Swivutiso Swa Vahlayi

Xana Ezekiyele u ‘tsandzeke ku vulavula’ hi ndlela yihi hi nkarhi wa ku rhendzeriwa ni ku lovisiwa ka Yerusalema?

Entiyisweni, leswi swi vula leswaku a a nga ri na lexi a nga xi engetelaka eka rungula ra Yehovha ra vuprofeta leri ana se a ri byeleke vanhu.

Muprofeta Ezekiyele u sungule ntirho wa yena tanihi murindzi wo tshembeka loko Vaisrayele va ha ri mahlonga eBabilona hi “lembe ra vuntlhanu ra ku yisiwa ka Hosi Yoyakini evukhumbini,” ku nga 613 B.C.E. (Ezekiyele 1:2, 3) Hi siku ra vukhume ra n’hweti ya vukhume ya 609 B.C.E., moya wa Xikwembu wu n’wi byele hi ta ku sungula ka ku rhendzeriwa ka Yerusalema hi Vababilona. (Ezekiyele 24:1, 2) A byi ta va byihi vuyelo bya ku rhendzeriwa loku? Xana muti wa Yerusalema ni vaaki va wona lava nga riki na ripfumelo a va ta pona? Ezekiyele, tanihi leswi a a ri murindzi, ana se a a va byerile hi ta ku avanyisa ka Yehovha loku nga ta ta hakunene naswona a ku nga ri na xilaveko xa leswaku Ezekiyele a engetela swin’wana, onge hiloko sweswo swi ta endla leswaku rungula rero ri va leri khorwisaka swinene. Ezekiyele u miyerile a nga vulavuli malunghana ni xin’wana ni xin’wana lexi khumbaka ku rhendzeriwa ka Yerusalema.—Ezekiyele 24:25-27.

Loko ku hundze tin’hweti ta tsevu muti wa Yerusalema wu lovisiwile hi 607 B.C.E., un’wana wa lava balekeke u te eBabilona a ta byela Ezekiyele leswaku muti wo kwetsima wu sale wu ri rhumbi. Hi xa tolo wa kona loko mubaleki loyi a nga si fika, Yehovha u ‘pfule nomu wa Ezekiyele, kutani a kota ku vulavula.’ (Ezekiyele 33:22) Ina, Ezekiyele u tlhele a kota ku vulavula.

Xana, Ezekiyele hakunene a a tsandzeka ku vulavula hi nkarhi wolowo? A swi kanakanisi leswaku a a swi kota ku vulavula hikuva hambi ku ri endzhaku ka ku “tsandzeka ku vulavula,” u vule vuprofeta lebyi a a byi kongomisiwe ngopfu eka matiko lama nga ekusuhi lawa a ma tsakile hikwalaho ka ku wa ka Yerusalema. (Ezekiyele, tindzima 25-32) Loko Ezekiyele a ha ku sungula ntirho wakwe wa ku va muprofeta ni murindzi, Yehovha u vulavule na yena a ku: “Ririmi ra wena ndzi ta ri namarheta ehenhla ka nomu wa wena, kunene u ta va mbheveve, u nga ka u nga vi munhu loyi a va tshinyaka, hikuva i yindlu leyi xandzukaka. Kutani loko ndzi vulavula na wena ndzi ta pfula nomu wa wena.” (Ezekiyele 3:26, 27) Loko Yehovha a nga ri na rungula ra ku ri byela Israyele, Ezekiyele a a fanele a tshama a nga vuli nchumu malunghana ni tiko rero. Ezekiyele a a fanele a vulavula ntsena leswi Yehovha a a lava leswaku a vula swona, hi nkarhi lowu Yehovha a lavaka leswaku a swi vula ha wona. Ku tsandzeka ku vulavula ka Ezekiyele swi vula leswaku a a miyela a nga ma vuli marito ya vuprofeta eka Vaisrayele.

Ntlawa wa varindzi wa manguva lawa, ku nga Vakreste lava totiweke, i khale va ri karhi va tsundzuxa hi ta ku lovisiwa ka Vujagana, lebyi fanekiseriwaka hi Yerusalema. Loko “nhlomulo lowukulu” wu sungula kutani wu lovisa “Babilona Lonkulu,” ku nga mfumo wa misava wa vukhongeri bya mavunwa, ntlawa wa Ezekiyele wa vatotiwa a wu nge he vuli nchumu malunghana ni ku lovisiwa ka Vujagana, lebyi ku nga byona byi nga xiphemu lexikulu xa mfumo wolowo.—Matewu 24:21; Nhlavutelo 17:1, 2, 5.

Ina, siku ri ta ta leri ha rona masalela lama totiweke ni vanghana va vona va nga ta tsandzeka ku vulavula, laha va nga ta va va nga ha ri na nchumu xo xi vula eka Vujagana. Sweswo swi ta endleka loko “timhondzo ta khume” ni “xivandzana” swi hlakata ni ku swerisa Babilona Lonkulu. (Nhlavutelo 17:16) Kambe, leswi a swi vuli swona leswaku Vakreste va ta va va tsandzeka ku vulavula hi xiviri. Tanihi laha va endlaka hakona sweswi, va ta dzunisa Yehovha ni ku vulavula ha yena siku ni siku ni le ka “switukulwana hinkwaswo leswi nga ta ta.”—Pisalema 45:17; 145:2.