“Ndzi Kombisiwe Xinghana, Rirhandzu Ni Nkhathalelo”

“HINKWAVO va ta tiva leswaku mi vadyondzisiwa va mina, loko mi rhandzana.” (Yohane 13:35) Hilaha Yesu a vuleke hakona, rirhandzu ri ve mfungho wa Vakreste vo sungula. Tertullian, loko a tsala eka malembe lama tlulaka dzana endzhaku ka rifu ra Kreste, u tshahe marito ya lava va tivoneleke hi ya vona loko va ku: ‘Vonani ndlela leyi va rhandzanaka ha yona swin’we ni ndlela leyi va tiyimiseleke ha yona ku fela van’wana.’

Xana rirhandzu ro tano ra ha ri kona emisaveni? Ina. Hi xikombiso, xiya papila leri amukeriweke erhavini ra Timbhoni ta Yehovha ra le Brazil. Mutsari wa papila leri, ku nga wansati la vuriwaka Marília, u te:

“Loko ha ha tshama eVilla Mercedes, le Argentina, mana wa mina loyi a nga Mbhoni ya Yehovha, u khomiwe hi vuvabyi bya mahlangano, lebyi n’wi siyeke a lamale ku suka exisutini ku ya fika emilengeni. Eka tin’hweti to sungula ta nhungu loko a ha ku khomiwa hi vuvabyi lebyi, a ku ri Timbhoni ta le Villa Mercedes leti a ti n’wi khathalela hi rirhandzu. A ti n’wi pfuna hi swilo hinkwaswo ku katsa ni ku basisa kaya rakwe swin’we ni ku n’wi lunghiselela swakudya. Niloko a ri exibedlhele, Manana a a tshama a ri ni munhu wo n’wi khathalela, vusiku ni nhlikanhi.

“Mina na Manana se hi vuyele eBrazil, laha ni sweswi a ha hlakarhelaka evuvabyini byakwe. Timbhoni ta laha hi tshamaka kona, sweswi ti endla xin’wana ni xin’wana lexi ti nga xi kotaka ku pfuna Manana leswaku a hlakarhela.”

Loko Marília a gimeta papila rakwe u ri: “Entiyisweni a ndzi Mbhoni, kambe ndzi kombisiwe xinghana, rirhandzu ni nkhathalelo hi Timbhoni.”

Ina, va ha ri kona vanhu lava ha kombisaka rirhandzu ra xiviri ra Vukreste. Loko va endla tano, va kombisa ndlela leyi tidyondzo ta Yesu ti nga byi khumbaka ha yona vutomi bya hina.