Swihlovo Leswi Nga Hlayisiki Mati

EMINKARHINI ya Bibele, swihlovo a ku ri migodi leyi ceriweke hi vanhu, leyi ngopfu-ngopfu a yi endleriwa ku hlayisa mati. Eka tinguva tin’wana, a ku ri swona ntsena leswi a swi hlayisa mati lama kalaka eTikweni leri Tshembisiweke.

Loko a tsala marito lama vuriweke hi Xikwembu, muprofeta Yeremiya u vulavule hi swihlovo hi ndlela yo fanekisela a ku: “Ku ni swilo swimbirhi swo biha leswi vanhu va mina va swi endleke: Va ndzi siyile, mina xihlovo xa mati lama hanyaka, leswaku va ya ticelela swihlovo, swihlovo leswi boxekeke, leswi nga kotiki ku hlayisa mati.”—Yeremiya 2:13.

Loko va fularhele Xikwembu xa vona, Yehovha—“xihlovo xa mati lama hanyaka”—Vaisrayele va endle ntwanano lowu tsekatsekaka ni matiko ya vuhedeni leswaku va ta kuma nsirhelelo wa swa matlhari va tlhela va sungula ku gandzela swikwembu swa hava leswi nga pfuniki nchumu. Hi ku ya hi xifaniso xa Yeremiya, tindhawu ta vona ta vutumbelo a ti fana ni swihlovo leswi boxekeke, leswi swi nga riki na wona matimba yo va sirhelela ni ku va ponisa.—Deteronoma 28:20.

Xana namuntlha ku ni dyondzo leyi hi yi kumaka eka xikombiso lexi xa nkarhi lowu hundzeke? Hilaha a swi ri hakona esikwini ra Yeremiya, Yehovha Xikwembu lexi nga riki na makumu, u hambeta a ri Xihlovo xi ri xin’we ntsena xa mati ya vutomi. (Pisalema 36:9; Nhlavutelo 4:11) Vanhu va nga kuma vutomi lebyi nga heriki eka yena ntsena, ha Yesu Kreste, N’wana wa yena. (Yohane 4:14; 17:3) Hambiswiritano, ku fana ni vanhu va le nkarhini wa Yeremiya, namuntlha mintshungu yi ala rito ra Xikwembu leri hlamuseriweke eBibeleni yi tlhela yi ri tekela ehansi. Ematshan’weni ya sweswo, yi veka ntshembo wa yona eka ntlhantlho wa tipolitiki, mianakanyo ya vanhu leyi nga pfuniki nchumu ni tifilosofi ta vanhu leti sandzaka Xikwembu. (1 Vakorinto 3:18-20; Vakolosa 2:8) Swi le rivaleni leswaku hi yihi ndhawu yo antswa leyi hi nga vekaka ntshembo wa hina eka yona. Xana ntshembo wa wena u ta wu veka kwihi? Xana u ta wu veka eka Yehovha, “xihlovo xa mati lama hanyaka,” kumbe eka “swihlovo leswi boxekeke, leswi nga kotiki ku hlayisa mati”?

[Xifaniso lexi nga eka tluka 32]

Xifaniso xa xikwembukati lexi endliweke hi vumba lexi kumiweke esirheni ra le Israyele

[Xihlovo Xa Kona]

Photograph taken by courtesy of the British Museum