Vandyangu Wa Ka Va Yesu A Ku Ri Vamani?

EMATIKWENI yo tala, hakanyingi hi December u vona minkombiso ya Yesu loko a ha ri ricece a vukarhiwe hi mana wakwe Mariya kumbe hi tata wa yena wa vuwundli, Yosefa. Minkombiso ya ndyangu wolowo yi nga ha tsakisa ni lava va nga tivuliki Vakreste. Tanihi leswi nyingiso hinkwawo wu kokeriwaka eka Yesu, xana Matsalwa ma hi byela yini hi ndyangu wa ka va Yesu?

Ndlela leyi Yesu a tswariweke ha yona ya hlamarisa swinene. U tswariwe hi nhwana la vuriwaka Mariya, xisweswo a va xirho xa ndyangu wa vanhu va laha misaveni. Bibele yi vula leswaku vutomi byakwe byi hundziseriwe embelekweni wa Mariya byi huma etilweni hi ku tirhisa moya lowo kwetsima. (Luka 1:30-35) Loko ta ku tikiwa ka Yesu hi singita ti nga si tivisiwa, Mariya a a vutiwe hi wanuna la vuriwaka Yosefa, loyi a veke tata wa vuwundli wa Yesu.

Endzhaku ka ku tswariwa ka Yesu, Yosefa na Mariya va ve ni vana van’wana, lava veke vamakwavo va Yesu hi manana. Sweswo swi kombisiwa hi xivutiso lexi vutisiweke hi vaaki va le Nazareta endzhakunyana malunghana na Yesu: “Xana loyi a hi n’wana wa muvatli? Xana mana wakwe a nga vuriwi Mariya, ni vamakwavo a hi Yakobo na Yosefa na Simoni na Yudasi? Naswona vamakwavo va xisati, xana hinkwavo a hi vona lava nga na hina?” (Matewu 1:25; 13:55, 56; Marka 6:3) Hi ku ya hi mhaka leyi hi nga gimeta hileswaku ndyangu wa ka va Yesu a wu vumbiwa hi vatswari vakwe, vamakwavo va xinuna va mune ni vamakwavo va xisati lava nga riki ehansi ka vambirhi.

Hambiswiritano, van’wana namuntlha a va pfumeli leswaku vamakwavo va Yesu a va ri vana va Yosefa na Mariya. Ha yini? New Catholic Encyclopedia, yi ri: “Ku sukela khale Kereke a yi dyondzisa leswaku Mariya u tshame a ri nhwana. Kutani, hikwalaho ka leswi a swi kanakanisi leswaku Mariya a nga vanga na vana van’wana.” Buku yoleyo yi vula leswaku marito lama nge “makwavo wa xinuna” ni “makwavo wa xisati” ma nga vula “munhu kumbe vanhu lava hlanganisiweke hi vukhongeri kumbe hi swin’wana” kumbe maxaka.

Xana swi tano hakunene? Ni vakambisisi van’wana va vukhongeri bya Khatoliki lava nga pfumelelaniki ni dyondzo ya byona emhakeni leyi, va seketela mhaka ya leswaku Yesu a a ri ni vamakwavo. John P. Meier, khale ka muungameri wa Vandla ra Bibele ra Khatoliki ra le Amerika u tsarile: “Eka [Testamente Leyintshwa] [rito ra Xigriki leri vulaka “makwavo”] loko ri nga tirhisiwi hi ndlela yo fanekisela kumbe yo gega kambe ri tirhiseriwa ku kombisa vuxaka bya ngati kumbe bya le nawini, ri vula makwavo, swi helela kwalaho.” * Ina, Matsalwa ma kombisa leswaku Yesu a a ri ni vamakwavo, lava tswariweke hi Yosefa na Mariya.

Tievhangeli ti vulavula hi maxaka man’wana ya Yesu, kambe sweswi a hi kambisiseni ndyangu wa ka va Yesu kutani hi vona leswi hi nga swi dyondzaka eka wona.

[Nhlamuselo ya le hansi]