“Rito Ra Xikwembu Ri Ni Matimba Hakunene!”

“RITO ra Xikwembu ra hanya naswona ri ni matimba.” (Vaheveru 4:12) Ku tiyisekisa leswaku Rito ra Xikwembu ri ni matimba hakunene, 2003 Calendar of Jehovah’s Witnesses yi kombise mintokoto ya tsevu leyi humaka ematikweni yo hambana-hambana. Eka xihloko lexi nge “Emahlweni Ni Le Ndzhaku,” khalendara leyi yi kombise ndlela leyi ntirho wo dyondzisa wa Timbhoni ta Yehovha wu va pfunaka ha yona vanhu leswaku va antswisa mahanyelo ya vona, va tshika mikhuva yo biha, va antswisa vutomi bya mindyangu ya vona ni ku hlakulela vuxaka lebyinene ni Xikwembu.

Ku amukeriwe mapapila yo hlayanyana yo kombisa ku tlangela malunghana ni khalendara ya 2003. Hi leti tinhlamuselo tin’wana laha hansi:

“Khalendara leyi i vumbhoni eka Vakreste va ntiyiso bya leswaku ku ni vanhu van’wana lava lweke hi matimba va lwela ripfumelo ku fana na vona. Sweswi va nga languta swifaniso swa yona leswi nga ta va tsundzuxa hi ku hundzuka loku va ku endleke.”—Steven, wa le United States.

“Hakunene a ndzi lava ku tsala marito lawa ma nga ri mangani leswaku ndzi mi tivisa ndlela leyi khalendara ya 2003 yi yi khumbeke ha yona mbilu ya mina. A yi kona khalendara leyi nga tshama yi khumba vutomi bya mina ku fana ni leyi. Mintokoto leyi yi ta hamba yi tshama enkwameni lowu ndzi fambaka na wona ensin’wini leswaku ndzi kota ku komba vanhu vumbhoni lebyi tiyeke bya ndlela leyi Bibele yi va khumbaka ha yona vanhu.”—Marc, wa le Belgium.

“Khalendara leyi yi ndzi khumbe swinene ngopfu. Ndzi hlamale ngopfu loko ndzi yi hlaya kutani ndzi vona ndlela leyi Yehovha a va hundzuleke ha yona vanhu lava. Hikokwalaho, ndzi susumeteleke ku hambeta ndzi cinca evuton’wini bya mina. Hakunene, sweswi ndzi titwa ndzi ri un’wana wa vamakwerhu va misava hinkwayo.”—Mary, wa le United States.

“Yesu u khumbeke ngopfu hikwalaho ka xiyimo xa moya xa mintshungu. Ndza nkhensa hikwalaho ka leswi mi tekeleleke xikombiso xa Kreste hi ku kombisa mintokoto leyi nga eka khalendara ya hina ya 2003. A ku si tshama ku va ni khalendara leyi ndzi khumbeke lerova ndzi xiririka mihloti evuton’wini bya mina.”—Cassandra, wa le United States.

“Loko ndza ha ri ni malembe ya 11 hi vukhale, ndzi sungule ku dzaha; hi ku famba ka nkarhi ndzi sungule ku tirhisa swidzidzirisi. Hakanyingi a ndzi anakanya hi ku tidlaya. Loko se ndzi tive Yehovha, ndzi pfunekile leswaku ndzi tshika mikhuva yo tano. Khalendara leyi i ya nkoka swinene eka mina. Swikombiso swa vamakwerhu va le matikweni yo hambana-hambana swa ndzi tiyisa. Sweswi ndza swi tiva leswaku a ndzi yi lwi ndzi ri ndzexe nyimpi leyi naswona nchumu wa nkoka swinene i ku rhandza Yehovha ni ku n’wi tirhela hi mbilu hinkwayo.”—Margaret, wa le Poland.

“Hakunene, Rito ra Xikwembu ri ni matimba! Loko ndzi kuma khalendara ya 2003, ndzi ringete ku tikhoma leswaku ndzi nga rili. Mintokoto leyi swin’we ni swifaniso swa kona swi tiyisa ripfumelo swinene.”—Darlene, wa le United States.

“Mintokoto ya van’wana va vanhu lava yi fana swinene ni ya vutomi bya mina bya khale. Yehovha u ndzi nyike matimba leswaku ndzi tshika mikhuva yo biha leyi vonakaka onge a swi koteki ku yi tshika. Ndza mi nkhensa swinene hikwalaho ka mintokoto leyi.”—William, wa le United States.