“Tshinelani Eka Xikwembu, Kutani Xi Ta Tshinela Eka N’wina”

Emahlweni Ni Le Ndzhaku Misinya Ya Milawu Ya Bibele Yi Ndzi Pfunile Leswaku Ndzi Hundzuka

LOKO Adrian a ha ri muntshwa a ri munhu wo kariha naswona a a tele rivengo. A a nga swi koti ku lawula vukarhi byakwe hikwalaho ka ximbilwambilwana. A a nwa, a dzaha a tlhela a va ni mahanyelo yo biha. Adrian a a ri murhandzi lonkulu wa vuyimbeleri bya rhok naswona a a titlhavele makanja emirini, lama kombaka leswaku u rhandza hasahasa. Loko a hlamusela malembe wolawo, u ri: “Ndzi tsemete misisi hi ndlela leyi varhandzi va vuyimbeleri bya rhok va talaka ku yi tsemeta ha yona, ndzi yi tote hi glu yi yima yi ku thwii, naswona minkarhi yin’wana a ndzi yi daya yi va yo tshwuka kumbe yi va muhlovo wun’wana.” Nhompfu ya Adrian na yona a yi boxiwile.

Adrian u ye a ya tshama endlwini leyi se a yi ri rhumbi ni vantshwa van’wana vo hlayanyana lava xandzukeke. Kwalaho a va nwa byala va tlhela va tirhisa swidzidzirisi. Adrian u ri: “A ndzi pfanganisa swidzidzirisi swa matimba ni Valium kun’we ni swin’wana leswi ndzi nga swi kumaka kutani ndzi swi nghenisa engatini hi ku titlhava hi neleta. Loko ndzi nga swi kumanga swidzidzirisi kumbe glu a ndzi koka petirolo emimovheni ya vanhu kutani yi ndzi dakwa.” Leswi Adrian se a a hundzuke goya, vanhu a va n’wi chava naswona a a rhandza ngopfu madzolonga. Vanhu a va nga lavi ku tihlanganisa na yena. Hi nkarhi wolowo, a a dume hi mikhuva yo biha.

Hakatsongo-ntsongo, Adrian u swi xiyile leswaku “vanghana” vakwe a va ta eka yena loko va tiva leswaku va ta kuma swo karhi. Ku tlula kwalaho, u te: “Vukarhi ni madzolonga a swi ndzi pfunanga nchumu.” U sukele vanghana vakwe hikwalaho ka leswi a a titwa a nga ri ni xikongomelo naswona a pfilunganyekile. Loko a kuma kopi ya Xihondzo xo Rindza laha a ku akiwa kona, u kokiwe rinoko hi leswi rungula ra kona a ri sekeriwe eBibeleni, naswona sweswo swi endle leswaku a sungula ku dyondza Bibele ni Timbhoni ta Yehovha. Adrian u xi amukele hi mandla mambirhi xirhambo lexi nge: “Tshinelani eka Xikwembu, kutani xi ta tshinela eka n’wina.” (Yakobo 4:8) Hikwalaho ka sweswo, Adrian u hatle a vona xilaveko xa leswaku a sungula ku hanya hi misinya ya milawu leyi kumekaka eMatsalweni yo Kwetsima.

Vutivi lebyi engetelekeke bya Bibele byi khumbe ripfalo ra Adrian byi tlhela byi cinca vutomi byakwe. U pfunekile leswaku a hlula ximbilwambilwana xakwe kutani a hlakulela moya wa ku tikhoma. Hikwalaho ka matimba ya Rito ra Xikwembu vumunhu bya Adrian byi cincile.—Vaheveru 4:12.

Kambe, xana Bibele yi nga va ni matimba yo tano eka vanhu hi ndlela yihi? Vutivi bya Matsalwa bya hi pfuna leswaku hi “ambala vumunhu lebyintshwa.” (Vaefesa 4:24) Ina, vumunhu bya hina bya hundzuka loko hi hanya hi vutivi lebyi kongomeke lebyi humaka eBibeleni. Kambe vutivi byo tano byi va hundzula njhani vanhu?

Xo sungula, Bibele yi hlamusela mikhuva leyi nga riki yinene leyi vanhu va faneleke va yi tshika. (Swivuriso 6:16-19) Xa vumbirhi, Matsalwa ma hi khutaza leswaku hi kombisa timfanelo letinene leti humesiwaka hi moya lowo kwetsima wa Xikwembu. Timfanelo leti ti katsa “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma.”—Vagalatiya 5:22, 23.

Ku twisisa swilaveko swa Xikwembu hi vuenti swi pfune Adrian leswaku a tikambela kutani a vona mikhuva leyi a faneleke a yi hlakulela ni leyi a faneleke a  yi tshika. (Yakobo 1:22-25) Kambe wolawo a ku ri masungulo. Ku engetela eka vutivi byebyo, a ku laveka xikhutazo—ku nga nchumu lowu nga ta susumetela Adrian leswaku a navela ku hundzuka.

Adrian u dyondze leswaku vumunhu lebyintshwa byi vumbiwa “hi ku ya hi xifaniso xa Loyi a byi tumbuluxeke.” (Vakolosa 3:10) U sungule ku xiya leswaku vumunhu bya Mukreste byi fanele byi fana ni vumunhu bya Xikwembu hi xoxe. (Vaefesa 5:1) Loko Adrian a dyondze Bibele, u tive ndlela leyi Yehovha a tirhisanaka ni vanhu ha yona a tlhela a xiya timfanelo letinene ta Xikwembu, to tanihi rirhandzu, musa, vunene, tintswalo ni vululami. Vutivi byo tano byi susumetele Adrian leswaku a rhandza Xikwembu nileswaku a lwela ku va munhu loyi a amukeriwaka hi Yehovha.—Matewu 22:37.

Eku heteleleni, Adrian u swi kotile ku lawula vukarhi byakwe hi ku pfuniwa hi moya lowo kwetsima wa Xikwembu. Yena swin’we ni nsati wakwe va khomekile eku pfuneni ka vanhu van’wana leswaku va hundzula vutomi bya vona hi ku pfuniwa hi vutivi bya Bibele. Adrian u ri: “Ku hambana ni vanghana va mina va khale lava se va feke, mina ndza ha hanya naswona ndzi tiphina hi vutomi bya ndyangu lebyi tsakisaka.” Ndlela leyi a hanyaka ha yona yi kombisa leswaku Bibele yi ni matimba yo hundzula vutomi.

[Marito lama tshahiweke exihlokweni lama nga eka tluka 25]

“Vukarhi ni madzolonga a swi ndzi pfunanga nchumu”

[Bokisi leri nga eka tluka 25]

Misinya Ya Milawu Ya Bibele Ya Tirha

Hi leyi misinya ya milawu ya Bibele leyi pfuneke vanhu vo tala lava karihaka ni lava nga ni madzolonga leswaku va va lava rhuleke:

“Vanani ni ku rhula ni vanhu hinkwavo. Mi nga tirihiseli, varhandziwa, kambe kendlukelani vukarhi.” (Varhoma 12:18, 19) Tshika Xikwembu ku va xona xi bohaka leswaku ndzihiso wu tisiwa rini naswona eka mani. Sweswo xi ta swi endla xi ri karhi xi tiva ntiyiso hinkwawo naswona ndzihiso wa xona wu ta kombisa vululami bya xona lebyi hetisekeke.

“Karihani, kambe mi nga dyohi; dyambu ri nga peli ma ha ri eka xiyimo xa ku kariha, mi nga nyiki Diyavulosi ndhawu.” (Vaefesa 4:26, 27) Minkarhi yin’wana munhu a nga ha hlundzuka. Kambe, loko sweswo swi humelela, a nga fanelanga a tshama a ri “eka xiyimo xa ku kariha.” Ha yini? Hikuva sweswo swi nga n’wi susumetela ku endla swo biha, kutani a nyika “Diyavulosi ndhawu” kutani a nga ha amukeleki eka Yehovha Xikwembu.

“Tshika ku hlundzuka, siya vukarhi; u nga kariheli ku endla swo biha.” (Pisalema 37:8) Ku tsandzeka ku lawula mintlhaveko swi endla leswaku munhu a endla swilo swo biha. Loko munhu a pfumelela vukarhi, a nga ha vula kumbe ku endla swilo leswi nga ta vavisa munhu un’wana ni un’wana loyi a katsekaka.