Vukreste Bya Ntiyiso Byi Boxa Ndzima Leyikulu

VUTIRHELI bya Yesu Kreste byi khumbe misava hi ndlela leyi xiyekaka eka lembe-xidzana ro sungula. Rungula rakwe a ri nyika vanhu matimba, ri va voningela ni ku va khutaza hi ndlela leyi hlamarisaka. Vo tala lava va n’wi tweke a vulavula va khumbiwe swinene hi marito yakwe.—Matewu 7:28, 29.

Yesu a nga chavanga ku ala ku hlanganyela emafambiselweni ya le nkarhini wakwe ya vafundhisi ni ya tipolitiki lawa a ma tikisela van’wana vutomi, kambe a a endla leswaku ni vanhu lava tolovelekeke va ya eka yena va nga chavi nchumu. (Matewu 11:25-30) U swi veke erivaleni leswaku mimoya yo homboloka yi ni nhlohlotelo wo biha emisaveni kutani a kombisa leswaku Xikwembu xi n’wi nyike matimba ya ku hlula mimoya yo tano. (Matewu 4:2-11, 24; Yohane 14:30) Yesu u yi hlamusele hi vurhon’wana ndlela leyi ku xaniseka ni xidyoho swi hlanganaka ha yona, naswona u swi kombise hi ndlela ya rirhandzu leswaku i Mfumo wa Xikwembu ntsena lowu nga ntshunxaka vanhu hi ku helela eku xanisekeni ni le xidyohweni. (Marka 2:1-12; Luka 11:2, 17-23) U wu hlongole hi ku helela munyama lowu heteke nkarhi wo leha wu mphimphele vumunhu bya ntiyiso bya Tata wakwe, a endla leswaku vito ra Xikwembu ri tiviwa hi vanhu hinkwavo lava lavaka ku va ni vuxaka bya xiviri na xona.—Yohane 17:6, 26.

Hikwalaho a swi hlamarisi leswi vadyondzisiwa va Yesu va haxeke rungula ra yena ra matimba hi mahika, hambileswi vaseketeri va vukhongeri ni va politiki a va lwisana na vona va lume ni nomu wa le hansi. Hi malembe ya kwalomu ka 30 ntsena, ku simekiwe mavandlha lama hanyaka ya Vukreste eAfrika, Asia ni le Yuropa. (Vakolosa 1:23) Tidyondzo leti twisisekaka leti Yesu a ti dyondziseke ti voningele vanhu lava titsongahataka, lava nga ni timbilu letinene eMfun’weni hinkwawo wa Rhoma.—Vaefesa 1:17, 18.

Kutani, xana a swi ta endlekisa ku yini leswaku vadyondzisiwa volavo lavantshwa hinkwavo va va ni “ripfumelo . . . rin’we” ra ntiyiso hi ku vula ka muapostola Pawulo, kasi a va ri va swiyimo swo hambana hi tlhelo ra timali ni hi ndhavuko, hi hala tlhelo va vulavula tindzimi to hambana naswona eku sunguleni a va ri evukhongerini byo hambana? (Vaefesa 4:5) I yini lexi a xi ta endla leswaku va hambeta va “vulavula hi ku twanana” leswaku ku nga vi ni ku avana? (1 Vakorinto 1:10) Hikwalaho ka ku avana lokukulu loku nga kona exikarhi ka lava va tivulaka Vakreste namuntlha, hi fanele hi kambisisa leswi Yesu a swi dyondziseke emhakeni leyi.

Xisekelo Xa Vun’we Bya Vukreste

Loko a ri karhi a tengisiwa emahlweni ka Pontiyo Pilato, Yesu u vulavule hi xisekelo xa vun’we bya Vukreste. U te: “Leswi ndzi velekeriweke swona, ni leswi ndzi teleke swona emisaveni i ku ta nyikela vumbhoni malunghana ni ntiyiso.  Un’wana ni un’wana loyi a nga etlhelweni ra ntiyiso u yingisa rito ra mina.” (Yohane 18:37) Hikwalaho, ku amukela tidyondzo ta Yesu kun’we ni Bibele hinkwayo leyi nga Rito leri huhuteriweke ra Xikwembu swi tisa vun’we lebyikulu eka vadyondzisiwa va Kreste va ntiyiso.—1 Vakorinto 4:6; 2 Timotiya 3:16, 17.

Ina, vadyondzisiwa va Yesu a va ta pfa va va ni swivutiso leswi twalaka kumbe va nga voni swilo hi tihlo rin’we. Kutani a ku ta endleka yini? Yesu u hlamuserile a ku: “Loko a fika, moya wa ntiyiso, u ta mi kongomisa entiyisweni hinkwawo, hikuva a nge vulavuli hi ku tisungulela, kambe u ta vula swilo leswi a swi twaka, naswona u ta mi byela swilo leswi taka.” (Yohane 16:12, 13) Xisweswo, moya lowo kwetsima wa Xikwembu a wu ta pfuna vadyondzisiwa va ntiyiso va Yesu leswaku va twisisa ntiyiso lowu Xikwembu a xi ta wu paluxa hakantsongo-ntsongo. Nakambe moya wolowo a wu ta tswala mihandzu, yo tanihi rirhandzu, ntsako ni ku rhula, naswona mihandzu yo tano a yi ta hlanganyeta vun’we exikarhi ka vona.—Mintirho 15:28; Vagalatiya 5:22, 23.

Yesu a a nga swi rhandzi nikatsongo leswaku ku va ni ku avana kumbe mintlawa-ntlawa exikarhi ka vadyondzisiwa vakwe; naswona a nga va nyikanga mpfumelelo wa ku hlamusela tidyondzo ta le Bibeleni hi ndlela yo sasa mikhuva ya xintu kumbe ya vukhongeri bya lava a va ta hlangana na vona. Ku ri na sweswo, eka madyambu yo hetelela lawa a ma heteke na vona, u khongele hi mahika a ku: “A ndzi endli xikombelo malunghana ni lava ntsena, kambe ndzi kombelela ni lava pfumelaka eka mina hi rito ra vona; leswaku hinkwavo va va un’we, tanihi leswi wena, Tatana, u nga ni vun’we na mina ni leswi na mina ndzi nga ni vun’we na wena, leswaku na vona va va ni vun’we na hina, leswaku misava yi kholwa leswaku u ndzi rhumile.” (Yohane 17:20, 21) Kutani ke, ku sukela eku sunguleni ku fikela enkarhini wa hina, vadyondzisiwa va ntiyiso va Kreste a va voniwa hi vun’we bya xiviri emoyeni ni le ntiyisweni. (Yohane 4:23, 24) Hambiswiritano, namuntlha tikereke ti avanile ematshan’weni ya ku va ni vun’we. Ha yini?

Xivangelo Xa Ku Avana Ka Tikereke

Xivangelo lexi kongomeke xa ku hambana lokukulu ka tidyondzo ni mikhuva ya lava va tivulaka Vakreste namuntlha hileswi va nga namarhelangiki tidyondzo ta Yesu. Mutsari un’wana u te: “Ku fana ni le nkarhini lowu hundzeke, Vakreste lavantshwa va namuntlha va ni mboyamelo wa ku amukela tidyondzo ta Bibele leti enerisaka vona ntsena—kutani va bakanya tidyondzo tihi ni tihi leti nga fambisaniki ni mikhuva ya vukhongeri bya vona.” Sweswo hi leswi Yesu ni vaapostola vakwe va vuleke leswaku a swi ta endleka.

Hi xikombiso, moya wu kongomise muapostola Pawulo leswaku a tsalela mulanguteri-kulobye Timotiya a ku: “Ku ta va ni nkarhi lowu va nga ta ka va nga tiyiseli eka dyondzo leyi hanyisaka, kambe, hi ku landza ku navela ka vona, va ta tihlengeletela vadyondzisi leswaku tindleve ta vona ti ta nyangalatiwa; naswona va ta hundzuluxela tindleve ta vona ekule ni ntiyiso, kasi va ta hambukiseriwa etimhakeni ta mavunwa.” Xana a ku ta kanganyisiwa Vakreste hinkwavo? Doo! Pawulo u ye emahlweni a ku: “Kambe wena, hlayisa mianakanyo ya wena leyi hlutekeke eka hinkwaswo, tiyiselela nhlomulo, endla ntirho wa muevhangeli, hetisisa vutirheli bya wena hi xitalo.” (2 Timotiya 4:3-5; Luka 21:8; Mintirho 20:29, 30; 2 Petro 2:1-3) Timotiya ni Vakreste van’wana lava tshembekaka a va namarhela xitsundzuxo xexo lexi huhuteriweke.

Vakreste Va Ntiyiso Va Ni Vun’we Ni Namuntlha

Ku fana na Timotiya, Vakreste va ntiyiso namuntlha va hlayisa mianakanyo ya vona yi hlutekile hi ku bakanya mianakanyo ya vanhu kutani va amukela tidyondzo leti seketeriwaka hi Matsalwa ntsena. (Vakolosa 2:8; 1 Yohane 4:1) Ku fana ni Vakreste va lembe-xidzana ro sungula, Timbhoni ta Yehovha ti chumayela ematikweni yo tlula 230, ti byela vanhu va le tindhawini hinkwato mahungu lamanene ya Mfumo, lama nga rungula ro sungula ra Yesu. Xiya tindlela ta mune ta nkoka leti ha tona va tekelelaka Yesu hi mbilu yin’we va tlhela va endla swilaveko swa Vukreste bya ntiyiso, ku nga khathariseki leswaku va tshama kwihi.

Tidyondzo ta vona ti sekeriwe eRitweni ra Xikwembu. (Yohane 17:17) Mufundhisi un’wana wa le Belgium u tsale leswi landzelaka malunghana na vona: “Leswi hi nga swi dyondzaka eka vona [Timbhoni ta Yehovha] i ku tiyimisela ka vona ku yingisa Rito ra Xikwembu ni ku chumayela ha rona hi xivindzi.”

 Va langutele Mfumo wa Xikwembu leswaku wu va phula eka swiphiqo swa misava. (Luka 8:1) Le Barranquilla, eColombia, Mbhoni yin’wana yi vulavule na Antonio loyi a nga museketeri lonkulu wa vandla rin’wana ra politiki. Mbhoni leyi a yi yimanga na rona vandla rakwe, naswona a yi bumabumelanga mianakanyo yo karhi ya politiki. Ku ri na sweswo, yi endle xiringanyeto xa ku dyondza Bibele na Antonio ni tindzisana ta yena tinharhu ta xisati, mahala. Endzhakunyana, Antonio u xiye leswaku Mfumo wa Xikwembu hi wona ntsena lowu nga ta tlhantlha swiphiqo swa vusweti bya le Colombia ni le misaveni hinkwayo.

Va xixima vito ra Xikwembu. (Matewu 6:9) Loko Timbhoni ta Yehovha ti hlangana ro sungula na Maria, Mukhatoliki la titsongahataka wa le Australia, wansati loyi u pfumerile loko Timbhoni ti lava ku n’wi komba vito ra Xikwembu eBibeleni. Xana u angurise ku yini? “Loko ndzi vona vito ra Xikwembu ro sungula eBibeleni, ndzi sungule ku rila. Ku tiva vito ra Xikwembu swi ndzi susumetele ku ri tirhisa.” Maria u ye emahlweni a dyondza Bibele, naswona u swi tive ro sungula evuton’wini bya yena leswaku Yehovha i munhu wa muxaka muni, kutani a va ni vuxaka lebyi tiyeke na yena.

Va hlanganisiwa hi rirhandzu. (Yohane 13:34, 35) Muhleri wa phepha-hungu ra le Canada leri nge The Ladysmith-Chemainus Chronicle, u te: “Ku nga khathariseki leswaku wa nghena kereke kumbe a wu ngheni, u fanele u bumabumela Timbhoni ta Yehovha ta 4 500 leti tirheke vusiku ni nhlikanhi emasikwini lama hundzeke lama endlaka vhiki ni hafu, ti aka Holo ya Tinhlengeletano ya swikwere-mitara swa 2 300 le Cassidy . . . Ku endla ntirho wo tano handle ko holova, ku avana kumbe ku tilavela vito, i nchumu lowu kombisaka Vukreste bya ntiyiso.”

Kutani tivonele hi wexe. Hambileswi vafundhisi, varhumiwa ni swirho swa tikereke ta Vujagana va hambetaka va nga ha dyi byi rhelela hikwalaho ka ku tshwukiselana mahlo loku pfindlukaka etikerekeni ta vona, Vukreste bya ntiyiso byi boxa ndzima leyikulu emisaveni hinkwayo. Ina, Vakreste va ntiyiso va hetisisa ntirho lowu va averiweke wona wa ku chumayela vanhu ni ku va dyondzisa Rito ra Xikwembu. (Matewu 24:14; 28:19, 20) Loko u ri un’wana wa lava va “konyaka” hikwalaho ka swilo leswi nyenyetsaka leswi endliwaka namuntlha, ni loko u karhatiwa hi ku avana ka vukhongeri bya Vujagana, ha ku rhamba leswaku u tihlanganisa ni Timbhoni ta Yehovha entirhweni lowu Vakreste va wu endlaka hi vun’we wa ku gandzela Yehovha, Xikwembu lexi nga xin’we ntsena xa ntiyiso.—Ezekiyele 9:4; Esaya 2:2-4.