“Lwana Nyimpi Leyinene Ya Ripfumelo”

XANA u anakanya leswaku ri kona socha leri nga hlunamaka hi nkarhi wa nyimpi loko ri nyikiwa xileriso lexi nge: “U fanele u tlhelela ekaya u ya heta nkarhinyana ni nsati wa wena swin’we ni ndyangu wa wena”?

Ku ni socha rin’wana leri nga tshama ri kuma xileriso xo tano eminkarhini ya Hosi Davhida wa le Israyele. Uriya loyi a ri Muheti u kume xileriso eka hosi hi yoxe lexi a xi n’wi kombela leswaku a tlhelela ekaya. Kambe, Uriya u arile ku tlhelela ekaya. Loko a vutisiwa leswaku u alela yini, Uriya u vule leswaku areka ya ntwanano, leyi a yi yimela vukona bya Xikwembu, ni vuthu ra Vaisrayele a swi ri laha nyimpi yi hisaka kona. U vutisile: “Kutani mina—xana ndzi fanele ndzi ya endlwini ya mina ndzi dya ni ku nwa naswona ndzi etlela ni nsati wa mina?” Eka Uriya, xiendlo xo tano a xi nga twali hikuva a ti bihile.—2 Samuwele 11:8-11.

Xiendlo xa Uriya xi pfuxa swivutiso swa nkoka, hikuva na hina hi hanya enkarhini wa nyimpi. Nyimpi leyi yi hisa ku tlula leti vanhu va laha misaveni va nga tshama va ti lwa. Yi endla leswaku tinyimpi timbirhi ta misava ti vonaka ti nga ri nchumu loko ti pimanisiwa na yona, naswona wa katseka enyimpini leyi. Hi le khombyeni, naswona nala u hi lumele ni nomu wa le hansi. Enyimpini leyi, a ku lwiwi hi swibamu ni tibomo kambe swi lava ku tiyimisela lokukulu.

Loko u nga si havela matlhari, u fanele u swi tiva kahle loko swi lulamile ku lwa nileswaku u lwela yini.  Xana u ta kuma hakelo enyimpini leyi? Muapostola Pawulo u xi hlamusele kahle xikongomelo xa nyimpi leyi, leyo hlawuleka eka papila rakwe leri yaka eka Timotiya: “Lwana nyimpi leyinene ya ripfumelo.” Ina, enyimpini leyi a wu fanelanga u sirhelela khokholo, kambe u fanele u sirhelela “ripfumelo”—ntiyiso hinkwawo wa Vukreste lowu paluxiweke eBibeleni. Entiyisweni, u fanele u pfumela hi mbilu hinkwayo leswaku “ripfumelo” ri ta lwa nyimpi leyi kukondza ri hlula.—1 Timotiya 6:12.

Nhenha yo tlhariha yi lwela ku tiva nala wa yona. Enyimpini leyi, nala wa hina u ni ntokoto lowukulu wa ku lwa, naswona u ni matlhari yo tala lawa a ma tirhisaka. Nakambe u ni matimba yo tlula ya vanhu. U ni tihanyi, vukarhi, naswona u hombolokile; u vitaniwa Sathana. (1 Petro 5:8) Matlhari ya xiviri swin’we ni vukanganyisi bya vanhu ni mano ya vona a hi nchumu eka nala loyi. (2 Vakorinto 10:4) Xana u ta lwa hi yini enyimpini leyi?

Tlhari leri tirhisiwaka ngopfu i “banga ra moya, ku nga rito ra Xikwembu.” (Vaefesa 6:17) Muapostola Pawulo u kombise ndlela leyi ri tirhaka ha yona: “Rito ra Xikwembu ra hanya naswona ri ni matimba, ri kariha ku tlula banga rihi ni rihi leri tsemaka hi matlhelo mambirhi, ri tlhava hambi ku ri ku ya fika emaaveni ya moya-xiviri ni moya, ni ya mahlangano swin’we ni mongo wa wona, naswona ra swi kota ku twisisa miehleketo ni makungu ya mbilu.” (Vaheveru 4:12) Tlhari leri karihaka ngopfu, lerova ri tlhava endzeni-ndzeni ka mianakanyo ni minsusumeto ya munhu hakunene ri fanele ri tirhisiwa hi vutshila ni hi vurhon’wana.

U nga ha va u tiva vuthu leri nga ni matlhari ya manguva lawa, kambe loko matlhari wolawo ma tirhisiwa hi masocha lama pfumalaka ntokoto a ma pfuni nchumu. Hilaha ku fanaka na wena u lava swiletelo swo tirhisa banga ra wena hi ndlela leyi humelelaka. Lexi tsakisaka va kona valeteri lava nga ni ntokoto swinene eku lweni ka nyimpi. Yesu u vitana valeteri lava a ku i “hlonga ro tshembeka ni ro tlhariha,” leri byarhisiweke vutihlamuleri byo phamela valandzeri va yena swakudya kumbe swiletelo swa moya hi nkarhi wa kona. (Matewu 24:45) Ntlawa lowu wa hlonga u nga wu vona hi ku xiya migingiriko ya wona eku dyondziseni ni le ku nyikeni ka switsundzuxo leswi taka hi nkarhi swa malunghana ni marhengu ya nala. Vumbhoni byi kombisa leswaku ntlawa lowu wa hlonga wu vumbiwa hi swirho leswi totiweke hi moya swa vandlha ra Vukreste ra Timbhoni ta Yehovha.—Nhlavutelo 14:1.

Ntlawa lowu wa hlonga a wu tirhi ku letela ntsena. Wu kombise moya wa muapostola Pawulo, loyi a tsaleleke vandlha ra le Tesalonika a ku: “Hi ve ni ku olova eka n’wina, hi ndlela leyi manana la wundlaka a khathalelaka vana vakwe ha yona. Kutani, hikwalaho ko va ni xinakulobye xa rirhandzu eka n’wina, leswi hi swi tsakeleke swinene a hi ku hundzisela mahungu lamanene ya Xikwembu ntsena eka n’wina, kambe ni mimoya-xiviri ya hina, hikuva mi ve lava rhandzekaka eka hina.” (1 Vatesalonika 2:7, 8) I vutihlamuleri bya socha rin’wana ni rin’wana leri nga Mukreste leswaku ri tirhisa ndzetelo wa rirhandzu lowu nyikeriwaka.

Mahavelo Lama Heleleke

Hi nyikiwe mahavelo lama heleleke yo fanekisela leswaku hi tisirhelela ha wona. U nga kuma nxaxamelo wa mahavelo lawa eka Vaefesa 6:13-18. Socha leri nga ni vuxiyaxiya, a ri nge kanyi mbilu ri ya enyimpini loko matlhari ya rona ya moya ma kayivela kumbe ma lava ku lunghisiwa.

Mukreste u fanele a va ni mahavelo yakwe hinkwawo, kambe ngopfu-ngopfu i xitlhangu lexikulu xa ripfumelo lexi nga xa nkoka. Hi yona mhaka leyi Pawulo a tsaleke a ku: “Ehenhla ka swilo hinkwaswo, rhwalani xitlhangu lexikulu xa ripfumelo, lexi mi nga ta kota ku timela ha xona miseve hinkwayo leyi pfurhaka ya lowo homboloka.”—Vaefesa 6:16.

Xitlhangu lexikulu, lexi funengetaka miri hinkwawo, xi yimela mpimo wa ripfumelo. U fanele u va ni ripfumelo leri tiyeke enkongomisweni wa Yehovha, u nga kanakani leswaku switshembiso swa yena hinkwaswo swi ta hetiseka. Eka wena,  switshembiso sweswo swi fanele swi vonaka onge hi loko ana se swi hetisekile. U nga kanakani nikatsongo leswaku mafambiselo lawa ya Sathana ma ta herisiwa ku nga ri khale, nileswaku misava yi ta hundzuriwa paradeyisi, ni leswaku vanhu lava tshembekaka eka Xikwembu va ta endliwa va va lava hetisekeke.—Esaya 33:24; 35:1, 2; Nhlavutelo 19:17-21.

Hambiswiritano, eka nyimpi leyikulu ya ripfumelo leyi lwiwaka, ku na swin’wanyana leswi u swi lavaka—ku nga munghana. Eminkarhini ya nyimpi, masocha ma aka vuxaka lebyikulu loko ma khutazana ni ku sirhelelana hambi ku ri ku ponisana eku feni loko swi koteka. Hambileswi vapfuni va nga va nkoka, leswaku u pona enyimpini leyi, ngopfu-ngopfu u fanele u va ni vunghana na Yehovha. Hi yona mhaka leyi Pawulo a gimeteke hi marito lama landzelaka enxaxamelweni wakwe wa leswi endlaka mahavelo lama heleleke: “Kasi hi swikhongelo swa mixaka hinkwayo ni xikombelo mi hamba mi khongela nkarhi hinkwawo hi moya.”—Vaefesa 6:18.

Ha tsaka swinene loko hi ri ni munghana lonkulu. Hi endla matshalatshala yo dzumba na yena nkarhi wo leha. Loko hi khongela eka Yehovha minkarhi hinkwayo, u va munghana wa hina lonkulu loyi hi n’wi tshembaka. Mudyondzisiwa Yakobo wa hi khutaza a ku: “Tshinelani eka Xikwembu, kutani xi ta tshinela eka n’wina.”—Yakobo 4:8.

Marhengu Ya Nala

Minkarhi yin’wana ku lwa ni misava leyi swi nga fana ni ku famba endhawini leyi nga ni tibomo leti fuhlekiweke. Nhlaselo wu nga ha ta hi matlhelo hinkwawo, naswona nala u ringeta ku ku phasa u nga ehleketanga. Kambe tiyiseka leswaku Yehovha u ta ku nyika nsirhelelo hinkwawo lowu u wu lavaka.—1 Vakorinto 10:13.

Nala loyi a nga tirhisa rhengu ra ku sola tidyondzo ta Bibele leti nga xisekelo xa ripfumelo ra wena. Vagwinehi va nga ha tirhisa marito yo tsokombela, vukanganyisi ni mavulavulelo lama hombolokeke leswaku va ringeta ku ku hambukisa. Kambe mugwinehi a nga na mhaka ni vumoya bya wena. Swivuriso 11:9 yi ri: “Loyi a nga mugwinehi u lovisa munhu-kulobye hi nomu wakwe, kambe lavo lulama va ponisiwa hi [vutivi].”

Ku ta va ku ri vuphukuphuku ku anakanya hi ku yingisela vagwinehi kumbe ku hlaya tibuku ta vona hi xikongomelo xo lulamisa tidyondzo ta vona. Mavulavulelo ya vona lama hombolokeke ni lama nga ni chefu ma nga ku vavisa hi tlhelo ra moya naswona ma nga hlakata ripfumelo ra wena ku fana ni xilondza lexi hlakataka miri hi rivilo lerikulu. (2 Timotiya 2:16, 17) Ematshan’weni ya sweswo, tekelela ndlela leyi Xikwembu xi khomaka vagwinehi ha yona. Yobo u vulavule ha Yehovha a ku: “Emahlweni ka [yena] a nga kona mugwinehi la nga nghenaka.”—Yobo 13:16.

Nala loyi a nga ringeta rhengu rin’wana, leri a phaseke vo tala ha rona enkarhini lowu hundzeke. Loko masocha lama yaka enyimpini mo yengiwa leswaku ma hambuka ma ya endla swilo swa vudlakuta, ku nga va ni hasahasa leyikulu.

Ntlhamu lowu phasaka vo tala i vuhungasi bya misava, byo tanihi tifilimi ni minkombiso ya le ka thelevhixini leyi thyakeke kun’we ni vuyimbeleri bya vudlakuta. Van’wana va vula leswaku va nga hlalela tifilimi ta vudlakuta kumbe va hlaya tibuku leti vulavulaka hi mahanyelo ya manyala kambe va nga khumbeki helo. Hambiswiritano,  munhu un’wana loyi a a tshamela ku hlalela tifilimi ta rimbewu u vule a nga tilumalumi a ku: “Tifilimi teto a ti rivaleki, loko u ehleketa ngopfu ha tona u tshamela ku lava ku endla leswi u swi voneke . . . Tifilimi teto ti endla leswaku u titwa onge ku ni swin’wana leswi u swi kayelaka.” Xana i vutlhari ku tipeta ekhombyeni ra ku phasiwa hi swirimbana sweswo leswi tumbeleke?

Rin’wana ra matlhari lawa nala loyi a ma tirhisaka i ku hlongorisa rifuwo. Swi nga ha tika ku vona khombo rero hikuva hinkwerhu ha swi lava swilo leswi vonakaka. Ha yi lava yindlu, swakudya ni swiambalo, naswona a swi hoxanga ku va ni swilo swa kahle. Langutelo leri munhu a nga na rona hi rifuwo hi rona leri nga n’wi hoxaka ekhombyeni. Hi nga ha teka mali yi ri ya nkoka ku tlula timhaka ta moya. Hi nga ha va vanhu lava rhandzaka mali. Hi fanele hi tsundzuka leswaku mpfuno wa rifuwo wu hikiwile. Rifuwo ra nyama i ra xinkarhana, kambe rifuwo ra moya ri tshama hilaha ku nga heriki.—Matewu 6:19, 20.

Loko masocha ma nga titshembi, hakanyingi a ma nge hluli enyimpini. “Xana u tikombise u hele matimba hi siku ra maxangu? Matimba ya wena ma ta va matsongo.” (Swivuriso 24:10) Sathana u hete vanhu matimba hi ndlela leyi humelelaka. Ku ambala “ntshembo wa ku ponisiwa wu va xihuku” swi ta ku pfuna leswaku u lwisana ni ndzingo wa ku hela matimba. (1 Vatesalonika 5:8) Ringeta ku hlayisa ntshembo wa wena wu ri lowu tiyeke ku fana ni wa Abrahama. Loko a komberiwa ku endla gandzelo hi Isaka n’wana wakwe la nga swakwe, Abrahama a nga kanakananga. A a tshemba leswaku Xikwembu xi ta hetisisa xitshembiso xa xona xa ku katekisa tinxaka hinkwato hi ku tirhisa vatukulu vakwe, nileswaku Xikwembu xi nga pfuxa Isaka eka lava feke loko swi fanerile leswaku xi hetisisa xitshembiso xexo.—Vaheveru 11:17-19.

U Nga Tshiki Ku Lwa eNyimpini Leyi

Van’wana lava ana se ku nga khale va ri karhi va lwa nyimpi leyi swi nga ha endleka va sungula ku karhala kutani va nga ha lwi hi matimba. Xikombiso xa Uriya, lexi boxiweke eku sunguleni ka xihloko lexi, xi nga pfuna hinkwavo lava nga enyimpini leyi leswaku va tshama va ri ni langutelo lerinene. Tinhenha-kulorhi to tala leti nga Vakreste ti tiyisela maxangu, ti weriwa hi makhombo, kumbe ti dlawa hi xirhami ni ndlala. Ku fana na Uriya, hi khutaziwa leswaku hi nga ehleketi hi vulovolovo lebyi hi nga byi kumaka sweswi kumbe hi navela ku hanya vutomi bya ka byandlana. Hi lava ku tshama hi ri exikarhi ka vuthu ra Yehovha ra misava hinkwayo ra masocha yo tshembeka kutani hi lwa kukondza hi kuma mikateko yo hlamarisa leyi hi tshembisiweke yona.—Vaheveru 10:32-34.

Loko hi khomiwa hi vurhongo hi ta wela ekhombyeni, kumbexana hi ehleketa leswaku nhlaselo wo hetelela wa ha ri ekule. Xikombiso xa Hosi Davhida xi kandziyisa khombo rero. A a nga fambanga ni masocha ya yena enyimpini hikwalaho ka xivangelo xo karhi. Hikwalaho ka sweswo, Davhida u endle xidyoho lexikulu lexi n’wi dyiseke  mbitsi a xeva hi nhlomulo vutomi byakwe hinkwabyo.—2 Samuwele 12:10-14.

Xana swi fanerile leswaku hi tikarhata hi lwa nyimpi leyi, hi langutana ni maxangu ya yona, hi tiyisela ku hlekuriwa ni ku balekela mintsako leyi pfuxaka swivutiso ya misava leyi? Lava humelelaka enyimpini leyi va pfumela leswaku leswi misava yi swi navetaka swi nga vonaka swi koka mahlo, ku fana ni nsimbi leyi vangamaka, kambe loko u swi langutela ekusuhi u kuma leswaku mpfuno wa swona a wu nyawuli. (Vafilipiya 3:8) Ku engetela kwalaho, hakanyingi vuyelo bya mintsako ya kona i maxangu ni ku hela matimba.

Mukreste loyi a nga enyimpini leyi ya moya u va ni vuxaka lebyikulu ni vanghana va ntiyiso, u va ni ripfalo leri baseke, naswona u ni ntshembo lowunene hi vumundzuku. Vakreste lava totiweke hi moya va byi langutele hi mahlo-ngati vutomi bya le tilweni laha va nga ta va na Kreste Yesu. (1 Vakorinto 15:54) Vunyingi bya masocha laman’wana ya Vakreste byi ni ntshembo wo hanya vutomi lebyi hetisekeke eparadeyisini laha misaveni. Hakunene hakelo leyi i ya nkoka ku tlula tihakelo hinkwato. Naswona, ku hambana ni tinyimpi ta misava, hi ni ntshembo wo hlula enyimpini leyi ntsena loko hi tshama hi tshembekile. (Vaheveru 11:1) Kambe vuyelo bya mafambiselo lawa lama lawuriwaka hi Sathana ku ta va ku loviseriwa makumu.—2 Petro 3:10.

Loko u ri karhi u lwa nyimpi leyi, tsundzuka marito ya Yesu lama nge: “Tiyani timbilu! Misava ndzi yi hlurile.” (Yohane 16:33) U yi hlule hi ku tshama a hitekile ni ku hambeta a tshembeka loko a ringiwa. Na hina hi nga endla leswi fanaka.

[Marito lama tshahiweke exihlokweni lama nga eka tluka 27]

Enyimpini leyi, a ku lwiwi hi swibamu ni tibomo kambe swi lava ku tiyimisela lokukulu

[Marito lama tshahiweke exihlokweni lama nga eka tluka 30]

Hi ni ntshembo wo hlula enyimpini leyi, ntsena loko hi tshama hi tshembekile

[Xifaniso lexi nga eka tluka 26]

Xihuku xa ku ponisiwa xi ta hi pfuna leswaku hi lwisana ni ndzingo wa ku hela matimba

Tirhisa xitlhangu lexikulu xa ripfumelo leswaku u timela ‘miseve leyi pfurhaka’ ya Sathana

[Xifaniso lexi nga eka tluka 28]

“Tshinelani eka Xikwembu, kutani xi ta tshinela eka n’wina”

[Xifaniso lexi nga eka tluka 29]

Hi fanele hi pfumela leswaku switshembiso swa Xikwembu swi ta hetiseka