Xana Ripfumelo Ri Nga Hanyisa Lava Vabyaka?

LOKO hi vabya hi lava tindlela to tshungula vuvabyi bya kona leswaku byi hola. Swi nga ha endleka u hlayile eBibeleni leswaku nkarhi ni nkarhi Yesu Kreste a a tshungula mixaka hinkwayo ya mavabyi, a pfuna vanhu vo tala lava vabyaka. Xana a a va tshungula njhani? Bibele yi vula leswaku a a hanyisa hi “matimba ya Xikwembu.” (Luka 9:42, 43; Mintirho 19:11, 12) Hikwalaho, moya lowo kwetsima lowu humaka eka Xikwembu hi wona lowu a wu hanyisa, a ku nga ri ripfumelo ra vanhu ntsena. (Mintirho 28:7-9) Hi yona mhaka leyi Yesu a a nga sindzisi leswaku vanhu lava vabyaka va kombisa ripfumelo ku sungula eka yena ku ri kona a va hanyisaka.

U nga ha tivutisa: ‘Xana ku hanyisa hi singita i nchumu wa nkarhi lowu hundzeke, kumbe, xana ku hanyisa loku Yesu a ku endleke ka ha ta endleka nakambe? Hi wihi ntshembo lowu nga kona eka lava xanisiwaka hi mavabyi lama tshikilelaka kumbe lama nga tshungulekiki?’

Bibele yi hlamusela leswaku emisaveni leyintshwa ya Xikwembu yo lulama, matimba ya Xikwembu ma ta tlhela ma endla leswaku ku hanyisa hi singita loku Yesu a ku endleke loko a ha ri emisaveni ku tlhela ku va kona. Timbhoni ta Yehovha ta laha u tshamaka kona ti ta tsakela ku ku kombisa ndlela ni nkarhi lowu Xikwembu xi nga ta hetisisa leswi lava hanyisaka hi ripfumelo va nga ta ka va nga swi endli—ku nga ku herisa mavabyi hinkwawo, swin’we ni rifu. Ina, Xikwembu xi “ta mita rifu hi masiku.”—Esaya 25:8.