Endla Yehovha A Va Ntshembo Wa Wena
Endla Yehovha A Va Ntshembo Wa Wena
“U ntshembo wa mina, Wena Yehovha, Hosi leyi Lawulaka, ntshembo wa mina ku sukela evuntshweni bya mina.”—Pisalema 71:5.
1. I ntlhontlho wihi lowu a wu langutane ni jaha leri a ri ri murisi leri vuriwaka Davhida?
WANUNA la vuriwaka Goliyadi a a lehe kwalomu ka timitara tinharhu. A swi hlamarisi leswi masocha hinkwawo ya Israyele a ma chava ku jamelana na yena! Goliyadi loyi a a ri xihontlovila xa Mufilista u hete mavhiki yo tala a tlhontlha vuthu ra Israyele mixo wun’wana ni wun’wana ni madyambu man’wana ni man’wana, a ri byela leswaku ri tisa nhenha leyi nga ta lwa na yena. Eku heteleleni, muntshwa un’wana loyi a a nga ri socha u pfumerile ku lwa na yena. Davhida loyi a a ri murisi a a nga vonaki na leswaku i yini loko a ringanisiwa ni nala wa yena. Phela, kumbexana a a tluriwa ni hi swihlomo ni matlhari ya Goliyadi hi ku tika! Nilokoswiritano, muntshwa loyi u ye a ya lwa ni xihontlovila lexi kutani a kombisa vurhena lebyi ni namuntlha byi nga si rivariwaka.—1 Samuwele 17:1-51.
2, 3. (a) Ha yini Davhida a swi kotile ku jamelana na Goliyadi hi xivindzi? (b) Hi ta bula hi magoza wahi mambirhi lawa hi faneleke hi ma teka leswaku hi endla Yehovha a va ntshembo wa hina?
2 I yini lexi endleke leswaku Davhida a va ni vurhena byo tano? Xiya marito man’wana lawa entiyisweni ma tsariweke hi Davhida loko se a kurile: “U ntshembo wa mina, Wena Yehovha, Hosi leyi Lawulaka, ntshembo wa mina ku sukela evuntshweni bya mina.” (Pisalema 71:5) Ina, loko a ha ri muntshwa Davhida u tshembe Yehovha hi ku helela. U jamelane na Goliyadi, a ku: “U ta eka mina hi banga ni fumu ni tlhari, kambe mina ndzi ta eka wena hi vito ra Yehovha wa mavuthu, Xikwembu xa nxaxamelo wa nyimpi ya Israyele lexi u xi tlhontlheke.” (1 Samuwele 17:45) Goliyadi a a tshembe matimba ya yena lamakulu ni matlhari ya yena, kasi Davhida a a tshembe Yehovha. Leswi Davhida a a seketeriwa hi Hosi leyi Lawulaka ya vuako, xana a a ta chava munhu wa nyama ku nga khathariseki leswaku u nkulu naswona u hlome ku fikela kwihi?
3 Loko u ri karhi u hlaya mhaka ya Davhida, xana u navela onge na wena u nga tshemba Yehovha hi ndlela yoleyo? A swi kanakanisi leswaku vo tala va hina ha swi navela sweswo. Kutani a hi kambisiseni magoza mambirhi lawa hi nga ma tekaka leswaku hi endla Yehovha a va ntshembo wa hina. Xo sungula, hi fanele hi kota ku hlula xihinga lexi talaka ku sivela vanhu ku va ni ntshembo wolowo. Xa vumbirhi, hi fanele hi dyondza leswaku kahle-kahle i yini lexi katsekaka eku tshembeni ka Yehovha.
Ku Hlula Xihinga Lexi Talaka Ku Sivela Vanhu Leswaku Va Tshemba Yehovha
4, 5. Ha yini vanhu vo tala swi va tikela ku tshemba Xikwembu?
4 I yini lexi sivelaka vanhu leswaku va tshemba Xikwembu? Hakanyingi, van’wana va pfilunganyiwa hileswi ku humelelaka swilo swo homboloka. Vo tala va dyondzisiwa leswaku Xikwembu hi xona xi vangaka ku xaniseka. Loko ko fa vanhu vo karhi, vafundhisi va nga ha vula leswaku Xikwembu xi “teke” vanhu volavo leswaku va ya tshama na xona etilweni. Ku tlula kwalaho, varhangeri vo tala va vukhongeri va dyondzisa leswaku i khale Xikwembu xi kunguhate xiendlakalo xin’wana ni xin’wana—ku katsa ni makhombo hinkwawo ni swiendlo swo biha leswi humelelaka laha misaveni. A swi ta tika ku tshemba Xikwembu xo tano xa tihanyi. Sathana, la dlayaka mianakanyo ya lava nga riki vapfumeri, u lwa hi matimba leswaku a kondletela ‘tidyondzo teto hinkwato ta madimona.’—1 Timotiya 4:1; 2 Vakorinto 4:4.
5 Sathana u lava leswaku vanhu va tshika ku tshemba Yehovha. Nala yoloye wa Xikwembu a nga lavi hi swi tiva leswaku kahle-kahle ku xaniseka ka vanhu ku vangiwa hi yini. Naswona loko hi hlayile eMatsalweni ivi hi swi tiva leswaku ku xaniseka ku vangiwa hi yini, Sathana u lava leswaku hi swi rivala swilo sweswo. Hikwalaho, i swinene leswaku nkarhi na nkarhi hi pfuxeta swivangelo-nkulu swinharhu swa ku xaniseka loku nga kona emisaveni. Loko hi endla tano, hi nga tiyiseka hakunene leswaku Yehovha a hi yena a vangaka swiphiqo leswi hi langutanaka na swona evuton’wini.—Vafilipiya 1:9, 10.
6. Xana 1 Petro 5:8 yi xi kombisa njhani xivangelo xin’wana xa ku xaniseka ka vanhu?
6 Xilo xo sungula lexi endlaka leswaku vanhu va xaniseka hileswaku Sathana u lava ku xaxisa vutshembeki bya vanhu va Yehovha. U ringetile ku xaxisa vutshembeki bya Yobo. Sathana u tsandzekile, kambe a nga lan’wanga. Leswi a nga mufumi wa misava leyi, u lava ku ‘herisa’ malandza lama tshembekaka ya Yehovha. (1 Petro 5:8) Na hina ha katseka! Sathana u lava ku hi tshikisa ku tirhela Yehovha. Xisweswo, hakanyingi u kondletela nxaniso. Hambiloko ku xaniseka koloko ku vava, hi ni xivangelo lexi twalaka xo tiyisela. Loko hi endla tano, ha pfuneta eku kombiseni ka leswaku Sathana i muhembi kutani hi tsakisa Yehovha. (Yobo 2:4; Swivuriso 27:11) Loko Yehovha a ri karhi a hi tiyisa leswaku hi tiyisela nxaniso, hi ya hi n’wi tshemba swinene.—Pisalema 9:9, 10.
7. Vagalatiya 6:7 yi hi pfuna ku xiya xivangelo xihi xa ku xaniseka?
7 Xivangelo xa vumbirhi xa ku xaniseka xi kumeka eka nsinya lowu wa nawu: “Xin’wana ni xin’wana lexi munhu a xi byalaka, u ta tlhela a tshovela xona.” (Vagalatiya 6:7) Minkarhi yin’wana loko vanhu va hlawula ku endla swilo leswo biha va va va ri eku byaleni, kutani va tshovela ku xaniseka lokukulu. Va nga ha hlawula ku chayela hi ndlela yo biha, kutani sweswo swi vanga mhangu. Vo tala va hlawula ku dzaha fole, leswi vangaka leswaku va va ni vuvabyi bya mbilu kumbe khensa ya mahahu. Lava va hlawulaka ku tikhoma hi ndlela yo biha hi tlhelo ra rimbewu va tihoxa ekhombyeni ra ku onha vuxaka bya ndyangu, ku heleriwa hi xindzhuti, ku va ni mavabyi lama tluletiwaka hi vuxaka bya rimbewu ni makhwiri lama nga laviwiki. Vanhu va nga ha tala ku sola Xikwembu hikwalaho ka maxangu wolawo, kambe kahle-kahle i vuyelo bya swiboho swa vona leswi hoxeke.—Swivuriso 19:3.
8. Hi ku ya hi Eklesiasta 9:11, ha yini vanhu va xaniseka?
8 Xivangelo xa vunharhu xa ku xaniseka xi hlamuseriwe eka Eklesiasta 9:11: “Ndzi tlhele ndzi swi vona ehansi ka dyambu leswaku lava va nga ni rivilo lerikulu a va hluli emphikizanweni, hambi ku ri lava va nga ni matimba a va hluli enyimpini, ni lavo tlhariha a va swi kumi swakudya, hambi ku ri lava twisisaka a va na rona rifuwo, ni lava va nga ni vutivi a va kombiwi tintswalo; hikuva nkarhi ni xiendlakalo lexi nga languteriwangiki swa va wela hinkwavo.” Minkarhi yin’wana vanhu va tikuma va ri endhawini leyi hoxeke hi nkarhi lowu hoxeke. Ku nga khathariseki leswaku hi ni matimba yo fikela kwihi kumbe hi tsane ku fikela kwihi, hi nga ha xaniseka kumbe hi fa nkarhi wun’wana ni wun’wana swi nga languteriwanga. Hi xikombiso, xihondzo xa le Yerusalema xi wile xi dlaya vanhu va 18 enkarhini wa Yesu. Yesu u kombise leswaku Xikwembu a xi nga ri ku va xupuleni hikwalaho ka swidyoho leswi va swi endleke enkarhini lowu hundzeke. (Luka 13:4) E-e, Yehovha a hi yena a vangeke khombo rolero.
9. I yini leswi vo tala va nga swi twisisiki malunghana ni ku xaniseka?
9 I swa nkoka ku twisisa swin’wana swa swilo leswi vangaka ku xaniseka. Hambiswiritano, ku ni mhaka yin’wana leyi vo tala swi va tikelaka ku yi twisisa. Mhaka ya kona hi leyi nge: Ha yini Yehovha Xikwembu a pfumelela ku xaniseka?
Ha Yini Yehovha A Pfumelela Ku Xaniseka?
10, 11. (a) Hi ku ya hi Varhoma 8:19-22, ku humelele yini hi “ntumbuluko hinkwawo”? (b) Hi nga swi kumisa ku yini leswaku i mani la vekeke ntumbuluko ehansi ka vuhava?
10 Tindzimana tin’wana leti nga epapileni ra muapostola Pawulo leri a ri ya eka Varhoma ta pfuna swinene emhakeni leyi ya nkoka. Pawulo u tsarile: “Ku langutela hi mahlongati ka ntumbuluko ku rindzele ku hlavuteriwa ka vana va Xikwembu. Hikuva ntumbuluko wu vekiwe ehansi ka vuhava, ku nga ri hi ku rhandza ka wona, kambe hikwalaho ka loyi a wu vekeke, exisekelweni xa ntshembo, leswaku ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu. Hikuva ha swi tiva leswaku ntumbuluko hinkwawo wu hambeta wu konya ni ku vaviseka swin’we ku ta fika sweswi.”—Varhoma 8:19-22.
11 Leswaku hi twisisa tindzimana leti, hi fanele hi rhanga hi kuma tinhlamulo ta swivutiso swin’wana swa nkoka. Hi xikombiso, I mani la vekeke ntumbuluko ehansi ka vuhava? Van’wana va vule leswaku i Sathana; kasi van’wana va ri i Adamu. Kambe ku hava ni un’we wa vona loyi a a ta swi kota ku swi endla sweswo. Ha yini? Hikuva loyi a vekaka ntumbuluko ehansi ka vuhava u wu veka “exisekelweni xa ntshembo.” Ina, u nyikela ntshembo wa leswaku vanhu vo tshembeka eku heteleleni va ta “ntshunxiwa evuhlongeni bya ku onhaka.” Adamu kumbe Sathana a va nga ta swi kota ku nyikela ntshembo wo tano. I Yehovha ntsena la nga swi kotaka. Kutani swi le rivaleni leswaku hi yena la vekeke ntumbuluko ehansi ka vuhava.
12. Hi kwihi ku pfilunganyeka loku veke kona malunghana ni nhlamuselo ya “ntumbuluko hinkwawo,” naswona xivutiso lexi xi nga hlamuriwa njhani?
12 Kutani, “ntumbuluko hinkwawo” lowu ku vulavuriwaka ha wona endzimaneni leyi i yini? Van’wana va vula leswaku “ntumbuluko hinkwawo” i swilo hinkwaswo leswi vumbiweke, ku katsa ni swiharhi ni swimila. Kambe xana swiharhi ni swimila swi ni ntshembo wo kuma “ntshunxeko lowu vangamaka wa vana va Xikwembu”? Doo! (2 Petro 2:12) Kutani “ntumbuluko hinkwawo” i vanhu. Hi wona ntumbuluko lowu khumbiwaka hi xidyoho ni rifu hikwalaho ka nxandzuko wa le Edeni naswona wu lava ntshembo hi mahlo-ngati.—Varhoma 5:12.
13. Xana nxandzuko wa le Edeni wu va khumbe njhani vanhu?
13 Kahle-kahle, nxandzuko wolowo wu endle yini evanhwini? Pawulo u hlamusela vuyelo bya wona hi rito rin’we: vuhava. Hi ku ya hi buku yin’wana ya tinhlamuselo, rito leri ri vula “vuhava bya nchumu lowu nga hetisisiki xikongomelo lexi a wu endleriwe xona.” Vanhu a va vumberiwe ku hanya hi masiku, va tirha swin’we va ri ndyangu lowu hetisekeke lowu nga ni vun’we, va khathalela misava leyi nga paradeyisi. Ku ri na sweswo, va hanya nkarhi wo koma ehansi ka xiyimo lexi hlomulaka mbilu. Hilaha Yobo a vuleke hakona, “munhu la velekiweke hi wansati, u hanya nkarhi wo koma naswona u taleriwe hi ku karhateka.” (Yobo 14:1) I vuhava hakunene!
14, 15. (a) Vululami byi kombisiwe njhani eka ndlela leyi Yehovha a gweveke vanhu ha yona? (b) Ha yini Pawulo a vule leswaku ntumbuluko wu vekiwe ehansi ka vuhava “ku nga ri hi ku rhandza ka wona”?
14 Sweswi hi ta eka xivutiso-nkulu lexi nge: Ha yini “Muavanyisi wa misava hinkwayo” a tshike vanhu va va ehansi ka xiyimo lexi hlomulaka mbilu swonghasi? (Genesa 18:25) Xana leswi a swi endleke a swi lulamile? Tsundzuka leswi nga endliwa hi vatswari va hina vo sungula. Loko va xandzukela Xikwembu, se a va yima na Sathana loyi a tlhontlheke vuhosi bya Yehovha hi ku kongoma. Swiendlo swa vona swi kombise leswaku va seketela mhaka ya leswaku munhu a nga swi kota ku hanya kahle handle ka Yehovha, a tifuma a kongomisiwa hi xivumbiwa xa moya lexi xandzukeke. Kahle-kahle loko Yehovha a gweva vaxandzuki lava u va nyike leswi va swi kombeleke. U pfumelele munhu leswaku a tifuma ehansi ka nkucetelo wa Sathana. Ehansi ka swiyimo leswi, xana lexi a xi nga ri xiboho xa nkoka xo endla munhu a va ehansi ka vuhava kambe a ri ni ntshembo?
15 Ina, loku a ku nga ri “ku rhandza ka wona” ntumbuluko. Hi velekiwa hi ri mahlonga ya xidyoho ni ku onhaka, handle ka ku tihlawulela. Kambe Yehovha hi tintswalo ta yena u pfumelele Adamu na Evha leswaku va hanya malembe lawa a ma va salerile kutani va veleka vana. Hambileswi hina vatukulu va vona hi vekiweke ehansi ka vuhava bya xidyoho ni rifu, hi ni lunghelo ra ku endla leswi Adamu na Evha va tsandzekeke ku swi endla. Hi nga yingisa Yehovha hi tlhela hi dyondza leswaku vuhosi bya yena i byinene naswona byi hetisekile, kasi loko munhu a tifuma handle ka Yehovha u tivangela ku vaviseka, gome ni vuhava ntsena. (Yeremiya 10:23; Nhlavutelo 4:11) Naswona nkucetelo wa Sathana wo nyanyisa timhaka ntsena. Matimu ya vanhu ma swi kombisile sweswo.—Eklesiasta 8:9.
16. (a) Ha yini hi nga tiyisekaka leswaku Yehovha a hi yena a vangaka ku xaniseka loku nga kona namuntlha emisaveni? (b) Hi wihi ntshembo lowu Yehovha a wu nyikeke vanhu lava tshembekaka hi rirhandzu?
16 Swi le rivaleni leswaku Yehovha a a ri ni swivangelo leswi twalaka swo veka vanhu ehansi ka vuhava. Kambe, xana sweswo swi vula leswaku Yehovha hi yena a vangaka vuhava ni ku xaniseka leswi hi karhataka namuntlha? Anakanya hi muavanyisi loyi a gwevaka xigevenga hi ndlela leyi faneleke. Xigevenga lexi xi nga ha xaniseka swinene loko xi ri karhi xi tirhela xigwevo xa xona, kambe xana swi nga va swi fanerile loko xi sola muavanyisi xi vula leswaku hi yena a vangeke ku xaniseka ka xona? Nikatsongo! Ku tlula kwalaho, Yehovha a hi yena a vangaka vuhomboloki. Yakobo 1:13 yi ri: “Xikwembu xi nga ka xi nga ringiwi hi swilo swo biha naswona xona a xi ringi munhu.” Nakambe a hi tsundzukeni leswaku Yehovha u humese xigwevo lexi “exisekelweni xa ntshembo.” Hi rirhandzu u endle malunghiselelo ya leswaku vatukulu lava tshembekaka va Adamu na Evha va vona ku herisiwa ka vuhava naswona va tsakela “ntshunxeko lowu vangamaka wa vana va Xikwembu.” Vanhu lava tshembekaka a va nge he boheki nikan’we ku karhateka hi leswaku ntumbuluko hinkwawo wu nga ha tlhela wu wela exiyin’weni lexi vavisaka xa vuhava. Ndlela yo lulama leyi Yehovha a nga ta tamela timhaka ha yona yi ta tiyisekisa hi ku helela leswaku vuhosi bya yena byi fanerile hakunene.—Esaya 25:8.
17. Loko hi pfuxeta swilo leswi vangaka ku xaniseka emisaveni namuntlha, xana swi fanele swi hi khumba njhani?
17 Loko hi ri karhi hi kambisisa swivangelo leswi swa ku xaniseka ka vanhu, xana hi vona ku ri ni xivangelo xo sola Yehovha hikwalaho ka vuhomboloki kumbe xo heleriwa hi ntshembo eka yena? Ku hambana ni sweswo, nkambisiso wolowo wu hi nyika xivangelo xo pfumelelana ni marito lawa ya Muxe: “Ribye, ntirho wakwe wu hetisekile, hikuva tindlela takwe hinkwato i vululami. Xikwembu xa vutshembeki, lexi nga riki na vuhomboloki; xi ni vululami naswona xi hava xisandzu.” (Deteronoma 32:4) Nkarhi na nkarhi loko hi anakanyisisa hi timhaka leti, a hi antswiseni ndlela leyi hi ti twisisaka ha yona. Hi ndlela yoleyo, loko hi langutane ni miringo hi ta lwisana ni matshalatshala ya Sathana yo byala ku kanakana emianakanyweni ya hina. Kambe, ku vuriwa yini hi goza ra vumbirhi leri boxiweke eku sunguleni? I yini lexi katsekaka eku tshembeni ka Yehovha?
Leswi Ku Tshemba Yehovha Swi Vulaka Swona
18, 19. Bibele yi tirhisa marito wahi leswaku yi hi khutaza ku tshemba Yehovha, kambe emhakeni yoleyo, xana van’wana va ni mavonelo wahi lama hoxeke?
18 Rito ra Xikwembu ra hi khutaza: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” (Swivuriso 3:5, 6) Marito wolawo ma tsakisa naswona ma tiyisa nhlana. Entiyisweni evuakweni hinkwabyo a nga kona munhu la tshembekaka hi ku hetiseka ku fana ni Tata wa hina la rhandzekaka wa le tilweni. Nilokoswiritano, hambileswi swi olovaka ku hlaya marito wolawo ya Swivuriso, swi nga ha tika ku ma tirhisa evuton’wini.
19 Vo tala va ni mavonelo lama hoxeke malunghana ni leswi ku tshemba Yehovha swi vulaka swona. Van’wana va anakanya leswaku ku tshemba koloko i ku tekeka. Van’wana swi tikomba onge va pfumela leswaku ku tshemba Xikwembu swi vula ku langutela leswaku xi hi sirhelela eka ku nonon’hweriwa hinkwako, xi hi tlhantlhela swiphiqo swa hina hinkwaswo, xi hi phula emiringweni hi ndlela leyi hi lavaka ha yona—xikan’we-kan’we! Kambe mavonelo yo tano a ma sekeriwanga helo. Ku tshemba a ko va ku tekeka ntsena, naswona a hi norho. Eka vanhu lavakulu, ku tshemba swi katsa ku tiendlela swiboho leswi twalaka.
20, 21. I yini lexi katsekaka eku tshembeni ka Yehovha? Kombisa.
20 Nakambe xiya leswi Swivuriso 3:5 yi swi vulaka. Xi kombisa ku hambana exikarhi ka ku tshemba Yehovha ni ku titshega hi ku twisisa ka hina, xi kombisa leswaku a hi nge swi koti ku swi endla haswimbirhi. Xana sweswo swi vula leswaku a hi pfumeleriwanga ku tirhisa matimba ya hina yo twisisa? E-e, hikuva Yehovha loyi a hi nyikeke matimba wolawo, u langutele leswaku hi ma tirhisa loko hi n’wi tirhela. (Varhoma 12:1) Kambe loko hi endla swiboho hi fanele hi titshega hi yini? Loko mianakanyo ya hina yi tsandzeka ku twanana ni ya Yehovha, xana hi amukela vutlhari bya yena—lebyi tlakukeke swinene eka bya hina? (Esaya 55:8, 9) Ku tshemba Yehovha swi vula ku pfumelela ku kongomisiwa hi mianakanyo ya yena.
21 Hi xikombiso: Anakanya hi n’wana lontsongo la tshameke exitulwini xa le ndzhaku emovheni, vatswari va yena va tshame emahlweni. Tata wa yena u le ku chayeleni. Loko ku va ni swiphiqo endleleni—va nga tiyiseki hi ndlela leyi va faneleke va yi teka kumbe ku va ni xiphiqo xa maxelo kumbe xa xiyimo xa pato—xana n’wana la yingisaka a tlhela a tshemba vatswari va yena u endlisa ku yini? Xana u huwelela tata wa yena a n’wi byela ndlela leyi a faneleke a chayela ha yona? Xana a nga swi tshembi swiboho swa vatswari va yena kumbe u lwisana na vona loko va n’wi byela leswaku a tshamiseka exitulwini? Doo, wa va tshemba vatswari va yena leswaku va ta ti tamela kahle timhaka to tano, hambileswi va nga hetisekangiki. Yehovha i Tata wa hina la hetisekeke. Xana a hi fanelanga hi n’wi tshemba hi ku hetiseka, ngopfu-ngopfu loko hi langutane ni swiyimo swo nonon’hwa?—Esaya 30:21.
22, 23. (a) Ha yini hi fanele hi tshemba Yehovha loko hi langutane ni swiphiqo, naswona hi nga swi endlisa ku yini sweswo? (b) Ku ta buriwa hi yini exihlokweni lexi landzelaka?
22 Hambiswiritano, Swivuriso 3:6 yi kombisa leswaku hi fanele hi ‘tivisa Yehovha tindlela ta hina hinkwato,’ ku nga ri loko hi langutane ni swiyimo swo tika ntsena. Kutani swiboho leswi hi swi endlaka siku na siku swi fanele swi kombisa leswaku hi tshemba Yehovha. Loko ku va ni swiphiqo, a hi fanelanga hi va ni gome, hi chava, kumbe hi lwisana ni nkongomiso wa Yehovha malunghana ni ndlela leyinene ngopfu yo tamela timhaka. Loko hi weriwa hi miringo hi fanele hi yi teka tanihi nkarhi wo kombisa ku seketela ka hina vuhosi bya Yehovha, hi pfuneta eku kombiseni ka leswaku Sathana i muhembi, hi tlhela hi yingisa ni ku va ni timfanelo tin’wana leti tsakisaka Yehovha.—Vaheveru 5:7, 8.
23 Hi nga kombisa leswaku hi tshemba Yehovha ku nga khathariseki leswaku hi xungetiwa hi swihinga swihi. Sweswo hi swi endla eswikhongelweni swa hina ni le ka ndlela leyi hi tshembaka vukongomisi bya Rito ra Yehovha ni nhlengeletano ya yena ha yona. Kambe, kahle-kahle hi nga swi kombisa njhani leswaku ha n’wi tshemba Yehovha loko hi langutane ni swiphiqo leswi vaka kona emisaveni namuntlha? Xihloko xa hina lexi landzelaka xi ta vulavula hi mhaka yoleyo.
A Wu Ta Hlamurisa Ku Yini?
• Xana Davhida u swi kombise njhani leswaku u endle Yehovha ntshembo wa yena?
• Hi swihi swilo swinharhu leswi vangelaka vanhu ku xaniseka namuntlha, naswona ha yini swi ri swinene ku swi pfuxeta nkarhi na nkarhi?
• Yehovha u va gweve njhani vanhu, naswona ha yini xigwevo xexo xi fanerile?
• I yini leswi katsekaka eku tshembeni ka Yehovha?
[Swivutiso Swa Dyondzo]
[Swifaniso leswi nga eka tluka 8]
Davhida u endle Yehovha a va ntshembo wa yena
[Xifaniso lexi nga eka tluka 10]
Yesu u kombise leswaku Yehovha a hi yena a nga vanga ku wa ka xihondzo xo karhi eYerusalema