Switshembiso Leswi U Nga Swi Kholwaka

MIKIYA muprofeta wa Xikwembu a a swi tiva leswaku hakanyingi switshembiso a swi hetisisiwi. Enkarhini wa yena, hambi ku ri vanhu lava tolovelaneke swinene a swi tiviwa leswaku minkarhi yin’wana a va ri hetisisi rito ra vona. Hikwalaho Mikiya u tsundzuxile: “U nga veki ripfumelo ra wena eka nakuloni. U nga tshembi munghana wa le xihundleni. Eka loyi a etleleke exifuveni xa wena, rindza leswi u swi vulaka hi nomu.”—Mikiya 7:5.

Xana Mikiya u pfumelele xiyimo lexi xi nga tsakisiki leswaku xi n’wi endla a kanakana switshembiso hinkwaswo? Doo! U kombise leswaku u swi tshemba hi ku hetiseka switshembiso leswi endliwaka hi Xikwembu xakwe, ku nga Yehovha. Mikiya u tsarile: “Loko ku ri mina, ndzi ta tshama ndzi rindzele Yehovha. Ndzi ta kombisa moya wo rindza eka Xikwembu lexi xi ndzi ponisaka.”—Mikiya 7:7.

Ha yini Mikiya a a ri ni ntshembo wo tano? Hikuva a a swi tiva leswaku Yehovha minkarhi hinkwayo wa ri hetisisa rito rakwe. Swilo hinkwaswo leswi Xikwembu xi swi tshembiseke vakokwa wa Mikiya swi hetisekile hinkwaswo. (Mikiya 7:20) Ku tshembeka ka  Yehovha enkarhini lowu hundzeke swi nyike Mikiya xivangelo lexi twalaka xa ku pfumela leswaku U ta ri hetisisa rito Rakwe enkarhini lowu taka.

“A Ku Wanga Ni Rito Rin’we”

Hi xikombiso, Mikiya a a swi tiva leswaku Yehovha u kutsule Vaisrayele evuhlongeni le Egipta. (Mikiya 7:15) Yoxuwa loyi a ku voneke ku kutsuriwa koloko, u khutaze Vaisrayele-kulobye leswaku va va ni ripfumelo eka switshembiso hinkwaswo swa Xikwembu. Hikwalaho ka yini? Yoxuwa u va tsundzuxile a ku: “Mi swi tiva kahle hi timbilu ta n’wina hinkwato ni mimoya-xiviri ya n’wina hinkwayo leswaku a ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke. Hinkwawo ma hetisekile eka n’wina. A ku wanga ni rito rin’we eka wona.”—Yoxuwa 23:14.

Vaisrayele a va swi tiva kahle leswaku Yehovha u va endlele swilo swo hlamarisa. U xi hetisisile xitshembiso xakwe lexi a xi endleke eka Abrahama kokwa wa vona la chavaka Xikwembu xa leswaku vatukulu vakwe a va ta tala ku fana ni tinyeleti naswona a va ta teka tiko ra Kanana. Yehovha u tlhele a byela Abrahama leswaku vatukulu va yena a va ta xanisiwa malembe ya 400 kambe a va ta tlhelela eKanana “eka xitukulwana xa vumune.” Leswi hinkwaswo swi humelerile.—Genesa 15:5-16; Eksoda 3:6-8.

Vaisrayele va amukeriwe hi mandla mambirhi le Egipta enkarhini wa Yosefa n’wana wa Yakobe. Endzhakunyana Vaegipta va va sindzise ku tirha tanihi mahlonga, kambe hilaha Xikwembu xi tshembiseke hakona, vatukulu lava va Abrahama va ntshunxiwile evuhlongeni bya le Egipta eka xitukulwana xa vumune ku sukela loko va nghene aEgipta. *

Eka malembe ya 40 lama landzeleke, Vaisrayele va ve ni vumbhoni lebyi engetelekeke bya leswaku Yehovha minkarhi hinkwayo wa swi hetisisa switshembiso swakwe. Loko Vaamaleke va lave ku hlasela Vaisrayele swi nga fanelanga, Xikwembu xi lwele vanhu va xona xi tlhela xi va sirhelela. Xi enerise swilaveko swa vona hinkwaswo swa nyama emalembeni ya 40 lawa va ma heteke va ri eriendzweni ra vona ra le mananga naswona eku heteleleni xi va nyike Tiko leri Tshembisiweke. Loko Yoxuwa a ri karhi a pfuxeta matimu ya ndlela leyi Yehovha a tirhisaneke ha yona ni vatukulu lava va Abrahama, u swi kotile ku vula hi ku tiyiseka a ku: “Ku hava xitshembiso lexi tsandzekeke eka switshembiso hinkwaswo leswinene leswi Yehovha a swi tshembiseke yindlu ya Israyele; hinkwaswo swi hetisekile.”—Yoxuwa 21:45.

Vana Ni Ntshembo Eka Switshembiso Swa Xikwembu

Xana u nga swi kotisa ku yini ku kombisa ripfumelo eka switshembiso swa Yehovha ku fana na Mikiya na Yoxuwa? Xana u sungula njhani ku tshemba van’wana? Hi ku tolovelana na vona swinene hilaha u nga kotaka hakona. Hi xikombiso, u nga ha dyondza ndlela leyi va tshembekaka ha yona hi ku xiya loko va endla matshalatshala ya ku swi hetisisa hi ku tshembeka switshembiso swa vona hinkwaswo. Loko u ya u va tiva swinene vanhu volavo, u ya u va tshemba. U nga endla leswi fanaka loko swi ta emhakeni ya ku va ni ripfumelo eswitshembisweni swa Xikwembu.

Ndlela yin’wana ya ku endla leswi i ku anakanyisisa hi ntumbuluko ni milawu leyi wu lawulaka. Vativi va sayense va tshemba milawu leyi, ku fana ni leyi lawulaka ndlela leyi sele yin’we ya munhu yi avanaka ha yona kutani yi andza yi humesa tisele ta tibiliyoni leti vumbeke miri wa  wena. Entiyisweni, milawu leyi lawulaka swilo ni ntamu evuakweni hinkwabyo yi fanele yi simekiwe hi Muendli wa Milawu la tshembekaka hi ku helela. Hakunene u nga tiyiseka hi switshembiso swakwe, tanihi leswi u yi tshembaka milawu leyi lawulaka ntumbuluko wa yena.—Pisalema 139:14-16; Esaya 40:26; Vaheveru 3:4.

Hi ku tirhisa muprofeta Esaya, loyi a hanyeke enkarhini wa Mikiya, Yehovha u tirhise ku tshembeka ka tinguva ni ndzhendzheleko lowu hlamarisaka wa mati leswaku a kombisa ku tshembeka ka rito rakwe. Lembe na lembe timpfula a ti na. Ti tsakamise misava kutani ti endla leswaku vanhu va kota ku byala timbewu ta vona ni ku tshovela swibyariwa swa vona. Emhakeni leyi Yehovha u te: “Tanihi leswi mpfula yi naka ehansi, ni gamboko ku suka ematilweni, naswona yi nga tlheleriki endhawini yoleyo yi nga si tsakamisa misava yi yi endla yi mirisa yi tlhela yi hlukisa, kutani mbewu yi nyikiwa mubyari ni xinkwa xi nyikiwa la dyaka, hikwalaho ni rito ra mina leri humaka enon’wini wa mina ri ta endlisa sweswo. A ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.”—Esaya 55:10, 11.

Switshembiso Leswi Tiyeke Swa Paradeyisi

Ku kambisisa ntumbuluko ku nga endla leswaku u tshemba Muvumbi, kambe ku laveka nchumu wun’wana loko u lava ku dyondza hi switshembiso leswi nga xiphemu xa ‘rito leri humaka enon’wini wa yena.’ Leswaku u dyondza switshembiso leswi hi xikongomelo xa ku swi tshemba, u fanele u kambisisa rhekhodo leyi huhuteriweke hi Xikwembu ya Matsalwa malunghana ni xikongomelo xa xona hi misava ni ndlela leyi xi tirhisanaka ni vanhu ha yona.—2 Timotiya 3:14-17.

Muprofeta Mikiya a a swi tshemba switshembiso swa Yehovha. Wena u ni rungula ro tala leri huhuteriweke hi Xikwembu ku tlula leri Mikiya a a ri na rona. Loko u ri karhi u hlaya Bibele u tlhela u anakanyisisa ha yona, na wena u nga va ni ripfumelo ra leswaku switshembiso swa Xikwembu swi ta hetiseka. Switshembiso leswi a swi katsi vatukulu va ntumbuluko va Abrahama ntsena kambe ni vanhu hinkwavo. Yehovha u tshembise mupatriyaka loyi la chavaka Xikwembu a ku: “Tinxaka hinkwato ta misava ti ta tikatekisa hi mbewu ya wena hikwalaho ka leswi u yingiseke rito ra mina.” (Genesa 22:18) Xiphemu-nkulu xa “mbewu,” kumbe n’wana wa Abrahama i Mesiya, ku nga Yesu Kreste.—Vagalatiya 3:16.

Hi ku tirhisa Yesu Kreste, Yehovha u ta endla leswaku vanhu lava yingisaka va kuma mikateko. Kutani Xikwembu xi tshembise ku endla yini enkarhini wa hina? Mikiya 4:1, 2 yi hlamula hi marito lawa ya vuprofeta: “Exiphen’wini xo hetelela xa masiku ntshava ya yindlu ya Yehovha yi ta simekiwa yi tiya ehenhla ka tintshava, kunene yi ta tlakuseriwa ehenhla ka switsunga; kutani vanhu va fanele va khitikanela eka yona. Kunene matiko yo tala ma ta ya, ma ku: ‘Tanani, a hi tlhandlukeleni entshaveni ya Yehovha ni le ndlwini ya Xikwembu xa Yakobe; kutani u ta hi letela tindlela ta yena, hi ta famba emintileni ya yena.’”

Lava va dyondzaka tindlela ta Yehovha va “fula mabanga ya vona ma va swikomu ni mafumu ya vona ma va swikhutulo.” Mboyamelo wihi na wihi wa nyimpi wu ta nyamalala. Ku nga ri khale misava yi ta tala hi vanhu vo lulama naswona a nga kona loyi a nga ta va chavisa. (Mikiya 4:3, 4) Ina, Rito ra Xikwembu ri tshembisa leswaku ehansi ka Mfumo lowu ku nga ta va ku fuma Yesu Kreste, Yehovha u ta herisa vatshikileri hinkwavo emisaveni.—Esaya 11:6-9; Daniyele 2:44; Nhlavutelo 11:18.

Hambi ku ri lava va xanisiweke kutani va fa hikwalaho ka ku xandzuka ka munhu eka Xikwembu va ta pfuxiwa va ri ni ntshembo wa ku hanya hilaha ku nga heriki emisaveni. (Yohane 5:28, 29) Sathana ni madimona yakwe, ku nga  vona vakondleteri va vuhomboloki, va ta va va nga ha ri kona, naswona vuyelo bya xidyoho xa Adamu byi ta va byi herisiwile hi gandzelo ra nkutsulo ra Yesu. (Matewu 20:28; Varhoma 3:23, 24; 5:12; 6:23; Nhlavutelo 20:1-3) Kutani xi ta va xihi xiyimo xa vanhu lava yingisaka? Ina, va ta katekisiwa hi ku nyikiwa vutomi lebyi nga heriki va ri ni rihanyo leri hetisekeke emisaveni leyi nga paradeyisi!—Pisalema 37:10, 11; Luka 23:43; Nhlavutelo 21:3-5.

Sweswo i switshembiso leswi tsakisaka hakunene! Kambe xana u nga swi tshemba? Ina u nga swi tshemba. Leswi a hi switshembiso swa vanhu lava nga vaka ni swikongomelo leswinene kambe va nga ri na matimba yo swi hetisisa. I switshembiso swa Xikwembu xa Matimba Hinkwawo, lexi nga hembiki ni lexi “nga [nonokiki] malunghana ni xitshembiso xa [xona].” (2 Petro 3:9; Vaheveru 6:13-18) U nga swi tshemba hi ku hetiseka switshembiso hinkwaswo leswi kumekaka eBibeleni, hikuva Xihlovo xa swona i “Yehovha Xikwembu xa ntiyiso.”—Pisalema 31:5.

[Nhlamuselo ya le hansi]

[Marito lama tshahiweke exihlokweni lama nga eka tluka 6]

“A ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke.”—YOXUWA 23:14

[Swifaniso leswi nga eka tluka 4, 5]

Yehovha u hetisise switshembiso swakwe eka Vaisrayele eLwandle ro Tshwuka ni le mananga

[Swifaniso leswi nga eka tluka 7]

Yehovha u hetisise xitshembiso xakwe eka Abrahama. Mbewu yakwe, ku nga Yesu Kreste yi ta katekisa vanhu