Nkarhi Wa Ta Lowu Switshembiso Swi Nga Ta Hetiseka

EMATIN’WINI ku ve ni switshembiso swo tala leswi nga hetisisiwangiki. Matiko ma tsandzeke ku hlayisa swihlambanyo swa wona swa ku veka matlhari ehansi, xisweswo ma lerisa vanhu va wona leswaku va ya enyimpini. Napoleon u tshame a ku: “Tihulumendhe ti hlayisa switshembiso swa tona ntsena loko ti sindzisiwa ku endla tano kumbe loko ku ta vuyeriwa tona.”

Ku vuriwa yini hi switshembiso leswi endliweke hi vanhu? Hakunene swi heta matimba loko munhu a nga ma hetisisi marito ya yena! Ngopfu-ngopfu swi tano loko ku ri munhu loyi u n’wi tivaka naswona u n’wi tshemba. Ina, vanhu va nga ha va va tsandzeka kumbe va nga swi lavi ku hetisisisa switshembiso swa vona.

Hakunene ku ni ku hambana lokukulu exikarhi ka switshembiso swa vanhu ni swa Xikwembu! Switshembiso swa Xikwembu swa tshembeka. Switshembiso hinkwaswo leswi endliwaka hi Yehovha Xikwembu swi tiyile. Swi ta hetiseka hakunene. Loko yi vulavula hi rito ra Xikwembu leri tshembekaka Esaya 55:11 yi ri: “Hikwalaho ni rito ra mina leri humaka enon’wini wa mina ri ta endlisa sweswo. A ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.”

Kutani, xana hi fanele hi swi languta njhani switshembiso swa Xikwembu leswi tsariweke eBibeleni? Hakunene hi nga tshembela eka swona. Hi xikombiso, muapostola Yohane u tsarile: “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:3, 4) U nga yi kuma mikateko yo tano loko u hanya hi ku pfumelelana ni marito ya Yesu lama nge: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.