Swivutiso Swa Vahlayi

Xana Vakreste va fanele va swi languta njhani ku tirhisa maribye ya risima lama fambisanaka ni n’hweti leyi munhu a tswariweke ha yona?

Etindhawini tin’wana ku tirhisiwa maribye ya risima lama fambisanaka ni n’hweti leyi munhu a tswariweke ha yona. Mukreste u fanele a tiendlela xiboho yena n’wini xa loko a ta vehela xingwavila lexi nga ni ribye ro karhi ra risima. (Vagalatiya 6:5) Loko munhu a endla xiboho xo tano, ku ni swilo swa nkoka leswi a faneleke a swi kambisisa.

Encyclopaedia Britannica yi vula leswaku “vanhu vo tala va vehela swingwavila leswi nga ni maribye ya risima lama fambisanaka ni nkarhi lowu va tswariweke ha wona, leswaku va weriwa hi tinjombo kumbe va va ni rihanyo lerinene.” Buku leyi ya engetela: “Ku sukela khale, vangoma va swilo swa le mpfhukeni va vule leswaku maribye man’wana ya risima ma fambisana ni vudimona.”

Ngopfu-ngopfu eminkarhini ya khale vanhu vo tala a va pfumela leswaku loyi a vehelaka xingwavila lexi nga ni ribye leri fambisanaka ni n’hweti leyi a tswariweke ha yona u kuma tinjombo. Xana Mukreste wa ntiyiso wa pfumela eka sweswo? Doo, wa swi xiya leswaku Yehovha a nga va amukeli vanhu lava n’wi fularheleke kutani va tshemba “xikwembu xa Nkateko.”—Esaya 65:11.

EMalembeni ya le Xikarhi, vavhumbhi va hlawule ribye ra risima ra n’hweti yin’wana ni yin’wana elembeni. A va khutaza vanhu leswaku va vehela xingwavila lexi nga ni ribye leri fambisanaka ni n’hweti leyi va tswariweke ha yona, va vula leswaku lava xi vehelaka a va nge weriwi hi makhombo. Kambe swi hoxile hi ku ya hi Matsalwa leswaku Mukreste a landzela leswi vuriwaka hi vavhumbhi lavakulu va swiendlakalo hikuva Bibele ya va sola.—Deteronoma 18:9-12.

A swi fanelanga leswaku Mukreste a teka xingwavila xi ri xa nkoka hileswi xi nga ni ribye leri fambisanaka ni nkarhi lowu a tswariweke ha wona. Timbhoni ta Yehovha a ti ma tlangeli masiku ya ku velekiwa. Xivangelo xa kona hileswi minkhuvo yo tano yi dzunisaka munhu wo karhi, naswona masiku ya ku velekiwa lawa ku vulavuriwaka ha wona eBibeleni i ya vafumi lava a va nga xi tirheli Xikwembu.—Genesa 40:20; Matewu 14:6-10.

Vanhu van’wana va ehleketa leswaku ku vehela xingwavila lexi nga ni ribye leri fambisanaka ni n’hweti leyi munhu a tswariweke ha yona swi byi khumba hi ndlela leyinene vumunhu bya munhu loyi a xi veheleke. Hambiswiritano, Vakreste va ntiyiso a va pfumeli eka sweswo, hikuva va swi xiya leswaku “vumunhu lebyintshwa” byi ambariwa hi ku susumetiwa hi moya lowo kwetsima wa Xikwembu ni hi ku hanya hi misinya ya milawu ya Matsalwa.—Vaefesa 4:22-24.

Mhaka ya nkoka i xikongomelo xa kona. Loko Mukreste a nga si endla xiboho xo vehela xingwavila lexi nga ni ribye leri fambisanaka ni n’hweti leyi a tswariweke ha yona, a nga ha tivutisa, ‘Xana ndzi lava ku vehela xingwavila lexi hikwalaho ka leswi ndzi rhandzaka ribye ra risima leri nga eka xona hambileswi ku vuriwaka leswaku xi fambisana ni n’hweti leyi ndzi tswariweke ha yona? Kumbe, xana ndzi kuceteriwe hi tidyondzo ta vukholwa-hava leti vanhu van’wana va ti hlanganisaka ni maribye lawa ya risima?’

Mukreste u fanele a tikambisisa leswaku a kota ku anakanyisisa hi xikongomelo xa yena. Matsalwa ma ri: “Hlayisa mbilu ya wena ku tlula hinkwaswo leswi swi faneleke swi hlayisiwa, hikuva swihlovo swa vutomi swi le ka yona.” (Swivuriso 4:23) Loko a endla xiboho malunghana ni ku tirhisa maribye ya risima lama kotlanaka ni n’hweti leyi a tswariweke ha yona, Mukreste un’wana ni un’wana u ta va a endla kahle loko a anakanyisisa hi xikongomelo xakwe ni vuyelo lebyi xiboho xa yena xi nga vaka na byona eka yena n’wini ni le ka van’wana.—Varhoma 14:13.