Wa Tsundzuka Xana?

Xana u swi tsakerile ku hlaya minkandziyiso leya ha ku humaka ya Xihondzo xo Rindza? Loko swi ri tano, ringeta ku hlamula swivutiso leswi landzelaka:

• Buku ya Mikiya yi ni tindzima tingani, yi tsariwe rini naswona xiyimo a xi ri njhani enkarhini wolowo?

Buku ya Mikiya yi ni tindzima ta nkombo. Muprofeta Mikiya u tsale buku leyi hi lembe-xidzana ra vunhungu B.C.E., hi nkarhi lowu vanhu lava Xikwembu xi endleke ntwanano na vona a va avanyisiwe hi tinxaka timbirhi—ku nga Vaisrayele ni Vayuda.—8/15, tluka 9.

• Hi ku ya hi Mikiya 6:8, xana Xikwembu xi langutele yini eka hina?

Hi fanele hi “kombisa vululami.” Xikwembu xi veke xikombiso xa vululami hi ndlela leyi xi endlaka swilo ha yona, kutani hi fanele hi namarhela misinya ya milawu ya xona ya ku tshembeka. Xi hi byela leswaku hi “rhandza musa.” Vakreste va kombise tintswalo ta rirhandzu hi ku khathalela swilaveko swa van’wana, swo tanihi loko ku humelele makhombo. Leswaku hi ‘titsongahata loko hi famba na’ Yehovha, hi fanele hi tiva lomu hi tsandzekaka kona kutani hi titshega hi yena.—8/15, matluka 20-2.

• Mukreste a nga endla yini loko a heleriwe hi ntirho wa ku tihanyisa?

Ku ta va ku ri vutlhari ku tlhela a kambisisa ndlela leyi a hanyaka ha yona. A nga ha swi kota ku olovisa vutomi bya yena hi ku rhurha a ya tshama endlwini leyitsongo kumbe a hunguta swilo leswi a nga na swona. Entiyisweni, i swa nkoka ku tshika ku karhateka hi swilaveko swa siku, hi tshemba leswaku Xikwembu xi nga endla leswaku hi swi kota ku kuma swilo leswi hi swi pfumalaka. (Matewu 6:33, 34)—9/1, matluka 14-15.

• Hi fanele hi tsundzuka yini loko hi nyika kumbe hi amukela tinyiko ta mucato?

Lexi lavekaka ngopfu ni lexi faneleke ku languteriwa a hi tinyiko to durha. Nchumu wa risima swinene i moya lowu munhu a nyikaka ha wona. (Luka 21:1-4) A hi swinene ku boxa vito ra loyi a humeseke nyiko. Ku endla tano swi nga khomisa van’wana tingana. (Matewu 6:3)—9/1, tluka 29.

• Ha yini hi fanele ku khongela minkarhi hinkwayo?

Ku khongela nkarhi ni nkarhi swi nga hi pfuna leswaku hi tiyisa vuxaka bya hina ni Xikwembu ni ku hi hlomisa leswaku hi kota ku hlangavetana kahle ni miringo leyikulu. Swikhongelo swa hina swi nga ha va swi komile kumbe swi lehile, swi ya hi swilaveko ni swiyimo swa kona. Xikhongelo xi aka ripfumelo naswona xi hi pfuna leswaku hi kota ku tlhantlha swiphiqo.—9/15, matluka 15-18.

• Xana hi fanele hi yi twisisa njhani 1 Vakorinto 15:29, leyi eka vuhundzuluxeri byin’wana yi hundzuluxeriweke yi ku “ku khuvuleriwa vafi”?

Muapostola Pawulo a a vula leswaku Vakreste lava totiweke va khuvuriwa kumbe ku petiwa ematini leswaku va sungula ku hanya vutomi lebyi nga ta endla leswaku va hetelela va fa va tshembekile, ku fana na Kreste. Endzhaku ka sweswo, va ta pfuxiwa va ri vanhu va moya ku fana na Kreste.—10/1, tluka 29.

• Xana hi swi tivisa ku yini leswaku ku va Mukreste a swi vuli ku papalata swilo swo biha leswi boxiweke eka 1 Vakorinto 6:9-11 ntsena?

Muapostola Pawulo a nga boxanga swilo swo biha swo tanihi vuoswi, ku gandzela swifaniso swa hava ni vudakwa ntsena. Loko a kombisa leswaku ku nga ha laveka ku hundzuka eka swilo leswi engetelekeke, u vule marito lawa eka ndzimana leyi landzelaka: “Swilo hinkwaswo swa pfumeleleka eka mina; kambe a hi hinkwaswo leswi pfunaka.”—10/15, matluka 18-19.

• I vamani vavasati van’wana va le minkarhini ya khale lava tsakiseke mbilu ya Xikwembu?

Va katsa Xifira na Puwa lava a va ri tinsungukati, lava nga xi yingisangiki xileriso xa Faro xo dlaya vana va vafana va Vaisrayele lava ha ku velekiwaka. (Eksoda 1:15-20) Mukanana un’wana la vuriwaka Rahava loyi a a ri nghwavava u sirhelele tinhlori timbirhi ta Vaisrayele. (Yoxuwa 2:1-13; 6:22, 23) Abigayele u tirhise vutlhari hi ku endla leswaku ku ponisiwa vutomi bya vanhu lebyi a byi ri ekhombyeni a tlhela a sivela Davhida leswaku a nga vi ni nandzu wa ngati. (1 Samuwele 25:2-35) Vavasati lava i swikombiso eka vavasati va namuntlha.—11/1, matluka 8-11.

• Xana “tinyeleti ti lwe [njhani na Sisera] ti ri etilweni,” hilaha swi boxiweke hakona eka Vaavanyisi 5:20?

Van’wana va anakanya leswaku leswi swi vula ku nghenelela ka Xikwembu. Van’wana va vula leswaku swi vula ku nghenelela ka ntsumi, swilo leswi waka hi le tilweni, kumbe ku va Sisera a tshemba vungoma bya tinyeleti. Leswi Bibele yi nga hlamuseliki mhaka leyi hi ku helela, hi nga teka xivulwa lexi tanihi lexi vulaka leswaku Xikwembu xi nghenelerile hi ndlela yo karhi xi pfuna vuthu ra Vaisrayele.—11/15, tluka 30.

• Leswi vanhu vo tala emisaveni va nga tsakeriki vukhongeri, ha yini vunyingi byi vula leswaku byi pfumela eka Xikwembu?

Vanhu van’wana lava yaka ekerekeni va lava ku rhula ka mianakanyo. Van’wana va tshemba leswaku va ta kuma vutomi lebyi nga heriki loko va file, kumbe va va ni rihanyo lerinene, rifuwo ni ku humelela. Etindhawini tin’wana, vanhu va lava ku enerisa ndlala ya vona ya moya leyi veke kona loko Vukhomunisi byi siviwa hi moya wa vukhepitali. Loko Mukreste a xalamukela timhaka to tano swi ta n’wi pfuna leswaku a vulavula hi ndlela leyi humelelaka ensin’wini.—12/1, tluka 3.