“Hlonga Ro Tshembeka” Ri Kumiwa Ri Faneleka Endzhaku Ko Kamberiwa!

“I nkarhi lowu vekiweke wa leswaku vuavanyisi byi sungula hi yindlu ya Xikwembu.”—1 Petro 4:17.

1. Xana Yesu u kume yini loko a kambela “hlonga”?

HI Pentekosta ya 33 C.E., Yesu u hlawule “hlonga” leri a ri ta phamela “va yindlu” yakwe swakudya hi nkarhi lowu faneleke. Hi 1914, Yesu u vekiwe ku va Hosi, naswona ku nga ri kungani ku fike nkarhi wa ku kambela “hlonga” rolero. U kume swirho swo tala swa “hlonga” rolero swi ‘tshembekile swi tlhela swi tlhariha.’ Hikwalaho, u ri veke “ehenhla ka hinkwaswo leswi nga swa yena.” (Matewu 24:45-47) Hambiswiritano, a ku ri ni hlonga ro biha, leri a ri nga tshembeki naswona a ri nga tlharihanga.

“Hlonga Lero Biha”

2, 3. Xana “hlonga lero biha” ri huma kwihi, naswona ri sungurise ku yini?

² Yesu u vulavule hi hlonga lero biha endzhakunyana ka ku vulavula hi “hlonga ro tshembeka ni ro tlhariha.” U te: “Loko hlonga lero biha ro tshuka ri tibyela embilwini ri ku, ‘N’wini wa mina wa hlwela,’ ivi ri sungula ku ba mahlonga-kulobye ri tlhela ri dya ni ku nwa ni swidakwa leswikulu, n’wini wa hlonga rero u ta ta hi siku leri ri nga ri langutelangiki ni hi nkarhi lowu ri nga wu tiviki, kutani u ta ri xupula hi ndlela leyi vavaka swinene naswona u ta ri avela endhawini yin’we ni vakanganyisi. Kwalaho hi laha ku rila ni ku getsela ka meno ya rona ku nga ta va kona.” (Matewu 24:48-51) Xiga lexi nge “hlonga lero biha” xi kokela nyingiso wa hina eka marito ya Yesu lawa a ma vuleke emahlweninyana malunghana ni hlonga ro tshembeka ni ro tlhariha. Ina, “hlonga lero biha” ri vumbiwa hi vanhu lava khale a va ri va ntlawa wa hlonga ro tshembeka. * Njhani?

³ Emahlweni ka 1914, swirho swo tala swa ntlawa wa hlonga ro tshembeka a swi ri ni ntshembo lowukulu wa ku hlangana ni Muteki etilweni hi lembe rero, kambe ntshembo wa swona a wu hetisekanga. Hikwalaho ka leswi na swiendlakalo swin’wana, vo tala va hele matimba kasi va nga ri vangani va hlundzukile. Van’wana va vona va ‘be’ khale ka vamakwavo va vona hi ku va tseketsela va tlhela va tolovelana ni “swidakwa leswikulu,” ku nga mintlawa ya vukhongeri ya Vujagana.—Esaya 28:1-3; 32:6.

4. Xana Yesu u endle yini hi “hlonga lero biha” swin’we ni hinkwavo lava kombiseke moya lowu fanaka?

⁴ Khale ka Vakreste lava va hetelele va tiviwa tanihi “hlonga lero biha,” naswona Yesu u va xupule hi “ndlela leyi vavaka swinene.” Njhani? U va fularherile naswona va lahlekeriwe hi ntshembo wa vona wa ku ya hanya etilweni. Hambiswiritano, a va lovisiwanga hi nkarhi wolowo. A va fanele va rhanga va tiyisela nkarhi wa ku rila ni wa ku getsela ka meno “ehandle [ka vandlha ra Vukreste] emunyameni.” (Matewu 8:12) Ku sukela emasikwini wolawo, i vanhu va nga ri vangani lava totiweke lava kombiseke moya lowu fanaka wo biha, va kombisa leswaku na vona va wela eka “hlonga lero biha.” Van’wana va “tinyimpfu tin’wana” na vona va kombise ku nga tshembeki. (Yohane 10:16) Valala hinkwavo vo tano va Kreste va helela “ehandle emunyameni” wa moya.

5. Xana hlonga ro tshembeka ni ro tlhariha ri angurise ku yini ku hambana ni “hlonga lero biha”?

⁵ Hambiswiritano, hlonga ro tshembeka ni ro tlhariha ri kamberiwile na rona ku fana ni “hlonga lero biha.” Kambe, ematshan’weni yo hlundzuka ri pfumele ku ololoxiwa. (2 Vakorinto 13:11) Va antswise ndlela leyi va rhandzaka Yehovha ni vamakwavo ha yona. Hikwalaho, va ve “phuphu  tlhelo xiseketelo xa ntiyiso” “emasikwini [lawa] yo hetelela” lama nga ni minkitsikitsi.—1 Timotiya 3:15; 2 Timotiya 3:1.

Vanhwanyana Vo Tlhariha Ni Va Swiphukuphuku

6. (a) Xana Yesu u ku kombise njhani ku tlhariha ka ntlawa wa hlonga ra yena ro tshembeka? (b) Hi rihi rungula leri Vakreste lava totiweke va ri chumayeleke emahlweni ka 1914?

⁶ Endzhaku ka ku vulavula hi “hlonga lero biha,” Yesu u vulavule hi swifaniso swimbirhi a kombisa lexi nga ta endla leswaku Vakreste van’wana lava totiweke va tshembeka va tlhela va tlhariha, loko van’wana va nga endli tano. * Leswaku a kombisa leswi ku tlhariha swi vulaka swona, u te: “Mfumo wa matilo wu ta fana ni vanhwana va khume lava tekeke timboni ta vona va huma ku ya hlanganisa muteki. Va ntlhanu eka vona a va ri swiphukuphuku, naswona va ntlhanu a va tlharihile. Lava va swiphukuphuku va teke timboni ta vona kambe va nga teki mafurha, kasi lavo tlhariha va teke mafurha hi swikutsu swa vona ni timboni ta vona.” (Matewu 25:1-4) Vanhwanyana lava khume va hi tsundzuxa Vakreste lava totiweke emahlweni ka 1914. A va kumisise leswaku muteki, ku nga Yesu Kreste a a ri kusuhi ni ku humelela. Hikwalaho, va ‘humile’ va ya n’wi hlangaveta, va chumayela hi xivindzi leswaku “nkarhi lowu vekiweke wa matiko” a wu ta hela hi 1914.—Luka 21:24.

7. Vakreste lava totiweke va ‘etlele’ rini hi ndlela yo fanekisela naswona ha yini?

⁷ A va pakanisile. Nkarhi lowu vekiweke wa matiko wu herile hakunene hi 1914, naswona Mfumo wa Xikwembu lowu nga ehansi ka Kreste Yesu wu sungule ku fuma. Kambe sweswo swi humelele ematilweni lama nga vonakiki. Emisaveni vanhu va sungule ku weriwa hi “khombo” leri vuriweke ka ha ri emahlweni. (Nhlavutelo 12:10, 12) Ku landzele nkarhi wa ku kamberiwa. Leswi a va nga swi twisisi kahle swilo, Vakreste lava totiweke va anakanye leswaku “muteki a [a] hlwela.” Leswi a va pfilunganyekile naswona va vengiwa hi misava, va debyise voko kutani va lava ni ku tshika ntirho wo chumayela lowu hleriweke. Ku fana ni vanhwanyana va le xifanisweni, “va khudzehe[rile] ivi va ya etlela” hi tlhelo ra moya, hilaha vanhu lava va nga tshembekiki lava tivulaka Vakreste va endleke hakona endzhaku ka ku fa ka vaapostola va Yesu.—Matewu 25:5; Nhlavutelo 11:7, 8; 12:17.

8. I yini lexi vangeke leswaku ku biwa hungwe leri nge: “Hi loyi muteki!” naswona a ku ri nkarhi wa leswaku Vakreste lava totiweke va endla yini?

⁸ Kutani hi 1919 ku humelele nchumu lowu a wu nga languteriwanga. Ha hlaya: “Exikarhi-karhi ka vusiku ku pfuka ku huwelela, ‘Hi loyi muteki! Humani mi n’wi hlanganisa.’ Kutani vanhwana volavo hinkwavo va pfuka va lulamisa timboni ta vona.” (Matewu 25:6, 7) Loko swilo swi tikomba swi nga ha tshembisi, ku ve ni xikhutazo xa ku gingiriteka! Hi 1918, Yesu, “murhumiwa wa ntwanano,” u tile etempeleni ya moya ya Yehovha leswaku a ta kambela ni ku basisa vandlha ra Xikwembu. (Malakiya 3:1) Sweswi Vakreste lava totiweke a va fanele va huma va ya n’wi hlangaveta eswivaveni swa le misaveni swa tempele yoleyo. A ku ri nkarhi wa leswaku va “voninga.”—Esaya 60:1; Vafilipiya 2:14, 15.

9, 10. Hi 1919, ha yini Vakreste van’wana a va “tlharihile” van’wana va ri “swiphukuphuku”?

⁹ Kambe yimanyana! Exifanisweni lexi, vanhwanyana van’wana va ve ni xiphiqo. Yesu u ye emahlweni: “Lava swiphukuphuku va byela lavo tlhariha va ku, ‘Hi nyikeni mafurhanyana ya n’wina, hikuva timboni ta hina ti lava ku timeka.’” (Matewu 25:8) Loko timboni ti nga ri na mafurha a ti nga ta voninga. Hikwalaho mafurha ya timboni ma hi tsundzuxa Rito ra Xikwembu ra ntiyiso ni moya wa xona lowo kwetsima, lowu nyikaka vagandzeri  va ntiyiso matimba ya leswaku va va vabyarhi va ku vonakala. (Pisalema 119:130; Daniyele 5:14) Emahlweni ka 1919, Vakreste vo tlhariha lava totiweke va hisekele ku twisisa leswi Xikwembu xi swi languteleke eka vona, hambileswi a va hele matimba swa xinkarhana. Hikwalaho, loko ku fika xirhambo xa leswaku va voninga, a va lunghekile.—2 Timotiya 4:2; Vaheveru 10:24, 25.

¹⁰ Hambiswiritano, vanhu van’wana lava totiweke a va nga swi lunghekelanga ku titsona swo karhi kumbe ku tirha hi ku hiseka—hambileswi a va swi navela hi mbilu hinkwayo ku va ni Muteki. Kutani loko ku fika nkarhi wa ku chumayela mahungu lamanene hi ku hiseka, a va nga swi lunghekelanga. (Matewu 24:14) Va kale va ringeta ku va heta matimba vanakulobye va vona lava hisekaka, entiyisweni va va kombela leswaku va va chelela mafurha. Xana vanhwanyana vo tlhariha va le xifanisweni xa Yesu va angurise ku yini? Va te: “Kumbexana a ma nge hi ringani kahle hina na n’wina. Ematshan’weni ya sweswo, khomani ndlela, mi ya eka lava ma xavisaka mi ya tixavela ya n’wina.” (Matewu 25:9) Hilaha ku fanaka, hi 1919 Vakreste vo tshembeka lava totiweke va arile ku endla nchumu wihi na wihi lowu a wu ta endla leswaku va nga voningi kahle. Xisweswo, va kumeke va faneleka endzhaku ko kamberiwa.

11. Ku humelele yini hi vanhwanyana va swiphukuphuku?

¹¹ Yesu u gimeta hi ku: “Loko [vanhwanyana va swiphukuphuku] va ha fambile ku ya xava, muteki a fika, kutani vanhwana lava a va lunghekile va nghena na yena enkhubyeni wa vukati; hiloko nyangwa yi pfariwa. Endzhakunyana vanhwana lavan’wana na vona va fika, va ku, ‘Nkulukumba, nkulukumba, hi pfulele!’ A va hlamula a ku, ‘Ndzi mi byela ntiyiso, a ndzi mi tivi.’” (Matewu 25:10-12) Ina, van’wana a va nga ku lunghekelanga ku fika ka Muteki. Hikwalaho, va kumeke va nga faneleki loko va kamberiwa naswona va lahlekeriwe hi lunghelo ro va kona enkhubyeni wa le tilweni. Swi hlomula mbilu hakunene!

Xifaniso Xa Titalenta

12. (a) Yesu u tirhise yini loko a kombisa leswi ku tshembeka swi vulaka swona? (b) I mani wanuna la “[yeke] etikweni ra le kule”?

¹² Endzhaku ko kombisa leswi ku tlhariha swi vulaka swona, Yesu u ye emahlweni a kombisa leswi ku tshembeka swi vulaka swona. U te: “Swi fana ni loko munhu loyi a lavaka ku endzela etikweni ra le kule, a vitana mahlonga yakwe a ma tamerisa leswi nga swa yena. Kutani a nyika rin’wana titalenta ta ntlhanu, rin’wana timbirhi, ni rin’wanyana yin’we, rin’wana ni rin’wana hi ku ya hi vuswikoti bya rona, ivi a ya etikweni ra le kule.” (Matewu 25:14, 15) Wanuna wa le xifanisweni i Yesu hi yexe, loyi a “[yeke] etikweni ra le kule” loko a tlhandlukela etilweni hi lembe ra 33 C.E. Kambe loko a nga si tlhandluka, Yesu u siye “leswi nga swa yena” ni vadyondzisiwa vakwe vo tshembeka. Njhani?

13. Xana Yesu u wu lunghiselele njhani ntirho lowukulu ni ku nyika “mahlonga” yakwe xileriso xa ku pindzula?

¹³ Hi nkarhi wa vutirheli byakwe bya laha misaveni, Yesu u sungule ku lunghiselela ntirho lowukulu hi ku chumayela mahungu lamanene ya Mfumo etikweni hinkwaro ra Israyele. (Matewu 9:35-38) Loko a nga si “ya etikweni ra le kule,” u siye nsimu yoleyo ni vadyondzisiwa vakwe vo tshembeka, a ku: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi  mi leriseke swona.” (Matewu 28:18-20) Hi marito lawa, Yesu u nyike “mahlonga” yakwe xileriso xa ku pindzula kukondza a vuya, “rin’wana ni rin’wana hi ku ya hi vuswikoti bya rona.”

14. Ha yini a ku nga languteriwanga leswaku vadyondzisiwa hinkwavo va pindzula hi ndlela leyi fanaka?

¹⁴ Xiga xexo xi kombisa leswaku a hi Vakreste hinkwavo va lembe-xidzana ro sungula lava a va ri ni swiyimo leswi fanaka ni vuswikoti lebyi fanaka. Van’wana vo fana na Pawulo na Timotiya a swi va olovela ku hlanganyela hilaha ku teleke entirhweni wo chumayela ni wo dyondzisa. Swiyimo swa van’wana a swi nga va pfumeleli kahle. Hi xikombiso, Vakreste van’wana a va ri mahlonga kasi van’wana a va hanya vutomi byo lomba, va dyuharile kumbe va ri ni vutihlamuleri bya ndyangu. Ina, vadyondzisiwa van’wana a va nga ma kumi malunghelo man’wana ya le vandlheni. Vavasati lava totiweke ni vavanuna van’wana lava totiweke a va nga dyondzisi evandlheni. (1 Vakorinto 14:34; 1 Timotiya 3:1; Yakobo 3:1) Hambiswiritano, ku nga khathariseki xiyimo xa vona, vadyondzisiwa hinkwavo va Kreste lava totiweke—vavanuna ni vavasati—a va fanele va pindzula, va wu tirhisa kahle nkarhi wa vona ni swiyimo swa vona evutirhelini bya Vukreste. Vadyondzisiwa va manguva lawa na vona va endla leswi fanaka.

Nkarhi Wa Ku Kambela Wu Sungula!

15, 16. (a) Nkarhi wo lulamisa timhaka wu fike rini? (b) I nkarhi wihi lowuntshwa wo “pindzula” lowu nyikiweke lava tshembekaka?

¹⁵ Xifaniso xi ya emahlweni xi ku: “Endzhaku ka nkarhi wo leha n’wini wa mahlonga wolawo a ta ivi a lulamisa timhaka na wona.” (Matewu 25:19) Hi 1914—nkarhi lowu wu nga leha hakunene ku sukela hi 33 C.E.—Kreste Yesu u sungule vukona byakwe bya le vuhosini. Hi 1918, endzhaku ka malembe manharhu ni hafu, u tile etempeleni ya Xikwembu ya moya kutani a hetisisa marito ya Petro lama nge: “I nkarhi lowu vekiweke wa leswaku vuavanyisi byi sungula hi yindlu ya Xikwembu.” (1 Petro 4:17; Malakiya 3:1) A ku ri nkarhi wo lulamisa timhaka.

¹⁶ Xana mahlonga, ku nga vamakwavo va Yesu lava totiweke, va endle yini hi “titalenta” ta Hosi? Ku sukela hi 33 C.E. ku ya emahlweni, ku katsa ni le malembeni ya le mahlweninyana ka 1914, vo  tala a va ‘pindzula’ swinene entirhweni wa Yesu. (Matewu 25:16) Hambi ku ri hi nkarhi wa nyimpi yo sungula ya misava, va kombise moya wa ku hisekela ku tirhela N’wini wa vona. Se a swi fanela ku nyika vanhu lava ha ku hundzukaka lava tshembekaka nkarhi wa ku “pindzula.” Nkarhi wa ku lovisiwa ka mafambiselo lawa ya swilo a wu fikile. Mahungu lamanene a ma fanele ma chumayeriwa emisaveni hinkwayo. “Ntshovelo wa misava” a wu fanele wu tshoveriwa. (Nhlavutelo 14:6, 7, 14-16) Swirho swo hetelela swa ntlawa wa koroni a swi fanele swi hlengeletiwa ku tlhela ku hlengeletiwa ni “ntshungu lowukulu” wa tinyimpfu tin’wana.—Nhlavutelo 7:9; Matewu 13:24-30.

17. Xana Vakreste vo tshembeka lava totiweke va ‘nghene njhani entsakweni wa n’wini wa vona’?

¹⁷ Nkarhi wo tshovela i nguva ya ntsako. (Pisalema 126:6) Kutani hi 1919, a swi fanela leswaku Yesu a nyika vamakwavo vakwe lava tshembekaka lava totiweke vutihlamuleri lebyi engetelekeke, kutani a ku: “U tshembekile eka swilo leswitsongo. Ndzi ta ku veka u langutela swilo swo tala. Nghena entsakweni wa n’wini wa wena.” (Matewu 25:21, 23) Ku tlula kwalaho, a hi nge swi koti ku yi anakanya ndlela leyi N’wini a a tsake ha yona loko a vekiwa ku va Hosi ya Mfumo wa Xikwembu. (Pisalema 45:1, 2, 6, 7) Ntlawa wa hlonga ro tshembeka na wona wa tsaka hikuva wu yimela Hosi wu tlhela wu andzisa swilo swa yona swa laha misaveni. (2 Vakorinto 5:20) Ntsako wa vona wu voniwa eka marito ya vuprofeta ya Esaya 61:10: “Kunene ndzi ta khana eka Yehovha. Moya-xiviri wa mina wu ta tsakela Xikwembu xanga. Hikuva u ndzi ambexe tinguvu ta ku ponisiwa.”

18. Ha yini van’wana va kumiwe va nga faneleki loko va kamberiwa, naswona vuyelo byi ve byihi?

¹⁸ Khombo ra kona, van’wana a va kumekanga va faneleka loko va kamberiwa. Ha hlaya: “[Nhlonga] leri kumeke talenta yin’we ri ta ivi ri ku, ‘N’wini wanga, ndzi ku tiva u ri munhu la koxaka ngopfu, loyi a tshovelaka laha a nga byalangiki kona naswona a hlengeletaka laha a nga peperhangiki kona. Kutani ndzi khomiwe hi ku chava ivi ndzi famba ndzi ya fihla talenta ya wena ehansi. Nchumu wa wena hi lowu.’” (Matewu 25:24, 25) Hilaha ku fanaka, Vakreste van’wana lava totiweke a va ‘pindzulanga.’ Emahlweni ka 1914 a va nga swi hisekeli ku byela van’wana hi ntshembo wa vona, naswona a va lavanga ku tlhela va ya emahlweni ni ntirho lowu hi 1919. Xana Yesu u angule njhani eka moya wolowo wa vona wa ku tikukumuxa? U va tekele malunghelo hinkwawo. Va ‘cukumetiwe ehandle emunyameni, laha ku rila ka vona ni ku getsela meno ka vona ku nga ta va kona.’—Matewu 25:28, 30.

Ku Kamberiwa Ku Ya eMahlweni

19. Xana ku kamberiwa ku ya emahlweni hi ndlela yihi, naswona Vakreste hinkwavo lava totiweke va tiyimisele ku endla yini?

¹⁹ Ina, vunyingi bya lava a va ta va mahlonga ya Kreste lama totiweke enkarhini wa makumu a va nga si n’wi tirhela Yehovha loko Yesu a sungula ku kambela hi 1918. Xana vona va hundziwe hi nkarhi wa ku kamberiwa? Nikatsongo. Ku kamberiwa ku sungule hi 1918/19, loko hlonga ro tshembeka ni ro tlhariha ri kumeka ri faneleka endzhaku ko kamberiwa tanihi ntlawa. Vakreste lava totiweke va hambeta va kamberiwa ha un’we-un’we ku kondza va fungheriwa makumu. (Nhlavutelo 7:1-3) Hi ku xiya leswi, vamakwavo va Kreste lava totiweke va tiyimisele ku hambeta va “pindzula” hi ku tshembeka. Va tiyimisele ku tshama va xalamukile, va tshama va ri ni mphakelo wo tala wa mafurha leswaku rivoni ri ta tshama ri voninga swinene. Va swi tiva leswaku loko un’wana ni un’wana a heta pfhumba rakwe hi ku tshembeka, Yesu u ta n’wi amukela etilweni.—Matewu 24:13; Yohane 14:2-4; 1 Vakorinto 15:50, 51.

20. (a) Xana tinyimpfu tin’wana namuntlha ti tiyimisele ku endla yini? (b) I yini lexi Vakreste lava totiweke va xi xiyaka?

 ²⁰ Ntshungu lowukulu wa tinyimpfu tin’wana wu tekelele vamakwavo va vona lava totiweke. Wa swi xiya leswaku leswi wu tivaka swikongomelo swa Xikwembu wu ni vutihlamuleri lebyikulu. (Ezekiyele 3:17-21) Hikwalaho, hi ku pfuniwa hi Rito ra Yehovha ni moya lowo kwetsima na vona va tshama va ri ni mphakelo wo tala wa mafurha hi ku dyondza na hi ku hlangana swin’we. Naswona va pfumelela ku vonakala ka vona ku voninga, va hlanganyela entirhweni wo chumayela ni wa ku dyondzisa, xisweswo va “pindzula” swin’we ni vamakwavo va vona lava totiweke. Hambiswiritano, Vakreste lava totiweke va swi xiya kahle leswaku titalenta ti khomisiwe vona. Va fanele va tihlamulela malunghana ni ndlela leyi swilo swa Hosi swi tirhisiwaka ha yona emisaveni. Hambileswi nhlayo ya vona yi nga nyawuriki, a va nge teki vutihlamuleri bya vona va byi byarhisa ntshungu lowukulu. Hikwalaho, hlonga ro tshembeka ni ro tlhariha ri hambeta ri rhangela eku khathaleleni ka mpindzulo wa Hosi, ri wu tlangela swinene nseketelo wa swirho leswi tinyiketeleke swa ntshungu lowukulu. Ntshungu lowukulu wu xiya vutihlamuleri bya vamakwavo va vona lava totiweke naswona va swi teka ku ri lunghelo ku tirha ehansi ka vulanguteri bya vona.

21. I xikhutazo xihi lexi tirhaka eka Vakreste hinkwavo ku sukela emahlweni ka 1919 ku ta fikela esikwini ra hina?

²¹ Xisweswo, hambileswi swifaniso leswimbirhi swi hi voningelaka eka swiendlakalo swa va-1919, kahle-kahle swi tirha ni le ka Vakreste va ntiyiso hinkwavo lava hanyaka emasikwini ya makumu. Hikwalaho, hambileswi xikhutazo lexi Yesu a xi vuleke emakumu ka xifaniso xa vanhwanyana va khume xi tirheke ro sungula eka Vakreste lava totiweke emahlweni ka 1919, kahle-kahle xa ha tirha eka Mukreste un’wana ni un’wana. Kutani, onge hinkwerhu hi nga yingisa marito ya Yesu lama nge: “Hikokwalaho, tshamani mi rindzile, hikuva a mi ri tivi siku hambi ku ri nkarhi wa kona.”—Matewu 25:13.

[Tinhlamuselo ta le hansi]

Xana U Nga Hlamusela?

• Xana Yesu u va kambele rini valandzeri vakwe, naswona u kume yini?

• Ha yini Vakreste van’wana lava totiweke va ve ni langutelo ra “hlonga lero biha”?

• Hi nga swi kombisa njhani leswaku hi tlharihile hi tlhelo ra moya?

• Hi nga hambeta njhani hi “pindzula” xisweswo hi tekelela vamakwavo va Yesu lava totiweke ni lava tshembekaka?

[Swivutiso Swa Dyondzo]

[Bokisi leri nga eka tluka 16]

XANA YESU U TA RINI?

Eka Matewu ndzima 24 na 25, ku vuriwa leswaku Yesu wa “ta” hi tindlela to hambana-hambana. Ku “ta” a swi kali swi lava a suka laha a nga kona. Ku ri na sweswo, ku “ta” ka yena i ku yisa nyingiso wakwe evanhwini kumbe eka valandzeri vakwe, hakanyingi hi xikongomelo xa ku avanyisa. Xisweswo, hi 1914 u ‘tile’ leswaku a ta sungula vukona byakwe tanihi Hosi leyi vekiweke exiluvelweni. (Matewu 16:28; 17:1; Mintirho 1:11) Hi 1918 u ‘tile’ tanihi murhumiwa wa ntwanano kutani a sungula ku avanyisa lava vulaka leswaku va tirhela Yehovha. (Malakiya 3:1-3; 1 Petro 4:17) Hi nkarhi wa Armagedoni, u ta ‘tela’ ku avanyisa valala va Yehovha.—Nhlavutelo 19:11-16.

Ku ta (kumbe, ku fika) loku ku vulavuriwaka ha kona hi ku phindha-phindha eka Matewu 24:29-44 na 25:31-46 ku ta va hi nkarhi wa ‘nhlomulo lowukulu.’ (Nhlavutelo 7:14) Hi hala tlhelo, ku ta loku vulavuriwaka ha kona hi ku phindha-phindha eka Matewu 24:45 ku ya eka 25:30 ku fambisana ni ku avanyisiwa ka lava va tivuleke vadyondzisiwa ku sukela hi 1918 ku ya emahlweni. Hi xikombiso, a swi nga ta twala ku vula leswaku ku hakeriwa ka hlonga ro tshembeka, ku avanyisiwa ka vanhwanyana va swiphukuphuku ni ku avanyisiwa ka hlonga ro loloha, leri tumbeteke talenta ya N’wini wa rona, swi ta endleka loko Yesu a “ta” hi nkarhi wa nhlomulo lowukulu. Sweswo a swi ta vula leswaku vo tala va vatotiwa a va ta kumiwa va nga tshembekanga hi nkarhi wolowo, xisweswo a va ta boheka ku siviwa. Hambiswiritano, Nhlavutelo 7:3 yi kombisa leswaku mahlonga hinkwawo lama totiweke ya Kreste ma ta va ma ‘fungheriwe’ makumu hi nkarhi wolowo.

[Xifaniso lexi nga eka tluka 14]

“Hlonga lero biha” a ri katekisiwanga hi 1919

[Xifaniso lexi nga eka tluka 15]

Vanhwanyana vo tlhariha a va lunghekile loko muteki a fika

[Xifaniso lexi nga eka tluka 17]

Mahlonga yo tshembeka ma ‘pindzurile’

[Xifaniso lexi nga eka tluka 17]

Hlonga ro loloha a ri pindzulanga

[Swifaniso leswi nga eka tluka 18]

Vatotiwa ni “ntshungu lowukulu” va hambeta va endla leswaku ku vonakala ka vona ku voninga