“Kuma Ntsako Lowu Heleleke Eka Yehovha”

“Kuma ntsako lowu heleleke eka Yehovha, kutani u ta ku nyika leswi komberiwaka hi mbilu ya wena.”—PISALEMA 37:4.

1, 2. I mani Munyiki wa ntsako wa ntiyiso, naswona Hosi Davhida u swi kombise njhani sweswo?

“VA TSAKA lava khathalaka hi xilaveko xa vona xa moya, . . . va tsaka lava nga ni tintswalo, . . . va tsaka lava kondletelaka ku rhula.” Lexi i xingheniso xo hlawuleka xa Dyondzo ya Yesu leyi dumeke ya le Ntshaveni, leyi tsariweke hi Matewu, mutsari wa Evhangeli, naswona xi hlanganisa ni tinhlamuselo tin’wana ta tsevu leti funghaka vanhu lava tsakeke. (Matewu 5:3-11) Marito lawa ya Yesu ma hi tiyisekisa leswaku na hina hi nga swi kota ku va lava tsakeke.

² Risimu ro hlawuleka leri tsariweke hi Hosi Davhida wa tiko ra khale ra Israyele ri kombisa leswaku Munyiki wa ntsako wa ntiyiso i Yehovha. Davhida u te: “Kuma ntsako lowu heleleke eka Yehovha, kutani u ta ku nyika leswi komberiwaka hi mbilu ya wena.” (Pisalema 37:4) Kambe i yini lexi nga endlaka leswaku ku tiva Yehovha ni timfanelo to tala ta vumunhu byakwe swi hi nyika “ntsako lowu heleleke”? Xana ku kambisisa leswi a swi endleke ni leswi a nga ta swi endla leswaku a hetisisa xikongomelo xakwe swi ku pfuna njhani leswaku u va ni ntshembo wa ku kuma “leswi komberiwaka hi mbilu ya wena”? Tinhlamulo hi nga ti kuma hi ku kambisisa Pisalema 37, tindzimana 1 ku ya eka 11.

“U Nga Va Vondzoki”

3, 4. Hilaha ku tsariweke hakona eka Pisalema 37:1, i xitsundzuxo xihi lexi Davhida a xi nyikaka, naswona ha yini swi fanerile ku xi yingisa namuntlha?

³ Hi hanya “[eminkarhini] ya mangava leyi swi nonon’hwaka ku langutana na yona,” naswona vuhomboloki byi tinyike matimba. Hi vone ku hetiseka ka marito ya muapostola Pawulo lama nge: “Vanhu vo homboloka ni vaxisi va ta ya emahlweni va nyanya evubihini bya vona, va hambukisa, na vona va hambukisiwa.” (2 Timotiya 3:1, 13) Swa olova swinene ku tikuma u khumbekile hi leswi u nga ha swi vonaka ku ri ku nyuka ka vanhu lavo homboloka! Sweswo hinkwaswo swi nga hi kavanyeta, swi bvinya langutelo leri hi nga na rona hi swilo swa moya. Xiya ndlela leyi xingheniso xa Pisalema 37 xi hi lemukisaka ha yona eka khombo ro tano, loko xi ku: “U nga karihi hikwalaho ka lava endlaka swo biha. U nga va vondzoki lava endlaka leswi nga lulamangiki.”

⁴ Siku ni siku, swihaxa-mahungu swa misava swi hi tisela swiviko swo tala swa vuhomboloki lebyi endliweke. Van’wamabindzu lava nga tshembekiki va endla vukanganyisi kambe ku nga ri na loyi a va vonaka nandzu. Swigevenga swi tlanga hi vanhu lava nga kotiki ku tilwela. Vadlayi a va khomiwi kumbe a va xupuriwi. Swikombiso sweswo hinkwaswo swa ku soholotiwa ka vululami swi nga pfindlusa vukarhi ni ku kavanyeta ku rhula ka hina emianakanyweni. Leswi hi nga swi tekaka swi ri ku nyuka ka vaendli va leswo biha swi nga endla ni leswaku hi va ni mavondzo. Kambe, xana ku  hlundzuka ka hina ku ta antswisa xiyimo? Xana ku va ni mavondzo hi leswi swi vonakaka swi ri ku nyuka ka lavo homboloka swi ta hundzula vuyelo bya vubihi bya vona? Doo! Naswona a ku na xilaveko xa ku va hi ‘kariha.’ Ha yini?

5. Ha yini vaendli va leswo biha va fanisiwa ni byanyi?

⁵ Mupisalema u hlamula a ku: “Hikuva hi ku hatlisa va ta vuna ku fana ni byanyi, hi ku hatlisa va ta vuna ku fana ni byanyi bya rihlaza lebya ha humaka.” (Pisalema 37:2) Byanyi bya rihlaza lebya ha ku rhumbukaka byi nga vonaka byi xongile, kambe a byi hlweli ku vuna ivi byi fa. Swi tano ni hi lava endlaka swo biha. Ku nyuka loku va vonakaka va ri na kona a ku nge tlhaveriwi hi dyambu. Loko va fa, rifuwo leri va ri kumeke hi ndlela yo biha a ra ha va pfuni nchumu. Eku heteleleni un’wana ni un’wana u tshovela lexi a xi byaleke. Pawulo u tsale a ku: “Hakelo leyi tisiwaka hi xidyoho i rifu.” (Varhoma 6:23) Hinkwavo lava endlaka leswo biha va ta kuma “hakelo” ya vona eku heteleleni. Vutomi byo tano i ku fukamela mandza yo bola hakunene!—Pisalema 37:35, 36; 49:16, 17.

6. Hi yihi dyondzo leyi hi nga yi kumaka eka Pisalema 37:1, 2?

⁶ Kutani, xana hi fanele hi khunguvanyeka loko hi vona vaendli va leswo biha va fuwa hi ku hatlisa? Dyondzo leyi hi yi kumaka eka tindzimana timbirhi to sungula ta Pisalema 37 hi leyi: U nga pfumeli leswaku ku nyuka ka vona ku ku hambukisa endleleni leyi u tihlawuleleke yona ya ku tirhela Yehovha. Ku ri na sweswo, tshama u ri karhi u anakanya hi mikateko ni tipakani ta swilo swa moya.—Swivuriso 23:17.

“Tshemba Yehovha U Endla Leswinene”

7. Ha yini hi fanele hi tshemba Yehovha?

⁷ Mupisalema wa hi khutaza a ku: “Tshemba Yehovha u endla leswinene.” (Pisalema 37:3a) Loko ku ri ni lexi hi karhataka kumbe hi ri ni ku kanakana ko karhi, hi fanele hi tshemba Yehovha swinene. Hi yena Loyi a nga hi sirhelelaka hi ku helela hi tlhelo ra moya. Muxe u tsale a ku: “Mani na mani la tshamaka endhawini ya le xihundleni ya La nge Henhla-henhla u ta kuma vutshamo endzhutini wa Lowa Matimba Hinkwawo.” (Pisalema 91:1) Loko ku andza ka vuhomboloki emafambiselweni lawa ya swilo ku hi karhata, hi fanele hi titshega swinene hi Yehovha. Loko hi suleke nenge, ha tsaka loko munghana a hi pfuna. Hilaha ku fanaka, loko hi ri karhi hi ringeta ku famba hi ku tshembeka, hi ta lava nseketelo wa Yehovha.—Esaya 50:10.

8. Ku hlanganyela evutirhelini bya Vukreste swi nga hi pfuna njhani leswaku hi nga khunguvanyeki ku tlula mpimo hikwalaho ka ku nyuka ka lavo homboloka?

⁸ Xin’wana lexi nga hi pfunaka leswaku hi nga karhateki hi ku nyuka ka lavo homboloka i ku khomeka hi ntirho wa ku lavisisa vanhu lava fanaka ni tinyimpfu, hi va pfuna leswaku va kuma vutivi lebyi kongomeke malunghana ni xikongomelo xa Yehovha. Loko vuhomboloki byi ya byi andza, na hina hi fanele hi tinyiketela swinene eku pfuneni ka van’wana. Muapostola Pawulo u te: “Mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.” Nchumu ‘lowunene’ ngopfu lowu hi nga wu endlaka i ku byela van’wana mahungu lamanene ya Mfumo wa Xikwembu. Entiyisweni ku chumayela ka hina erivaleni i “xitlhavelo xa ku dzunisa.”—Vaheveru 13:15, 16; Vagalatiya 6:10.

9. Hlamusela xikhutazo xa Davhida xa ku “tshama emisaveni.”

⁹ Davhida u ya emahlweni a ku: “Tshama emisaveni, kutani u endla hi ku tshembeka.” (Pisalema 37:3b) ‘Misava’ ya le nkarhini wa Davhida a ku ri ndhawu leyi Yehovha a yi nyikeke Vaisrayele, ku nga Tiko leri Tshembisiweke. Hi nkarhi wa ku fuma ka Solomoni, ndhawu leyi a yi suka eDani le n’walungwini yi ya fika eBera-xeba hala dzongeni. A ku ri rona kaya ra Vaisrayele. (1 Tihosi 4:25) Namuntlha,  ku nga khathariseki lomu hi tshamaka kona emisaveni, hi langutele nkarhi lowu ndhawu hinkwayo yi nga ta va paradeyisi emisaveni leyintshwa yo lulama. Kambe sweswi hi le ndhawini leyi hlayisekeke hi tlhelo ra moya.—Esaya 65:13, 14.

10. Ku va ni vuyelo byihi loko hi “endla hi ku tshembeka”?

¹⁰ Vuyelo byi ta va byihi loko hi “endla hi ku tshembeka”? Xivuriso lexi huhuteriweke xa hi tsundzuxa xi ku: “Munhu wa swiendlo swo tshembeka u ta kuma mikateko yo tala.” (Swivuriso 28:20) Loko hi phikelela hi chumayela mahungu lamanene hi ku tshembeka kwihi ni kwihi laha hi tshamaka kona naswona hi nga hlawuli munhu, a hi tiyisekeni leswaku Yehovha u ta hi hakela. Hi xikombiso, Frank ni nkatakwe Rose, va sungule ntirho wa vuphayona malembe ya 40 lama hundzeke edorobeni rin’wana leri nga en’walungwini wa Scotland leri a va averiwe eka rona. Vanhu va nga ri vangani lava a va kombise ku tsakela ntiyiso kwalaho ana se a va tlhelele endzhaku. Handle ko hela matimba, mpatswa lowu wa maphayona wu sungule ntirho wo chumayela ni wa ku endla vadyondzisiwa. Sweswi ku ni vandlha leri kulaka edorobeni rolero. Hakunene Yehovha u katekise ku tshembeka ka mpatswa lowu. Hi ku titsongahata Frank u te: “Lexi hi tsakisaka ngopfu hileswi ha ha riki entiyisweni nileswi Yehovha a yaka emahlweni a hi tirhisa.” Ina, loko hi “endla hi ku tshembeka,” hi kuma mikateko yo tala leyi hi yi tlangelaka.

“Kuma Ntsako Lowu Heleleke Eka Yehovha”

11, 12. (a) Hi nga wu “kuma [njhani] ntsako lowu heleleke eka Yehovha”? (b) I pakani yihi leyi u nga tivekelaka yona eka dyondzo ya wena n’wini, naswona vuyelo byi nga va byihi?

¹¹ Leswaku hi tiyisa vuxaka bya hina na Yehovha ni ku tshemba yena minkarhi hinkwayo, hi fanele hi “kuma ntsako lowu heleleke eka Yehovha.” (Pisalema 37:4a) Hi nga wu kuma njhani? Ematshan’weni ya ku titshandza ngopfu hi xiyimo xa hina, hambiloko xi tika, ngopfu-ngopfu hi fanele hi anakanya hi Yehovha. Sweswo hi nga swi endla hi ku tinyika nkarhi wa ku hlaya Rito rakwe. (Pisalema 1:1, 2) Xana ku hlaya ka wena Bibele swi ku tisela ntsako? Swi ta ku tsakisa ntsena loko u hlaya hi xikongomelo xo kuma vutivi lebyi engetelekeke malunghana na Yehovha. Endzhaku ko hlaya xiyenge xo karhi, ha yini u nga yimi u tivutisa xivutiso lexi nge, ‘Xana xiyenge lexi xi ndzi dyondzise yini malunghana na Yehovha?’ U nga ha kuma swi pfuna ku hlaya Bibele u ri na buku kumbe phepha ro tsalela tinhla eka rona. Nkarhi na nkarhi loko u yima u anakanyisisa hi nhlamuselo ya leswi wa ha ku swi hlayaka, tsala xiga lexi nga ta ku tsundzuxa yin’wana ya timfanelo letinene ta Xikwembu. Eka pisalema yin’wana, Davhida u yimbelerile a ku: “Marito ya nomu wa mina ni ku anakanyisisa ka mbilu ya mina a ku tsakise emahlweni ka wena, Wena Yehovha Ribye ra mina ni Mukutsuri wa mina.” (Pisalema 19:14) Ku tinyiketela hi ndlela leyi eku kambisiseni ka Rito ra Xikwembu swi ‘tsakisa’ Yehovha swi tlhela swi tsakisa na hina.

¹² Hi nga wu kumisa ku yini ntsako hi ku dyondza ni ku anakanyisisa? Hi nga tivekela pakani ya ku dyondza swo tala hilaha hi nga kotaka hakona malunghana na Yehovha ni tindlela ta yena. Tibuku to tanihi leyi nge Nghwazi Leyi Tshameke Yi Hanya ni leyi nge Tshinela Eka Yehovha * ti ni rungula ro tala leri hi nga ri tlangelaka loko hi anakanyisisa ha rona. Kutani Davhida u tiyisekisa lavo lulama leswaku Yehovha “u ta [va] nyika leswi komberiwaka hi mbilu ya [vona].” (Pisalema 37:4b) Muapostola Yohane u fanele a tiyisekisiwe hi sweswo loko a susumeteleka ku tsala marito lama nge: “Ku tiyiseka loku hi nga na kona [hi Xikwembu], i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa. Ku tlula kwalaho, loko hi tiva leswaku xa hi twa malunghana ni xin’wana ni xin’wana lexi hi xi kombelaka,  ha swi tiva leswaku hi ta swi kuma swilo leswi hi swi kombelaka tanihi leswi hi swi kombelaka eka xona.”—1 Yohane 5:14, 15.

13. Emalembeni ya sweswinyana, ntirho wo chumayela hi timhaka ta Mfumo wu kule njhani ematikweni yo tala?

¹³ Tanihi vahlayisi va vutshembeki, nchumu lowu hi wu languteleke hi mahlo-ngati i ku vona ku lweriwa ka vuhosi bya Yehovha. (Swivuriso 27:11) Xana timbilu ta hina a ti khapi hi ntsako loko hi tivisiwa leswaku vamakwerhu va endla ntirho lowukulu wa ku chumayela ematikweni lawa a ma fumiwa hi voko ra nsimbi? Hi swi langutele hi mahlo-ngati ku vona leswaku hi kwihi kun’wana laha ku nga ta va ni ntshunxeko emahlweni ka ku hela ka mafambiselo lawa ya swilo. Malandza yo tala ya Yehovha lama tshamaka laha ntirho wa Vukreste wu endliwaka hi ku ntshunxeka ma khomeke ngopfu hi ntirho wo chumayela eka swichudeni, vabaleki ni van’wana lava yaka va ya tshamanyana ematikweni yo tano lama nga ni ntshunxeko wa vugandzeri. Hi khongelela leswaku loko vanhu vo tano va tlhelela ekaya, va hambeta va endla leswaku ku vonakala ka ntiyiso ku voninga ni laha ku vonakaka ku ri ni munyama lowukulu.—Matewu 5:14-16.

“Andlala Ndlela Ya Wena Eka Yehovha”

14. Hi byihi vumbhoni lebyi kombisaka leswaku Yehovha wa hi seketela loko hi titshega hi yena?

¹⁴ Swa phyuphyisa hakunene ku tiva leswaku mivilelo ni mintshikilelo ya hina swi nga susiwa! Njhani? “Andlala ndlela ya wena eka Yehovha,” ku vula Davhida, a tlhela a ya emahlweni a ku, “yena u ta teka goza.” (Pisalema 37:5) Emavandlheni ya hina ku ni vumbhoni lebyikulu bya leswaku Yehovha wa hi seketela loko hi titshega hi yena. (Pisalema 55:22) Lava va nga entirhweni wa nkarhi hinkwawo, hambi i maphayona, valanguteri lava famba-fambaka, varhumiwa kumbe lava tirhaka eBethele, hinkwavo va nga swi tiyisekisa leswaku Yehovha wa va khathalela hakunene. Ha yini u nga vulavuli ni lava u va tivaka, u kumisisa ndlela leyi Yehovha a va pfuneke ha yona? Handle ko kanakana u ta twa mintokoto yo tala leyi kombaka leswaku Yehovha a nga va tshiki vanhu vakwe, niloko swiyimo swi tika. Minkarhi hinkwayo u va nyika swilo swa nkoka evuton’wini.—Pisalema 37:25; Matewu 6:25-34.

15. Ku lulama ka vanhu va Xikwembu ku voninga hi ndlela yihi?

¹⁵ Loko hi tshemba Yehovha hi ku helela, hi nga vona ku hetiseka ka leswi mupisalema a yeke emahlweni a swi hlamusela, loko a ku: “Kunene u ta humesa ku lulama ka wena tanihi ku vonakala, ni vululami bya wena kukota nhlikanhi.” (Pisalema 37:6) Tanihi Timbhoni ta Yehovha, hakanyingi hi onhiwa vito. Kambe Yehovha u pfula mahlo ya vanhu  lavo tshembeka, a va pfuna va vona leswaku ntirho wa hina wo chumayela hi wu endla hileswi hi rhandzaka Yehovha ni vaakelani. Hi nkarhi lowu fanaka, vanhu va kota ku vona mahanyelo ya hina lamanene, hambiloko vo tala va hi onha vito. Yehovha wa hi tiyisa minkarhi hinkwayo loko hi kanetiwa ni loko hi xanisiwa. Hikwalaho, ku lulama ka vanhu va Xikwembu ku voninga ku fana ni dyambu leri baka thavathava.—1 Petro 2:12.

‘Miyela U Rindza Hi Ku Swi Rhandza’

16, 17. Ku pfumelelana ni tsalwa ra Pisalema 37:7, sweswi i nkarhi wa yini, naswona ha yini?

¹⁶ Mupisalema u ya emahlweni a ku: “Miyela emahlweni ka Yehovha n’wi rindzele hi ku swi rhandza. U nga karihi loko un’wana a humelela endleleni yakwe, munhu la hetisisaka mianakanyo yakwe.” (Pisalema 37:7) Laha Davhida u kandziyisa xilaveko xa ku va hi rindzela Yehovha hi ku lehisa mbilu leswaku a teka goza. Hambileswi makumu ya mafambiselo lawa ma nga si fikaka, a hi fanelanga hi karhateka hi sweswo. Xana a hi swi xiyanga leswaku tintswalo ta Yehovha ni ku lehisa mbilu ka yena i swikulu ku tlula leswi a hi anakanyisa swona eku sunguleni? Xana na hina se hi kota ku kombisa moya wa ku lehisa mbilu entirhweni wa ku chumayela mahungu lamanene hi ku hiseka, makumu ma nga si fika? (Marka 13:10) Lowu a hi nkarhi wa ku endla swilo hi matlotlo, hikuva sweswo swi nga hi tekela ntsako ni vuhlayiseki bya moya. Sweswi hi fanele hi lwisana hi matimba ni nhlohlotelo wo biha wa misava ya Sathana. Nakambe enkarhini wa sweswi hi fanele hi lwela ku tshama hi tengile emahanyelweni, hi nga tshiki nchumu xi onha vuxaka bya hina na Yehovha. A hi hambeteni hi bakanya mianakanyo ya vudlakuta, hi papalata ku endla swilo leswi nga xiximekiki eka munhu wa rimbewu leri hambaneke, hambi ku ri wa rimbewu leri fanaka.—Vakolosa 3:5.

¹⁷ Davhida wa hi tsundzuxa a ku: “Tshika ku hlundzuka, siya vukarhi; u nga kariheli ku endla swo biha. Hikuva lava endlaka swo biha va ta herisiwa, kambe lava tshembaka Yehovha hi vona lava nga ta dya ndzhaka ya misava.” (Pisalema 37:8, 9) Ina, hi nga wu langutela hi mahlo-ngati hakunene nkarhi lowu se wu tshineleke swinene, lowu ha wona Yehovha a nga ta susa vuhomboloki hinkwabyo emisaveni, a susa ni vaendli va byona hinkwavo.

“Hi Nkarhinyana”

18, 19. Hi xihi xikhutazo lexi u xi kumaka eka Pisalema 37:10?

¹⁸ “Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona.” (Pisalema 37:10) Marito lawa ma hi khutaza swinene tanihi leswi hi tshinelelaka makumu ya mafambiselo lawa ni ya moya wa ku ala ku tiveka ehansi ka Yehovha! Hulumendhe kumbe vulawuri byihi ni byihi lebyi simekiweke hi vanhu byi hluleke hi ndlela leyi hlomulaka mbilu. Sweswi hi le kusuhi ni nkarhi wa ku vuyeteriwa ka vulawuri bya xiviri bya Xikwembu, Mfumo wa Yehovha lowu nga ehansi ka Yesu Kreste. Wu ta lawula swilo hinkwaswo emisaveni, wu susa vakaneti hinkwavo va Mfumo wa Xikwembu.—Daniyele 2:44.

¹⁹ Emisaveni leyintshwa leyi nga ta va ehansi ka Mfumo wa Xikwembu, hambi wo lavisisa hi vukheta, u wu nge n’wi kumi “lowo homboloka.” Ina, mani na mani loyi a nga ta xandzukela Yehovha enkarhini wolowo u ta hatla a susiwa. Loyi a lwisanaka ni vuhosi byakwe kumbe loyi a alaka ku tiveka ehansi ka byona a nge wu veki kwalaho. Vaakelani va wena hinkwavo va ta va ni mianakanyo yin’we ya ku lava ku tsakisa Yehovha. Sweswo swi ta tisa nsirhelelo lowukulu—a ku nge he laveki maloko ni tinsimbhi to goga hi tona, kambe vanhu va ta hanya hi ku tshembana va ri ni ntsako lowukulu!—Esaya 65:20; Mikiya 4:4; 2 Petro 3:13.

20, 21. (a) I vamani “lavo rhula” lava ku vulavuriwaka ha vona eka Pisalema 37:11, naswona va ku kuma kwihi ‘ku rhula lokukulu’? (b) Hi yihi mikateko leyi hi nga ta yi kuma loko hi tekelela Davhida Lonkulu?

²⁰ Kutani “lavo rhula va ta dya ndzhaka ya misava.” (Pisalema 37:11a) Kambe, xana i vamani vanhu “lavo rhula” lava ku vulavuriwaka ha vona? Rito leri hundzuluxeriweke ri va “rhula” ri huma  eka rimitsu leri vulaka “ku xanisa, ku tsongahata, ku khomisa tingana.” Ina, “lavo rhula” hi lava va rindzelaka Yehovha hi ku titsongahata leswaku a lulamisa vuhomboloki hinkwabyo lebyi va weleke. “Hakunene va ta kuma ntsako lowu heleleke eku rhuleni lokukulu.” (Pisalema 37:11b) Hambi ku ri sweswi hi va ni ku rhula lokukulu eparadeyisini ya moya leyi fambisanaka ni vandlha ra ntiyiso ra Vukreste.

²¹ Hambileswi hi nga si humulaka emaxangwini ya hina, ha seketelana hi tlhela hi chavelela lava nga ni gome. Hikwalaho, vanhu va Yehovha va kondletela ntsako wa xiviri exikarhi ka vona. Vamakwerhu lava vekiweke leswaku va va varisi va khathalela swilaveko swa hina swa moya—minkarhi yin’wana ni swa nyama—va hi pfuna ku tiyisela maxangu lawa hi kombiwaka wona hileswi hi endlaka leswo lulama. (1 Vatesalonika 2:7, 11; 1 Petro 5:2, 3) Ku rhula loku hi nga na kona i ka nkoka swinene! Nakambe hi ni ntshembo wa ku hanya hi masiku eParadeyisini leyi tshineleke yo rhula. Kutani onge hi nga tekelela Davhida Lonkulu, ku nga Kreste Yesu, loyi ku hisekela ka yena Yehovha ku n’wi susumeteleke leswaku a n’wi tirhela hi ku tshembeka ku fikela emakumu. (1 Petro 2:21) Loko hi endla tano, hi ta hambeta hi kuma ntsako, hi dzunisa Yehovha Xikwembu xa hina, lexi hi nyikaka ntsako wo tano lowu heleleke.

[Nhlamuselo ya le hansi]

U Nga Hlamula Xana?

• I yini leswi u swi dyondzeke eka Pisalema 37:1, 2?

• U nga endla yini leswaku u “kuma ntsako lowu heleleke eka Yehovha”?

• Hi byihi vumbhoni lebyi nga kona bya leswaku Yehovha u ta hi seketela loko hi titshega ha yena?

[Swivutiso Swa Dyondzo]

[Xifaniso lexi nga eka tluka 9]

Vakreste ‘a va va vondzoki lava endlaka leswi nga lulamangiki’

[Xifaniso lexi nga eka tluka 10]

“Tshemba Yehovha u endla leswinene”

[Xifaniso lexi nga eka tluka 11]

Kuma ntsako lowu heleleke eka Yehovha hi ku dyondza swo tala hilaha u nga kotaka hakona ha yena

[Xifaniso lexi nga eka tluka 12]

“Lavo rhula va ta dya ndzhaka ya misava”