“Lunghekela Ntirho Wun’wana Ni Wun’wana Lowunene”

“HAMBETA u va tsundzuxa leswaku va tiveka ehansi ka tihulumendhe ni valawuri naswona va va yingisa hileswi va nga vafumi, va lunghekela ntirho wun’wana ni wun’wana lowunene.” (Tito 3:1) Xana hi wihi ntirho lowunene lowu muapostola Pawulo a a anakanya ha wona loko a tsalela vapfumeri-kulobye marito lawa? Xidyondzi xa Bibele E. F. Scott u kombetele eka muxaka wun’we wa ntirho lowunene, loko a ku: “Vakreste a va fanelanga va yingisa vulawuri ntsena kambe va fanele va lunghekela ntirho wun’wana ni wun’wana lowunene. . . . Loko ku ri ni xilaveko, Vakreste va fanele ku va exikarhi ka vanhu vo sungula eku khathaleleni ka vaaka-tiko. Ku ta tshama ku ri ni swilo swo fana ni ndzilo, mintungu, makhombo yo hambana-hambana, lama nga ta endla leswaku vaaka-tiko lavanene va tsakela ku pfuna vaakelani va vona.”

Vakreste va hlanganyela emintirhweni yin’wana leyi vuyerisaka tiko ntsendze loko yi nga lwisani ni nawu wa Xikwembu. (Mintirho 5:29) Hi xikombiso, lembe ni lembe eJapani le Ebina, hofisi ya rhavi ya Timbhoni ta Yehovha yi endla nkombiso wo tisirhelela loko ku ri ni ndzilo, yi landzela xileriso xa ndzawulo ya ndzilo ya kwalaho. Hi minkarhi yo tano, swirho hinkwaswo swa ndyangu wa Bethele swa hlengeletana leswaku swi ta yingisa swiletelo leswi nyikeriwaka hi muyimeri wa ndzawulo ya ndzilo ya kwalaho.

Ku tlula kwalaho, se ku hele malembe ya khume rhavi ri ri karhi ri tirhisana ni valawuri va ndhawu eka nkombiso lowu khutazaka ku sivela makhombo ya ndzilo. Eka nkombiso lowu, tikhampani ni tifeme ta le dorobeni ti kombisa ndlela leyi ti swi lunghekeleke ha yona ku tima ndzilo ni ku wu lawula. Minkarhi yo tala rhavi ri bumabumeriwile hikwalaho ka vutshila ni ntirhisano wa vanhu va rona. Hi lembe ra 2001 ri kume sagwadi ro sungula eka nkombiso lowu. Va swi lunghekerile ku endla ntirho lowunene lowu nga ponisaka vutomi loko ko tshuka ku va ni ndzilo.

Ntirho Wa Risima

Hambiswiritano, Timbhoni ta Yehovha ti hisekela swinene ku endla muxaka wun’wana wa ntirho lowunene lowu nga wa nkoka swinene, lowu na wona wu ponisaka vutomi. Nkarhi na nkarhi ti endzela vaakelani va tona leswaku ti avelana na vona mahungu lamanene ya Mfumo wa Xikwembu. (Matewu 24:14) Timbhoni ti khutaza vanhu leswaku va dyondza ni ku tirhisa misinya ya milawu ya Bibele evuton’wini bya vona leswaku va ta hanya vutomi byo antswa sweswi va tlhela va va ni ntshembo wa vutomi lebyi nga heriki, emisaveni leyi nga ta va ni ku rhula ka ntiyiso ni nsirhelelo.

Van’wana va nga ha tsandzeka ku xiya leswaku ntirho lowu endliwaka hi Timbhoni ta Yehovha i wa nkoka naswona va nga ti teka tanihi vanhu lava phirhaka. Hambiswiritano, Muavanyisi Jean Crepeau wa Huvo Leyi Tlakukeke ya le Quebec le Canada, yena u ni vonelo leri hambaneke. Edorobeni ra Blainville le Quebec, Timbhoni ta Yehovha a ti nga twanani ni nawu lowu vekiweke edorobeni rero, lowu a wu vula leswaku ti fanele ti kuma mpfumelelo wo nghena hi yindlu na yindlu. Loko a hlaya xiboho xa huvo, Muavanyisi Crepeau u te: “Maendzo ya Timbhoni ta Yehovha i ntirho wa Vukreste lowu vuyerisaka tiko naswona . . . minkandziyiso leyi Timbhoni ti yi nyikaka vanhu lava tsakelaka i minkandziyiso ya nkoka, yi vulavula hi  timhaka to fana ni vukhongeri, Bibele, swidzidzirisi, vundzendzele, dyondzo ya vantshwa, swiphiqo swa vukati ni ku dlaya vukati.” Xiboho xi ye emahlweni xi ku: “Huvo yi gimeta hi ku vula leswaku ku fanisa Timbhoni ta Yehovha ni vaxavisi i ndzhukano, swa tsongahata, swa vavisa naswona i vulumbeti.”

Timbhoni ta Yehovha ti hoxa xandla eka vuhlayiseki bya vaakelani va tona hi ku pfuna vanhu leswaku va hlula swiphiqo swa vutomi bya vona bya siku na siku, ni ku va nyika ntshembo wa nkarhi lowu taka. Bibele hi yona yi va hlomisaka leswaku va hetisisa ntirho wolowo. “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni, leswaku munhu wa Xikwembu a faneleka hi ku helela, a hlomisiwa hi ku helela eka ntirho wun’wana ni wun’wana lowunene.”—2 Timotiya 3:16, 17.

Xana wa swi lava ku tiva ndlela leyi Timbhoni ta Yehovha ti pfuniwaka ha yona leswaku ti “lunghekela ntirho wun’wana ni wun’wana lowunene”? Ha ku kombela leswaku u amukela xirhambo xa tona xa ku ku pfuna leswaku u dyondza leswi engetelekeke hi Bibele, kutani hi ndlela yoleyo na wena u ta kota ku endla ntirho lowu wa nkoka wo pfuna vaakelani, lowu ti wu endlaka endhawini ya ka n’wina ni le misaveni hinkwayo.

[Swifaniso leswi nga eka tluka 30, 31]

Timbhoni ta Yehovha ta swi lava ku khomisana ni valawuri va tiko

[Xifaniso lexi nga eka tluka 31]

Timbhoni ta tiviwa hikwalaho ka ku pfuna vaakelani va tona