Tshemba Yehovha Hi Ku Helela eMinkarhini Ya Maxangu
Tshemba Yehovha Hi Ku Helela eMinkarhini Ya Maxangu
“Xikwembu i vutumbelo ni ntamu wa hina, mpfuno lowu kumekaka hi ku hatlisa hi nkarhi wa maxangu.”—PISALEMA 46:1.
1, 2. (a) Hi xihi xikombiso lexi kombisaka leswaku a swi enelanga ku vula leswaku hi tshemba Xikwembu? (b) Ha yini hi nga fanelanga hi vula ntsena leswaku hi tshemba Yehovha swi helela kwalaho?
SWA olova ku vula leswaku hi tshemba Xikwembu. Kambe swa tika ku swi kombisa hi swiendlo swa hina. Hi xikombiso, xiga lexi nge “Hi Tshemba Xikwembu” se xi ni malembe yo tala xi humelela emalini ya phepha ni ya nsimbi ya le United States. * Hi 1956, Palamendhe ya le United States yi humese nawu lowu a wu vula leswaku xiga xolexo i xihlambanyo xa tiko ra le United States. Lexi hlamarisaka, vanhu vo tala—ku nga ri va le tikweni rero ntsena kambe emisaveni hinkwayo—va tshemba mali ni swilo leswi vonakaka ku tlula Xikwembu.—Luka 12:16-21.
2 Tanihi Vakreste va ntiyiso, a hi fanelanga hi vula ntsena leswaku hi tshemba Yehovha. Leswi “ripfumelo leri nga riki na mintirho ri [feke],” ni ku vula leswaku hi tshemba Xikwembu a swi pfuni nchumu handle ka loko hi swi seketela hi swiendlo. (Yakobo 2:26) Exihlokweni lexi hundzeke, hi dyondze leswaku loko hi tshemba Yehovha hi ta swi kombisa hi ku ya eka yena hi xikhongelo, hi lava nkongomiso wakwe eRitweni ra yena ni le nhlengeletanweni ya yena. Sweswi a hi kambisiseni ndlela leyi hi nga ma tekaka ha yona magoza wolawo manharhu eminkarhini ya maxangu.
Loko U Heleriwa Hi Ntirho Kumbe U Kuma Muholo Wutsongo
3. Hi swihi swiphiqo swa ikhonomi leswi malandza ya Yehovha ma langutanaka na swona ‘eminkarhini leyi ya mangava,’ naswona hi swi tivisa ku yini leswaku Xikwembu xi tiyimiserile ku hi pfuna?
3 ‘Eminkarhini leyi ya mangava,’ hina tanihi Vakreste hi va ni swiphiqo swa ikhonomi ku fana ni van’wana. (2 Timotiya 3:1) Hikwalaho, hi xitshuketa hi nga ha tikuma hi heleriwe hi ntirho. Kumbe hi nga ha boheka ku tirha tiawara to tala kambe hi hola mali yitsongo. Loko hi ri ehansi ka swiyimo swo tano, swi nga ha hi tikela ‘ku wundla lava nga va ka hina.’ (1 Timotiya 5:8) Xana Xikwembu Lexi nge Henhla-henhla xi tiyimiserile ku hi pfuna eminkarhini yo tano? Xi tiyimiserile hakunene! Ina, Yehovha a nga hi sirheleli eka maxangu hinkwawo ya vutomi ya mafambiselo lawa ya swilo. Hambiswiritano, loko hi n’wi tshemba, marito ya Pisalema 46:1 ma ta hetiseka eka hina: “Xikwembu i vutumbelo ni ntamu wa hina, mpfuno lowu kumekaka hi ku hatlisa hi nkarhi wa maxangu.” Kambe hi nga swi kombisa njhani leswaku hi tshemba Yehovha hi ku helela loko hi ri ni swiphiqo swa timali?
4. Loko hi ri ni swiphiqo swa timali, i yini lexi hi nga xi khongelelaka, naswona Yehovha u swi teka njhani swikhongelo swo tano?
4 Ndlela yin’wana leyi hi nga kombisaka ha yona leswaku hi tshemba Yehovha i ku khongela eka yena. Kambe xana hi nga khongelela yini? Loko hi langutane ni swiphiqo swa timali, hi nga ha lava vutlhari lebyi pfunaka ku tlula rini na rini. Kutani, byi khongelele hilaha u nga kotaka hakona! Rito ra Yehovha ra hi tiyisekisa: “Loko mani na mani eka n’wina a kayivela vutlhari, a a hambete a kombela eka Xikwembu, hikuva xi nyika hinkwavo hi mbilu yo basa, handle ka ku sandza; kutani u ta nyikiwa byona.” (Yakobo 1:5) Ina, kombela vutlhari eka Yehovha—vuswikoti byo tirhisa vutivi ni ku twisisa hi ndlela leyinene—leswaku u ta endla swiboho leswi twalaka ni ku hlawula swilo leswinene. Tata wa hina wa rirhandzu wa le tilweni wa hi tiyisekisa leswaku u ta swi yingisa swikhongelo swo tano. U tshama a tiyimiserile ku lulamisa tindlela ta lava va n’wi tshembaka hi timbilu ta vona hinkwato.—Pisalema 65:2; Swivuriso 3:5, 6.
5, 6. (a) Ha yini hi fanele hi lava mpfuno eRitweni ra Xikwembu leswaku hi langutana ni swiphiqo swa timali? (b) Hi nga ha endla yini leswaku hi hunguta ku karhateka loko hi heleriwa hi ntirho?
5 Ku lava nkongomiso eRitweni ra Xikwembu i ndlela yin’wana yo kombisa leswaku ha n’wi tshemba Yehovha. Switsundzuxo swa yena swa vutlhari leswi kumekaka eBibeleni swi tikombe swi “tshembeka swinene.” (Pisalema 93:5) Hambileswi buku yoleyo leyi huhuteriweke yi hetiweke emalembeni yo tlula 1 900 lama hundzeke, yi ni xitsundzuxo lexi tshembekaka ni vutlhari lebyikulu lebyi nga hi pfunaka ku langutana kahle ni swiphiqo swa timali. Xiya swikombiso swin’wana swa vutlhari bya le Bibeleni.
6 Hosi Solomoni wo tlhariha u tshame a vula marito lawa: “Bya nandziha vurhongo bya loyi a tirhelaka un’wana, ku nga khathariseki leswaku u dya leswitsongo kumbe swo tala; kambe swo tala swa loyi a fuweke a swi n’wi pfumeleli leswaku a etlela.” (Eklesiasta 5:12) Swi lava nkarhi ni mali ku lunghisa, ku basisa, ku hlayisa ni ku sirhelela swilo swa hina leswi vonakaka. Kutani loko hi heleriwa hi ntirho, hi nga ha tirhisa nkarhi wolowo hi anakanyisisa hi ndlela leyi hi hanyaka ha yona, hi ringeta ku vona swilo leswi nga swa nkoka ni leswi nga riki swa nkoka. Leswaku hi hunguta ku karhateka, ku nga ha va vutlhari ku endla ku cinca ko karhi. Hi xikombiso, xana hi nga olovisa vutomi bya hina, kumbexana hi rhurhela endlwini leyitsongo kumbe hi hunguta swilo leswi vonakaka leswi nga riki swa nkoka?—Matewu 6:22.
7, 8. (a) Xana Yesu u swi kombise njhani leswaku wa swi tiva leswaku vanhu lava nga hetisekangiki va ni mboyamelo wa ku vilela ku tlula mpimo hi swilo leswi vonakaka? (Vona nhlamuselo ya le hansi.) (b) Yesu u nyikele xitsundzuxo xihi xa vutlhari malunghana ni ku papalata ku vilela ku tlula mpimo?
7 EDyondzweni ya le Ntshaveni, Yesu u tsundzuxile a ku: “Tshikani ku vilela hi mimoya-xiviri ya n’wina malunghana ni leswi mi nga ta swi dya kumbe leswi mi nga ta swi nwa, kumbe ku vilela hi mimiri ya n’wina hi leswi mi nga ta swi ambala.” * (Matewu 6:25) Yesu a a swi tiva leswaku hi ntumbuluko vanhu lava nga hetisekangiki va karhateka malunghana ni leswaku va ta swi kuma njhani swilo leswi nga swa nkoka evuton’wini. Kambe, hi nga swi ‘tshikisa ku yini ku vilela’ hi swilo sweswo? Yesu u te: “Hambetani mi lava mfumo . . . ku sungula.” Ku nga khathariseki leswaku hi hlangavetana ni swiphiqo swihi, hi fanele hi hambeta hi rhangisa vugandzeri bya Yehovha emahlweni. Loko hi endla tano, hi ta “engeteleriwa” swilaveko hinkwaswo swa siku hi Tata wa hina wa le tilweni. U ta tirhisa tindlela to karhi leswaku a hi nyika leswi hi swi pfumalaka.—Matewu 6:33.
8 Yesu u nyikele xitsundzuxo xin’wana a ku: “Mi nga tshuki mi vilela hi siku leri tlhandlamaka, hikuva siku leri tlhandlamaka ri ta va ni mivilelo ya rona.” (Matewu 6:34) A hi vutlhari ku vilela ku tlula mpimo hi leswi siku ra mundzuku ri nga hi tiselaka swona. Xidyondzi xin’wana xi te: “Ku chava swilo swa nkarhi lowu taka i vuhava.” Loko hi ku titsongahata hi yingisa xitsundzuxo xa Bibele xo anakanyisisa hi swilo swa nkoka ni ku eneriseka hi swilo swa siku rero, sweswo swi nga hi pfuna leswaku hi papalata ku vilela ku tlula mpimo.—1 Petro 5:6, 7.
9. Loko hi ri ni swiphiqo swa timali, hi wihi mpfuno lowu hi nga wu kumaka eminkandziyisweni ya “hlonga ro tshembeka ni ro tlhariha”?
9 Loko hi ri ni swiphiqo swa timali, hi nga tlhela hi kombisa leswaku hi tshemba Yehovha hi ku hlaya minkandziyiso ya “hlonga ro tshembeka ni ro tlhariha” leswaku hi kuma mpfuno. (Matewu 24:45) Nkarhi na nkarhi, magazini wa Xalamuka! wu ni swihloko leswi nga ni switsundzuxo ni swiringanyeto swa leswaku u nga langutana njhani ni swiphiqo swa ikhonomi. Xihloko lexi nge “Ku Heleriwa Hi Ntirho—Hi Yihi Mintlhantlho Ya Kona?” lexi nga enkandziyisweni wa August 8, 1991 (wa Xinghezi), xi vulavule hi switsundzuxo swa nhungu leswi pfuneke vanhu vo tala leswaku va nga karhateki ngopfu hi tlhelo ra timali swin’we ni le mintlhavekweni loko va nga ha tirhi. * Ina, switsundzuxo swoleswo swi fanele swi fambisana ni langutelo leri faneleke hi nkoka wa xiviri wa mali. Langutelo rolero ri hlamuseriwe exihlokweni lexi nge “Nchumu Wa Nkoka Swinene Ku Tlula Mali,” lexi a xi kumeka enkandziyisweni lowu fanaka.—Eklesiasta 7:12.
Loko U Tshikileriwe Hi Swiphiqo Swa Rihanyo
10. Xikombiso xa Hosi Davhida xi swi kombisa njhani leswaku swa twala ku tshemba Yehovha loko hi hlaseriwe hi vuvabyi lebyikulu?
10 Xana swa twala ku tshemba Yehovha loko u hlaseriwe hi vuvabyi lebyikulu? Hakunene swa twala! Yehovha wa va twela vanhu va yena lava vabyaka. Ku tlula kwalaho, u tiyimisele ku va pfuna. Hi xikombiso, anakanya hi Hosi Davhida. Kumbexana na yena a a vabya swinene loko a tsala malunghana ni ndlela leyi Xikwembu xi n’wi khomaka ha yona munhu la lulameke loko a vabya. U te: “Yehovha u ta n’wi seketela ehenhla ka mubedo wa vuvabyi; kunene sangu ra yena u ta ri cinca hi nkarhi wa ku vabya.” (Pisalema 41:1, 3, 7, 8) Davhida u hambete a tshemba Xikwembu hilaha ku tiyeke naswona eku heteleleni hosi leyi yi hlakarherile eka vuvabyi bya yona. Kambe, hi nga swi kombisa njhani leswaku hi tshemba Xikwembu loko hi tshikileriwe hi swiphiqo swa rihanyo?
11. Loko hi hlaseriwe hi vuvabyi, hi nga ha kombela yini eka Tata wa hina wa le tilweni?
11 Loko hi hlaseriwe hi vuvabyi, ndlela yin’wana yo kombisa leswaku hi tshemba Yehovha i ku n’wi kombela hi xikhongelo leswaku a hi pfuna hi tiyisela. Hi nga ha n’wi kombela leswaku a hi pfuna hi tirhisa “vutlhari lebyi pfunaka” leswaku hi hanya hi ku ya hi swiyimo swa hina. (Swivuriso 3:21) Hi nga ha tlhela hi n’wi kombela leswaku a hi pfuna hi lehisa mbilu hi tlhela hi tiyisela leswaku hi ta langutana ni vuvabyi lebyi. Ku tlula kwalaho, hi nga ha kombela leswaku Yehovha a hi tiyisa, a hi nyika matimba yo tshama hi tshembekile eka yena naswona hi tshama hi ri ni langutelo lerinene, ku nga khathariseki leswaku ku humelela yini. (Vafilipiya 4:13) Ku hlayisa vutshembeki bya hina eka Xikwembu i swa nkoka swinene ku tlula ku hlayisa vutomi bya hina bya sweswi. Loko hi hlayisa vutshembeki bya hina, Muhakeri Lonkulu u ta hi nyika vutomi ni rihanyo leri nga heriki ni leri hetisekeke.—Vaheveru 11:6.
12. I misinya yihi ya milawu ya le Matsalweni leyi nga hi pfunaka leswaku hi endla swiboho swa vutlhari loko swi ta emhakeni ya vutshunguri?
12 Ku tshemba Yehovha swi ta tlhela swi hi susumetela ku hlaya Rito ra yena, Bibele, leswaku hi kuma nkongomiso lowu pfunaka. Misinya ya milawu leyi kumekaka eMatsalweni yi nga hi pfuna leswaku hi endla swiboho swa vutlhari loko swi ta emhakeni ya swa vutshunguri. Hi xikombiso, leswi hi swi tivaka leswaku Bibele yi sola “xiendlo xa vungoma,” hi ta papalata tindlela leti fambisanaka ni vungoma to kambela mavabyi kumbe ta vutshunguri. (Vagalatiya 5:19-21; Deteronoma 18:10-12) Hi lexi xikombiso xin’wana xa vutlhari lebyi tshembekaka bya le Bibeleni: “Un’wana ni un’wana la nga riki na ntokoto u pfumela rito rin’wana ni rin’wana, kambe lowo tlhariha u xiyisisa magoza yakwe.” (Swivuriso 14:15) Hikwalaho, loko hi anakanya hi vutshunguri, hi ta va hi tlharihile loko hi lava rungula leri tshembekaka ematshan’weni yo “pfumela rito rin’wana ni rin’wana.” “Mianakanyo [yoleyo] yo hluteka” yi nga hi pfuna leswaku hi anakanyisisa hi vukheta kutani hi endla xiboho lexi twalaka.—Tito 2:12.
13, 14. (a) Hi swihi swihloko leswi pfunaka leswi vulavulaka hi timhaka ta rihanyo leswi kandziyisiweke eka timagazini ta Xihondzo xo Rindza ni Xalamuka!? (Vona bokisi eka tluka 17.) (b) I xitsundzuxo xihi lexi vulavulaka hi ku langutana ni vuvabyi lebyi nga tshungulekiki lexi kandziyisiweke eka Xalamuka! ya February 8, 2001?
13 Hi nga ha tlhela hi kombisa leswaku hi tshemba Yehovha hi ku kambisisa leswi vuriwaka hi minkandziyiso ya hlonga ro tshembeka. Minkarhi yin’wana timagazini ta Xihondzo xo Rindza ni Xalamuka! ti va ni swihloko leswi vulavulaka hi swiphiqo swo karhi swa rihanyo ni mavabyi. * Minkarhi yin’wana, timagazini leti ti humese swihloko leswi vulavulaka hi vanhu lava koteke ku langutana ni vuvabyi byo hambana-hambana ni ku lamala ko karhi. Ku engetela kwalaho, swihloko swin’wana swi nyikele swiringanyeto swa le Matsalweni swin’we ni ndzayo leyi pfunaka malunghana ni ndlela yo hanya ni mavabyi lama nga tshungulekiki.
14 Hi xikombiso, nkandziyiso wa Xalamuka! wa February 8, 2001, a wu ri na swihloko leswi tlhandlamanaka swa nhloko-mhaka leyi nga exifunengetweni leyi nge “Nchavelelo Eka Lava Vabyaka.” Swihloko leswi swi nyikele misinya ya milawu ya Bibele leyi pfunaka swin’we ni rungula leri kumiweke loko ku buriwa ni vanhu lava se va nga ni malembe yo tala va hanya ni vuvabyi lebyi nga tshungulekiki. Xihloko lexi nge “Ku Hanya Ni Vuvabyi Bya Wena Hilaha Ku Humelelaka—Njhani?” xi nyikele xitsundzuxo lexi landzelaka: Dyondza swo tala hilaha u nga kotaka hakona malunghana ni vuvabyi bya wena. (Swivuriso 24:5) Tivekele tipakani leti fikelelekaka, ku katsa ni tipakani to pfuna van’wana, kambe u fanele u swi twisisa leswaku u nge swi koti ku fikelela tipakani leti fikeleriwaka hi van’wana. (Mintirho 20:35; Vagalatiya 6:4) U nga tihambanisi ni vanhu van’wana. (Swivuriso 18:1) Endla leswaku vanhu va swi tsakela ku ku endzela. (Swivuriso 17:22) Ku tlula kwalaho, vana ni vuxaka lebyikulu na Yehovha ni vandlha. (Nahume 1:7; Varhoma 1:11, 12) Xana a hi wu tlangeli nkongomiso lowu tshembekaka lowu Yehovha a wu nyikelaka hi nhlengeletano ya yena?
Loko Ku Tsana Ka Nyama Ku Phikelela
15. Muapostola Pawulo u swi kotise ku yini ku hlula enyimpini yo lwisana ni nyama ya yena leyi tsaneke, naswona i xitiyisekiso xihi lexi hi nga vaka na xona?
15 Muapostola Pawulo u tsarile: “Enyameni ya mina, a ku tshami nchumu lexinene.” (Varhoma 7:18) Pawulo a a swi tiva kahle leswaku swi nga tika njhani ku lwisana ni ku navela ni ku tsana ka nyama leyi nga hetisekangiki. Hambiswiritano, Pawulo a a tlhela a tiyiseka leswaku a a ta hlula. (1 Vakorinto 9:26, 27) Njhani? Hi ku tshemba Yehovha hi ku helela. Hi yona mhaka leyi Pawulo a nga te: “Mina munhu wa maxangu! I mani loyi a nga ta ndzi ponisa eka miri lowu weriwaka hi rifu leri? Ndzi nkhensa Xikwembu ha Yesu Kreste Hosi ya hina!” (Varhoma 7:24, 25) Ku vuriwa yini hi hina? Na hina hi lwisana ni nyama leyi tsaneke. Loko hi ri karhi hi lwisana ni ku tsana loku, swa olova ku heleriwa hi ntshembo, hi khorwiseka leswaku a hi nge hluli. Kambe Yehovha u ta hi pfuna loko, ku fana na Pawulo, hi titshega swinene ha Yena hi nga tshembi matimba ya hina.
16. Loko ku tsana ka nyama ku phikelela, hi fanele hi khongelela yini, naswona hi fanele hi endla yini loko hi tikuma hi tlhelele exiyin’weni xo sungula xa ku tsana ka nyama?
16 Loko ku tsana ka nyama ku phikelela, hi nga kombisa leswaku hi tshemba Yehovha hi ku n’wi kombela hi xikhongelo. Hi fanele hi kombela Yehovha leswaku a hi pfuna hi moya wa yena lowo kwetsima. (Luka 11:9-13) Hi nga ha kombela leswaku a hi pfuna hi tikhoma, ku nga wun’wana wa mihandzu ya moya wa Xikwembu. (Vagalatiya 5:22, 23) Hi fanele hi endla yini loko hi tshuka hi tlhelele exiyin’weni xo sungula xa ku tsana ka nyama? A hi fanelanga hi lan’wa nikatsongo. A hi fanelanga hi karhala ku khongela hi ku titsongahata eka Xikwembu xa hina xa tintswalo, hi kombela leswaku xi hi rivalela xi tlhela xi hi pfuna. Yehovha a nge yi fularheli mbilu leyi “tshovekeke yi tlhela yi pfotloseka” hileswi yi titwaka yi ri ni xidyoho. (Pisalema 51:17) Loko hi n’wi kombela hi mbilu hinkwayo leyi tisolaka, Yehovha u ta hi pfuna leswaku hi lwisana ni miringo.—Vafilipiya 4:6, 7.
17. (a) Ha yini swi pfuna ku anakanyisisa hi ndlela leyi Yehovha a titwaka ha yona hi ku tsana ko karhi loku hi nga ha vaka hi lwisana na kona? (b) Hi wahi matsalwa lawa hi nga ha ma nhlokohataka loko hi ringeta ku lawula ximbilwambilwana? ku lawula ririmi ra hina? ku lwisana ni mboyamelo wo rhandza vuhungasi lebyi thyakeke?
17 Hi nga tlhela hi kombisa leswaku hi tshemba Yehovha hi ku lava mpfuno eRitweni ra yena. Hi ku tirhisa xikombo xa marito lama nga eBibeleni kumbe Watch Tower Publications Index, hi nga lava nhlamulo ya xivutiso lexi nge, ‘Xana Yehovha u titwa njhani hi ku tsana loku ndzi lwisanaka na kona?’ Loko hi anakanyisisa hi ndlela leyi Yehovha a titwaka ha yona hi mhaka yoleyo swi nga kurisa ku navela ka hina ku n’wi tsakisa. Xisweswo hi nga ha sungula ku titwa hi ndlela leyi a titwaka ha yona, hi venga leswi a swi vengaka. (Pisalema 97:10) Van’wana swi va pfunile ku nhlokohata tindzimana ta Bibele leti vulavulaka hi ku tsana loku va lwisanaka na kona. Xana hi le ku lweni hi matimba leswaku hi lawula ximbilwambilwana? Kutani hi nga ha nhlokohata tindzimana to tanihi Swivuriso 14:17 na Vaefesa 4:31. Xana swa hi tikela ku lawula ririmi ra hina? Hi nga ha nhlokohata tindzimana to tanihi Swivuriso 12:18 na Vaefesa 4:29. Xana hi rhandza vuhungasi lebyi thyakeke? Hi nga ha ringeta ku tsundzuka tindzimana to tanihi Vaefesa 5:3 na Vakolosa 3:5.
18. Ha yini hi nga fanelanga hi pfumelela ku khomiwa hi tingana ku hi sivela ku kombela mpfuno eka vakulu leswaku hi hlula ku tsana ka hina?
18 Ndlela yin’wana yo kombisa ku titshega ka hina hi Yehovha i ku lava mpfuno eka vakulu lava vekiweke hi moya evandlheni. (Mintirho 20:28) Phela, “tinyiko leti nga vanhu” i lunghiselelo leri humaka eka Yehovha ha Kreste ro sirhelela ni ku khathalela tinyimpfu ta yena. (Vaefesa 4:7, 8, 11-14) Ina, swi nga ha tika ku kombela mpfuno wo lwisana ni ku tsana ko karhi. Hi nga ha khomiwa hi tingana, hi chava leswaku vakulu va ta hi langutela ehansi. Kambe a swi kanakanisi leswaku vavanuna lava va wupfeke hi tlhelo ra moya va ta hi xixima hileswi hi veke ni xivindzi xo kombela mpfuno. Ku tlula kwalaho, vakulu va tikarhatela ku kombisa timfanelo ta Yehovha loko va tirhisana ni ntlhambi. Ndzayo ya vona leyi chavelelaka ni leyi pfunaka swin’we ni vukongomisi lebyi humaka eRitweni ra Xikwembu ku nga ha va leswi hi swi lavaka leswaku hi tiyimisela swinene ku hlula ku tsana ka hina.—Yakobo 5:14-16.
19. (a) Sathana u swi tirhisa njhani swilo leswi nga pfuniki nchumu evuton’wini emafambiselweni lawa? (b) Ku tshemba swi katsa yini, naswona hi fanele hi tiyimisela swinene ku endla yini?
19 U nga rivali leswaku Sathana wa swi tiva leswaku nkarhi wa yena wu komile. (Nhlavutelo 12:12) U lava ku tirhisa swilo swa misava leyi leswi nga pfuniki nchumu evuton’wini leswaku a hi heta matimba leswaku hi lan’wa. Onge hi nga ma tshemba hi ku hetiseka marito lama vuriweke eka Varhoma 8:35-39: “I mani loyi a nga ta hi hambanisa ni rirhandzu ra Kreste? Xana ku ta va nhlomulo kumbe maxangu kumbe nxaniso kumbe ndlala kumbe vusweti kumbe khombo kumbe banga? . . . Ku hambana ni sweswo, eka swilo leswi hinkwaswo, hi hlula hi ku helela hikwalaho ka loyi a hi rhandzeke. Hikuva ndza kholwa leswaku rifu ni vutomi ni tintsumi ni tihulumendhe ni swilo leswi nga laha sweswi ni swilo leswi taka ni vaungameri ni vutlakuki ni vuenti ni xivumbiwa xihi ni xihi xin’wana a swi nge swi koti ku hi hambanisa ni rirhandzu ra Xikwembu leri nga eka Kreste Yesu Hosi ya hina.” Wa nga vona marito lama kombisaka ku tshemba Yehovha! Hambiswiritano, ku va ni ntshembo wo tano a hi ku tekeka. Ku ri na sweswo, i ntshembo lowu katsaka swiboho leswi hi anakanyisiseke ha swona leswi hi swi endlaka siku na siku. Kutani, a hi tiyimiseleni swinene ku tshemba Yehovha hi ku helela eminkarhini ya maxangu.
[Tinhlamuselo ta le hansi]
^ par. 1 Eka papila leri yaka eVumakini bya Mali ya Nsimbi le United States, leri a ri tsariwe hi November 20, 1861, Matsalana wa Vuhlayiselo bya Xuma, Salmon P. Chase u tsarile: “A ri kona tiko leri nga vaka ni matimba loko ri nga tiyisiwi hi Xikwembu, kumbe ri sirheleleka loko xi nga ri lweli. Leswaku vanhu va tiko ra hina va tshemba Xikwembu swi fanele swi kombisiwa eka mali ya nsimbi ya tiko ra hina.” Hikwalaho, xihlambanyo lexi nge “Hi Tshemba Xikwembu” xi humelele ro sungula eka mali ya nsimbi ya le United States hi 1864.
^ par. 7 Ku vilela loku ku vulavuriwaka ha kona laha i “ku hanya hi ku chava, loku endlaka leswaku munhu a nga tsaki evuton’wini.” Vuhundzuluxeri byin’wana byi vula leswaku “mi nga vileli” kumbe “mi nga karhateki.” Kambe vuhundzuluxeri byolebyo byi vula leswaku a hi fanelanga hi sungula ku vilela kumbe ku karhateka. Buku yin’wana ya tinhlamuselo yi ri: “Riendli ra Xigriki ri le ka ndzeriso wa nkarhi wa sweswi, leswi vulaka xileriso xa ku tshika ku endla nchumu lowu ana se u wu endlaka.”
^ par. 9 Tinhla leta nhungu hi leti: (1) U nga pfilunganyeki; (2) vana ni langutelo lerinene; (3) tiyimisele ku amukela ntirho lowuntshwa; (4) hanya hi leswi u nga na swona—u nga tiringanisi ni van’wana; (5) vana ni vukheta loko u xava swilo hi xikweleti; (6) endla leswaku ndyangu wu tshama wu ri ni vun’we; (7) hlayisa xindzhuti xa wena; naswona (8) hlela ndlela leyi u nga ta yi tirhisa ha yona mali leyi u nga na yona.
^ par. 13 Timagazini leti ti sekeriweke eBibeleni a ti bumabumeli kumbe ku seketela vutshunguri byo karhi, hikuva emhakeni leyi munhu u fanele a tiendlela xiboho. Ku ri na sweswo, swihloko leswi vulavulaka hi vuvabyi byo karhi swi tsaleriwe ku tivisa vahlayi hi rungula leri tiviwaka ku fikela enkarhini wolowo.
Wa Tsundzuka Xana?
• Loko hi langutane ni swiphiqo swa ikhonomi, hi nga swi kombisa njhani leswaku hi tshemba Yehovha?
• Hi nga swi kombisa njhani leswaku hi tshemba Xikwembu loko hi tshikileriwe hi swiphiqo swa rihanyo?
• Loko ku tsana ka nyama ku phikelela, hi nga swi kombisa njhani leswaku hakunene hi titshege hi Yehovha?
[Swivutiso Swa Dyondzo]
[Bokisi leri nga eka tluka 17]
Xana Wa Ha Swi Tsundzuka Swihloko Leswi?
Loko hi tshikileriwe hi swiphiqo swa rihanyo, swa khutaza ku hlaya hi timhaka ta vanhu van’wana lava langutaneke hi ndlela leyi humelelaka ni swiphiqo swa rihanyo ni vuvabyi lebyi nga tshungulekiki. Laha hansi ku ni swihloko swin’wana leswi kandziyisiweke eka timagazini ta Xihondzo xo Rindza ni Xalamuka!
“Ku Langutana Ni Ku Tsana Ka Mina” lexi vulavulaka hi ku langutana ni mianakanyo leyi hoxeke ni ntshikilelo.—Xihondzo xo Rindza, May 1, 1990.
“Hambi Ku Ri Hahu Ra Nsimbi A Ri N’wi Sivelanga Ku Chumayela.”—Xalamuka! (ya Xinghezi), January 22, 1993.
“Kulu Ri Hundzule Vutomi Bya Mina” a xi vulavula hi ku langutana ni ku lamala.—Xalamuka!, November 8, 1995.
“A Mi Swi Tivi Leswaku Vutomi Bya N’wina Byi Ta Va Yini Mundzuku” a xi vulavula hi ku langutana ni mpfilungano wa mianakanyo.—Xihondzo xo Rindza, December 1, 2000.
“Loida A Sungula Ku Vulavula” lexi a xi vulavula hi ku langutana ni vuvabyi bya ku oma swirho.—Xalamuka!, May 8, 2000.
“Ku Lwisana Ka Mina Ni Vuvabyi Bya Mbeleko.”—Xalamuka! (ya Xinghezi), July 22, 2000.
“Ku Lwisana Ka Mina Ni Vuvabyi Bya Ku Tsindziyela Ka Nhlonge.”—Xalamuka! (ya Xinghezi), August 8, 2001.
“Ndzi Hlule Ntshikilelo Lowu Vaka Kona Endzhaku Ka Ku Bebula.”—Xalamuka!, August 8, 2002.
[Xifaniso lexi nga eka tluka 15]
Loko hi heleriwe hi ntirho swi nga ha va swinene ku tlhela hi kambisisa vutomi bya hina
[Xifaniso lexi nga eka tluka 16]
Mhaka ya Loida yi kombisa ndlela leyi ku tshemba Yehovha ku pfunaka munhu ha yona leswaku a tiyisela (Vona bokisi eka tluka 17)
[Xifaniso lexi nga eka tluka 18]
A hi fanelanga hi va ni tingana to kombela mpfuno wo hlula ku tsana ka hina