Xiviko Xa Vahuweleri Va Mfumo

Nongonoko Wa Thelevhixini Wu N’wi Pfune Leswaku A Dzunisa Xikwembu

MUAPOSTOLA PAWULO u vule leswaku “van’wana va chumayela Kreste hi mona ni nkwetlembetano, kambe van’wanyana va chumayela hi ku tirhisa vunene.” (Vafilipiya 1:15) Nkarhi wun’wana, hambi ku ri lava va ringetaka ku onha vito ra vanhu va Yehovha, handle ko swi xiya va endle leswaku vanhu va timbilu letinene va amukela ntiyiso.

Hi November 1998, enongonokweni wa thelevhixini ya tiko ya le Furwa, ku kombisiwe miako ya Bethele, ku nga rhavi ra Timbhoni ta Yehovha le Louviers, eFurwa. Hambileswi vanhu va anguleke hi tindlela to hambana, nongonoko lowu wu tise vuyelo lebyinene swi nga languteriwanga.

Anna-Paula i un’wana wa lava a va hlalele nongonoko lowu, naswona kaya ra yena ri le ka mpfhuka wa tikhilomitara ta 60 ku suka eBethele. Anna-Paula, manana la tshikiweke hi nuna naswona a nga ni vana vambirhi, a a lava ntirho. Kutani hi mixo lowu landzeleke, u bele Bethele riqingho, a kombela ntirho. U te: “Nongonoko lowu wa thelevhixini wu ndzi endla ndzi vona leswaku leyi i ndhawu ya kahle swinene ni leswaku ku endliwa ntirho lowu pfunaka.” U hlamale swinene loko a twa leswaku vanhu hinkwavo lava tirhaka eBethele i vatirhi va ku tirhandzela! Endzhaku ko vulavurisana na yena katsongo hi ntirho wa Timbhoni ta Yehovha, u pfumerile leswaku Mbhoni yi nga n’wi endzela.

Loko Léna, la nga mutirheli wa nkarhi hinkwawo evandlheni ra kwalaho, a n’wi endzerile, va vulavule nkarhi wo leha naswona Anna-Paula u amukele buku leyi nge Vutivi Lebyi Yisaka eVuton’wini Lebyi Nga Heriki. * Eka riendzo leri landzelaka, Anna-Paula se a a hetile ku hlaya buku leyi naswona a a ri ni swivutiso swo tala. Handle ko hlwela u amukele dyondzo ya Bibele. Anna-Paula u te: “Eka mina, leswi swi ndzi nyike nkarhi wa ku tiva Rito ra Xikwembu. A ndzi nga si tshama ndzi va ni Bibele.”

Hi January, Anna-Paula u endzele Bethele kutani hi vhiki leri landzelaka a ya eka nhlangano wakwe wo sungula wa Vukreste. Endzhakunyana ka sweswo, u sungule ku dyondza Bibele ni vana vakwe ni ku chumayela vanghana vakwe. U ri: “A ndzi nga swi koti ku miyela ni leswi ndzi swi dyondzaka. A ndzi lava ku byela van’wana rungula ra Bibele ni ku va chavelela.” Endzhaku ko dodombisana ni swiphiqo swo hlayanyana swa munhu hi xiyexe, Anna-Paula u sungule ku ya eminhlanganweni nkarhi na nkarhi. U endle nhluvuko hi ku hatlisa naswona u khuvuriwile hi May 5, 2002.

Ku tlula kwalaho, hikwalaho ka xikombiso lexinene xa Anna-Paula ni ku chumayela ka yena hi ku hiseka, mana wakwe u sungule ku dyondza Bibele kutani a khuvuriwa endzhakunyana. Anna-Paula u ri: “A ndzi tikoti hi ku tsaka. Siku ni siku ndzi nkhensa Yehovha hi leswi a nga endla leswaku ndzi n’wi tiva ni ku n’wi gandzela, swin’we ni mikateko hinkwayo leyi a ndzi nyikeke yona.”

[Nhlamuselo ya le hansi]

[Swifaniso leswi nga eka tluka 8]

Ehenhla: Anna-Paula

Ehansi: Nyangwa wo nghena ehofisini ya rhavi ya le Furwa