Swivutiso Swa Vahlayi

Leswi Valevhi a va nga ri na ndzhaka eIsrayele wa khale, xana Mulevhi la vuriwaka Hanamele a a ta yi xavisa njhani nsimu eka Yeremiya loyi a a ri muzala wakwe wa Mulevhi, hilaha swi kombisiweke hakona eka Yeremiya 32:7?

Malunghana ni Valevhi, Yehovha u byele Aroni a ku: “A wu nge vi na ndzhaka, naswona a wu nge vi na xiavelo exikarhi ka vona [Vaisrayele].” (Tinhlayo 18:20) Nilokoswiritano, Valevhi a va nyikiwe miti ya 48 ku katsa ni madyelo ya yona, naswona miti ya kona a yi kumeka etindhawini to hambana-hambana eTikweni leri Tshembisiweke. Muti wa ka va Yeremiya a ku ri Anathoti, ku nga wun’wana wa miti leyi averiweke “vana va Aroni lowa muprista.”—Yoxuwa 21:13-19; Tinhlayo 35:1-8; 1 Tikronika 6:54, 60.

Eka Levhitika 25:32-34, hi kuma leswaku Yehovha u nyikele swiletelo leswi kongomeke malunghana ni “mfanelo ya ku kutsula” swilo swa Valevhi. Swi le rivaleni leswaku ndyangu wun’wana ni wun’wana wa Valevhi a wu ta va ni mfanelo yo tirhisa ndzhaka ya wona hilaha wu rhandzaka hakona. Hikwalaho sweswo a swi katsa ku xavisa ni ku kutsula nhundzu ya vona. * Hi tindlela to tala, Valevhi a va lawula ni ku tirhisa swilo swa vona ku fana ni Vaisrayele va tinyimba tin’wana.

Kumbexana vini va masimu wolawo ya Valevhi a va ma kuma hi lunghiselelo ra ndzhaka ya ndyangu. Hambiswiritano, “mfanelo ya ku kutsula” a yi tirha exikarhi ka Valevhi ntsena. Nakambe swi vonaka onge ku xavisa ni ku kutsula masimu a swi tirha ntsena eka masimu ya le mitini, hikuva “nhova ya madyelo ya miti ya vona” a yi nga fanelanga yi xavisiwa tanihi leswi a yi ri “ndzhaka ya hilaha ku nga riki na makumu eka vona.”—Levhitika 25:32, 34.

Hikwalaho nsimu leyi Yeremiya a yi xaveke eka Hanamele entiyisweni a yi ri leyi a swi koteka leswaku yi hundziseriwa eka van’wana hi ku kutsuriwa. Swi nga endleka leswaku a yi ri endzeni ka mindzilakana ya muti. Yehovha hi byakwe u tiyisekise leswaku “nsimu” leyi ku vulavuriwaka ha yona a yi ri ya Hanamele naswona Yeremiya a a ri ni “mfanelo yo [yi] kutsula.” (Yeremiya 32:7) Yehovha u ri tirhise hi ndlela yo fanekisela lunghiselelo leri ra ku xaviselana, a kandziyisa xitshembiso xa yena xa leswaku Vaisrayele a va ta tlhela va ya koxa ndhawu ya vona endzhaku ka loko va hete nkarhi wo karhi va ri evuhlongeni eBabilona.—Yeremiya 32:13-15.

A byi kona vumbhoni lebyi kombisaka leswaku Hanamele a a kume masimu hi ku dyelela eAnathoti. A xi kona lexi kombisaka leswaku a a tshove nawu wa Yehovha hi ku kombela Yeremiya leswaku a xava nsimu leyi eAnathoti kumbe leswaku Yeremiya u tirhise mfanelo yakwe ya ku kutsula hi ndlela yo biha leswaku a xava nsimu.—Yeremiya 32:8-15.

[Nhlamuselo ya le hansi]