Yehovha U Ndzi Dyondzise Ku Sukela eVuntshweni Bya Mina
Mhaka Ya Vutomi
Yehovha U Ndzi Dyondzise Ku Sukela eVuntshweni Bya Mina
HI KU VULA KA RICHARD ABRAHAMSON
“Oho Xikwembu, u ndzi dyondzisile ku sukela evuntshweni bya mina ku ya emahlweni, ku fikela sweswi ndzi hambeta ndzi vulavula hi mintirho ya wena yo hlamarisa.” Mi nge ndzi mi hlamusela leswaku ha yini marito wolawo ya Pisalema 71:17 ma ri ya nkoka swinene eka mina.
HI 1924 mana wa mina, Fannie Abrahamson, u endzeriwe hi Swichudeni swa Bibele, leswi namuntlha swi vuriwaka Timbhoni ta Yehovha. Hi nkarhi wolowo a ndzi ri ni lembe rin’we ntsena. Nkarhi ni nkarhi loko Manana a heta ku dyondzisiwa ntiyiso wa Bibele, a a hatla a endzela vaakelani a ya va hlamusela swilo leswi a swi dyondzeke, a tlhela a swi dyondzisa mina, buti wa mina na sesi wa mina. Ni ku hlaya ndzi nga si swi kota, u ndzi dyondzise ku tiva matsalwa yo tala hi nhloko lama vulavulaka hi mikateko leyi nga ta tisiwa hi Mfumo wa Xikwembu.
Eku heleni ka va-1920, ntlawa wa hina wa Swichudeni swa Bibele wa le La Grande, exifundzheni xa Oregon, le U.S.A., laha ndzi velekeriweke kona ndzi tlhela ndzi kulela kona, a wu ri ntlawa wa vavasati va nga ri vangani ni vana. Hambileswi a hi ri ekule ni mavandlha man’wana, a hi endzeriwa kan’we kumbe kambirhi hi lembe hi vatirheli lava famba-fambaka lava a va vuriwa vafamberi. Vatirheli lava a va nyikela tinkulumo leti khutazaka, va famba na hina entirhweni wa yindlu ni yindlu, ni ku kombisa nkhathalelo lowukulu eka vana. Van’wana va vatirheli volavo lava rhandzekaka a ku ri Shield Toutjian, Gene Orrell na John Booth.
A nga kona eka ntlawa wa hina loyi a koteke ku ya entsombanweni wa le Columbus, eOhio hi 1931, laha Swichudeni swa Bibele swi amukeleke vito leri nge Timbhoni ta Yehovha. Kambe mavandlha kun’we ni mintlawa leyi nga ekule ni mavandlha, leyi a yi nga ri na vayimeri entsombanweni yi hlanganile etindhawini ta yona hi August wa lembe rero yi tiboha ku amukela vito leri. Ntlawa wa hina lowutsongo wa le La Grande wu endle tano
na wona. Kutani etsimeni ra 1933 ra ku fambisa xibukwana lexi nge The Crisis, ndzi dyondze xingheniso xa Bibele hi nhloko kutani ndzi chumayela ro sungula ndzi ri ndzexe hi yindlu ni yindlu.Hi va-1930, ntirho wa hina a wu kanetiwa swinene. Leswaku hi hlangavetana ni ku kanetiwa loku, mavandlha ma avanyisiwe hi mintlawa ma va ni tinhlengeletano letitsongo, naswona a ma hlanganyela kan’we kumbe kambirhi hi lembe entirhweni wo chumayela lowu a wu vuriwa tsima ra ntlawa. Etinhlengeletanweni leti a hi dyondzisiwa tindlela ta ku chumayela naswona a hi kombisiwa leswaku hi nga xi kombisa njhani xichavo loko maphorisa ma hi kavanyeta. Tanihi leswi Timbhoni a ti tala ku yisiwa eka muavanyisi loyi a nga phorisa kumbe ehubyeni leyi tolovelekeke, a hi pfuxeta rungula leri nga ephepheni ra vuleteri leri vuriwaka Matengiselo ya Nandzu. Sweswo swi hi pfune ku kota ku hlangavetana ni nkaneto.
Ndzi Kuma Vutivi Lebyi Engetelekeke Bya Bibele Ndza Ha Ri Ntsongo
A ndzi ya ndzi tlangela ntiyiso wa Bibele ni ntshembo lowu sekeriweke eBibeleni wa ku hanya hi masiku emisaveni ehansi ka Mfumo wa Xikwembu wa le matilweni. Hi nkarhi wolowo, ku khuvuriwa a swi nga kandziyisiwi ngopfu eka lava a va nga ri na ntshembo wa ku ya fuma na Kreste etilweni. (Nhlavutelo 5:10; 14:1, 3) Kambe ndzi byeriwe leswaku loko ndzi tiyimisele hi mbilu hinkwayo ku endla ku rhandza ka Yehovha, swi ta va swi fanerile leswaku ndzi khuvuriwa. Kutani ndzi khuvuriwile hi August 1933.
Loko ndzi ri ni malembe ya 12, mudyondzisi wa mina u vone leswaku ndzi ni vuswikoti lebyikulu bya ku hlaya emahlweni ka vanhu, kutani u khutaze Manana leswaku a endla malunghiselelo ya leswaku ndzi kuma vuleteri lebyi engetelekeke. Manana u anakanye leswaku sweswo a swi ta ndzi pfuna leswaku ndzi n’wi tirhela ku antswa Yehovha. Kutani ndzi dyondzisiwe hi muleteri loyi mana wa mina a n’wi hakeleke hi ku n’wi hlantswela timpahla lembe hinkwaro. Vuleteri bya kona byi ndzi pfune swinene ensin’wini. Loko ndzi ri ni malembe ya 14, ndzi khomiwe hi vuvabyi bya ku pandza ka mahlangano, lebyi endleke leswaku ndzi xwa exikolweni nkarhi lowu tlulaka lembe.
Hi 1939 mutirheli wa nkarhi hinkwawo la vuriwaka Warren Henschel u fike endhawini ya ka hina. * A ndzi n’wi teka a ri buti wa mina wa moya, loyi a a famba na mina ensin’wini siku hinkwaro. Hi ku hatlisa u ndzi pfune ku sungula ntirho wa vuphayona bya nkarhi wo wisa, lebyi nga vuphayona bya nkarhinyana. Hi ximumu xa lembe rero, ntlawa wa hina wu hleriwe wu va vandlha. Warren u ve nandza wa vandlha, kutani mina ndzi va mufambisi wa Dyondzo ya Xihondzo xo Rindza. Mina ndzi ve nandza wa vandlha loko Warren a hi siya a ya tirha eBethele, ku nga yindlu-nkulu ya matiko hinkwawo ya Timbhoni ta Yehovha leyi nga eBrooklyn, le New York.
Ndzi Sungula Vutirheli Bya Nkarhi Hinkwawo
Vutihlamuleri lebyi engetelekeke bya ku va nandza wa vandlha byi kurise ku navela ka mina ku nghenela vutirheli bya nkarhi hinkwawo, kutani ndzi byi nghenele loko ndzi ri ni malembe ya 17 endzhaku ko heta lembe ra vunharhu ndzi ri exikolweni xa le henhla. Tatana a a nga hlanganyeli eka vupfumeri bya hina, kambe a a hi khathalela swinene naswona a a ri ni vumunhu. Yena a a lava leswaku ndzi ya ekholichi. Kambe xin’wana lexi a ndzi byeleke xona hileswaku ndzi nga endla leswi
ndzi swi tsakelaka, ntsena loko ndzi ta tivonela malunghana ni ndhawu yo tshama eka yona ni swakudya. Kutani ndzi sungule ku phayona hi September 1, 1940.Loko ndzi suka ekaya, mana wa mina u ndzi kombele leswaku ndzi hlaya Swivuriso 3:5, 6 leyi nge: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” Kunene, ku tshemba Yehovha minkarhi hinkwayo swi ndzi pfune ngopfu.
Endzhakunyana ndzi ye ndzi ya tirha na Joe na Margaret va ka Hart en’walungu-xikarhi wa Xifundzha xa Washington. Nsimu ya kona a yi ri ni swilo swo hambana-hambana—mapurasi ya tihomu ni ya tinyimpfu, tindhawu leti hlayiseke ndhavuko wa Maindiya ni madoroba yo tala lamatsongo ni swimitana. Hi ximun’wana xa 1941, ndzi ve nandza wa vandlha ra le Wenatchee, eWashington.
Eka yin’wana ya tinhlengeletano ta hina le Walla Walla, eWashington, a ndzi ri murindzi, ndzi amukela lava nghenaka eholweni. Ndzi vone makwerhu la ha riki muntshwa a ri karhi a kayakaya a ringeta ku lunghisa fambiselo ra mpfumawulo wa nhlengeletano. Kutani ndzi ringanyete leswaku hi cincana swiavelo. Loko mutirheli wa muganga, ku nga Albert Hoffman, a vuya kutani a ndzi vona ndzi siye xiavelo xa mina, u n’wayiterile hi moya wa xinghana a ndzi hlamusela leswaku i swa nkoka ku tshama exiavelweni xa mina ku kondza ndzi cinciwa. Ndzayo ya yena a ndzi yi rivali ni sweswi.
Hi August 1941, Timbhoni ta Yehovha ti kunguhate ntsombano lowukulu le St. Louis, eMissouri. Va ka Hart va nghenise xifunengeto endzhaku ka lori ya vona va vekela ni mabenci. Hi nghene hi ri kaye elorini yoleyo hi teka riendzo ra tikhilomitara ta 2 400 hi kongoma eSt. Louis, hinkwerhu hi ri maphayona. Ku ya ntsena swi hi tekele kwalomu ka vhiki, ni ku vuya swi hi tekela nkarhi lowu fanaka. Entsombanweni wolowo, maphorisa ma ringanyete leswaku a ku ri ni vanhu va 115 000. Niloko ku ri leswaku nhlayo ya kona a yi ri ehansi ka yoleyo, lexi hi tiyisekaka ha xona hileswaku a yi hundza nhlayo ya Timbhoni ta le United States leti a ti ri 65 000 hi nkarhi wolowo. Ntsombano wolowo a wu khutaza swinene emoyeni.
Ndzi Ya Tirha eBethele Ya Le Brooklyn
Loko ndzi tlhelele eWenatchee, ndzi kume papila leri a ri ndzi kombela leswaku ndzi ya eBethele ya le Brooklyn. Ndzi te ndzi fika kwalaho hi October 27, 1941, ndzo namba ndzi yisiwa ehofisini ya Nathan H. Knorr, loyi a a ri mulanguteri wa vugandliselo. U ndzi hlamusele hi musa leswaku ku tirha eBethele swi njhani, a kandziyisa leswaku ku namarhela Yehovha minkarhi hinkwayo i swa nkoka leswaku munhu a humelela eka vutomi bya kona. Kutani ndzi yisiwe eka Ndzawulo ya Vurhumeri bya Tibuku laha ndzi nga fika ndzi averiwa ku bohelela mabokisi ya tibuku leti rhumeriwaka kun’wana.
Hi January 8, 1942, Joseph Rutherford, loyi a a ri ni vutihlamuleri lebyikulu exikarhi ka Timbhoni ta Yehovha emisaveni hinkwayo u file. Endzhaku ka ntlhanu wa masiku, vakongomisi va Sosayiti va hlawule Makwerhu Knorr leswaku a n’wi tlhandlama. Loko W. E. Van Amburgh, loyi a ri ni nkarhi wo leha a ri mulanguteri wa timali ta Sosayiti, a tivisa ndyangu wa Bethele mhaka leyi, u te: “Ndzi tsundzuka loko C. T. Russell a fa [hi 1916] kutani a siviwa hi J. F. Rutherford. Hosi yi ye emahlweni yi kongomisa ntirho wa Yona wu va lowu
humelelaka. Ni sweswi ndza tiyiseka leswaku ntirho wu ta ya emahlweni ehansi ka vuungameri bya Nathan H. Knorr, hikuva lowu a hi ntirho wa munhu kambe i wa Hosi.”Hi February 1942, ku tivisiwe leswaku ku ta sunguriwa “Khoso Leyi Antswisiweke Ya Ntirho Wa Xikwembu.” A yi kunguhateriwe ku letela vatirhi va le Bethele leswaku va antswisa vuswikoti bya vona bya ku endla ndzavisiso wa timhaka to karhi ta le Bibeleni, va hlela rungula ra vona kahle kutani va ri nyikela hilaha ku humelelaka. Ndzi kote ku endla nhluvuko hi xihatla eka khoso leyi tanihi leswi a ndzi kume ndzetelo wa ku vulavula emahlweni ka vanhu enkarhini lowu hundzeke.
Endzhakunyana ndzi averiwe ku ya tirha eka Ndzawulo ya Ntirho, leyi langutelaka ntirho wa nsimu wa Timbhoni eUnited States. Eku heleni ka lembe rero, ku endliwe xiboho xa ku pfuxeta lunghiselelo ra ku va vatirheli va endzela mavandlha ya Timbhoni. Hi ku famba ka nkarhi, vatirheli lava va famba-fambaka va vuriwe valanguteri va xifundzha. Hi ximumu xa 1942, ku hleriwe khoso eBethele ya ku letela vamakwerhu leswaku va endla ntirho wo tano, naswona ndzi ve un’wana wa lava veke ni lunghelo ro kuma vuleteri byo tano. Ndzi tsundzuka yinhla leyi Makwerhu Knorr, loyi a a ri un’wana wa valeteri a yi kandziyiseke loko a ku: “U nga tshuki u lava ku tsakisa vanhu. U ta tikuma u nga ha tsakisi munhu. Tsakisa Yehovha, kutani u ta tsakisa ni hinkwavo lava rhandzaka Yehovha.”
Ntirho wo famba-famba wu simekiwe hi October 1942. Van’wana va hina eBethele a hi hlanganyela eka wona hi mahelo-vhiki man’wana, hi endzela mavandlha lama nga empfhukeni wo fika eka 400 wa tikhilomitara ku sukela eDorobeni ra New York. A hi kambisisa ntirho wo chumayela wa vandlha ni nhlayo ya lava vaka kona eminhlanganweni, hi hlangana ni lava nga ni vutihlamuleri evandlheni, hi nyikela nkulumo yin’we kumbe timbirhi, hi tlhela hi tirha ni Timbhoni ta kwalaho ensin’wini.
Hi 1944, ndzi ve un’wana wa swirho swa Ndzawulo ya Ntirho leswi rhumeriweke entirhweni wo endzela mavandlha tin’hweti ta tsevu, hi ya eswifundzheni swa Delaware, Maryland, Pennsylvania ni le Virginia. Endzhaku ka tin’hwetinyana ndzi endzele mavandlha ya le Connecticut, Massachusetts ni le Xihlaleni xa Rhode. Loko ndzi tlhelela eBethele, a ndzi pfa ndzi tirha ehofisini na Makwerhu Knorr ni matsalana wa yena Milton Henschel, laha ndzi veke ni vutivi byo antswa malunghana ni ntirho wa hina emisaveni hinkwayo. A ndzi pfa ndzi tirha eHofisini ya Timali leyi a yi languteriwa hi W. E. Van Amburgh ni xandla xakwe Grant Suiter. Kutani hi 1946 ndzi ve mulanguteri wa tindzawulo to hlayanyana eBethele.
Ku Cinca Lokukulu eVuton’wini Bya Mina
Loko ndzi ri karhi ndzi fambela mavandlha hi 1945, ndzi tolovelane na Julia Charnauskas wa le dorobeni ra Providence, eXihlaleni xa Rhode. Exikarhi ka 1947 hi endle makungu ya ku tekana. Ntirho wa Bethele a ndzi wu rhandza hi mbilu ya mina hinkwayo, kambe enkarhini wolowo a ku nga ri na lunghiselelo ra ku ta ni munghana wa vukati a ta tirha kona. Hikwalaho ndzi tshike ntirho wa Bethele hi January 1948, kutani ndzi tekana na Julia (Julie). Ndzi kume ntirho wa nkarhinyana exitolo xin’wana le Providence, kutani hi sungula ku phayona swin’we.
Hi September 1949, ndzi averiwe ku endzela mavandlha ya le n’walungu-vupela-dyambu bya Wisconsin. Sweswo a swi vula vutomi lebyintshwa eka mina na Julie tanihi leswi a hi ta chumayela eswidorobanini ni le tindhawini ta le makaya leti teleke tideri. Nkarhi wa vuxika a wu lehile naswona a ku titimela swinene, kasi a ku hela mavhiki yo tala ku ri ni gwitsi ni gamboko yo tala. A hi nga ri na movha. Kambe minkarhi hinkwayo a ku va ni loyi a hi yisaka evandlheni leri landzelaka.
Endzhakunyana ka loko ndzi sungule ntirho wo endzela mavandlha, hi ve ni nhlengeletano ya xifundzha. Ndzi tsundzuka ndzi ri karhi ndzi nyunganyungeka ndzi kambisisa ku vona loko swilo hinkwaswo swi tshamisekile. Kutani mulanguteri wa muganga, Nicholas Kovalak, u ndzi hlamusele hi musa leswaku vamakwerhu a va tolovele ku endla swilo hi ndlela ya vona kutani a ndzi nga fanelanga ndzi karhateka ni hi swilo leswitsongo. Xitsundzuxo xexo xi ndzi pfune ngopfu eku tameleni ka swiavelo swo tala ku sukela enkarhini wolowo.
Hi 1950, ndzi kume xiavelo xa nkarhinyana xa ku langutela malunghiselelo ya byetlelo bya vapfhumba eka ntsombano wo sungula lowukulu lowu khomeriweke eXitediyamu xa Yankee le Dorobeni ra New York. Ntsombano wolowo a wu tsakisa
ku sukela eku sunguleni ku ya fika emakumu, laha a ku ri ni vapfhumba vo huma ematikweni ya 67 naswona ku ve ni vanhu va 123 707! Endzhaku ka ntsombano, mina na Julie hi ye emahlweni ni ntirho wa hina wo endzela mavandlha. A hi wu tsakela swinene ntirho lowu. Kambe a hi tiyimisele ku amukela xiavelo xin’wana ni xin’wana xa ntirho wa nkarhi hinkwawo. Kutani lembe ni lembe a hi endla swikombelo swa ku nghenela ntirho wa Bethele kumbe wa vurhumiwa. Hi 1952 hi tsake ngopfu loko hi kuma xirhambo xa ku nghena eka ntlawa wa vu-20 wa Xikolo xa Bibele xa Gilead xa Watchtower, laha hi leteriweke ntirho wa vurhumiwa.Hi Ya Tirha eNtsungeni Wa Malwandle
Hi lo na thwasa hi 1953, ho namba hi averiwa ku ya eBritain, laha ndzi veke mulanguteri wa muganga edzongeni wa Nghilandhi. Loko mina na Julie hi nga si hlanganisa ni lembe entirhweni wolowo lowu a hi wu rhandza swinene, hi hlamarile loko hi kuma xiavelo xa ku rhurhela eDenmark. Le Denmark a ku ri ni xilaveko xa mulanguteri lontshwa wa rhavi. Tanihi leswi a ndzi ri kusuhi nileswi a ndzi leteriwe ntirho wo tano loko ndza ha ri eBrooklyn, ndzi averiwe ku ya pfuna kwalaho. Hi khandziye xikepe hi ya eNetherlands, ku suka kwalaho hi khandziya xitimela hi kongoma eCopenhagen, etikweni ra Denmark. Hi fike hi August 9, 1954.
Xiphiqo xin’wana lexi a xi fanele xi lulamisiwa hileswi vamakwerhu va nga ri vangani lava nga ni vutihlamuleri a va lwisana ni vukongomisi bya yindlu-nkulu ya le Brooklyn. Nakambe vahundzuluxeri vanharhu eka va mune lava a va hundzuluxela minkandziyiso ya hina hi Xidenixi va hume hinkwavo eBethele ivi eku heteleleni va tihambanisa ni Timbhoni ta Yehovha. Kambe Yehovha u hlamule swikhongelo swa hina. Maphayona mambirhi, ku nga Jørgen na Anna Larsen, lava a va pfa va endla ntirho wa vuhundzuluxeri, va pfumerile ku va vahundzuluxeri va nkarhi hinkwawo. Kutani
timagazini ta hina hi Xidenixi ti hambete ti huma hinkwato, a ku na nkandziyiso lowu hi wu kayiveleke. Va ka Larsen va ha ri eBethele ya le Denmark, naswona Jørgen hi yena muhlanganisi wa Komiti ya Rhavi.Nchumu lowu a wu khutaza ngopfu eminkarhini yoleyo a ku ri ku endzeriwa nkarhi ni nkarhi hi Makwerhu Knorr. A a nga wu pfumali nkarhi wa ku tshama na munhu a vulavula na yena, a hlamusela mintokoto leyi pfunaka ku vona ndlela yo langutana ni swiphiqo swo karhi. Nkarhi wun’wana loko a hi endzerile hi 1955, ku endliwe xiboho xa ku aka rhavi lerintshwa leri nga ni ndhawu leyi a hi ta gandlisela eka yona timagazini ta le Denmark. Ku kumiwe ndhawu en’walungwini wa Copenhagen, naswona hi ximumu xa 1957, hi rhurhele emuakweni lowuntshwa. Harry Johnson, loyi a fikeke eDenmark ni nghamu yakwe Karin loko va ha ku thwasa eka ntlawa wa vu-26 wa le Gilead, u hi pfune ku hlela vugandliselo ni ntirho wo gandlisa.
Hi antswise malunghiselelo ya hina ya ku khoma mintsombano leyikulu eDenmark, naswona ntokoto lowu ndzi wu kumeke loko ndza ha hlela mintsombano eUnited States wu ndzi pfune ngopfu. Hi 1961 entsombanweni wa hina lowukulu wa matiko eCopenhagen ku ve ni vapfhumba vo huma ematikweni yo tlula 30. Nhlayo ya lava veke kona yi fike eka 33 513. Hi 1969, hi khome ntsombano lowukulu ku tlula hinkwayo leyi tshameke yi khomiwa ematikweni ya le Scandinavia, laha nhlayo ya lava veke kona yi fikeke eka 42 073!
Hi 1963, ndzi rhambiwe leswaku ndzi ya nghena eka ntlawa wa vu-38 wa Gilead. Leyi a yi ri khoso leyi pfuxetiweke ya tin’hweti ta khume leyi ngopfu-ngopfu a yi hleleriwe ku letela vatirhi va le rhavini. Ku ve ntsako lowukulu ku tlhela ndzi va ni ndyangu wa Bethele ya le Brooklyn ni ku vuyeriwa eka ntokoto wa lava va heteke malembe yo tala va ri karhi va khathalela mintirho ya le yindlu-nkulu.
Endzhaku ka ndzetelo lowu, ndzi tlhelele eDenmark ndzi ya emahlweni ni vutihlamuleri bya mina. Nakambe ndzi ve ni lunghelo ra ku fambela marhavi ya le Yuropa vupela-dyambu ni le n’walungwini, ndzi khutaza vatirhi ni ku va pfuna ku hetisisa vutihlamuleri bya vona. Sweswinyana ndzi endle ntirho wo tano eAfrika Vupela-dyambu ni le Kharibiya.
Eku heleni ka va-1970, vamakwerhu va le Denmark va sungule ku lava ndhawu yo aka muako lowukulu, tanihi leswi ntirho wa vuhundzuluxeri ni wa vugandlisi a wu ya wu kula. Ku kumiwe ndhawu leyinene empfhukeni wa kwalomu ka 60 wa tikhilomitara loko u suka Copenhagen u kongoma evupela-dyambu. Ndzi tirhisane ni van’wana eku endleni ka pulani ya muako lowuntshwa, naswona mina na Julie a hi swi langutele hi mahlo-ngati ku tshama ni ndyangu wa Bethele ekaya lerintshwa ro xonga. Kambe swilo a swi fambanga hi ndlela yoleyo.
EBrooklyn Nakambe
Hi November 1980, mina na Julie hi komberiwe ku ya tirha eBethele ya le Brooklyn, laha hi fikeke hi January 1981. Hi nkarhi wolowo a hi ri ni malembe ya le ku heleni ka va-50, naswona endzhaku ko heta kwalomu ka hafu ya vutomi bya hina hi tirha ni vamakwerhu lava rhandzekaka eDenmark, a swi hi olovelanga ku tlhelela eUnited States. Hambiswiritano, a hi vanga ni mianakanyo ya ku phikelela hi tshama eka ndhawu leyi hina a hi rhandza ku va eka yona, kambe hi anakanyisise hi swiavelo swa hina leswintshwa ni hi swiphiqo swihi ni swihi leswi hi nga langutanaka na swona eka swiavelo swa kona.
Hi fike eBrooklyn kutani hi tolovelana ni vutomi bya kona. Julie u averiwe ehofisini ya swa timali, ku nga ntirho lowu a a endla wona le Denmark. Mina ndzi averiwe eka Ndzawulo ya Vutsari laha a ndzi pfuneta ku hlela xiyimiso xa ku endliwa ka minkandziyiso ya hina. Eku sunguleni ka va-1980 ku ve ni ku cinca lokukulu eka matirhelo ya hina eBrooklyn, tanihi leswi hi tshikeke ku tirhisa michini yo thayipa ni ya magandliselo ya xikhale kutani
hi tirhisa tikhompyuta ni michini leyintshwa ya ku gandlisa. A ndzi nga tivi nchumu hi tikhompyuta kambe a ndzi ri ni vutivi byo karhi eku hleleni ka ntirho ni ku kota ku tirha ni vanhu.Endzhakunyana ku laveke mpfuno wo antswisa mafambiselo ya ntirho wa Ndzawulo ya Swifaniso loko hi sungula ku gandlisa hi michini ya mivala ya mune leyi a yi humesa swifaniso swa mivala yo hambana-hambana. Hambileswi a ndzi nga ri na ntokoto etimhakeni ta swifaniso, a ndzi kota ku pfuneta ku hlela ntirho. Kutani ndzi ve ni lunghelo ra ku langutela ndzawulo yoleyo ku ringana malembe ya kaye.
Hi 1992 ndzi averiwe ku tirha ni Komiti ya Vukandziyisi leyi nga ehansi ka Huvo leyi Fumaka kutani ndzi hundzela eka Hofisi ya swa Timali. Ni sweswi ndza ha tirha kwalaho entirhweni lowu fambisanaka ni mintirho ya Timbhoni ta Yehovha leyi lavaka timali.
Ntirho Lowu Ndzi Wu Endleke Ku Sukela eVuntshweni Bya Mina
Ku sukela evuntshweni bya mina ni le ka malembe ya 70 lawa ndzi tirheke hi ku tinyiketela, Yehovha u ndzi lehisele mbilu a ndzi dyondzisa hi ku tirhisa Rito rakwe ku nga Bibele ni hi ku tirhisa vamakwerhu lava pfunaka swinene enhlengeletanweni yakwe leyi hlamarisaka. Ndzi hete malembe yo tlula 63 evutirhelini bya nkarhi hinkwawo, kasi yo tlula 55 eka wona ndzi ma hete ndzi tirha na nkatanga la tshembekaka, Julie. Ndza swi vona hakunene leswaku Yehovha u ndzi katekisile.
Le ndzhaku hi 1940 loko ndzi suka ekaya ndzi nghenela ntirho wa vuphayona, tata wa mina u hlekule xiboho lexi ndzi xi endleke a ku: “N’wananga, loko u hi siya u ya endla sweswo, u nga vuyi hi ku tsutsuma u ta ndzi rilela.” Eka malembe lawa hinkwawo a ndzi swi endlanga sweswo. Yehovha u swi enerise swinene swilaveko swa mina, hakanyingi a tirhisa mpfuno wa Vakreste-kulorhi. Endzhaku tata wa mina u sungule ku xixima ntirho wa hina, naswona a a endle nhluvuko wo karhi eku dyondzeni ka ntiyiso wa Bibele loko a fa hi 1972. Manana, loyi a a ri ni ntshembo wa ku ya hanya etilweni, u hambete a tirhela Yehovha hi ku tshembeka ku fikela loko a fa hi 1985, a ri ni malembe ya 102.
Hambileswi ku pfaka ku va ni swiphiqo evutirhelini bya nkarhi hinkwawo, mina na Julie a hi kalanga hi anakanya hi ku tshika xiavelo xa hina. Minkarhi hinkwayo Yehovha u hi tiyisile leswaku hi namarhela xiboho xa hina. Niloko vatswari va mina va dyuhala kutani va lava mpfuno, sesi wa mina Victoria Marlin u tinyiketele ku va khathalela. Ha wu tlangela swinene mpfuno wakwe wa rirhandzu, hikuva sweswo swi hi pfune ku ya emahlweni ni vutirheli bya nkarhi hinkwawo.
Julie u ndzi seketele swinene eka swiavelo swa hina hinkwaswo, a swi languta tanihi xiphemu xa ku tinyiketela ka yena eka Yehovha. Hambileswi se ndzi nga ni malembe ya 80 naswona ndzi nga ni swiphiqo swo karhi swa rihanyo, ndza swi vona leswaku Yehovha u ndzi katekisile hakunene. Ndzi khutaziwa swinene hi marito ya mupisalema, loyi a vuleke leswaku Xikwembu xi n’wi dyondzisile ku sukela evuntshweni, kutani a kombela a ku, ‘Oho Xikwembu, u nga ndzi tshiki ni le malembeni ya ku dyuhala, ku fikela loko ndzi vulavula hi matimba ya wena eka lava ha taka.’—Pisalema 71:17, 18.
[Nhlamuselo ya le hansi]
^ par. 12 Warren a a ri buti wa Milton Henschel, loyi a tirheke malembe yo tala a ri xirho xa Huvo leyi Fumaka ya Timbhoni ta Yehovha.
[Xifaniso lexi nga eka tluka 20]
Ndzi ri na Manana hi 1940, loko ndzi sungula ku phayona
[Xifaniso lexi nga eka tluka 21]
Ndzi ri na maphayona-kulorhi Joe na Margaret Hart
[Xifaniso lexi nga eka tluka 23]
Esikwini ra ku cata ka hina hi January 1948
[Xifaniso lexi nga eka tluka 23]
Ndzi ri ni swichudeni-kulorhi swa le Gilead hi 1953. Ku suka eximatsini ku ya exineneni: Don na Virginia Ward, Geertruida Stegenga, Julie na mina
[Xifaniso lexi nga eka tluka 23]
Ndzi ri na Frederick W. Franz na Nathan H. Knorr le Copenhagen, eDenmark, hi 1961
[Xifaniso lexi nga eka tluka 25]
Ndzi ri na Julie namuntlha