Yehovha U Ni Rirhandzu Lerikulu Leri Nga Tsekatsekiki
Yehovha U Ni Rirhandzu Lerikulu Leri Nga Tsekatsekiki
“Yehovha u ni . . . musa lowukulu wa rirhandzu.”—PISALEMA 145:8.
1. Xana rirhandzu ra Xikwembu ri kule ku fikela kwihi?
“XIKWEMBU i rirhandzu.” (1 Yohane 4:8) Marito wolawo lama khutazaka ma kombisa leswaku ndlela leyi Yehovha a fumaka ha yona yi fambisana ni rirhandzu. Phela, hambi ku ri vanhu lava nga n’wi yingisiki va kuma mpfuno eka dyambu ni mpfula leyi a yi nisaka hi rirhandzu! (Matewu 5:44, 45) Tanihi leswi Xikwembu xi rhandzaka vanhu, xi pfumelela ni valala va xona leswaku va hundzuka, va ya eka xona, kutani va kuma vutomi. (Yohane 3:16) Kambe ku nga ri khale Yehovha u ta lovisa vanhu lava phikelelaka va endla leswo biha, leswaku lava va n’wi rhandzaka va ta tsakela vutomi lebyi nga heriki emisaveni leyintshwa yo lulama.—Pisalema 37:9-11, 29; 2 Petro 3:13.
2. Hi rihi rirhandzu ro hlawuleka leri Yehovha a ri kombisaka lava va tinyiketeleke eka yena?
2 Yehovha u kombisa rirhandzu eka vagandzeri vakwe va ntiyiso hi ndlela yo hlawuleka leyi nga hikiwangiki. Rirhandzu ro tano ri hlamuseriwa hi rito ra Xiheveru leri hundzuluxeriweke ri va “musa wa rirhandzu,” kumbe “rirhandzu leri nga tsekatsekiki.” Hosi Davhida wa le tikweni ra khale ra Israyele a a wu tlangela swinene musa wa Xikwembu wa rirhandzu. Hikwalaho ka leswi swi n’wi humeleleke ni leswi a a anakanyisisa hi ndlela leyi Xikwembu xi tirhisaneke ni van’wana ha yona, Davhida u yimbelele hi mahika a ku: “Yehovha u ni . . . musa lowukulu wa rirhandzu [kumbe “rirhandzu leri nga tsekatsekiki”].”—Pisalema 145:8.
Ndlela Yo Lemuka Vanhu Va Xikwembu Lava Tshembekaka
3, 4. (a) Pisalema 145 yi hi pfunisa ku yini leswaku hi lemuka vanhu va Yehovha lava tshembekaka? (b) Vanhu va Xikwembu lava tshembekaka va xi “katekisa” njhani?
3 Malunghana na Yehovha Xikwembu, Hana mana wa muprofeta Samuwele u vule leswi landzelaka: “U rindza milenge ya lava va tshembekaka vakwe.” (1 Samuwele 2:9) I vamani ‘vanhu vo tano lava tshembekaka’? Hosi Davhida u nyikela nhlamulo. Endzhaku ko bumabumela timfanelo ta Yehovha leti hlamarisaka, u te: “Lava tshembekeke va wena va ta ku [katekisa].” (Pisalema 145:10) U nga tivutisa leswaku vanhu va nga katekisa Xikwembu hi ndlela yihi. Ngopfu-ngopfu sweswo u swi endla hi ku xi dzunisa kumbe hi ku vulavula leswinene ha xona.
4 Vanhu va Yehovha lava tshembekaka hi lava va tirhisaka milomu ya vona ku vulavula leswinene hi yena. Loko va tidzumbela ni van’wana ni loko va ri eminhlanganweni ya Vukreste, i yini leswi va vulavulaka ngopfu ha swona? Ina, va vulavula ngopfu hi Mfumo wa Yehovha! Malandza ya Xikwembu lama tshembekaka ma titwa hilaha Davhida a titweke hakona loko a yimbelela a ku: “Va ta vulavula hi ku vangama ka vuhosi bya wena [Yehovha], naswona va ta vulavula hi matimba ya wena.”—Pisalema 145:11.
5. Hi swi tivisa ku yini leswaku Yehovha wa yingisela loko vanhu vakwe lava tshembekaka va vulavula leswinene hi yena?
5 Xana Yehovha wa yingisela loko vanhu vakwe lava tshembekaka va n’wi dzunisa? Ina, wa yingisela. Eka vuprofeta lebyi vulavulaka hi vugandzeri bya ntiyiso bya le nkarhini wa hina, Malakiya u tsarile a ku: “Enkarhini wolowo lava va chavaka Yehovha va vulavurisanile, un’wana ni un’wana ni nakulobye, Yehovha a hambeta a rhiya ndleve, a yingisa. Kutani buku ya xitsundzuxo yi sungula ku tsariwa emahlweni ka yena yi tsaleriwa lava va chavaka Yehovha ni lava va anakanyaka hi vito ra yena.” (Malakiya 3:16) Yehovha wa tsaka swinene loko vanhu va yena lava tshembekaka va vulavula leswinene ha yena, naswona wa va tsundzuka.
6. Hi wihi ntirho lowu hi pfunaka ku lemuka vanhu va Xikwembu lava tshembekaka?
6 Malandza ya Yehovha lama tshembekaka nakambe ma nga lemukiwa hi vurhena bya wona ni ku tirhisa tindlela tin’wana ni tin’wana leti ma pfulekelaka ma vulavula ni vanhu lava nga riki vagandzeri va Xikwembu xa ntiyiso. Kunene, vanhu va Xikwembu lava tshembekaka “va tivisa vana va vanhu swiendlo swakwe leswikulu ni ku vangama lokukulu ka vuhosi byakwe.” (Pisalema 145:12) Xana u lavisisa tindlela to vulavula hi vuhosi bya Yehovha ni vanhu lava nga riki vapfumeri kutani u ti tirhisa loko ti ku pfulekela? Ku hambana ni mimfumo ya vanhu leyi nga ta hundza ku nga ri khale, vuhosi bya yena byi ta va kona hilaha ku nga heriki. (1 Timotiya 1:17) I mhaka ya xihatla leswaku vanhu va dyondza hi vuhosi bya Yehovha lebyi nga heriki kutani va byi seketela. Davhida u yimbelerile a ku: “Vuhosi bya wena i vuhosi bya minkarhi leyi nga riki na makumu, naswona vulawuri bya wena i bya switukulwana hinkwaswo leswi tlhandlamanaka.”—Pisalema 145:13.
7, 8. Ku endleke yini hi 1914, naswona hi byihi vumbhoni lebyi kombisaka leswaku sweswi Xikwembu xa fuma hi ku tirhisa Mfumo wa N’wana wa xona?
7 Ku sukela hi 1914, ku ve ni xivangelo xin’wana xa ku vulavula hi vuhosi bya Yehovha. Hi lembe rero, Xikwembu xi simeke Mfumo wa Vumesiya etilweni laha Hosi ya wona ku nga Yesu Kreste, N’wana Davhida. Xisweswo Yehovha u hetisise xitshembiso xa yena xa leswaku vuhosi bya Davhida a byi ta va kona hilaha ku nga heriki.—2 Samuwele 7:12, 13; Luka 1:32, 33.
8 Vumbhoni bya leswaku sweswi Yehovha wa fuma hi ku tirhisa Mfumo wa N’wana wakwe Yesu Kreste, byi kombisiwa hi ku hetiseka loku yaka emahlweni ka xikombiso xa vukona bya Yesu. Nchumu wa nkoka swinene eka xikombiso xexo i ntirho lowu Yesu a profeteke leswaku a wu ta endliwa hi vanhu va Xikwembu hinkwavo lava tshembekaka, loko a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:3-14) Tanihi leswi vanhu va Xikwembu lava tshembekaka va hetisisaka vuprofeta byebyo hi ku hiseka, sweswi ku ni nhlayo leyi tlulaka tsevu wa timiliyoni ya vavanuna, vavasati ni vana lava hlanganyelaka entirhweni wolowo lowukulu, lowu nga ta ka wu nga ha phindhiwi. Ku nga ri khale hinkwavo lava lwisanaka ni Mfumo wa Yehovha va ta lovisiwa.—Nhlavutelo 11:15, 18.
Ku Kuma Mpfuno Eka Vuhosi Bya Yehovha
9, 10. Yehovha u hambana njhani ni vafumi va misava?
9 Loko hi ri Vakreste lava tinyiketeleke, vuxaka bya hina na Hosi Leyikulu Yehovha byi ta hi vuyerisa hi tindlela to tala. (Pisalema 71:5; 116:12) Hi xikombiso, tanihi leswi hi chavaka Xikwembu hi tlhela hi endla leswo lulama, ha amukeleka eka xona naswona hi va ni vuxaka lebyikulu bya moya na xona. (Mintirho 10:34, 35; Yakobo 4:8) Ku hambana ni sweswo, hakanyingi vafumi va misava va voniwa va ri ni vanhu lava tlakukeke, vo tanihi varhangeri va swa nyimpi, van’wankumi kumbe vanhu lava nga ni mavito eka swa mintlangu ni swa vuhungasi. Hi ku ya hi phepha-hungu ra laha Afrika leri vuriwaka Sowetan, mutirhela-mfumo wa xiyimo xa le henhla u vule leswi landzelaka malunghana ni tindhawu leti weriweke hi vusweti etikweni ra ka vona: “Ndza swi vona leswaku ha yini vo tala va hina hi nga swi rhandzi ku ya etindhawini to tano. Xivangelo hileswi hi lavaka leswaku swiyimo swo tano swi suleka emianakanyweni ya hina. [Mimovha] yo durha leyi hi njirimukaka ha yona yi endla leswaku mapfalo ya hina ma hi kingindza naswona hi khomiwa hi tingana.”
10 Ina, vafumi van’wana va misava va karhateka swinene hi vuhlayiseki bya lava va va fumaka. Kambe hambi ku ri vafumi va xiyimo xa le henhla swinene a va va tivi kahle lava va va fumaka. Ina, hi nga tivutisa xivutiso lexi nge: Xana u kona mufumi loyi a khathalelaka vanhu hinkwavo lava nga ehansi ka yena lerova a hatlisa a pfuna un’wana ni un’wana wa vona loko a ri ekhombyeni? Ina, u kona. Davhida u tsarile a ku: “Yehovha u seketela hinkwavo lava waka, naswona u yimisa hinkwavo lava nkhinsamaka.”—Pisalema 145:14.
11. Hi yihi miringo leyi welaka vanhu va Xikwembu lava tshembekaka, naswona hi wihi mpfuno lowu va wu kumaka?
11 Vanhu va Yehovha Xikwembu lava tshembekaka va weriwa hi miringo ni makhombo yo tala hikwalaho ka ku nga hetiseki ka vona ni leswi va hanyaka emisaveni leyi lawuriwaka hi Sathana “lowo homboloka.” (1 Yohane 5:19; Pisalema 34:19) Vakreste va xanisiwa. Van’wana va karhatiwa hi mavabyi lama nga tshungulekiki kumbe hileswi va feriweke hi loyi va n’wi rhandzaka. Minkarhi yin’wana swihoxo swa vanhu va Yehovha lava tshembekaka swi nga va vangela ku ‘nkhinsama’ hikwalaho ko hela matimba. Kambe ku nga khathariseki miringo leyi un’wana ni un’wana wa vona a weriwaka ha yona, Yehovha u tshama a lunghekele ku va chavelela ni ku va tiyisa emoyeni. Hosi Yesu Kreste na yena u ma khathalela hi ndlela leyi fanaka malandza yakwe lama tshembekaka.—Pisalema 72:12-14.
Swakudya Leswi Enerisaka Leswi Fikaka Hi Nkarhi Wa Kona
12, 13. Yehovha u swi enerisa ku fikela kwihi swilaveko swa “xilo xin’wana ni xin’wana lexi hanyaka”?
12 Hikwalaho ka musa wakwe lowukulu wa rirhandzu, Yehovha u enerisa swilaveko hinkwaswo swa malandza yakwe. Sweswo swi katsa ku va enerisa hi swakudya leswinene. Hosi Davhida u tsarile a ku: “Mahlo hinkwawo ma languta eka wena [Yehovha] ma ri ni ntshembo, naswona u va nyika swakudya swa vona hi nguva ya kona. U pfula voko ra wena u enerisa ku navela ka xilo xin’wana ni xin’wana lexi hanyaka.” (Pisalema 145:15, 16) Ni le minkarhini yo nonon’hwa, Yehovha a nga kongomisa timhaka leswaku vanhu va yena lava tshembekaka va kuma ‘xinkwa xa siku.’—Luka 11:3; 12:29, 30.
13 Davhida u vule leswaku “xilo xin’wana ni xin’wana lexi hanyaka” xa enerisiwa. Sweswo swi katsa ni swiharhi. Loko emisaveni ni le lwandle a ku nga ri na swimilana swo tala, sweswo a swi ta endla leswaku swivumbiwa leswi hanyaka ematini, tinyenyana ni swiharhi swi nga kumi moya wo tenga ni swakudya. (Pisalema 104:14) Kambe Yehovha u endla leswaku swilaveko swa swona hinkwaswo swi enerisiwa.
14, 15. Swakudya swa moya swi phameriwa njhani namuntlha?
14 Ku hambana ni swiharhi, vanhu va ni xilaveko xa moya. (Matewu 5:3) Yehovha wa swi enerisa hakunene swilaveko swa moya swa vanhu vakwe lava tshembekaka! Loko a nga si fa, Yesu u tshembise leswaku “hlonga ro tshembeka ni ro tlhariha” a ri ta phamela valandzeri vakwe “swakudya swa vona [swa moya] hi nkarhi lowu faneleke.” (Matewu 24:45) Namuntlha ntlawa wolowo wa hlonga wu vumbiwa hi masalela ya vatotiwa va 144 000. Hi ku tirhisa wona, hakunene Yehovha u lunghiselela swakudya swa moya hi xitalo.
15 Hi xikombiso, vanhu vo tala va Yehovha sweswi va vuyeriwa eka vuhundzuluxeri lebyintshwa bya Bibele lebyi pakanisaka, lebyi kumekaka hi ririmi ra vona. Vuhundzuluxeri Bya Misava Leyintshwa Bya Matsalwa Yo Kwetsima byi ve nkateko lowukulu! Ku tlula kwalaho, timiliyoni ta minkandziyiso leyi pfunaka ku dyondza Bibele ti hambeta ti kandziyisiwa hi tindzimi to tlula 300. Swakudya leswi swa moya hinkwaswo swi ve nkateko lowukulu eka vagandzeri va ntiyiso emisaveni hinkwayo. I mani loyi a faneleke a dzunisiwa hikwalaho ka sweswo? I Yehovha Xikwembu. Hikwalaho ka musa wakwe lowukulu wa rirhandzu, u endle swi koteka leswaku ntlawa wa hlonga wu lunghiselela ‘swakudya hi nguva ya swona.’ Hi ku tirhisa malunghiselelo wolawo, u enerisa “ku navela ka xilo xin’wana ni xin’wana lexi hanyaka” eparadeyisini ya moya ya namuntlha. Naswona malandza ya Yehovha ma swi langutele hi mahlo-ngati ku vona ku hetiseka ka ntshembo lowu tsakisaka wa ku hundzuriwa ka misava yi va paradeyisi ya xiviri!—Luka 23:42, 43.
16, 17. (a) Hi swihi swikombiso leswi nga kona swa leswaku swakudya swa moya swi fika hi nkarhi lowu faneleke? (b) Pisalema 145 yi yi kombisa njhani mintlhaveko ya vanhu va Xikwembu lava tshembekaka malunghana ni mphikamakaneta leyikulu leyi pfuxiweke hi Sathana?
16 Xiya xikombiso lexinene xa ku kumiwa ka swakudya swa moya hi nkarhi wa kona. Hi 1939, ku tlhekeke Nyimpi ya Vumbirhi ya Misava le Yuropa. Hi lembe rero, nkandziyiso (wa Xinghezi) wa Xihondzo xo Rindza wa November 1 wu ve ni xihloko lexi nge “Vukala-tlhelo.” Hikwalaho ka rungula leri twalaka kahle leri hlamuseriweke, Timbhoni ta Yehovha emisaveni hinkwayo ti vone xilaveko xa ku ka ti nga ngheneleli hi ku helela etimhakeni ta matiko lama lwaka. Sweswo swi endle leswaku mimfumo leyi lwaka yi susela mavila eka tona, hi nkarhi wolowo wa nyimpi leyi heteke malembe ya tsevu. Kambe hambiloko vanhu va Xikwembu lava tshembekaka va yirisiwa ni ku xanisiwa, va hambete va chumayela mahungu lamanene ya Mfumo. Ku sukela hi 1939 ku ya eka 1946, va katekisiwe hi ku andza loku hlamarisaka ka tiphesente ta 157. Ku tlula kwalaho, matimu ya vona lama tsakisaka ya ku tshembeka hi nkarhi wa nyimpi yoleyo ma hambeta ma pfuna vanhu leswaku va lemuka vukhongeri bya ntiyiso.—Esaya 2:2-4.
17 Swakudya swa moya leswi Yehovha a swi lunghiselelaka a swi fiki hi nkarhi wa kona ntsena, kambe swi tlhela swi enerisa swinene. Loko matiko ma ri karhi ma susana ntshiva hi nkarhi wa Nyimpi ya Vumbirhi ya Misava, vanhu va Yehovha va pfuniwile leswaku va anakanyisisa hi mphikamakaneta leyikulu swinene ku tlula ku ponisiwa ka vona. Yehovha u va pfune ku twisisa leswaku mhaka leyikulu leyi khumbaka vuako hinkwabyo yi fambisana ni vuhosi lebyi faneleke bya Yehovha. Swa tsakisa hakunene ku tiva leswaku Mbhoni yin’wana ni yin’wana ya Yehovha leyi lwelaka ku tshembeka, yi hoxa xandla hi ndlela yo karhi eku lweleni ka vuhosi bya Yehovha ni ku kombisa leswaku Diyavulosi i muhembi! (Swivuriso 27:11) Ku hambana na Sathana loyi a vulavulaka ku biha hi Yehovha ni ndlela leyi a fumaka ha yona, vanhu va Yehovha lava tshembekaka va hambeta va vula erivaleni va ku: “Yehovha u lulamile etindleleni takwe hinkwato.”—Pisalema 145:17.
18. Hi xihi xikombiso xa sweswinyana xa swakudya swa moya leswi fikaka hi nkarhi ni leswi enerisaka swinene?
18 Xikombiso xin’wana xa swakudya leswi enerisaka swa moya leswi fikaka hi nkarhi wa kona i buku leyi nge Tshinela Eka Yehovha, leyi humesiweke eka madzana ya Mintsombano ya Miganga ya “Vachumayeri Va Mfumo Lava Hisekaka” leyi khomiweke emisaveni hinkwayo hi 2002/03. Buku yoleyo, leyi lunghiseleriweke hi “hlonga ro tshembeka ni ro tlhariha” kutani yi fambisiwa hi Timbhoni ta Yehovha, yi dzika ngopfu eka timfanelo ta Yehovha Xikwembu leti hlamarisaka, ku katsa ni leti ti boxiweke eka Pisalema 145. Buku yoleyo leyinene yi ta pfuna swinene leswaku vanhu va Xikwembu lava tshembekaka va tshinela swinene eka xona.
Nkarhi Wa Ku Tshinela Swinene Eka Yehovha
19. Hi wihi nkarhi wa nkoka lowu tshinelaka, naswona hi nga langutana njhani na wona?
19 Nkarhi wa nkoka wa ku ahlula mphikamakaneta ya vuhosi bya Yehovha wa tshinela. Hilaha swi profetiweke hakona eka Ezekiyele ndzima 38, ku nga ri khale Sathana u ta hetisisa ntirho wakwe tanihi “Gogo wa tiko ra Magogo.” Sweswo swi ta katsa ku hlaseriwa ka vanhu va Yehovha emisaveni hinkwayo. Sathana u ta va a hume tsima ro xaxisa vutshembeki bya vanhu va Xikwembu. Hi nkarhi wolowo vagandzeri va Yehovha va ta fanela va titshega hi yena swinene, va n’wi huwelela leswaku a va pfuna. Xana ku chava Xikwembu ni ku xi rhandza ka vona swi ta va swa hava? Nikatsongo, hikuva Pisalema 145 yi ri: “Yehovha u le kusuhi ni hinkwavo lava n’wi vitanaka, eka hinkwavo lava n’wi vitanaka hi ntiyiso. U ta enerisa ku navela ka lava va n’wi chavaka, naswona u ta ku twa ku rila ka vona va kombela ku pfuniwa, u ta va ponisa. Yehovha wa va rindza hinkwavo lava n’wi rhandzaka, kambe lavo homboloka hinkwavo u ta va lovisa.”—Pisalema 145:18-20.
20. Marito ya Pisalema 145:18-20 ma ta hetiseka njhani ku nga ri khale?
20 Hi ta tiyisiwa nhlana swinene hi ku tiva leswaku Yehovha u kusuhi na hina naswona u ni matimba ya ku hi ponisa loko a lovisa vanhu hinkwavo lava hombolokeke! Enkarhini wolowo wa nkoka lowu ngo va kwala nyongeni, Yehovha u ta yingisela ntsena “lava n’wi vitanaka hi ntiyiso.” Vakanganyisi a nge va yingiseli nikatsongo. Rito ra Xikwembu ri swi kombisa kahle leswaku vanhu hinkwavo vo homboloka lava tirhiseke vito ra xona loko se va heleriwe hi nkarhi a va humelelanga.—Swivuriso 1:28, 29; Mikiya 3:4; Luka 13:24, 25.
21. Vanhu va Yehovha lava tshembekaka va swi kombisa njhani leswaku va tsakela ku tirhisa vito rakwe?
21 Sweswi i swa xihatla swinene leswaku lava va chavaka Yehovha va ‘n’wi vitana hi ntiyiso.’ Vanhu va yena lava tshembekaka va tsakela ku tirhisa vito rakwe eswikhongelweni swa vona ni loko va nyikela tinhlamuselo eminhlanganweni. Va tirhisa vito ra Xikwembu loko va vulavula ni van’wana etlhelo. Naswona va twarisa vito ra Yehovha hi vurhena entirhweni wa vona wa nsimu.—Varhoma 10:10, 13-15.
22. Ha yini swi ri swa nkoka leswaku hi tshama hi ri karhi hi lwisana ni malangutelo ya misava ni ku navela ka yona?
22 Leswaku hi hambeta hi vuyeriwa eka vuxaka lebyikulu lebyi hi nga na byona na Yehovha Xikwembu, nakambe i swa nkoka leswaku hi hambeta hi lwisana ni swilo leswi nga ni khombo emoyeni swo tanihi ku hlongorisa swilo leswi vonakaka, vuhungasi lebyi nga tengangiki, ni moya wa ku ala ku rivalela van’wana, kumbe ku nga khathali hi vanhu lava lavaka mpfuno. (1 Yohane 2:15-17; 3:15-17) Loko mikhuva yo tano yi nga lulamisiwi yi nga hi vangela ku endla swidyoho leswikulu, ivi Yehovha a hetelela a hi fularherile. (1 Yohane 2:1, 2; 3:6) I swinene ku tsundzuka leswaku Yehovha u ta hambeta a hi kombisa musa wa rirhandzu kumbe rirhandzu leri nga tsekatsekiki loko hi tshama hi tshembekile eka yena.—2 Samuwele 22:26.
23. Hi byihi vumundzuku lebyinene lebyi vanhu va Xikwembu hinkwavo lava tshembekaka va nga ta va na byona?
23 Hikwalaho, a hi tshameni hi dzikise mianakanyo ya hina eka vumundzuku lebyinene lebyi vanhu hinkwavo va Yehovha lava tshembekaka va nga ta va na byona. Loko hi endla tano, hi ta va ni ntshembo lowunene wa ku hlayiwa exikarhi ka lava va nga ta tlakusa Yehovha va tlhela va n’wi katekisa ni ku n’wi dzunisa “siku hinkwaro,” ina, “hi masiku.” (Pisalema 145:1, 2) Kutani onge hi nga ‘tihlayisa erirhandzwini ra Xikwembu, hi ri karhi hi rindzela vutomi lebyi nga heriki.’ (Yudha 20, 21) Loko hi ri karhi hi hambeta hi pfuneka hikwalaho ka timfanelo letinene ta Tata wa hina wa le tilweni, ku katsa ni musa lowukulu wa rirhandzu lowu a wu kombisaka eka lava va n’wi rhandzaka, onge minkarhi hinkwayo hi nga titwa hilaha Davhida a titweke hakona loko a vula marito yakwe yo hetelela ya Pisalema 145: “Nomu wa mina wu ta dzunisa Yehovha; naswona nyama hinkwayo a yi dzunise vito rakwe ro kwetsima hilaha ku nga riki na makumu, hi masiku.”
A Wu Ta Hlamurisa Ku Yini?
• Pisalema 145 yi hi pfuna njhani leswaku hi lemuka vanhu va Xikwembu lava tshembekaka?
• Yehovha u ku ‘enerisa njhani ku navela ka xilo xin’wana ni xin’wana lexi hanyaka’?
• Ha yini hi fanele hi tshinela swinene eka Yehovha?
[Swivutiso Swa Dyondzo]
[Xifaniso lexi nga eka tluka 16]
Vanhu va Xikwembu lava tshembekaka va tsakela ku vulavula hi swiendlo swa xona swa matimba
[Xifaniso lexi nga eka tluka 17]
Malandza ya Yehovha ma ni vurhena eku pfuneni ka vanhu lava nga riki vapfumeri leswaku va dyondza hi ta ku dzuneka ka vuhosi bya yena
[Swifaniso leswi nga eka tluka 18]
Yehovha u phamela “xilo xin’wana ni xin’wana lexi hanyaka” swakudya
[Xihlovo Xa Kona]
Animals: Parque de la Naturaleza de Cabárceno
[Xifaniso lexi nga eka tluka 19]
Yehovha u nyika vanhu vakwe lava tshembekaka matimba a tlhela a va kongomisa loko va lava mpfuno wa yena hi xikhongelo