Xana U “Raha Tinsungunu”?

EMINKARHINI ya Bibele, risungunu ra tihavi—a ku ri nhonga yo leha leyi hakanyingi a yi hoxiwa nsimbi yo tontswa hala makumu—leyi a yi tirhiseriwa ku kongomisa kumbe ku lawula swifuwo leswi kokaka mindzhwalo. Xana a ku endleka yini loko xifuwo xi sihalala xi ala ku ya laha xi kongomisiwaka kona hambiloko xi tlhaviwa? A xi ta tama xi tlhaviwa ku kondza xi ya lomu xi kongomisiwaka kona.

Endzhaku ka ku pfuxiwa kakwe, Yesu Kreste u vulavule hi tinsungunu loko a humelela eka wanuna loyi a a vuriwa Sawulo, loyi a a ri endleleni yo ya khoma vadyondzisiwa van’wana va Yesu. Sawulo u twe Yesu a vulavula a ri eku vonakaleni loku dlayaka mahlo a ku: “Sawulo, Sawulo, u ndzi xanisela yini? Ku tshamela ku raha tinsungunu swi nonon’hwisela wena.” Kahle-kahle loko Sawulo a xanisa Vakreste a a lwa ni Xikwembu, naswona sweswo a ku ri ku tivitanela khombo.—Mintirho 26:14.

Xana swi nga endleka leswaku na hina hi nga swi xiyi leswaku hi “raha tinsungunu”? Bibele yi fanisa “marito ya lavo tlhariha” ni tinsungunu ta tihavi leti hi susumetelaka ku ya emahlweni hi ndlela leyi faneleke. (Eklesiasta 12:11) Ndzayo leyi huhuteriweke leyi humaka eRitweni ra Xikwembu yi nga hi khutaza ni ku hi kongomisa kahle—loko hi yi amukela. (2 Timotiya 3:16) Loko hi lwisana ni swikhutazo swa yona ku ta vaviseka hina.

Sawulo u yingise marito ya Yesu, hiloko a cinca mahanyelo ya yena kutani a va muapostola Pawulo la nga Mukreste la rhandzekaka. Hilaha ku fanaka loko hi yingisa ndzayo ya Xikwembu swi ta hi tisela mikateko ya hilaha ku nga heriki.—Swivuriso 3:1-6.

[Laha Xifaniso Xi Humaka Kona eka tluka 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers