka voko ku sungula swi nga fanelanga. Sweswo swi nga ha va heta matimba lava va lavaka nkarhi wutsongo wo hlela marito lawa va nga ta ma tirhisa. Loko a yima nkarhinyana, u ta nyika loyi a nga si hlamulaka nkarhi wa ku hlamula. Nakambe u ta va a kombisa leswaku wa twisisa loko a nga hlamurisi vana swivutiso leswi vulavulaka hi timhaka leti va nga ti twisisiki.

Ku vuriwa yini loko ku nyikeriwa nhlamulo leyi hoxeke? Loyi a fambisaka dyondzo u fanele a papalata ku n’wi khomisa tingana munhu la nyikeleke nhlamulo yoleyo. Tinhlamulo hambiloko ti hoxile ti ni ntiyiso wo karhi. Loyi a fambisaka nhlangano a nga hlawula mhaka leyi nga ntiyiso enhlamulweni yoleyo, a vutisa xivutiso xolexo hi ndlela yin’wana kumbe a vutisa xivutiso lexi engetelekeke, xisweswo a lulamisa nhlamulo handle ko n’wi khomisa tingana loyi a hlamuleke.

Leswaku a khutaza vayingiseri ku hlamula, loyi a fambisaka nhlangano u fanele a papalata ku vutisa swivutiso swo tanihi leswi nge, ‘Xana ka ha ri ni loyi a nga ni nhlamulo yin’wana?’ Xiga lexi nge, ‘Loyi a nga si hlamulaka i nkarhi wa yena wo hetelela!’ xi nga ha vuriwa hi xikongomelo lexinene, kambe a xi nge khutazi munhu ku tiphofula hi ku ntshunxeka. Vamakwerhu a va fanelanga va endliwa va titwa va ri ni nandzu hileswi va nga hlamulangiki loko dyondzo ya ha sungula. Ku ri na sweswo, va fanele va khutaziwa ku vula leswi va swi tivaka hikuva ku vulavula koloko i xikombiso xa rirhandzu. Ku engetela kwalaho, endzhaku ka loko mufambisi a kombe un’wana leswaku a hlamula, swa antswa a nga vuli leswaku, “Endzhaku ka yena hi ta twa Makwerhu Swimani-mani ivi ku landzela Makwerhu Swimani-mani.” Loyi a fambisaka dyondzo u fanele a rhanga a yingisela nhlamulo ivi a vona loko ka ha laveka nhlamuselo leyi engetelekeke.

Ku Hlamula I Lunghelo

Ku va kona eminhlanganweni ya Vukreste i xilaveko xa le matsalweni; ku hlamula loko u ri eka yona i lunghelo. Loko hi ya hi hlanganyela swinene eka ndlela leyi yo hlawuleka yo dzunisa Yehovha “exikarhi ka nhlengeletano,” hi ta va hi landzela xikombiso xa Davhida naswona hi yingisa ndzayo ya Pawulo. Ku hlanganyela ka hina eminhlanganweni swi kombisa leswaku hi rhandza vamakwerhu nileswaku hi xiphemu xa vandlha lerikulu ra Yehovha. Xana u nga lava ku tikuma u ri kwihi tanihi leswi “[u] vonaka siku ri tshinela”?—Vaheveru 10:25.

[Nhlamuselo ya le hansi]

[Swifaniso leswi nga eka tluka 20]

Ku yingisela ni ku hlamula eminhlanganweni ya Vukreste i swa nkoka

[Xifaniso lexi nga eka tluka 21]

Loyi a fambisaka nhlangano u yingisela nhlamulo yin’wana ni yin’wana hi vukheta