Xana Wa Va Tlangela Vapfumeri-kulorhi Lava Dyuhaleke?

LOKO Vaisrayele va khale va ha namarhele ntwanano lowu Xikwembu xi wu endleke na vona, va nyikiwe xileriso lexi nge: “U fanele u suka u yima emahlweni ka la nga ni timpfu naswona u fanele u komba xichavo eka munhu la kuleke, u fanele u chava Xikwembu xa wena.” (Levhitika 19:32) Kutani ku xixima vadyuhari a ku ri vutihlamuleri byo hlawuleka, lebyi fambisanaka ni ku tiveka ehansi ka Xikwembu. Hambileswi Vakreste namuntlha va nga ha riki ehansi ka Nawu wa Muxe, wu hi tsundzuxa leswaku malandza lama dyuhaleke ya Yehovha i ya nkoka eka yena. (Swivuriso 16:31; Vaheveru 7:18) Xana hi languta vanhu vo tano hilaha Yehovha a va langutaka hakona? Xana ha va tlangela Vakreste-kulorhi lava dyuhaleke?

Munhu Loyi A A Tlangela Nakulobye La Dyuhaleke

Rungula rin’wana ra Bibele leri vulavulaka hi mhaka ya ku kombisa xichavo eka vadyuhari ri kumeka ebukwini ya Tihosi ta Vumbirhi. Yi hlamusela ndlela leyi muprofeta Eliya a tlhandlamiweke ha yona hi muprofeta Elixa loyi a a ha tsakama. Xiya leswi humeleleke hi siku leri Eliya a heteleleke ha rona ku va muprofeta wa mfumo wa tinyimba ta khume wa Israyele.

Hi siku rero, muprofeta loyi a dyuhaleke u lerisiwe hi Yehovha leswaku a suka a Giligala a ya eBethele, ku suka eBethele a ya eYeriko, ivi a suka eYeriko a ya eNambyeni wa Yordani. (2 Tihosi 2:1, 2, 4, 6) Eka riendzo rero ra tikhilomitara ta kwalomu ka 50, Eliya u kombele Elixa kanharhu leswaku a tlhelela endzhaku. Kambe Elixa u arile ku tshika muprofeta la dyuhaleke a famba a ri yexe, ku fana na Rhuti la ha tiyeke, loyi eka madzana ya malembe emahlweni ka kwalaho, a beke ehansi hi nenge a ala ku hambana na Nawomi. (Rhuti 1:16, 17) Elixa u vule kanharhu a ku: “Leswi Yehovha a hanyaka nileswi moya-xiviri wa wena wu hanyaka, a ndzi nge ku siyi.” (2 Tihosi 2:2, 4, 6) Enkarhini wolowo, Elixa ana se a a hete malembe ya kwalomu ka tsevu a ri karhi a pfuna Eliya. Kambe a a navela ku ya emahlweni a tirha na Eliya. Kahle-kahle, rungula leri ri ya emahlweni ri ku: “Kuteloko va ha famba swin’we, va famba va ri karhi va vulavula, waswivo, . . . Eliya a tlhandlukela [ehenhla].” (Ndzimana 11) Eliya na Elixa va vulavurisanile ku fikela enkarhini wo hetelela wa vutirheli bya Eliya eIsrayele. Swi le rivaleni leswaku muprofeta lontsongo a a hisekela ku kuma vuleteri ni xikhutazo lexikulu eka muprofeta la dyuhaleke ni loyi a nga ni ntokoto lowukulu. A swi kanakanisi leswaku a a tlangela munghana wakwe loyi a dyuhaleke.

‘Tanihi Vatatana Na Vamanana’

A swi tiki ku vona xivangelo xa ku va Elixa a rhandze muprofeta la dyuhaleke tanihi munghana —tlhelo tatana wa moya. (2 Tihosi 2:12) Emahlweninyana ko va Eliya a heta xiavelo xa yena xa le Israyele, u byele Elixa a ku: “Kombela leswi ndzi faneleke ndzi ku endlela swona ndzi nga si susiwa eka wena.” (Ndzimana 9) Ku fikela esikwini ro hetelela, Eliya u kombise ku khathala ka yena hi vumoya bya mutlhandlami wakwe ni ku va ntirho wa Xikwembu wu ya emahlweni.

Ni namuntlha swa khutaza swinene ku vona moya lowu fanaka wa ku khathala ka Vakreste-kulorhi lava dyuhaleke, loku va ku kombisaka hi ku avelana vutivi ni vutlhari bya vona ni vamakwerhu lava ha tsakamaka. Hi xikombiso, vamakwerhu lava nga ni malembe va tirha etihofisini ta marhavi ya Timbhoni ta Yehovha va pfuna swirho leswintshwa swa ndyangu wa Bethele leswaku swi kuma ntokoto lowu swi wu lavaka entirhweni wa swona. Hilaha ku fanaka, valanguteri lava famba-fambaka ni vasati va vona lava nga ni malembe yo tala va ri karhi va endzela mavandlha, va avelana ntokoto wa vona lowukulu ni lava va va letelaka leswaku va va valanguteri lava famba-fambaka. Ku tlula kwalaho, emavandlheni ya Timbhoni ta Yehovha emisaveni hinkwayo, ku ni vamakwerhu lava dyuhaleke lava va nga ni makume ya malembe va ri karhi va tirhela Yehovha hi ku tshembeka, lava avelanaka vutlhari ni ntokoto wa vona ni swirho leswintshwa swa vandlha.—Swivuriso 2:7; Vafilipiya 3:17; Tito 2:3-5.

Nkhathalelo lowu humaka embilwini lowu kombisiwaka hi Vakreste lava va dyuhaleke ni lava rhandzekaka, wu hi susumetela ku va kombisa xichavo lexi humaka embilwini. Kutani hi fanele hi tekelela xikombiso xa Elixa xa ku va tlangela swinene vapfumeri-kulorhi lava dyuhaleke. Hilaha muapostola Pawulo a hi tsundzuxaka hakona, a hi hambeteni hi khoma ‘wanuna la kuleke tanihi tata wa hina,’ ni “vaxisati lava kuleke tanihi vamanana.” (1 Timotiya 5:1, 2) Loko hi endla tano, hi ta va hi hoxa xandla swinene leswaku vandlha ra Vukreste emisaveni hinkwayo ri tirha kahle ri tlhela ri endla nhluvuko.

[Xifaniso lexi nga eka tluka 30]

Elixa a a navela ku tirha na Eliya ku fikela emakumu

[Swifaniso leswi nga eka tluka 31]

Lava va ha riki vantshwa va dyondza swo tala eka Vakreste lava dyuhaleke