Ndlela Leyi Hi Kombisaka Ha Yona Leswaku Hi Rhandza Xikwembu
Ndlela Leyi Hi Kombisaka Ha Yona Leswaku Hi Rhandza Xikwembu
KU HLAKULELA ku rhandza Xikwembu a hi mhaka ya ku yi yela exikolweni. Hilaha malandza ya Xikwembu emisaveni hinkwayo ma nga tiyisekisaka hakona, rirhandzu ra ntiyiso eka Xikwembu ra kula loko munhu a ya a tiva vumunhu bya xona, naswona ra tiya loko munhu a tiva leswi xi swi rhandzaka, leswi xi swi vengaka, leswi xi swi tsakelaka ni leswi xi swi languteleke eka hina.
Hikwalaho ka rirhandzu rakwe, Yehovha u hi nyike Rito ra yena, ku nga Bibele, leri a tihlavutelaka eka rona. Eka rona, hi dyondza ndlela leyi Yehovha a ti tameleke ha yona timhaka to hambana-hambana. Leswi papila leri humaka eka munhu loyi hi n’wi rhandzaka ri tsakisaka, Bibele na yona ya hi tsakisa loko yi hi paluxela timhaka letintshwa hi vumunhu bya Yehovha.
Hambiswiritano, hilaha na hina minkarhi yin’wana hi swi xiyaka hakona entirhweni wo chumayela, ku dyondza hi Xikwembu a hi minkarhi hinkwayo swi endlaka leswaku munhu a xi rhandza. Yesu u byele Vayuda van’wana lava nga tlangeliki va le sikwini rakwe a ku: “Mi kambisisa Matsalwa, hikuva mi ehleketa leswaku hikwalaho ka wona mi ta va ni vutomi lebyi nga heriki; . . . kambe ndzi swi tiva kahle leswaku rirhandzu ra Xikwembu a ri kona eka n’wina.” (Yohane 5:39, 42) Vanhu van’wana va hete malembe yo tala va ri karhi va dyondza hi swiendlo swa Yehovha swa rirhandzu kambe a va n’wi rhandzi ngopfu. Ha yini? Va tsandzeka ku anakanyisisa hi ntiyiso lowu va wu dyondzaka. Ku hambana ni sweswo, vanhu va timiliyoni lava tshembekaka lava hi dyondzaka Bibele na vona va xiya leswaku ndlela leyi va rhandzaka Xikwembu ha yona yi hambeta yi kula. Ha yini? Hikuva va landzela xikombiso xa Asafa, hilaha na hina hi endlaka hakona. Njhani?
Anakanyisisa Hi Mbilu Leyi Tlangelaka
Asafa a a tiyimisele ku hlakulela ku rhandza Yehovha embilwini ya yena. U tsarile: “Ndzi ta karhateka hi mbilu ya mina, . . . ndzi ta tsundzuka leswi Yah a a swi endla; hikuva ndzi ta tsundzuka leswi u swi endleke swo hlamarisa swa khale swinene. Kunene ndzi ta anakanyisisa hi mintirho ya wena Pisalema 77:6, 11, 12) Munhu loyi a anakanyisisaka hi tindlela ta Yehovha ku fana ni mupisalema u ta ya a xi rhandza swinene Xikwembu embilwini yakwe.
hinkwayo, ndzi ta ehleketa hi ntirhisano wa wena.” (Ku engetela kwalaho, ku tsundzuka mintokoto leyi hi hlangavetaneke na yona loko hi ri karhi hi tirhela Yehovha swi tiyisa vuxaka bya hina na yena. Muapostola Pawulo u vule leswaku hi “vatirhi-kulobye” ni Xikwembu naswona vunghana lebyi vaka kona eka vatirhi-kulobye i bya nkoka swinene. (1 Vakorinto 3:9) Loko hi kombisa rirhandzu ra hina eka Yehovha, wa swi tlangela, naswona mbilu ya yena ya tsaka. (Swivuriso 27:11) Kutani loko hi kombela mpfuno eka Yehovha ivi a hi kongomisa loko hi langutane ni swiphiqo swo karhi, ha swi tiva leswaku u na hina, naswona hi ya hi n’wi rhandza swinene.
Vunghana bya vanhu vambirhi bya kula loko va phofulelana mintlhaveko ya vona. Hilaha ku fanaka, loko hi byela Yehovha leswaku ha yini hi tinyiketela eka yena, rirhandzu ra hina eka yena ra kula. Hi ta anakanyisisa hi marito ya Yesu lama nge: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Marka 12:30) Xana hi nga endla yini ku tiyiseka leswaku hi ta hambeta hi rhandza Yehovha hi mbilu ya hina hinkwayo, hi moya-xiviri wa hina hinkwawo, hi mianakanyo ya hina hinkwayo, ni hi ntamu wa hina hinkwawo?
Ku Rhandza Yehovha Hi Mbilu Ya Hina Hinkwayo
Matsalwa ma vulavula hi mbilu yo fanekisela, leyi nga munhu wa le ndzeni—ku navela ka hina, malangutelo ya hina ni mintlhaveko ya hina. Kutani, ku rhandza Yehovha hi mbilu ya hina hinkwayo swi vula leswaku hi swi navela swinene ku tsakisa Xikwembu. (Pisalema 86:11) Hi kombisa leswaku hi na rona rirhandzu ro tano hi ku endla leswaku vumunhu bya hina byi amukeleka eka xona. Hi lwela ku tekelela Xikwembu hi ku ‘nyenya leswi hombolokeke ni ku namarhela leswi nga swinene.’—Varhoma 12:9.
Rirhandzu leri hi nga na rona eka Xikwembu ri khumba mintlhaveko ya hina malunghana ni nchumu wun’wana ni wun’wana. Hi xikombiso, hi nga ha kuma ntirho wa ku tihanyisa wu ri lowu tsakisaka kumbe lowu lavaka ku endliwa hi vurhon’wana, kambe xana timbilu ta hina ti dzike eka wona? Doo! Leswi hi rhandzaka Yehovha hi mbilu ya hina hinkwayo, nchumu wa nkoka swinene eka hina i ku va vatirheli va Xikwembu. Hilaha ku fanaka, hi lava ku tsakisa vatswari va hina, vanghana va hina va vukati, ni vathori va hina, kambe hi tikombisa hi rhandza Yehovha hi mbilu hinkwayo hi ku lava ku n’wi tsakisa ku tlula swilo hinkwaswo. Phela, u faneriwa hi ku va wo sungula etimbilwini ta hina.—Matewu 6:24; 10:37.
Ku Rhandza Yehovha Hi Moya-xiviri Wa Hina Hinkwawo
EMatsalweni rito leri nge “moya-xiviri” ri vula munhu hi ku helela ni vutomi bya yena. Hikwalaho ku rhandza
Yehovha hi moya-xiviri wa hina hinkwawo swi vula leswaku vutomi bya hina hi byi tirhisela ku n’wi dzunisa ni ku kombisa leswaku ha n’wi rhandza.Entiyisweni, swi nga ha endleka ku ri ni swin’wana leswi hi swi tsakelaka evuton’wini, swo tanihi ku dyondza ntirho, ku fambisa bindzu, kumbe ku kurisa vana. Kambe hi hala tlhelo, hi tikombisa hi rhandza Yehovha hi moya-xiviri wa hina hinkwawo hi ku endla swilo hi ndlela ya yena ni hi ku veka swilo leswin’wana swa vutomi bya hina endhawini ya swona, xisweswo hi “lava mfumo ni ku lulama ka yena ku sungula.” (Matewu 6:33) Nakambe ku gandzela hi moya-xiviri hinkwawo swi vula ku hiseka. Hi kombisa Yehovha leswaku ha n’wi rhandza hi ku chumayela rungula ra Mfumo hi ku hiseka, hi ku nyikela tinhlamulo leti akaka eminhlanganweni, kumbe hi ku pfuna Vakreste-kulorhi. Eka swilo hinkwaswo, hi hambeta hi “endla ku rhandza ka Xikwembu hi moya-xiviri hinkwawo.”—Vaefesa 6:6.
Yesu u kombise leswaku u rhandza Xikwembu hi moya-xiviri hinkwawo hi ku titshika. A a rhangisa ku rhandza ka Xikwembu ku sungula kutani swilaveko swakwe swi ta endzhaku. Yesu u hi rhambile leswaku hi tekelela xikombiso xa yena. U te: “Loko munhu a lava ku ndzi landzela, a a titshike kutani a rhwala mhandzi yakwe ya nxaniso a ndzi landzela nkarhi hinkwawo.” (Matewu 16:24, 25) Ku titshika swi vula ku tinyiketela. Swi vula leswaku hi xi rhandza swinene Xikwembu lerova hi tinyikela eka xona leswaku xi hi lawula, ku fana ni loko Muisrayele enkarhini wa Bibele a rhandza n’wini wakwe swinene lerova a tinyikela eka yena leswaku a va hlonga rakwe vutomi byakwe hinkwabyo. (Deteronoma 15:16, 17) Ku tinyiketela ka hina eka Yehovha i vumbhoni lebyi tiyeke bya leswaku ha n’wi rhandza.
Ku Rhandza Yehovha Hi Mianakanyo Ya Hina Hinkwayo
Loko hi rhandza Yehovha hi mianakanyo ya hina hinkwayo swi vula leswaku hi endla matshalatshala yo twisisa vumunhu bya Yehovha, swikongomelo swakwe ni swilaveko swa yena. (Yohane 17:3; Mintirho 17:11) Hi phofula rirhandzu ra hina eka Yehovha hi ku tirhisa vuswikoti bya hina hinkwabyo bya mianakanyo eku pfuneni ka vanhu van’wana, leswaku na vona va rhandza Yehovha, hi tlhela hi ri phofula hi ku antswisa vutshila bya hina byo dyondzisa. Muapostola Petro u khutazile a ku: “Hlomiselani mianakanyo ya n’wina ntirho.” (1 Petro 1:13) Nakambe, hi endla matshalatshala yo kombisa rirhandzu eka van’wana, ngopfu-ngopfu malandza-kulorhi ya Xikwembu. Ha swi xiya swiyimo swa vona naswona ha va bumabumela loko swi fanerile kumbe hi va chavelela loko swi laveka.
Hi kombisa leswaku hi rhandza Yehovha hi mianakanyo ya hina hinkwayo hi ku va ni mianakanyo ya ku titsongahata eka yena. Hi ringeta ku vona swilo hi ndlela leyi a swi vonaka ha yona, hi anakanya hi yena loko hi endla swiboho, naswona ha tshemba leswaku ndlela ya yena i yinene. (Swivuriso 3:5, 6; Esaya 55:9; Vafilipiya 2:3-7) Kambe, xana hi nga wu tirhisa njhani ntamu wa hina loko hi ri karhi hi kombisa rirhandzu eka Xikwembu?
Ku Rhandza Yehovha Hi Ntamu Wa Hina Hinkwawo
Vantshwa vo tala evandlheni ra Vukreste va tirhisa matimba ya vona va dzunisa Yehovha. (Swivuriso 20:29; Eklesiasta 12:1) Ndlela yin’wana leyi vantshwa vo tala va Vakreste va kombisaka ha yona leswaku va rhandza Yehovha hi matimba ya vona hinkwawo i ku hlanganyela entirhweni wa vuphayona, ku nga vutirheli bya nkarhi hinkwawo. Vamanana vo tala va hlanganyela evutirhelini lebyi loko vana va vona va ha ri exikolweni. Vakulu vo tshembeka lava endlaka maendzo ya vurisi loko hi hala tlhelo va ri karhi va khathalela mindyangu ya vona, va kombisa leswaku va rhandza Yehovha hi matimba ya vona hinkwawo. (2 Vakorinto 12:15) Yehovha u va nyika matimba lava tshembaka yena, kutani va kombisa leswaku va n’wi rhandza hi ku n’wi dzunisa, va tirhisa matimba hinkwawo lawa va nga na wona.—Esaya 40:29; Vaheveru 6:11, 12.
Loko rirhandzu ri hlakuleriwa kahle ri ta kula. Hikwalaho, hi hambeta hi tinyika nkarhi wa ku anakanyisisa. Hi tsundzuka leswi Yehovha a hi endleleke swona nileswaku ha yini swi fanerile leswaku hi tinyiketela eka yena. Leswi hi nga vatukulu va Adamu lava nga hetisekangiki, a hi nge pfuki hi faneriwe hi “swilo leswi Xikwembu xi swi lunghiseleleke lava xi rhandzaka,” kambe hi nga kombisa leswaku hi rhandza Yehovha hi moya-xiviri wa hina hinkwawo. A hi hambeteni hi endla tano!—1 Vakorinto 2:9.
[Xifaniso lexi nga eka tluka 20]
Hi kombisa hi swiendlo swa hina leswaku hi rhandza Xikwembu