Swivutiso Swa Vahlayi

Endzhaku ka Ndhambi, Nowa u rhumele tuva ehandle ka ngalava leri vuyeke ni “tluka ra mutlhwari.” Xana tuva ri ri kume kwihi tluka rero?

Bibele yi hi byela leswaku “mati ma [funengete] misava swinene lerova tintshava hinkwato to leha leti a ti ri ehansi ka matilo hinkwawo ti funengetiwa.” (Genesa 7:19) Loko mati ya ndhambi ma ri karhi ma phya, Nowa u rhumele tuva kanharhu ehandle ka ngalava a tlurisa vhiki rin’we. Loko a ri rhumela ra vumbirhi, tuva ri vuye ni “tluka ra mutlhwari leri a ra ha ku khiwa, hikwalaho Nowa a swi tiva leswaku mati ma hungutekile ehenhla ka misava.”—Genesa 8:8-11.

Ina, sweswi a swi koteki ku tiva leswaku ndhambi yi funengete xiphemu xo karhi xa misava nkarhi wo tanihi kwihi, hikuva a swi kanakanisi leswaku xivumbeko xa misava xi cinciwile hi Ndhambi. Nilokoswiritano, swi le rivaleni leswaku mati ma hete nkarhi wo leha ma funengete tindhawu to tala ta misava lerova mirhi yo tala yi kala yi fa. Kambe, a swi kanakanisi leswaku yin’wana yi hambete yi hanya, kutani yi kota ku hluka hi vuntshwa loko mati ma phyile.

Malunghana ni murhi wa mutlhwari, The New Bible Dictionary yi ri: “Loko wu tsemiwa, wu mila swihluke swin’wana ku suka erimitswini, hikwalaho ku nga hluka misinya leyi nga ringanaka ntlhanu. Loko mirhi ya mutlhwari yi ri kusuhi ni ku fa, yi hluka hi ndlela leyi fanaka.” The New Schaff-Herzog Encyclopedia of Religious Knowledge yi ri: “Mirhi ya mutlhwari a yi fi hi ku olova.” Namuntlha a nga kona munhu la nga ni vuxokoxoko bya leswaku mati ya ndhambi a ma ri ni munyu wo tala ku fikela kwihi kumbe mahiselo ya kona a ma ri njhani. Hikwalaho, a hi tiyiseki leswaku mati ya ndhambi ma yi khumbe njhani mirhi ya mutlhwari ni swimilana swin’wana.

Hambiswiritano, mutlhwari wa nhova a wu hanyi etindhawini leti titimelaka, ku fana ni le tintshaveni. Hi xitalo yi mila etindhawini leti nga ehansi ka timitara ta 1 000 hi ku tlakuka, laha mahiselo ya kona ma nga ehenhla ka 10 wa tidigri hi ku ya hi hlayelo ra Celsius. Buku leyi nge The Flood Reconsidered yi ri: “Xisweswo, Nowa u swi xiyile eka tluka lera ha ku khiwaka leswaku minkova a yi nga ha ri na mati.” Loko Nowa a rhumele tuva endzhaku ka vhiki, a ra ha tlhelelanga eka yena, leswi kombiseke leswaku swimilana se a swi tele naswona tuva leri a ri ri ni tindhawu to tala to tshama eka tona.—Genesa 8:12.