Papalata Vuxisi
Papalata Vuxisi
“Tivoneleni: swi nga ha endleka ku va ni un’wana loyi a nga ta mi phasa hi . . . vuxisi bya hava.”—VAKOLOSA 2:8.
1-3. (a) Hi swihi swikombiso leswi swi vekaka erivaleni leswaku vuxisi byi khumba swiyimo swo tala swinene evuton’wini bya hina bya siku ni siku? (b) Ha yini hi nga fanelanga hi hlamarisiwa hi vuxisi lebyi nga kona emisaveni?
“I VANGANI exikarhi ka n’wina lava nga si tshamaka va byeriwa mavunwa hi munhu loyi va n’wi yimelaka?” Malembe ma nga ri mangani lama hundzeke, profesa wa nawu u endle nkambisiso hi ku vutisa xivutiso xexo. Xana nhlamulo yi ve yihi? Wa hlamusela: “Eka magqweta ya gidi, i rin’we ntsena leri a ri nga si tshama ri byeriwa mavunwa.” Xivangelo? “Gqweta ra kona a ra ha ku sungula ku tirha ni nhlangano lowukulu wa magqweta, kutani a ri nga si tshama ri vulavula ni munhu la lavaka ku yimeriwa.” Ntokoto lowu wu kombisa mhaka yo vava—ku hemba ni vuxisi swi toloveleke ngopfu emisaveni ya namuntlha.
2 Vuxisi byi ta hi tindlela to hambana-hambana naswona byi khumba swiyimo swo tala swinene evuton’wini bya vanhu namuntlha. Swiviko swa swihaxa-mahungu swi ni swikombiso swo tala—van’watipolitiki lava vulaka mavunwa malunghana ni swiendlo swa vona, van’watinkota ni magqweta lava hundzeletaka mali leyi va yi koxaka, vaendli va swinavetisi lava xisaka vaxavi, vanhu lava kanganyisaka loko va koxa mali eka tikhampani ta ndzindza-khombo, ni swin’wana swo tala swinene. Nakambe ku ni vuxisi bya vukhongeri. Vafundhisi va kanganyisa mintshungu hi tidyondzo ta mavunwa, to tanihi moya-xiviri lowu nga fiki, ndzilo wa le tiheleni ni Vunharhu-un’we.—2 Timotiya 4:3, 4.
3 Xana vukanganyisi lebyi hinkwabyo byi fanele byi hi hlamarisa? Nikatsongo. Malunghana ni ‘masiku lawa yo hetelela,’ Bibele yi lemukisile yi ku: “Vanhu vo homboloka ni vaxisi va ta ya emahlweni va nyanya evubihini bya vona, va hambukisa, na vona va hambukisiwa.” (2 Timotiya 3:1, 13) Tanihi Vakreste, hi fanele hi xalamukela mianakanyo ya vukanganyisi leyi nga hi hambukisaka entiyisweni. Hikwalaho ku tlakuka swivutiso swimbirhi: Ha yini vuxisi byi tele swonghasi namuntlha, naswona hi nga swi papalatisa ku yini ku xisiwa?
Ha Yini Ku Ri Ni Vuxisi Byo Tala Swonghasi Namuntlha?
4. Bibele yi xi hlamusela njhani xivangelo xa ku tala ka vuxisi emisaveni?
4 Bibele yi swi veka erivaleni leswaku ha yini vuxisi byi tele swonghasi emisaveni leyi. Muapostola Yohane u tsale leswaku “misava hinkwayo yi le hansi ka matimba ya lowo homboloka.” (1 Yohane 5:19) Munhu yoloye “lowo homboloka” i Sathana Diyavulosi. Malunghana na yena, Yesu u te: “A nga yimanga a tiyile entiyisweni, hikuva ntiyiso a wu kona eka yena. Loko a vulavula vunwa, u vulavula hi ku landza mboyamelo wa yena, hikuva i muhembi ni tata wa mavunwa.” Xana swa hlamarisa leswi misava leyi yi tekelelaka moya, mianakanyo ni tindlela ta vuxisi ta mufumi wa yona?—Yohane 8:44; 14:30; Vaefesa 2:1-3.
5. Sathana u hume tsima lerikulu hi ndlela yihi eka matshalatshala ya yena ya vuxisi enkarhini lowu wa makumu, naswona i vamani lava a va pikeke ngopfu?
5 Enkarhini lowu wa makumu, Sathana u hume tsima lerikulu. U cukumeteriwe emisaveni. Wa swi tiva leswaku nkarhi wa yena wu komile, kutani u “hlundzukile swinene.” Tanihi leswi a tiyimiseleke ku wisa vanhu vo tala swinene, u “[xisa] misava hinkwayo leyi akiweke.” (Nhlavutelo 12:9, 12) Sathana a nga pfi a koka moya eku xiseni ka yena. Ku ri na sweswo, u phikelela hi matimba eka matshalatshala ya yena ya ku xisa vanhu. * U tirhisa tindlela hinkwato ta vuxisi leswaku a pfala vanhu lava nga pfumeliki mianakanyo leswaku va nga vi na vuxaka ni Xikwembu. (2 Vakorinto 4:4) Mathwarivona loyi wa vuxisi ngopfu-ngopfu u pike lava va gandzelaka Xikwembu “hi moya ni ntiyiso.” (Yohane 4:24; 1 Petro 5:8) U nga rivali leswaku kahle-kahle Sathana u tshama a ku: ‘Ndzi nga swi kota ku hambukisa vanhu hinkwavo eka Xikwembu.’ (Yobo 1:9-12) A hi kambisiseni man’wana ya “mano layo biha” ya Sathana ni ndlela leyi hi nga tivonelaka ha yona eka wona.—Vaefesa 6:11, Bibele—Mahungu Lamanene.
Papalata Ku Xisiwa Hi Vagwinehi
6, 7. (a) I yini leswi vagwinehi va nga swi vulaka? (b) Matsalwa ma xi kombisa njhani xikongomelo xa vagwinehi?
6 I khale Sathana a ri karhi a tirhisa vagwinehi eka marhengu yakwe ya ku kanganyisa malandza ya Xikwembu. (Matewu 13:36-39) Vagwinehi va nga vula leswaku va gandzela Yehovha naswona va yi tshemba Bibele, kambe va lwisana ni nhlengeletano yakwe leyi vonakaka. Van’wana va kala va tlhelela etidyondzweni leti sandzaka Xikwembu ta “Babilona Lonkulu,” ku nga mfumo wa misava wa vukhongeri bya mavunwa. (Nhlavutelo 17:5; 2 Petro 2:19-22) Vatsari va Bibele lava huhuteriweke hi Xikwembu va tirhise marito ya matimba yo paluxa minsusumeto ya vagwinehi ni tindlela leti va ti tirhisaka.
7 Xana xikongomelo xa vagwinehi hi xihi? Vo tala va va va nga enerisekanga hi ku fularhela vupfumeri lebyi kumbexana a va byi teka byi ri bya ntiyiso eku sunguleni. Hakanyingi va lava ku gwinehisa ni van’wana. Ematshan’weni yo famba va tikumela vadyondzisiwa kun’wana, vagwinehi vo tala va lava ku “tikokela vadyondzisiwa [va Kreste eka vona].” (Mintirho 20:29, 30) Malunghana ni vadyondzisi va mavunwa, muapostola Pawulo u vule xilemukiso lexi xa xihatla: “Tivoneleni: swi nga ha endleka ku va ni un’wana loyi a nga ta mi phasa.” (Vakolosa 2:8) Xana a swi hlamuseli leswi vagwinehi vo tala va ringetaka ku swi endla? Ku fana ni mutlhakisi loyi a bvungaka munhu a n’wi hambanisa ni ndyangu wakwe, vagwinehi va wonga swirho swa vandlha leswi vonakaka swi va tshemba, va ringeta ku swi humesa entlhambini.
8. Hi tihi tindlela leti tirhisiwaka hi vagwinehi leswaku va fikelela xikongomelo xa vona?
8 Hi tihi tindlela leti vagwinehi va ti tirhisaka leswaku va fikelela xikongomelo xa vona? Hakanyingi va soholota ntiyiso, va vula ntiyiso lowu kayivelaka ni ku tirhisa vunwa lebyi nga erivaleni. Yesu a a swi tiva leswaku valandzeri vakwe a va ta hlaseriwa hi lava a va ta va “hembela hi swilo hinkwaswo swo homboloka.” (Matewu 5:11) Vakaneti volavo lava nga ni vuntswaka va nga vulavula mavunwa hi xikongomelo xo hambukisa van’wana. Muapostola Petro u lemukise malunghana ni vagwinehi lava a va ta tirhisa “marito ya vuxisi,” va hangalasa ‘tidyondzo ta vuxisi’ va tlhela va ‘soholota Matsalwa’ leswaku va fikelela swikongomelo swa vona. (2 Petro 2:3, 13; 3:16) Lexi vavisaka, vagwinehi va humelela eku “[onheni ka] ripfumelo ra van’wana.”—2 Timotiya 2:18.
9, 10. (a) Hi nga swi papalatisa ku yini ku xisiwa hi vagwinehi? (b) Ha yini hi nga karhateki loko matwisiselo ya hina hi xikongomelo xa Xikwembu ma fanele ma lulamisiwa?
9 Hi nga swi papalatisa ku yini ku xisiwa hi vagwinehi? Hi ku yingisa xitsundzuxo xa Rito ra Xikwembu lexi nge: “Mi hambeta mi veka tihlo ra n’wina eka lava va vangaka ku avana ni swiyimo leswi khunguvanyisaka leswi lwisanaka ni dyondzo leyi mi yi dyondzeke, mi va papalata.” (Varhoma 16:17) Hi “va papalata” hi ku bakanya mianakanyo ya vona—ku nga khathariseki leswaku va yi vule hi nomu, va yi tsale kunene kumbe va yi nghenise eka Internet. Ha yini hi teka goza ro tano? Xo sungula hileswi Rito ra Xikwembu ri hi lerisaka ku endla tano, naswona ha tiyiseka leswaku minkarhi hinkwayo Yehovha u hi navelela leswinene.—Esaya 48:17, 18.
10 Xa vumbirhi hileswi hi rhandzaka nhlengeletano leyi hi dyondziseke tidyondzo ta risima leti hi hambanisaka hi ku helela na Babilona Lonkulu. Hi nkarhi lowu fanaka, ha swi lemuka leswaku vutivi bya hina hi xikongomelo xa Xikwembu a byi hetisekanga; matwisiselo ya hina ma lulamisiwile hi ku famba ka malembe. Vakreste lava tshembekaka va swi tsakela hi mbilu hinkwayo ku rindzela Yehovha leswaku a endla mindzulamiso yoleyo hinkwayo. (Swivuriso 4:18) Hi nkarhi lowu fanaka, a hi nge yi fularheli nhlengeletano leyi Xikwembu xi tsakeleke ku tirhisa yona, hikuva hi yi vona kahle ndlela leyi xi yi katekisaka ha yona.—Mintirho 6:7; 1 Vakorinto 3:6.
Papalata Ku Tixisa
11. Ha yini vanhu lava nga hetisekangiki va ri ni mboyamelo wa ku tixisa?
11 Vanhu lava nga hetisekangiki va ni mboyamelo lowu Sathana a tshamaka a wu pikile—ku nga ku tixisa. Yeremiya 17:9 yi ri: “Mbilu yi kanganyisa ngopfu ku tlula hinkwaswo naswona yi ni khombo.” Hala tlhelo Yakobo u tsarile a ku: “Un’wana ni un’wana u ringiwa hi ku kokiwa ni ku wongiwa hi ku navela ka yena n’wini.” (Yakobo 1:14) Loko timbilu ta hina ti ringiwa kahle-kahle ti nga hi naveta xidyoho, xi vonaka xi koka rinoko naswona xi nga ri na khombo. Langutelo rero ra hambukisa, hikuva ku pfumela ku hluriwa hi xidyoho eku heteleleni swi tisa khombo ntsena.—Varhoma 8:6.
12. Ku tixisa ku nga hi phasa hi tindlela tihi?
12 Ku tixisa ku nga hi phasa hi ku olova. Mbilu leyi kanganyisaka yi nga vangela munhu ku honisa mikhuva yo biha leyi a nga na yona kumbe yi n’wi yimelela loko a endla xidyoho lexikulu. (1 Samuwele 15:13-15, 20, 21) Timbilu ta hina leti nga ni khombo nakambe ti nga ringeta ku yimelela mahanyelo lama siyaka swivutiso swo tala. A hi tekeni xikombiso xa vuhungasi. Vuhungasi byin’wana i byinene naswona bya tsakisa. Kambe swilo swo tala swa misava leyi—swo tanihi tifilimi ni minongonoko ya thelevhixini kun’we ni rungula ra Internet—swi borile naswona swi tele vudlakuta. Swa olova ku tibyela leswaku hi nga languta vuhungasi byo biha kambe hi nga khumbeki helo. Van’wana va kala va vula nileswaku, “Ripfalo ra mina a ri ndzi aleli, kutani xiphiqo xi nga va kwihi?” Kambe vanhu vo tano va ‘tixisa hi mianakanyo ya mavunwa.’—Yakobo 1:22.
13, 14. (a) Hi xihi xikombiso xa Matsalwa lexi swi vekaka erivaleni leswaku ripfalo ra hina ri pfa ri nga hi kongomisi kahle? (b) Hi nga swi papalatisa ku yini ku tixisa?
13 Hi nga swi papalatisa ku yini ku tixisa? Xo sungula, hi fanele hi tsundzuka leswaku ripfalo ra munhu ri pfa ri nga tshembeki. Xiya mhaka ya muapostola Pawulo. Loko a nga si va Mukreste, a a xanisa valandzeri va Kreste. (Mintirho 9:1, 2) Swi nga endleka ripfalo rakwe ri nga n’wi karhatanga hi nkarhi wolowo. Kambe swi le rivaleni leswaku a ri leteriwe hi ndlela leyi hoxeke. Pawulo u te: “A ndzi pfumala vutivi naswona a ndzi endla hi ku pfumala ripfumelo.” (1 Timotiya 1:13) Kutani loko ripfalo ra hina ri nga hi karhati emhakeni ya vuhungasi byo karhi, a swi vuli swona leswaku vuhungasi bya kona byi fanerile. Ripfalo lerinene leri leteriweke hi Rito ra Xikwembu hi rona ri nga hi kongomisaka kahle.
14 Leswaku hi papalata ku tixisa, ku ni swiringanyeto swin’wana leswinene leswi hi faneleke hi swi tsundzuka. Tikambisise kahle, u ri karhi u tirhisa xikhongelo. (Pisalema 26:2; 2 Vakorinto 13:5) Loko u tikambisisa kahle u nga lemuka leswaku ku ni ku cinca loku u faneleke u ku endla eka mavonelo kumbe tindlela ta wena. Yingisa van’wana. (Yakobo 1:19) Tanihi leswi u nga pfaka u tiyimelela loko u ri karhi u tikambisisa, i vutlhari ku twa leswi Vakreste-kulorhi lava vupfeke va anakanyaka swona hi wena. Loko u endla swiboho kumbe u endla swilo hi ndlela leyi siyaka swivutiso eka vapfumeri-kulorhi lava nga ni mianakanyo leyi hlutekeke ni lava nga ni ntokoto, u nga tivutisa xivutiso lexi nge, ‘Xana swi nga endleka ripfalo ra mina ri nga leteriwanga kahle kumbe mbilu ya mina yi va yi ndzi xisa?’ Tshama u ri karhi u hlaya Bibele ni tibuku leti fambisanaka ni Bibele. (Pisalema 1:2) Ku endla tano swi ta endla leswaku mianakanyo, malangutelo ni mintlhaveko ya wena swi tshama swi ri karhi swi pfumelelana ni misinya ya milawu ya Xikwembu.
Papalata Mavunwa Ya Sathana
15, 16. (a) Sathana u ringeta ku hi kanganyisa hi mavunwa wahi? (b) Hi nga swi papalatisa ku yini ku kanganyisiwa hi mavunwa yo tano?
15 Sathana u ringeta ku hi xisa hi mavunwa yo hambana-hambana. U ringeta ku hi khorwisa leswaku ku va ni rifuwo swi tisa ntsako ni ku eneriseka, kambe hakanyingi hi kuma leswaku a swi tano. (Eklesiasta 5:10-12) U lava hi pfumela leswaku misava leyi yo homboloka yi ta tshama yi ri kona hi masiku, hambileswi ku nga ni vumbhoni lebyi nga erivaleni bya leswaku hi hanya “emasikwini yo hetelela.” (2 Timotiya 3:1-5) Sathana u byala moya wa leswaku ku hanya vutomi bya vudlakuta a swi na khombo, hambileswi vanhu lava hlongorisaka ntsako va talaka ku tshovela swilo swo biha. (Vagalatiya 6:7) Hi nga swi papalatisa ku yini ku kanganyisiwa hi mavunwa yo tano?
16 Amukela mpfuno wa swikombiso swa le Bibeleni. Bibele yi ni swikombiso leswi lemukisaka swa vanhu lava kanganyisiweke hi mavunwa ya Sathana. A va rhandza rifuwo, va kohleka hi xiyimo xa minkarhi leyi a va hanya eka yona, kumbe va tipeta evuton’wini bya vudlakuta—naswona hinkwavo va tshovele vuyelo byo vava. (Matewu 19:16-22; 24:36-42; Luka 16:14; 1 Vakorinto 10:8-11) Dyondza eka swikombiso swa manguva lawa. Lexi vavisaka, minkarhi yin’wana Vakreste van’wana va sungula ku tigedlha va anakanya leswaku ku tirhela Xikwembu swi endla leswaku va hundziwa hi swilo leswinene. Va nga tshika ntiyiso kutani va hlongorisa vutomi lebyi ku vuriwaka leswaku byi tisa ntsako. Kambe vanhu vo tano va le “[ndhawini] leyi rhetaka,” hikuva endzhaku va ta vona xa ncila wa bulubulu hikwalaho ka vutomi bya vona. (Pisalema 73:18, 19) Hi ta va hi endla kahle loko hi dyondza eka swihoxo swa van’wana.—Swivuriso 22:3.
17. Ha yini Sathana a haxa vunwa bya leswaku Yehovha a nga hi rhandzi naswona u hi teka hi ri swikamba ntsena?
17 Ku ni vunwa byin’wana lebyi Sathana a hambukiseke vo tala ha byona—bya leswaku Yehovha a nga hi rhandzi naswona u hi teka hi ri swikamba ntsena. Sathana u hete magidi ya malembe a ri karhi a dyondza vanhu lava nga hetisekangiki. Wa swi tiva leswaku ku hela matimba swi nga tsanisa vumoya bya hina. (Swivuriso 24:10) Hikwalaho u haxa vunwa bya leswaku Xikwembu xi hi teka hi nga ri nchumu eka xona. Loko hi “tlatlalatiwa ehansi” kutani hi pfumela leswaku Yehovha a nga khathali hi hina, hi nga anakanya hi ku panulula. (2 Vakorinto 4:9) Sweswo hi leswi Muxisi lonkulu a lavaka swona! Hi nga swi papalatisa ku yini ku kanganyisiwa hi vunwa byebyo bya Sathana?
18. Bibele yi hi tiyisekisa njhani leswaku Yehovha wa hi rhandza?
18 Anakanyisisa hi leswi Bibele yi swi vulaka malunghana ni ndlela leyi Xikwembu xi hi rhandzaka ha yona. Rito ra Xikwembu ri tirhisa swifaniso leswi fikelelaka mbilu, leswi tiyisekisaka leswaku Yehovha u teka un’wana ni un’wana wa hina a ri wa nkoka naswona wa hi rhandza. U chela mihloti ya wena “eguleni ra [yena] ra dzovo,” leswi vulaka leswaku u vona a tlhela a tsundzuka mihloti leyi u yi humeseke loko u ri karhi u lwela ku tshama u tshembekile. (Pisalema 56:8) Wa swi xiya loko u ‘tshoveke mbilu’ naswona u tshama a ri kusuhi na wena hi minkarhi yoleyo. (Pisalema 34:18) U tiva swilo hinkwaswo malunghana na wena, ku katsa ni nhlayo ya ‘misisi ya nhloko ya wena.’ (Matewu 10:29-31) Ku tlula sweswo hinkwaswo, Xikwembu xi “[nyikele] hi N’wana wa xona la tswariweke a ri swakwe,” hikwalaho ka wena. (Yohane 3:16; Vagalatiya 2:20) Minkarhi yin’wana swi nga ku tikela ku pfumela leswaku matsalwa yo tano ma tirha ni le ka wena hi ku kongoma. Kambe hi fanele hi kholwa leswi Yehovha a swi vulaka. U lava hi kholwa leswaku a nga hi rhandzi tanihi ntlawa ntsena, kambe u tlhela a rhandza un’wana ni un’wana wa hina.
19, 20. (a) Ha yini swi ri swa nkoka ku lemuka vunwa bya Sathana bya leswaku Yehovha a nga ku rhandzi? (b) Mulanguteri un’wana la famba-fambaka u swi kotise ku yini ku pfuna vanhu lava heleke matimba?
19 Lemuka vunwa kutani u byi papalata. Loko u swi vona leswaku munhu u le ku ku hembeleni, u nga papalata ku hambukisiwa. Kutani, ku tiva leswaku Sathana u lava u pfumela vunwa bya leswaku Yehovha a nga ku rhandzi, swi nga va mpfuno lowukulu eka wena. Loko a hlamusela ndlela leyi a xi tlangeleke ha yona xihloko xin’wana xa Xihondzo xo Rindza lexi a xi lemukisa hi marhengu ya Sathana, Mukreste un’wana u te: “A ndzi nga swi lemuki leswaku Sathana u ringeta ku tirhisa mintlhaveko ya mina leswaku a ndzi heta matimba. Ku tiva mhaka leyi swi ndzi nyika matimba ya ku lwisana ni mintlhaveko yoleyo.”
20 Xiya ntokoto wa mulanguteri la famba-fambaka wa le tikweni rin’wana ra le Amerika Dzonga. Loko a endzela vapfumeri-kulobye lava heleke matimba leswaku a ya va khutaza, hakanyingi u va vutisa xivutiso lexi nge, ‘Xana wa yi pfumela dyondzo ya Vunharhu-un’we?’ Hakanyingi munhu la heleke matimba u hlamula a ku, ‘A ndzi yi pfumeli nikatsongo,’ hi ku xiya leswaku hi yin’wana ya tidyondzo ta mavunwa ta Sathana. Nakambe nkulu loyi u vutisa xivutiso lexi nge, ‘Xana wa yi pfumela dyondzo ya ndzilo wa tihele?’ Nakambe nhlamulo ya kona yi ri, ‘A ndzi yi pfumeli nikatsongo!’ Kutani nkulu loyi u va byela leswaku ku ni vunwa byin’wana bya Sathana lebyi byi nga taliki ku lemukiwa leswaku i vunwa hakunene. U va kombela leswaku va languta buku leyi nge Tshinela Eka Yehovha, * eka tluka 249, ndzimana 21, leyi paluxaka vunwa bya leswaku Yehovha a nga rhandzi un’wana ni un’wana wa hina. Mulanguteri la famba-fambaka u vika leswaku ku va ni vuyelo lebyinene loko a tirhisa ndlela yoleyo ku pfuna vanhu lava heleke matimba leswaku va lemuka vunwa lebyi bya Sathana kutani va byi bakanyela etlhelo.
Tivonele Leswaku U Nga Xisiwi
21, 22. Ha yini hi nga ri emunyameni loko swi ta emarhengwini ya Sathana ya vuxisi, naswona hi fanele hi tiyimisela yini?
21 Exiphen’wini lexi xo hetelela xa masiku ya makumu, a swi hlamarisi leswi Sathana a hambetaka a hlanta mavunwa ni vuxisi. Lexi tsakisaka hileswaku Yehovha a nga hi siyanga emunyameni malunghana ni marhengu ya vuxisi ya Sathana. Bibele ni tibuku ta Bibele ta “hlonga ro tshembeka ni ro tlhariha” ti teka marhengu yo biha ya Diyavulosi ti ma paluxa erivaleni. (Matewu 24:45) Tanihi leswi hi tshamaka hi ri karhi hi lemukisiwa ha wona, na hina hi tshama hi ri karhi hi lwisana na wona.—2 Vakorinto 2:11.
22 Kutani a hi tshameni hi xalamukele mianakanyo ya vagwinehi. Onge hi nga tiyimisela ku papalata ntlhamu lowu fihlekeke wa ku tixisa. Naswona a hi lemukeni mavunwa hinkwawo ya Sathana kutani hi ma papalata. Loko hi endla sweswo, hi ta kota ku hlayisa vuxaka bya hina na “Xikwembu xa ntiyiso,” lexi vengaka vuxisi.—Pisalema 31:5; Swivuriso 3:32.
[Tinhlamuselo ta le hansi]
^ par. 5 Malunghana ni riendli leri hundzuluxeriweke ri ku ‘la xisaka’ eka Nhlavutelo 12:9, buku yin’wana ya tinhlamuselo yi vula leswaku ri “kombisa leswaku i nchumu lowu hambetaka lowu hundzukeke mukhuva.”
^ par. 20 Yi kandziyisiwe hi Timbhoni ta Yehovha.
Wa Tsundzuka Xana?
• Ha yini ku tele vuxisi swonghasi emisaveni ya namuntlha?
• Hi nga swi papalata njhani ku xisiwa hi vagwinehi?
• Hi nga swi papalata njhani ku kanganyisiwa hi mboyamelo wihi ni wihi wa ku tixisa?
• Hi nga swi papalata njhani ku kanganyisiwa hi mavunwa ya Sathana?
[Swivutiso Swa Dyondzo]
[Xifaniso lexi nga eka tluka 17]
U nga tikanganyisi malunghana ni vuhungasi
[Swifaniso leswi nga eka tluka 18]
Leswaku u papalata vuxisi, tikambisise kahle u ri karhi u khongela, yingisa van’wana u tlhela u hlaya Rito ra Xikwembu nkarhi ni nkarhi