Swivutiso Swa Vahlayi

Xana ku khuvuriwa ematshan’weni ya lava feke swi vula yini?

Loko a tsala hi ta ku pfuxeriwa etilweni, muapostola Pawulo u tsale mhaka leyi tsakisaka. Eka Bibele Ya Xitsonga ha hlaya: ‘Loko swi ri tano, lava nga khuvuleriwa vafi va ta endla yini loko kunene vafi va nga pfuki? Xana va ha khuvuleriwa yini vafi?’ Kasi eka Bibele—Mahungu Lamanene ndzimana leyi yi hundzuluxeriwe hi ndlela leyi: “Xana vanhu va lava yini, loko va khuvuriwa ematshan’wini ya lava feke xana? Loko vafi va nga pfuki nikatsongo, swi pfuna yini ku khuvuleriwa vona ke?”—1 Vakorinto 15:29.

Xana laha Pawulo a a vula leswaku vanhu lava hanyaka va fanele va khuvuriwa ematshan’weni ya lava feke va nga khuvuriwanga? Hi ku ya hi vuhundzuluxeri lebyi ni vuhundzuluxeri byin’wana bya Bibele swi nga ha vonaka swi ri tano. Hambiswiritano, loko hi kambisisa Matsalwa swin’we ni Xigriki xo sungula lexi Pawulo a xi tirhiseke, hi fikelela makumu yo hambana ni lawa. Pawulo a a vula leswaku Vakreste lava totiweke va khuvuriwa naswona hi ku endla sweswo va sungula ku hanya vutomi lebyi nga ta endla leswaku va hetelela va fe rifu leri fanaka ni ra Kreste, va fa va tshembekile. Endzhaku ka sweswo, va ta pfuxiwa va ri vanhu va moya tanihi yena.

Matsalwa ma yi seketela nhlamuselo leyi. Epapileni ra yena leri yaka eka Varhoma, Pawulo u tsale a ku: “Xana a mi swi tivi leswaku hinkwerhu ka hina lava hi khuvuriweke eka Kreste Yesu hi khuvuriwe eka rifu ra yena?” (Varhoma 6:3) Kasi epapileni ra yena leri yaka eka Vafilipiya, Pawulo u vulavule hi yena n’wini a ku: “[Ndzi] hlanganyela eku xanisekeni ka [Kreste], ndzi tiveka ehansi ka rifu ro fana ni ra yena, ku vona loko hi ndlela yo karhi ndzi ta kuma ku pfuxiwa ko sungula eka lava feke.” (Vafilipiya 3:10, 11) Pawulo a a hlamusela leswaku vutomi bya mulandzeri wa Kreste la totiweke byi katsa ku tshama a tshembekile hambiloko a langutane ni ndzingo, ku langutana ni rifu siku ni siku kutani a fa a tshembekile ivi a pfuxeriwa etilweni.

Swi le rivaleni leswaku matsalwa lawa ni man’wana lawa hi ku kongoma ma vulavulaka hi rifu ra vanhu lava khuvuriweke, ma kombetela eka vanhu lava hanyaka lava khuvuriweke, ku nga ri eka vanhu lava feke. Pawulo u tlhele a byela Vakreste-kulobye lava totiweke a ku: “Mi lahliwe na yena eku khuvuriweni kakwe, naswona hi vuxaka na yena mi tlhele mi pfuxiwa swin’we hi ripfumelo ra n’wina eka matirhelo ya Xikwembu, lexi n’wi pfuxeke eka lava feke.”—Vakolosa 2:12.

Xirhangi xa Xigriki lexi nge hy·perʹ, lexi vuhundzuluxeri byin’wana byi xi hundzuluxelaka xi va ku “khuvuleriwa” kumbe “ku khuvuriwa ematshan’wini ya,” eka 1 Vakorinto 15:29, xi nga tlhela xi vula leswaku “hi xikongomelo xa.” Hikwalaho, hi ku pfumelelana ni tindzimana tin’wana ta Bibele, Vuhundzuluxeri Bya Misava Leyintshwa Bya Matsalwa Yo Kwetsima byi andlala ndzimana leyi kahle byi ku: “Va ta endla yini lava va khuvuriwaka hi xikongomelo xa ku va lava feke? Loko lava feke va nga ta pfuxiwa nikatsongo, ha yini na vona va khuvuriwa hi xikongomelo xa leswaku va va tano?”