Swivutiso Swa Vahlayi

I yini leswi vangeleke Yuda leswaku a va ni vuxaka bya rimbewu ni wansati loyi a a anakanya leswaku i nghwavava, hilaha ku hlamuseriweke hakona eka Genesa 38:15, 16?

Hambileswi Yuda a veke ni vuxaka bya rimbewu ni wansati loyi a a anakanya leswaku i nghwavava, entiyisweni wansati loyi a a nga ri nghwavava. Genesa ndzima 38 yi hlamusela leswi humeleleke.

Loko jaha ra mativula ra Yuda ri nga si tswaleriwa n’wana hi nsati wa rona Tamari, ri dlayiwile hikwalaho ka leswi ri veke munhu “lowo biha ematihlweni ya Yehovha.” (Genesa 38:7) Hi nkarhi wolowo, a swi tolovelekile leswaku wansati a tekiwa hi makwavo wa nuna wakwe. Leswi a swi vula leswaku loko wanuna a fa a nga ri na mudyandzhaka, makwavo wa wanuna yoloye a a fanele a teka noni yoleyo leswaku yi ta tswala mudyandzhaka. Kambe n’wana wa vumbirhi wa Yuda, ku nga Onani, u arile ku teka nsati wa makwavo. Hikwalaho, u file hikwalaho ka ku avanyisiwa hi Xikwembu. Kutani Yuda u mukise n’wingi wa yena Tamari eka rikwavo leswaku a ya rindza kukondza n’wana wa vunharhu wa Yuda, ku nga Xela, a kula ku ringana leswaku a n’wi teka. Hambiswiritano, loko nkarhi wu ri karhi wu hundza Yuda u tsandzekile ku endla leswaku Xela a tekana na Tamari. Kutani loko Yuda a feriwa hi nsati, Tamari u endle rhengu ro kuma mudyandzhaka ha Yuda, ku nga Muisrayele loyi a a ri tata wa nuna wakwe. U tiendle nghwavava ya le tempeleni kutani a tshama endleleni leyi a a swi tiva leswaku Yuda u ta hundza ha yona.

Leswi Yuda a nga n’wi xiyangiki Tamari, u etlele na yena. Hi vutlhari wansati loyi u kombele swilo swa ku nkhensiwa ha swona hikwalaho ka leswi a etleleke na yena, kutani endzhaku ka nkarhi a tirhisa swona ku tiyisekisa leswaku u tikisiwe hi yena. Loko ntiyiso wu humele erivaleni, Yuda a nga vonanga nsati loyi nandzu kambe hi ku titsongahata u te: “U lulame ngopfu ku ndzi tlula, hikwalaho ka leswi ndzi nga n’wi nyikangiki n’wananga Xela.” Naswona hilaha ku faneleke, “a nga ha tlhelanga a tivana na yena.”—Genesa 38:26.

Yuda u dyohile hileswi a nga tekangiki Tamari a n’wi nyika n’wana wa yena Xela hilaha a a tshembise hakona. U tlhele a tivana ni wansati loyi a a anakanya leswaku a a ri nghwavava ya le tempeleni. Sweswo a swi lwisana ni xikongomelo xa Xikwembu xa leswaku wanuna a va ni vuxaka bya rimbewu ni wansati loyi a tekaneke na yena ntsena. (Genesa 2:24) Kambe, entiyisweni Yuda a nga vanga ni vuxaka bya rimbewu ni nghwavava. Ku ri na sweswo, handle ko swi xiya u hetisise lunghiselelo ra ku teka nsati wa makwavo, ku nga nchumu lowu a wu fanele wu endliwe hi Xela, xisweswo a va ni vana lava nga enawini.

Loko ku ri Tamari a a nga tiviwi a ri wansati loyi a a tikhoma hi ndlela yo biha. Vana va yena va majaha va mahahlwa a va nga tekiwi va ri vana va vumbhisa. Loko Bowasi wa le Betlehema a teke Rhuti wa Mumowabu hi ku ya hi lunghiselelo ra ku teka nsati wa makwenu, vakulukumba va le Betlehema va vulavule kahle hi Faresi n’wana wa Tamari, va byela Bowasi va ku: “Onge yindlu ya wena yi nga fana ni yindlu ya Faresi, loyi Tamari a n’wi tswaleleke Yuda, hi vana lava Yehovha a nga ta ku nyika vona hi nhwanyana loyi.” (Rhuti 4:12) Nakambe Faresi u xaxametiwe exikarhi ka vakokwa wa Yesu Kreste.—Matewu 1:1-3; Luka 3:23-33.