Swivutiso Swa Vahlayi

Xana xiga lexi nge u ni ‘vutomi eka yena n’wini’ xi vula yini?

Bibele yi vulavula hi Yesu Kreste tanihi loyi a nga ni ‘vutomi eka yena n’wini’ kasi loko yi vulavula hi vadyondzisiwa va yena yi ri va ni ‘vutomi eka vona vini.’ (Yohane 5:26; 6:53, ringanisa Bibele Ya Xitsonga) Hambiswiritano, matsalwa lawa mambirhi a ma na nhlamuselo leyi fanaka.

Yesu u te: ‘Kukotisa leswi Tatana a nga ni vutomi eka yena swakwe, u nyikile na yena N’wana, leswaku a va ni vutomi eka yena n’wini.’ Emahlweni ko vula marito lawa lama xiyekaka, Yesu u te: “Hakunene ndzi tiyisile ndzi ri eka n’wina, Loyi a twaka rito ra mina kutani a kholwa loyi a ndzi rhumeke, u ni vutomi lebyi nga heriki . . . Nkarhi wa ta, naswona hi wona sweswi, lowu vafi va nga ta twa rito ra N’wana wa Xikwembu kutani lava yingiseke va ta hanya.” Laha Yesu a a kombetela eka matimba lamakulu lama a nyikiweke wona hi Tata wakwe—ku nga vuswikoti byo endla leswaku vanhu va amukeleka emahlweni ka Xikwembu. Ku tlula kwalaho, Yesu u ni matimba yo pfuxa lava etleleke eku feni kutani a va nyika vutomi. Kutani, ku va Yesu a va ni ‘vutomi eka yena n’wini’ swi vula leswaku u nyikiwe matimba yo endla swilo leswi. Ku fana ni Tata wakwe, N’wana na yena u ni ‘nyiko ya vutomi eka yena n’wini.’ (Yohane 5:24-26, ringanisa Bibele Ya Xitsonga) Ku vuriwa yini hi valandzeri va yena?

Endzhaku ka lembe, Yesu u vulavule ni vayingiseri va yena a ku: ‘Ndzi vurisile, ndzi ri ka n’wina: Loko mi nga dyi nyama ya N’wana wa munhu, ni loko mi nga nwi ngati ya yena, a ku na vutomi eka n’wina. La dyaka nyama ya nga, ni la nwaka ngati ya nga, u ni vutomi lebyi nga heriki, kutani ndzi ta n’wi pfuxa hi siku ra makumu.’ (Yohane 6:53, 54, Bibele Ya Xitsonga) Yesu u fanisa ku va ni ‘vutomi eka n’wina’ ni “vutomi lebyi nga heriki.” Swiga leswi yimeke ku fana ni lexi nge ‘vutomi eka n’wina’ swi kona kun’wana eka Matsalwa ya Xigriki. Hi leswi swikombiso swimbirhi, “Vanani ni munyu eka n’wina” ni lexi nge ‘va tikumele hakelo leyi faneleke ku lahleka ka vona.’ (Marka 9:50; Varhoma 1:27, Bibele Ya Xitsonga) Eka swikombiso leswi, swiga swa kona a swi vulavuli hi matimba yo nyika van’wana munyu kumbe ku hakela un’wana ni un’wana. Kambe laha ku vulavuriwa hi nchumu lowu heleleke. Kutani, xiga lexi nge ‘vutomi  eka n’wina vini’ lexi tirhisiweke eka Yohane 6:53 xi vula ku kuma vutomi lebyi heleleke.

Loko a kombetela eka valandzeri va yena leswaku va ni vutomi eka vona vini, Yesu u vulavule hi nyama yakwe ni ngati yakwe. Endzhaku, loko a simeka Xilalelo xa Hosi, Yesu u tlhele a vulavula hi nyama ni ngati yakwe kutani a byela valandzeri vakwe lava nga ta nghena eka ntwanano lowuntshwa leswaku va dya swifanekiselo swa xinkwa xo kala comela ni vhinyo. Xana leswi swi vula leswaku i Vakreste lava totiweke ntsena, lava nga eka ntwanano lowuntshwa na Yehovha Xikwembu, lava nga ta kuma vutomi lebyi, lebyi heleleke? Doo! Swiendlakalo leswimbirhi a swi siyana hi lembe. Lava va tweke marito ya Yesu lama tsariweke eka Yohane 6:53, 54 a va nga swi tivi leswaku ku ni nkhuvo wa lembe na lembe lowu nga ni swifanekiselo leswi yimelaka nyama ni ngati ya Kreste.

Hi ku ya hi Yohane ndzima 6, Yesu u rhange a fanisa nyama yakwe ni manna, a ku: “Vatata wa n’wina va dye manna emananga kambe va file. Lexi i xinkwa lexi xikaka hi le tilweni, leswaku un’wana ni un’wana a xi dya, a nga fi. Ndzi xinkwa lexi hanyaka lexi xikeke hi le tilweni; loko munhu a dya xinkwa lexi u ta hanya hi masiku.” Nyama ya Yesu swin’we ni ngati yakwe, a swi ri swa nkoka ku tlula manna ya xiviri. Hi ndlela yihi? Hikuva nyama ya yena yi nyikeriwile hikwalaho ka “vutomi bya misava,” yi endla swi koteka ku kuma vutomi lebyi nga heriki. * Hikwalaho, xiga lexi nge ku va ni ‘vutomi eka n’wina vini’ lexi nga eka Yohane 6:53 xi tirha eka hinkwavo lava kumaka vutomi lebyi nga heriki—etilweni kumbe emisaveni.—Yohane 6:48-51.

Hi rini laha valandzeri va Kreste va nga ta va ni vutomi eka vona vini kumbe va nghena eka vutomi lebyi heleleke? Eka vatotiwa lava nga vadyandzhaka va Mfumo, leswi swi endleka loko va pfuxeriwa etilweni tanihi swivumbiwa swa moya leswi nga fiki. (1 Vakorinto 15:52, 53; 1 Yohane 3:2) “Tinyimpfu tin’wana” ta Yesu ti ta kuma vutomi lebyi heleleke endzhaku ka Mfumo wa yena wa Gidi ra Malembe. Hi nkarhi wolowo ti ta va ti ringiwile, ti kumeka ti tshembekile kutani ku vuriwa leswaku ti lulamile, ta faneleka ku hanya hilaha ku nga heriki eParadeyisini emisaveni.—Yohane 10:16; Nhlavutelo 20:5, 7-10.

[Nhlamuselo ya le hansi]

[Swifaniso leswi nga eka tluka 31]

Vakreste hinkwavo va ntiyiso va nga va ni ‘vutomi eka vona vini’