Xivangelo Lexinene Xo Pfumela Eka Xikwembu

BUKU ya Xikorea leyi nge 31 Reasons Why Young People Leave the Church yi vula leswaku vantshwa vo tala va tshika ku ya ekerekeni hikwalaho ka leswi va nga kumiki tinhlamulo leti va enerisaka ta swivutiso swa vona. Hi xikombiso, va vutisa xivutiso lexi nge ‘Ha yini vanhu lava pfumelaka eka Xikwembu va xaniseka?’ ni lexi nge ‘Ha yini hi fanele hi pfumela xin’wana ni xin’wana lexi tikereke ti xi dyondzisaka, kasi to tala ta tidyondzo ta kona ta pfilunganya ti tlhela ti kanetana?’

Vo tala va gimeta hileswaku Bibele a yi na tona tinhlamulo ta swivutiso swa vona hikwalaho ka leswi va hetiweke matimba hi tinhlamulo leti va ti kumeke eka vafundhisi va vona. Loko mufundhisi a hlamula hi ku ya hi vonelo ra yena, hakanyingi va sala va pfilunganyekile, va nga ha lavi ku twa nchumu hi Xikwembu ni hi Bibele.

Sweswo hi leswi nga humelela eka Abel, loyi a kurisiweke a ri Mulutere eAfrika Dzonga. U ri: “Kereke yi dyondzisa leswaku munhu un’wana ni un’wana la faka u ‘tekiwa’ hi Xikwembu. Kambe a ndzi nga swi twisisi leswaku ha yini Xikwembu lexi nga ni rirhandzu xi ‘tekela’ vana vatswari va vona. Endhawini yin’wana ya le makaya ya Vantima laha ndzi kuleleke kona, a hi nga wu dlayi mbhaha loko swikukwana swa wona swi nga si kula swi tlhariha. Loko hi lava ku dlaya homu kutani hi kuma leswaku yi mithile a hi yi tshika hi nga yi dlayi yi kala yi tswala xirhodyana xa yona xi tlhela xi tshikisiwa ku mama ku ri kona hi yi dlayaka. A ndzi nga swi twisisi leswaku ha yini Xikwembu lexi nga ni rirhandzu xi nga va tweli hi ndlela leyi fanaka vanhu.”

Aram, wa le Canada na yena a a ri ni ku kanakana loku fanaka. U ri: “Loko ndzi ri ni malembe ya 13, ndzi feriwe hi tata wa mina. Exilahlweni, mufundhisi la dumeke u vule leswaku Xikwembu a xi lava leswaku tata wa  mina a fa leswaku a ta va ekusuhi na xona etilweni. U te: ‘Xikwembu xi teka vanhu lavanene hikuva xi rhandza lavo lulama.’ A ndzi nga swi twisisi leswaku ha yini Xikwembu xi ri ni vutianakanyi byonghasi.”

Eku heteleleni, Abel na Aram va hlangane ni Timbhoni ta Yehovha, va dyondza Bibele na tona ivi swivutiso swa vona swi hetelela swi hlamulekile. Va sungule ku rhandza Xikwembu va tlhela va va ni ripfumelo leri tiyeke eka xona. Eku heteleleni, va nyiketele vutomi bya vona eka Yehovha kutani va va malandza yo tshembeka ya yena.

Vutivi Lebyi Kongomeke I Xilotlelo Xa Ku Pfumela Eka Xikwembu

Hi nga dyondza yini eka mintokoto leyi? Yi hi byela leswaku vutivi lebyi kongomeke bya Bibele i bya nkoka loko swi ta emhakeni ya ku pfumela eka Xikwembu. Muapostola Pawulo u byele Vakreste va le mutini wa khale wa Filipiya a ku: “Leswi ndzi hambetaka ndzi swi khongelela hi leswi, leswaku rirhandzu ra n’wina ri ya ri andza ngopfu hi vutivi lebyi kongomeke ni ku twisisa loku heleleke.” (Vafilipiya 1:9) Laha Pawulo u kandziyisa leswaku ku rhandza Xikwembu ni vanhu-kulorhi, swi fambisana swinene ni vutivi lebyi kongomeke bya Xikwembu ni ku twisisa leswi ku rhandza ka xona ku nga swona.

Leswi swa twisiseka, hikuva loko munhu a lava ku tshemba munhu un’wana u fanele a rhanga a n’wi tiva—naswona loko a ya a n’wi tiva swinene u ta ya a n’wi tshemba swinene. Hilaha ku fanaka, leswaku u ta susumeteleka ku pfumela eka Xikwembu u fanele u va ni vutivi lebyi kongomeke. Pawulo u te: “Ripfumelo i ku langutela loku tiyisekisiweke ka swilo leswi tshembiwaka, vumbhoni lebyi tiyeke bya leswi nga swa xiviri hambiloko swi nga voniwi.” (Vaheveru 11:1) Loko u pfumela eka Xikwembu kambe u nga ri na vutivi lebyi kongomeke bya Bibele swi fana ni ku aka xiyindlwana hi mimpupurha. Loko xo ninginisiwa switsongo xo wa.

Loko wo dyondza Bibele swi nga ku pfuna leswaku u kuma tinhlamulo ta swivutiso swo tanihi lexi xi karhateke Abel na Aram nkarhi wo leha, lexi nge, Ha yini vanhu va fa? Bibele yi hlamusela leswaku “tanihi leswi xidyoho xi ngheneke emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.” (Varhoma 5:12) Vanhu va dyuhala va tlhela va fa, ku nga ri hileswi Xikwembu xi va tekaka leswaku va ya va na xona, kambe hikwalaho ka leswi Adamu a dyoheke. (Genesa 2:16, 17; 3:6, 17-19) Ku tlula kwalaho, Bibele yi paluxa ntshembo wa ntiyiso lowu Yehovha Xikwembu a wu nyikaka vanhu. Hi ku tirhisa N’wana wa yena, Yesu Kreste, u nyika ntshembo wa ku pfuxiwa ka vanhu lava nga ni xidyoho.—Yohane 5:28, 29; Mintirho 24:15.

Leswaku yi hi pfuna hi twisisa ntiyiso malunghana ni ku pfuxiwa ka vafi, Bibele yi ni swikombiso swo hlayanyana swa vanhu lava Yesu a va pfuxeke eku feni. (Luka 7:11-17; 8:40-56; Yohane 11:17-45) Loko u ri karhi u hlaya marungula lawa ya le Bibeleni, xiya ntsako lowu vanghana ni maxaka ya lava pfuxiweke ma veke na wona. Nakambe xiya leswaku va susumeteleke ku dzunisa Xikwembu ni ku va ni ripfumelo eka Yesu.

Vutivi lebyi kongomeke hi Xikwembu ni hi swikongomelo swa xona byi nga endla leswaku vanhu va titwa hi ndlela leyi fanaka ni namuntlha. Vo tala va tshame va pfilunganyiwa ni ku karhatiwa hi swivutiso swa nkoka leswi a va nga kumi tinhlamulo leti enerisaka ta swona. Kambe loko va dyondza Bibele, va kume tinhlamulo naswona sweswo swi hundzule vutomi bya vona hi ku hetiseka.

Ku Rhandza Xikwembu I Xivangelo Xa Nkoka Xo Xi Tirhela

Hambileswi vutivi lebyi kongomeke byi nga bya nkoka loko munhu a ta va ni ripfumelo eka Xikwembu, ku laveka leswi engetelekeke leswaku a susumeteleka ku xi yingisa ni ku xi tirhela. Loko Yesu a vutisiwe leswaku hi xihi xileriso lexikulu lexi humaka eka Xikwembu, u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Marka 12:30) Loko munhu a rhandza Xikwembu hilaha Yesu a hlamuseleke hakona, u ta tiyimisela swinene ku xi yingisa ni ku xi tirhela. Xana na wena u xi rhandza hi ndlela yoleyo?

Rachel, loyi se a nga ni makume ya malembe a ri murhumiwa le Korea, u hlamusela xivangelo xa yena xa ku va ni ripfumelo, a ku: “Ndzi anakanya hi tintswalo leti Yehovha a ti kombisaka swivumbiwa swakwe, ndlela leyi a va rivalelaka ha yona vanhu vakwe ni ku hi navelela leswinene lerova a hi byela  leswi a swi languteleke eka hina. Swilo sweswo hinkwaswo swi endla leswaku ndlela leyi ndzi rhandzaka Xikwembu ha yona yi kula. Naswona rirhandzu rolero ri ndzi susumetela ku xi tirhela.”

Martha, loyi a nga noni ya le Jarimani, se u ni malembe ya 48 a tirhela Yehovha. U ri: “Ha yini ndzi tirhela Yehovha? Hikuva ndza n’wi rhandza. Madyambu man’wana ni man’wana ndzi vulavula na Yehovha hi xikhongelo ndzi n’wi byela ndlela leyi ndzi yi tlangelaka swinene ha yona mikateko ya yena hinkwayo, ngopfu-ngopfu gandzelo ra nkutsulo.”

Ina, ku rhandza Xikwembu ku hi susumetela ku xi tirhela hi mbilu hinkwayo. Kambe xana munhu u ri hlakulela njhani rirhandzu rolero? Nchumu lowukulu lowu nga hi susumetelaka ku hlakulela ku rhandza Xikwembu i ku ri tlangela swinene rirhandzu leri xi hi kombiseke rona. Xiya xitsundzuxo lexi khutazaka lexi humaka eBibeleni: “Loyi a nga riki na rirhandzu a nga tivi Xikwembu, hikuva Xikwembu i rirhandzu. Rirhandzu ra Xikwembu ri kombisiwile eka hina, hileswi Xikwembu xi rhumeke N’wana wa xona la tswariweke a ri swakwe emisaveni leswaku hi ta kuma vutomi ha yena. Rirhandzu ri tise xileswi, ku nga ri leswaku hina hi rhandze Xikwembu, kambe xona xi hi rhandzile kutani xi rhuma N’wana wa xona a va gandzelo ra ku vuyelelana ra swidyoho swa hina.”—1 Yohane 4:8-10.

Xana wa swi xiya leswaku rirhandzu leri i rikulu ku fikela kwihi? A hi nge u le ku nweleni enkoveni lowu hobomulanaka, hiloko wanuna un’wana a hoxa vutomi byakwe ekhombyeni leswaku a ku ponisa. Xana a wu ta n’wi rivala, kumbe a wu ta n’wi nkhensa swinene? Xana a wu nga ta tiyimisela ku n’wi endlela xin’wana ni xin’wana lexi u nga xi kotaka? Rirhandzu leri Xikwembu xi ri kombiseke hi ku nyikela hi N’wana wa xona, Yesu Kreste, tanihi gandzelo ra nkutsulo i rikulu swinene. (Yohane 3:16; Varhoma 8:38, 39) Loko mbilu ya wena yi khumbiwa hi rirhandzu ra Xikwembu, u ta susumeteleka ku xi rhandza ni ku xi tirhela hi mbilu hinkwayo.

Mikateko Ya Sweswi Ni Ya Le Nkarhini Lowu Taka

Hambileswi rirhandzu ri nga rona xivangelo-nkulu xa hina xa ku endla ku rhandza ka Xikwembu, swa khutaza ku tiva leswaku Xikwembu xi  hakela lava va xi tirhelaka. Muapostola Pawulo u te: “Handle ka ripfumelo a swi koteki ku xi tsakisa kahle, hikuva la tshinelelaka Xikwembu u fanele a kholwa leswaku xi kona ni leswaku hi xona muhakeri wa lava va xi lavaka hi mbilu hinkwayo.”—Vaheveru 11:6.

Lava va rhandzaka Xikwembu va tlhela va xi yingisa xa va katekisa hakunene. Vo tala va ni rihanyo lerinene hikwalaho ka leswi va namarhelaka misinya ya milawu ya Bibele. (Swivuriso 23:20, 21; 2 Vakorinto 7:1) Lava va tirhisaka misinya ya milawu ya Bibele loko swi ta emhakeni yo tshembeka ni ku tirha hi matimba va tshembiwa hi vathori va vona, kutani hakanyingi a va lahlekeriwi hi ntirho. (Vakolosa 3:23) Malandza ya Xikwembu ma ni ku rhula ka mianakanyo hikwalaho ka leswi ma vekaka ntshembo wa wona eka Yehovha, hambiloko ma ri ehansi ka swiyimo swo nonon’hwa. (Swivuriso 28:25; Vafilipiya 4:6, 7) Xa nkoka swinene, ma wu langutele hi ku tiyiseka nkateko wa vutomi lebyi nga heriki emisaveni leyi nga Paradeyisi leyi taka.—Pisalema 37:11, 29.

Xana lava va kumaka mikateko yoleyo leyi humaka eka Yehovha va titwa njhani ha yena? Jacqueline, Mukreste wa le Canada u phofula ndlela leyi a xi tlangelaka ha yona Xikwembu a ku: “Minkarhi hinkwayo xi hi nyika tinyiko to hlamarisa, naswona xi hi nyika ntshembo lowu tiyeke wa vutomi lebyi nga heriki.” Abel, loyi ku vulavuriweke ha yena eku sunguleni, u hlamusela ndlela leyi a titwaka ha yona a ku: “A ndzo sungula ku twa hi ta ntshembo wa ku hanya hi masiku emisaveni leyi nga paradeyisi, naswona ndzi swi langutele hi mahlo-ngati. Hambiswiritano, niloko Paradeyisi a yi nga ta va kona, a ndzi ta swi tsakela ku kombisa rirhandzu ra mina eka Xikwembu hi ku xi tirhela.”

Na Wena U Nga Va Ni Ripfumelo Ra Xiviri

Bibele yi ri: “Yehovha wa mavuthu u avanyisa hi ku lulama; u kambela tinso ni mbilu.” (Yeremiya 11:20) Ina, Yehovha u kambisisa leswi tumbeleke le ndzeni-ndzeni ka hina. Un’wana ni un’wana u fanele a kambisisa lexi n’wi susumetaka ku pfumela eka Xikwembu. Tidyondzo leti hoxeke malunghana ni Xikwembu ti nga va ti ku susumetele ku endla swilo leswo biha enkarhini lowu hundzeke. Kambe vutivi lebyi kongomeke bya Bibele byi nga endla leswaku u va ni vuxaka lebyinene ni Muvumbi, Yehovha Xikwembu.—1 Timotiya 2:3, 4.

Timbhoni ta Yehovha ti pfuna vanhu leswaku va va ni vutivi lebyi kongomeke hi Xikwembu hi ku tirhisa lunghiselelo ra dyondzo ya le kaya ya Bibele. (Matewu 28:20) Vo tala lava amukeleke mpfuno wolowo va sungule ku rhandza Xikwembu naswona va ve ni ripfumelo ra xiviri eka xona. Hi ku dyondza Bibele, va ve ni “vutlhari lebyi pfunaka ni vuswikoti byo ehleketa,” leswi va pfunaka ku “famba [va] sirhelelekile” emasikwini lawa ya khombo. (Swivuriso 3:21-23) Xa nkoka swinene, sweswi va ni ntshembo ‘lowu tiyeke’ hi vumundzuku. (Vaheveru 6:19) Na wena u nga va ni ripfumelo ra xiviri kutani u kuma mikateko yoleyo.

Swivutiso Leswi Karhataka Leswi A Swi Lava Ku Hlamuriwa

“Loko ndzi ri karhi ndzi dyondzela swa vutshunguri exibedlhele, ndzi vone vanhu lavanene va ri karhi va konya hikwalaho ka mavabyi ni makhombo. Loko Xikwembu xi ri kona, ha yini swilo leswi swi humelela? Xana xikongomelo xa vukhongeri i ku verhamisa mianakanyo ya vanhu ntsena?”—Khale ka Mupresbeteriya wa le Korea.

“A ndzi tshamela ku tivutisa loko tata wa mina loyi a a ri xindzendzele, a ye etiheleni kumbe etilweni. Vafi a ndzi va chava kasi ni dyondzo ya ndzilo wa tihele a yi ndzi chavisa. A ndzi nga swi twisisi leswaku Xikwembu xi nga n’wi rhumela njhani munhu leswaku a ya xaniseka hilaha ku nga heriki etiheleni.”—Khale ka Mukhatoliki wa le Brazil.

“Xana hi byihi vumundzuku bya misava ni bya vanhu? Xana vanhu va ta swi kotisa ku yini ku hanya hi masiku? Xana munhu a nga ku kuma njhani ku rhula ka ntiyiso?”—Khale ka Mukhatoliki wa le Jarimani.

“Dyondzo ya ntswariwo-nyingi a ndzi yi vona yi nga ri na nhloko na ncila. Swiharhi a swi gandzeli, kutani loko wo tshuka u ya tswariwa u ri xiharhi hikwalaho ka xivangelo xo karhi leswaku u ta hakela swidyoho swa wena, xana u nga swi kotisa ku yini ku lulamisa timhaka leswaku u ta suka eka xiyimo lexi?”—Khale ka Muhindu wa le Afrika Dzonga.

“Ndzi kulele endyangwini wa Maconfucius, naswona a ndzi hlanganyela enkhubyeni wo tsakisa vakokwa wa hina. Loko ndzi ri karhi ndzi hlanganyela eku lunghiseni ka tafula ro endlela eka rona magandzelo ndzi tlhela ndzi phahla, a ndzi tivutisa loko vakokwana lava feke va swi dya swakudya leswi ni loko va hi vona loko hi ri karhi hi va phahla.”—Khale ka Muconfucius wa le Korea.

Vanhu lava hinkwavo va kume tinhlamulo ta swivutiso swa vona loko va dyondze Bibele ni Timbhoni ta Yehovha.