“Tikombeni Mi Ri Ni Ku Nkhensa”

“Ku rhula ka Kreste a ku mi lawule etimbilwini ta n’wina . . . Kutani tikombeni mi ri ni ku nkhensa.”—VAKOLOSA 3:15.

1. I ku hambana kwihi loku hi ku vonaka exikarhi ka vandlha ra Vukreste ni misava leyi lawuriwaka hi Sathana?

MOYA wa ku nkhensa wa vonaka emavandlheni ya 94 600 ya Timbhoni ta Yehovha emisaveni hinkwayo. Nhlangano wun’wana ni wun’wana wu pfuriwa wu tlhela wu pfariwa hi xikhongelo lexi hlanganisaka ni marito ya ku nkhensa Yehovha. Hakanyingi hi twa marito lama nge “inkomu,” “swa nkhenseka,” kumbe man’wana yo fana ni wolawo lama humaka emilon’wini ya vana ni vanhu lavakulu kun’we ni Timbhoni letintshwa ni leta khale loko ti hlangana swin’we evugandzerini kumbe eku tihungaseni. (Pisalema 133:1) Sweswo swi hambane ngopfu ni moya wa vutianakanyi lowu kombisiwaka hi vo tala ‘lava nga n’wi tiviki Yehovha ni lava nga ma yingisiki mahungu lamanene’! (2 Vatesalonika 1:8) Hi hanya emisaveni leyi nga riki na moya wa ku nkhensa. Kambe sweswo a swi hlamarisi loko hi tsundzuka leswaku xikwembu xa misava leyi i Sathana Diyavulosi, loyi a nga mathwarivona eka moya wa vutianakanyi, naswona u hlohlotela vanhu leswaku va dzaha moya wakwe wa ku tikukumuxa ni wa ku xandzuka!—Yohane 8:44; 2 Vakorinto 4:4; 1 Yohane 5:19.

2. Hi xihi xitsundzuxo lexi hi faneleke hi xi yingisa, naswona hi swihi swivutiso leswi hi nga ta swi kambisisa?

² Tanihi leswi hi rhendzeriweke hi misava ya Sathana, hi fanele hi tivonela leswaku hi nga tluleriwi hi moya wa yona. Eka lembe-xidzana ro sungula, muapostola Pawulo u tsundzuxe Vakreste va le Efesa a ku: “Mi [tshame mi famba] hi ku ya hi mafambiselo ya swilo ya misava leyi, hi ku ya hi mufumi wa vulawuri bya moya, moya lowu sweswi wu tirhaka eka vana lava nga yingisiki. Ina, exikarhi ka vona hinkwerhu hi tshame hi tikhoma hi ku pfumelelana ni ku navela ka nyama ya hina, hi endla swilo leswi rhandziwaka hi nyama ni miehleketo, naswona hi ntumbuluko a hi ri vana va ku kombisiwa vukarhi ku fana ni lavan’wana hinkwavo.” (Vaefesa 2:2, 3) Swi tano eka vo tala ni namuntlha. Kutani, xana hi nga wu hlakulela njhani moya wa ku nkhensa? Hi wihi mpfuno lowu Yehovha a hi nyikaka wona? Hi nga swi kombisa njhani hi ku kongoma  leswaku hi ni moya wa ku nkhensa hakunene?

Swivangelo Swa Ku Nkhensa

3. I yini leswi hi nkhensaka Yehovha hikwalaho ka swona?

³ Hi fanele hi nkhensa Yehovha Xikwembu, Muvumbi wa hina ni Munyiki wa Vutomi, ngopfu-ngopfu loko hi kambisisa tin’wana ta tinyiko leti a hi nyikeke tona hi xitalo. (Yakobo 1:17) Siku ni siku hi nkhensa Yehovha hileswi hi hanyaka. (Pisalema 36:9) Laha hi nga kona hi vona swilo swo tala leswi kombisaka vutshila bya Yehovha, swo tanihi dyambu, n’weti ni tinyeleti. Misava ya hina leyi teleke timinerali leti kondletelaka vutomi, xibakabaka lexi nga ni mpfangano lowu ringaneleke kahle wa mimoya ni ndzhendzheleko wo hlamarisa wa swilo swa ntumbuluko, hinkwaswo swi kombisa nchumu lowu hi wu kolotaka Tata wa hina wa le tilweni la nga ni rirhandzu. Hosi Davhida u yimbelerile a ku: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina; a nga kona la nga fanisiwaka na wena. Loko a ndzi lava ku vulavula ha yona, yi tele swinene lerova a ndzi nge yi runguli.”—Pisalema 40:5.

4. Ha yini hi fanele hi nkhensa Yehovha hikwalaho ka vuxaka lebyinene lebyi nga kona emavandlheni ya ka hina?

⁴ Malandza ya Yehovha a ma si fika eparadeyisini ya xiviri, kambe namuntlha ma tsakela vutomi eparadeyisini ya moya. ETiholweni ta hina ta Mfumo, emintsombanweni ni le tinhlengeletanweni, hi xiya ndlela leyi moya wa Xikwembu wu tirhaka ha yona eka vapfumeri-kulorhi. Ina, Timbhoni tin’wana ti tirhisa leswi Pawulo a swi hlamuseleke epapileni rakwe leri a ri tsaleleke Vagalatiya, loko ti chumayela eka vanhu lava nga riki na vutivi ngopfu hi vukhongeri. Ti rhanga ti vulavula hi “mintirho ya nyama” kutani ti vutisa vayingiseri va tona leswaku i yini leswi vona va swi xiyeke malunghana ni mhaka leyi. (Vagalatiya 5:19-23) Vo tala va hatla va swi xiya leswaku sweswo hileswi vunyingi namuntlha byi hanyisaka swona. Loko va kombiwa nhlamuselo ya mihandzu ya moya wa Xikwembu ni loko va rhamberiwe eHolweni ya Mfumo ya le ndhawini ya ka vona leswaku va ta tivonela hi voxe leswaku yi tirhisiwa njhani, vo tala va hatla va pfumela va ku: “Xikwembu xi le xikarhi ka n’wina hakunene.” (1 Vakorinto 14:25) Mihandzu yoleyo ya moya a yi vonaki eHolweni ya Mfumo ntsena. Kwihi ni kwihi laha u nga yaka kona, loko u hlangana ni un’wana ni un’wana wa Timbhoni ta Yehovha leti tlulaka timiliyoni ta tsevu, u ta kuma leswaku ti kombisa moya lowu fanaka wa ntsako. Kunene,  vuxaka byebyo lebyinene byi hi nyika xivangelo xa ku nkhensa Yehovha, loyi a hi nyikaka moya wakwe lowu kondletelaka vuxaka byo tano.—Sofaniya 3:9; Vaefesa 3:20, 21.

5, 6. Hi nga swi kombisa njhani leswaku hi nkhensa Xikwembu hikwalaho ka nyiko ya xona leyikulu eka hinkwato, ku nga nkutsulo?

⁵ Nyiko leyikulu leyi hetisekeke leyi Yehovha a hi nyikeke yona i N’wana wakwe Yesu, loyi ku nyikeriweke gandzelo ra nkutsulo hi ku tirhisa yena. Muapostola Yohane u tsarile a ku: “Loko leyi ku ri ndlela leyi Xikwembu xi hi rhandzeke ha yona, kutani hina hi boheka ku rhandzana.” (1 Yohane 4:11) Ina, nkutsulo a hi wu nkhensi hi ku kombisa rirhandzu eka Yehovha ni ku n’wi tlangela ntsena, kambe ni hi ku hanya vutomi bya hina hi ndlela leyi kombisaka rirhandzu eka van’wana.—Matewu 22:37-39.

⁶ Hi nga dyondza swo tala malunghana ni ku kombisa ku nkhensa loko hi kambisisa ndlela leyi Yehovha a va khomeke ha yona Vaisrayele va khale. Yehovha u dyondzise tiko rero swilo swo tala hi ku tirhisa Nawu lowu a ri nyikeke wona hi ku tirhisa Muxe. Hi ku tirhisa “ntila wa vutivi ni wa ntiyiso hi tlhelo ra Nawu,” hi nga dyondza swo tala leswi nga ta hi pfuna ku tirhisa xitsundzuxo xa Pawulo lexi nge: “Tikombeni mi ri ni ku nkhensa.”—Varhoma 2:20; Vakolosa 3:15.

Swilo Swinharhu Leswi Hi Nga Swi Dyondzaka eNawini Wa Muxe

7. Lunghiselelo ra vukhume a ri va pfumelela njhani Vaisrayele leswaku va kombisa moya wa ku nkhensa eka Yehovha?

⁷ ENawini wa Muxe, Yehovha u kombise tindlela tinharhu leti Vaisrayele a va ta kombisa ku tlangela ka vona ka xiviri ha tona hikwalaho ka vunene bya yena. Xo sungula a ku ri ni vukhume. Vukhume bya leswi tshoveriweke ensin’wini kun’we ni “xiphemu xin’wana ni xin’wana xa vukhume entlhambini wa tihomu ni le ntlhambini wa tinyimpfu,” a byi fanele byi va “nchumu wo kwetsima eka Yehovha.” (Levhitika 27:30-32) Loko Vaisrayele va yingisile, Yehovha u va katekisile swinene. “‘Tisani swiphemu hinkwaswo swa vukhume exitlatini, leswaku ku va ni swakudya endlwini ya mina; ndzi kombela mi ndzi ringa, emhakeni leyi,’ Yehovha wa mavuthu u vurile, ‘mi vona loko ndzi ta ka ndzi nga mi pfuleli tinyangwa ta ndhambhi ya matilo kutani ndzi mi chululela nkateko, kukondza ku nga ha pfumaleki nchumu.’”—Malakiya 3:10.

8. Minyikelo ya ku tirhandzela a yi hambana njhani ni vukhume?

⁸ Xa vumbirhi, ku tlhandlekela eka xilaveko xa vukhume, Yehovha u endle malunghiselelo ya leswaku Vaisrayele va endla minyikelo ya ku tirhandzela. U lerise Muxe leswaku a byela Vaisrayele a ku: “Loko mi nghena etikweni leri ndzi mi tisaka eka rona, kutaku loko mi dya xinkwa xin’wana ni xin’wana xa tiko, mi fanele mi nyikela munyikelo eka Yehovha.” Swirhangana swin’wana swa “swakudya swa [vona] leswi nga silekangiki hi ku helela swo kota swinkwa leswi vumbekeke ku fana ni swingwavila” a swi fanele swi nyikeriwa ku fana ni “munyikelo eka Yehovha” eka switukulwana swa vona hinkwaswo. Xiya leswaku eka swirhangana leswi a ku nga laveki mpimo wo karhi. (Tinhlayo 15:18-21) Kambe loko Vaisrayele va nyikela minyikelo ya ku kombisa ku nkhensa, a va tiyiseka leswaku Yehovha u ta va katekisa. Lunghiselelo leri fanaka ri fambisana ni tempele ya le xivonweni xa Ezekiyele.  Ha hlaya: “Swirhangana swa mihandzu hinkwayo leyi rhangaka yi wupfa ya xin’wana ni xin’wana ni munyikelo wun’wana ni wun’wana wa hinkwaswo swa minyikelo ya n’wina—swi ta va swa vaprista; swirhangana swa swakudya swa n’wina leswi nga nyawuriki mi fanele mi swi nyika vaprista, leswaku nkateko wu va ehenhla ka yindlu ya wena.”—Ezekiyele 44:30.

9. Yehovha u dyondzise yini hi ku tirhisa lunghiselelo ra ku khwaja?

⁹ Xa vunharhu, Yehovha u endle lunghiselelo ra ku khwaja. Xikwembu xi lerise xi ku: “Loko mi tshovela ntshovelo wa tiko ra n’wina, mi nga tshuki mi tshovela ematlhelo ka nsimu ya n’wina hi ku helela, naswona mi nga tshuki mi khwaja ntshovelo wa nsimu ya n’wina. Nakambe, mi nga tshuki mi hlengeleta leswi seleke swa nsimu ya n’wina ya vhinya, naswona mi nga tshuki mi rholela madiriva ya nsimu ya n’wina ya vhinya. Hikuva mi fanele mi swi siyela la xanisekaka ni la nga muluveri. Hi mina Yehovha Xikwembu xa n’wina.” (Levhitika 19:9, 10) Ni laha a ku nga laveki mpimo wo karhi. Muisrayele un’wana ni un’wana a a fanele a tiendlela xiboho xa mpimo wa ntshovelo lowu a nga ta wu siyela vapfumari. Hosi Solomoni la tlhariheke u hlamusele kahle a ku: “Loyi a kombisaka xisiwana tintswalo u lomba Yehovha, naswona ndlela leyi a xi khomaka ha yona U ta yi tlherisela eka yena.” (Swivuriso 19:17) Kutani Yehovha u va dyondzise leswaku va va ni ntwela-vusiwana eka vapfumari va tlhela va va anakanyela.

10. Ku ve ni vuyelo byihi eka Vaisrayele loko va tsandzeka ku kombisa moya wa ku nkhensa?

¹⁰ Yehovha u katekise Vaisrayele loko va tisa vukhume hi mbilu yo basa, va nyikela minyikelo ya ku tirhandzela ni ku endla malunghiselelo ya ku pfuna swisiwana. Kambe loko Vaisrayele va nga kombisi moya wa ku nkhensa, Yehovha a a va fularhela. Sweswo swi va vangele khombo ivi eku heteleleni va yisiwa etikweni rimbe. (2 Tikronika 36:17-21) Kutani i yini leswi hi swi dyondzaka?

Tindlela Ta Hina Ta Ku Kombisa Ku Nkhensa

11. Hi yihi ndlela ya nkoka leyi hi nga kombisaka ku nkhensa ka hina ha yona eka Yehovha?

¹¹ Ndlela ya nkoka leyi hi nga dzunisaka Yehovha ha yona ni ku kombisa ku nkhensa ka hina ha yona, na yona yi katsa “ku nyikela.” Ina, hina Vakreste a hi le hansi ka Nawu wa Muxe, a hi boheki ku nyikela magandzelo ya swiharhi ni ntshovelo. (Vakolosa 2:14) Hambiswiritano, muapostola Pawulo u khutaze Vakreste va Vaheveru a ku: “A hi nyikeleni eka Xikwembu xitlhavelo xa ku dzunisa nkarhi hinkwawo, ku nga mbhandzu wa milomu leyi endlaka xitiviso xa le rivaleni eka vito ra xona.” (Vaheveru 13:15) Loko hi tirhisa vuswikoti ni rifuwo ra hina eku dzuniseni ka Yehovha entirhweni wa nsimu kumbe “emintshungwini leyi hlengeletaneke” ya Vakreste-kulorhi, hi ta va hi kombisa ku nkhensa ka hina eka Tata wa hina wa le tilweni la nga ni rirhandzu, ku nga Yehovha Xikwembu. (Pisalema 26:12) Loko hi endla tano, xana hi nga dyondza yini eka tindlela leti Vaisrayele a va fanele va kombisa ku nkhensa ka vona ha tona eka Yehovha?

12. Malunghana ni vutihlamuleri bya hina bya Vukreste, i yini leswi hi nga swi dyondzaka eka lunghiselelo ra vukhume?

¹² Xo sungula, hilaha hi voneke hakona, lunghiselelo ra vukhume a ri boha; Muisrayele un’wana ni un’wana a a boheka ku ri hetisisa. Tanihi Vakreste, hi ni vutihlamuleri bya ku hlanganyela entirhweni wa nsimu ni ku va kona eminhlanganweni ya Vukreste. Sweswo ha boheka ku swi endla. Eka vuprofeta byakwe byo hlawuleka bya malunghana ni nkarhi wa makumu, Yesu u vule hi ku kongoma a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14; 28:19, 20) Malunghana ni minhlangano ya Vukreste, muapostola Pawulo u kongomisiwe hi moya leswaku a tsala a ku: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:24, 25) Hi kombisa ku nkhensa ka hina eka Yehovha loko hi tsakela ku amukela vutihlamuleri bya hina bya ku chumayela ni ku dyondzisa kun’we ni ku hlangana ni vamakwerhu nkarhi na nkarhi eminhlanganweni ya vandlha, hi swi languta swi ri lunghelo.

13. Hi yihi dyondzo leyi hi yi kumaka eka lunghiselelo ra minyikelo ya ku tirhandzela ni ra ku khwaja?

¹³ Tlhandla-kambirhi, hi nga vuyeriwa hi ku kambisisa malunghiselelo laman’wana mambirhi lawa Vaisrayele a va kombisa ku tlangela ka vona ha wona—ku nga minyikelo ya ku tirhandzela ni ya ku  khwaja. Ku hambana ni vukhume lebyi munhu a a boheka ku byi humesa hilaha swi hlamuseriweke hakona, eka lunghiselelo ra minyikelo ya ku tirhandzela ni ra ku khwaja a ku nga laveki mpimo wo karhi. Ku ri na sweswo, lunghiselelo leri a ri pfumelela nandza wa Yehovha ku kombisa leswi mbilu ya yena yi n’wi susumetelaka ku swi endla leswaku a kombisa vuenti bya ku tlangela kakwe. Hilaha ku fanaka, ha swi twisisa leswaku ku hlanganyela entirhweni wa nsimu ni ku va kona eminhlanganweni ya Vukreste i vutihlamuleri lebyikulu bya nandza un’wana ni un’wana wa Yehovha, kambe xana hi swi endla hi timbilu ta hina hinkwato ni hi ku swi rhandza? Xana hi swi vona swi ri ndlela yo kombisa ku tlangela ka hina loku humaka embilwini hikwalaho ka hinkwaswo leswi Yehovha a hi endleleke swona? Xana hi endla swilo swo tano hi ku tiyimisela hilaha swiyimo swa hina swi hi pfumelelaka hakona? Kumbe, xana hi swi endla hileswi hi bohekaka ntsena? Ina, leswi i swivutiso leswi un’wana ni un’wana a faneleke a tihlamulela swona. Muapostola Pawulo u swi veke hi ndlela leyi: “Un’wana ni un’wana a a kombise leswi ntirho wa yena wu nga swona, kutani u ta va ni xivangelo xo khana malunghana na yena hi yexe, naswona ku nga ri hi ku tiringanisa ni munhu un’wana.”—Vagalatiya 6:4.

14. Yehovha u langutele leswaku hi n’wi tirhela hi ndlela yihi?

¹⁴ Yehovha Xikwembu u swi tiva kahle swiyimo swa hina. U tiva lomu hi hlulekaka kona. U tlangela swilo hinkwaswo leswi malandza ya yena ma n’wi endlelaka swona hi ku tirhandzela, ku nga khathariseki leswaku i switsongo kumbe i swikulu. A nga rindzelanga leswaku hinkwerhu hi nyikela hi mpimo lowu ringanaka, hikuva sweswo a swi nge koteki. Loko a vulavula hi ku nyikela hi swilo leswi vonakaka, muapostola Pawulo u byele Vakreste va le Korinto a ku: “Loko ku lungheka ku ri kona ku sungula, swi amukeleka hi ku hlawuleka hi ku ya hi leswi munhu a nga na swona, ku nga ri hi leswi a nga riki na swona.” (2 Vakorinto 8:12) Nsinya lowu wa nawu wu tirha hi mukhuva lowu fanaka eka ndlela leyi hi tirhelaka Xikwembu ha yona. Leswi endlaka leswaku ntirho wa hina wu amukeleka eka Yehovha a hi mpimo wa leswi hi swi endlaka kambe i ndlela leyi hi swi endlaka ha yona—hi ntsako ni hi mbilu hinkwayo.—Pisalema 100:1-5; Vakolosa 3:23.

Aka Moya Wa Vuphayona U Tlhela U Wu Hlakulela

15, 16. (a) Vuphayona byi fambisana njhani ni ku nkhensa? (b) Lava va nga swi kotiki ku phayona va nga wu kombisa njhani moya wa vuphayona?

¹⁵ Ndlela leyi vuyerisaka ya ku kombisa ku nkhensa  ka hina eka Yehovha i ku nghenela vutirheli bya nkarhi hinkwawo. Malandza yo tala lama tinyiketeleke ma susumetiwe hi rirhandzu ra wona eka Yehovha ni hi ku tlangela ka wona musa wakwe lowukulu ngopfu, lerova ma endla mindzulamiso leyikulu evuton’wini bya wona leswaku ma kuma nkarhi lowu engetelekeke wa ku tirhela Yehovha. Van’wana i maphayona ya nkarhi hinkwawo lama hetaka tiawara ta kwalomu ka 70 n’hweti yin’wana ni yin’wana ma ri karhi ma chumayela mahungu lamanene ni ku dyondzisa vanhu ntiyiso. Van’wana lava swiyimo swa vona swi nga va pfumeleliki kahle, hakanyingi va endla malunghiselelo ya ku heta tiawara ta 50 hi n’hweti va chumayela tanihi maphayona ya nkarhinyana.

¹⁶ Kambe ku vuriwa yini hi malandza yo tala ya Yehovha lama nga swi kotiki ku va maphayona ya nkarhi hinkwawo kumbe ya nkarhinyana? Ma nga kombisa ku nkhensa ka wona hi ku aka moya wa vuphayona ni ku wu hlakulela. Njhani? Hi ku khutaza lava phayonaka, hi ku khutaza vana va vona leswaku va hlakulela moya wa ku nghenela ntirho wa nkarhi hinkwawo, ni hi ku hlanganyela swinene eku chumayeleni hi ku ya hi swiyimo swa vona. Leswi hi swi endlaka entirhweni wa nsimu swi titshege swinene hi mpimo lowu timbilu ta hina ti swi tlangelaka ha wona swilo leswi Yehovha a hi endleleke swona, ni leswi a hi endlelaka swona sweswi kun’we ni leswi a nga ta hi endlela swona enkarhini lowu taka.

Ku Kombisa Moya Wa Ku Nkhensa Hi ‘Swilo Swa Hina Swa Nkoka’

17, 18. (a) Hi nga ku kombisa njhani ku nkhensa hi “swilo swa [hina] swa nkoka”? (b) Hi xihi xibumabumelo lexi Yesu a xi vuleke malunghana ni minyikelo ya noni, naswona ha yini?

¹⁷ Swivuriso 3:9 yi ri: “Xixima Yehovha hi swilo swa wena swa nkoka ni swirhangana hinkwaswo swa ntshovelo wa wena hinkwawo.” Malandza ya Yehovha a ma ha boheki ku humesa vukhume. Ku ri na sweswo, Pawulo u tsalele vandlha ra le Korinto a ku: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Vakorinto 9:7) Ku endla minyikelo ya ku tirhandzela leswaku hi seketela ntirho wo chumayela timhaka ta Mfumo emisaveni hinkwayo na swona swi kombisa ku nkhensa ka hina. Ku tlangela loku sukaka embilwini ku hi susumetela ku nyikela nkarhi na nkarhi, kumbexana hi vekela swo karhi etlhelo vhiki ni vhiki, hilaha Vakreste vo sungula a va endla hakona.—1 Vakorinto 16:1, 2.

¹⁸ Ndlela leyi hi tlangelaka Yehovha ha yona a yi kombisiwi hi mpimo lowu hi nyikelaka ha wona. Kambe yi kombisiwa hi moya lowu hi nyikelaka ha wona. Sweswo hi leswi Yesu a swi vuleke loko a hlalele vanhu lava a va hoxa minyikelo ya vona ebokisini ra mali leri a ri ri etempeleni. Loko Yesu a vona noni leyi pfumalaka yi hoxa “swimalana swimbirhi swa nsimbi swa ntikelo wa le hansi swinene,” u te: “Ndzi mi byela ntiyiso, Noni leyi, hambileswi yi nga xisiwana, yi hoxe swo tlula leswi hoxiweke hi lavan’wana hinkwavo. Hikuva lava hinkwavo va hoxe tinyiko leti va ti pambuleke eka leswi swi va taleleke, kambe wansati loyi hambileswi a a pfumala u hoxe hinkwaswo leswi a a ri na swona swa ku tihanyisa.”—Luka 21:1-4.

19. Ha yini swi ri swinene ku kambisisa tindlela leti hi kombisaka ku tlangela ka hina ha tona?

¹⁹ Onge dyondzo leyi ya ku kombisa ku nkhensa yi nga hi susumetela ku kambisisa tindlela leti hi kombisaka ku tlangela ka hina ha tona. Xana hi nga swi kota ku antswisa ndlela leyi hi dzunisaka Yehovha ha yona, kun’we ni ndlela leyi hi seketelaka ntirho wa misava hinkwayo ha yona hi swilo leswi vonakaka? Kutani loko hi endla tano, a hi tiyisekeni leswaku Yehovha Tata wa hina wa rirhandzu ni la hananaka wa tsaka swinene loko hi kombisa moya wa ku nkhensa.

Wa Tsundzuka Xana?

• Hi swihi swivangelo leswi hi nga na swona swa ku nkhensa Yehovha?

• I yini leswi hi swi dyondzaka eka lunghiselelo ra vukhume, ra minyikelo ya ku tirhandzela ni ra ku khwaja?

• Hi nga wu hlakulela njhani moya wa vuphayona?

• Hi nga swi tirhisa njhani “swilo swa [hina] swa nkoka” leswaku hi nkhensa Yehovha?

[Swivutiso Swa Dyondzo]

[Swifaniso leswi nga eka tluka 15]

“Nyiko yin’wana ni yin’wana leyinene ni nyiko yin’wana ni yin’wana leyi hetisekeke yi huma ehenhla”

[Swifaniso leswi nga eka tluka 16]

Hi swihi swilo swinharhu leswi hi swi dyondzaka eNawini leswi kombisiweke laha?

[Swifaniso leswi nga eka tluka 18]

I switlhavelo swihi leswi hi nga swi endlaka?