“Hetisisa Vutirheli Bya Wena Hi Xitalo”

“Endla ntirho wa wena hi ku hetiseka.”—2 TIMOTIYA 4:5, Byington.

1, 2. Hambileswi Vakreste hinkwavo va nga vavuri va evhangeli, i yini lexi languteriweke eka vakulu hi ku ya hi Matsalwa?

XANA u muhuweleri wa Mfumo? Loko u ri yena, u fanele u nkhensa Yehovha Xikwembu hikwalaho ka lunghelo leri ro hlawuleka. Xana u nkulu evandlheni? Rolero i lunghelo leri engetelekeke leri humaka eka Yehovha. Kambe a hi fanelanga hi rivala leswaku ku dyondzeka kumbe vuswikoti bya ku vulavula a hi swona swi endlaka leswaku munhu a fanelekela vutirheli kumbe ku va mulanguteri evandlheni. Yehovha hi yena a endlaka leswaku hi byi fanelekela kahle vutirheli, naswona vavanuna van’wana exikarhi ka hina va ni lunghelo ra ku va valanguteri hileswi va fikelelaka swilaveko swo karhi swa Matsalwa.—2 Vakorinto 3:5, 6; 1 Timotiya 3:1-7.

² Vakreste hinkwavo lava tinyiketeleke i vavuri va evhangeli, kambe valanguteri kumbe vakulu hi vona ngopfu-ngopfu va faneleke va veka xikombiso lexinene evutirhelini. Xikwembu na Kreste swin’we ni Timbhoni letin’wana ta Yehovha va va xiya vakulu “lava tirhaka hi matimba eku vulavuleni ni le ku dyondziseni.” (1 Timotiya 5:17; Vaefesa 5:23; Vaheveru 6:10-12) Minkarhi hinkwayo dyondzo ya nkulu yi fanele yi va leyi hanyaka hi tlhelo ra moya, hikuva muapostola Pawulo u byele mulanguteri Timotiya a ku: “Ku ta va ni nkarhi lowu va nga ta ka va nga tiyiseli eka dyondzo leyi hanyisaka, kambe, hi ku landza ku navela ka vona, va ta tihlengeletela vadyondzisi leswaku tindleve ta vona ti ta nyangalatiwa; naswona va ta hundzuluxela tindleve ta vona ekule ni ntiyiso, kasi va ta hambukiseriwa etimhakeni ta mavunwa. Kambe wena, hlayisa mianakanyo ya wena leyi hlutekeke eka hinkwaswo, tiyiselela nhlomulo, endla ntirho wa muevhangeli, hetisisa vutirheli bya wena hi xitalo.”—2 Timotiya 4:3-5.

3. I yini lexi faneleke xi endliwa leswaku tidyondzo ta mavunwa ti nga xungeti vumoya bya vandlha?

³ Leswaku mulanguteri a tiyiseka leswaku tidyondzo ta mavunwa a ti xungeti vumoya bya vandlha, u fanele a fambisana ni ndzayo ya Pawulo leyi nge: “U va ni miehleketo leyi hlutekeke eka swilo hinkwaswo, . . . u endla ntirho wa wena hi ku hetiseka.” (2 Timotiya 4:5, Byington) Ina, nkulu u fanele a ‘hetisisa vutirheli bya yena hi xitalo.’ U fanele a byi endla hinkwabyo, hi ku hetiseka, kumbe hi mpimo lowu hetisekeke. Nkulu loyi a endlaka vutirheli byakwe hi ku hetiseka u nyikela nyingiso eka vutihlamuleri byakwe hinkwabyo, a nga honisi nchumu kumbe ku siya nchumu wun’wana wu nga endliwanga hi ku hetiseka. Munhu wo tano wa tshembeka ni le ka swilo leswitsongo.—Luka 12:48; 16:10.

4. I yini lexi nga hi pfunaka ku hetisisa vutirheli bya hina hi xitalo?

⁴ A hi minkarhi hinkwayo ku lavekaka nkarhi lowu engetelekeke leswaku hi hetisisa vutirheli bya hina hi xitalo, kambe hi fanele hi wu tirhisa kahle nkarhi wa hina. Vakreste hinkwavo va nga pfuneka leswaku va hetisisa swilo swo karhi evutirhelini loko va ri ni xiyimiso lexi nga hundzukiki xa nkarhi na nkarhi. Leswaku a heta nkarhi wo tala ensin’wini, nkulu u fanele a hleleka kahle leswaku a ta kota ku ringanisela xiyimiso xakwe ni ku tiva leswaku i yini leswi a nga swi avelaka van’wana leswaku va swi endla ni leswaku a nga swi endlisa ku yini. (Vaheveru 13:17) Hi ntolovelo, nkulu la xiximekaka na yena u endla leswi a faneleke a swi endla, a tekelela Nehemiya, la hlanganyeleke eku pfuxeni ka marhangu ya Yerusalema. (Nehemiya 5:16) Kutani malandza hinkwawo ya Yehovha ma fanele ma hlanganyela nkarhi na nkarhi entirhweni wo chumayela hi Mfumo.—1 Vakorinto 9:16-18.

5. Hi fanele hi titwa njhani hi vutirheli?

⁵ Hi nyikiwe ntirho lowu tsakisaka swonghasi wa ku va vahuweleri va Mfumo lowu simekiweke etilweni! Hakunene ha ri tlangela lunghelo ra hina ra ku hlanganyela eku chumayeleni ka mahungu lamanene emisaveni hinkwayo leyi  akiweke, makumu ma nga si fika. (Matewu 24:14) Hambileswi hi nga hetisekangiki, hi nga khutaziwa hi marito ya Pawulo lama nge: “Hi ni xuma lexi [xa vutirheli] eswibyeni swa vumba, leswaku matimba lama tlulaka lama tolovelekeke ma va ya Xikwembu, ku nga vi ya hina.” (2 Vakorinto 4:7) Ina, hi nga endla ntirho lowu amukelekaka—kambe hi matimba ni vutlhari lebyi hi nyikiweke byona hi Xikwembu.—1 Vakorinto 1:26-31.

Ku Kombisa Ku Vangama Ka Xikwembu

6. Hi kwihi ku hambana loku a ku ri kona exikarhi ka Israyele wa ntumbuluko na Israyele wa moya?

⁶ Loko a vulavula hi Vakreste lava totiweke, Pawulo u vula leswaku Xikwembu xi “hi [endle] hi faneleka kahle ku va vatirheli va ntwanano lowuntshwa.” Muapostola loyi u kombise ku hambana exikarhi ka ntwanano lowuntshwa lowu endliweke na Israyele wa moya ha Yesu Kreste swin’we ni ntwanano wa khale wa Nawu lowu endliweke na Israyele wa ntumbuluko ha Muxe. Pawulo u engetela hi leswaku loko Muxe a xika eNtshaveni ya Sinayi a ri ni maribye lawa a ma ri ni Milawu ya Khume, xikandza xakwe a xi vangama swinene lerova Vaisrayele a va nga swi koti ku xi languta hi ku kongoma. Kambe, hi ku famba ka nkarhi ku humelele nchumu wun’wana wo hlamarisa, hikuva “matimba ya vona ya mianakanyo ma tlanyarile” naswona etimbilwini ta vona ku ve ni nturhu. Hambiswiritano, loko munhu a hundzulukela eka Yehovha hi ku tinyiketela hi mbilu hinkwayo, nturhu wolowo wa susiwa. Endzhaku ka sweswo loko a vulavula hi vutirheli lebyi nyikiweke lava nga eka ntwanano lowuntshwa, Pawulo u ri: “Hinkwerhu ka hina, . . . hi vonakarisa ku vangama ka Yehovha kukota swivoni hi swikandza leswi fununguriweke.” (2 Vakorinto 3:6-8, 14-18; Eksoda 34:29-35) “Tinyimpfu tin’wana” ta namuntlha ta Yesu na tona ti ni lunghelo ro vonakarisa ku vangama ka Yehovha.—Yohane 10:16.

7. Xana vanhu va nga ku vonakarisa njhani ku vangama ka Xikwembu?

⁷ Xana vanhu lava dyoheke va nga ku vonakarisa njhani ku vangama ka Xikwembu, kasi a ku na munhu la nga vonaka xikandza xa xona kutani a hanya? (Eksoda 33:20) Handle ka ku vangama ka Yehovha hi byakwe, nakambe ku ni xikongomelo xa yena lexi vangamaka xo lwela vuhosi byakwe hi ku tirhisa Mfumo wa yena. Ntiyiso lowu fambisanaka ni Mfumo wu vumba xiphemu xa “swilo leswikulu ngopfu swa Xikwembu,” leswi sunguleke ku twarisiwa hi lava va chululeriweke moya lowo kwetsima hi Pentekosta ya 33 C.E. (Mintirho 2:11) A va kota ku hetisisa vutirheli lebyi va nyikiweke byona hi xitalo hi ku kongomisiwa hi moya.—Mintirho 1:8.

8. Xana Pawulo a a tiyimisele ku endla yini malunghana ni vutirheli?

⁸ Pawulo a a tiyimiserile ku nga pfumeleli nchumu wu n’wi sivela ku hetisisa vutirheli bya yena hi xitalo. U tsarile: “Hi yona mhaka leyi hi nga tshikiki, leswi hi nga ni vutirheli lebyi hi ku ya hi tintswalo leti hi kombisiweke tona; kambe hi fularhele swilo leswi ngungumerisiwaka leswi khomisaka tingana, a hi fambi hi vukanganyisi, hambi ku ri ku nyakapfarisa rito ra Xikwembu, kambe hi ku kombisa ntiyiso ha tibumabumela eka ripfalo ra munhu un’wana ni un’wana emahlweni ka Xikwembu.” (2 Vakorinto 4:1, 2) Ntiyiso wa kombisiwa naswona ku vonakala ka moya ka twarisiwa ni le matikweni ya le kule, hikwalaho ka leswi Pawulo a swi vitanaka “vutirheli lebyi.”

9, 10. Xana swi kotekisa ku yini ku vonakarisa ku vangama ka Yehovha?

⁹ Pawulo u tsarile malunghana ni Xihlovo xa ku vonakala ka xiviri ni ka moya: “Xikwembu hi xona xi nga te: ‘Ku vonakala a ku voninge emunyameni,’  naswona xi voninge timbilu ta hina leswaku xi ti voningela hi vutivi lebyi vangamaka malunghana ni Xikwembu, hi xikandza xa Kreste.” (2 Vakorinto 4:6; Genesa 1:2-5) Tanihi leswi hi nyikiweke lunghelo lerikulu ra ku va vatirheli va Xikwembu, a hi tihlayiseni hi basile leswaku hi ta vonakarisa ku vangama ka Yehovha ku fana ni swivoni.

¹⁰ Vanhu lava nga emunyameni wa moya a va ku voni ku vangama ka Yehovha kumbe xifaniso xa kona eka Yesu Kreste, Muxe Lonkulu. Kambe tanihi malandza ya Yehovha, hi kuma ku vonakala loku vangamaka eMatsalweni kutani hi ku vonakarisa eka van’wana. Loko lava nga emunyameni wa moya sweswi va lava ku pona, va fanele va kuma ku vonakala loku humaka eka Xikwembu. Kutani, hi xi yingisa hi mbilu hinkwayo xileriso xa Xikwembu xa ku kombisa ku vonakala emunyameni leswaku ku vangamisiwa Yehovha.

Ku Vonakala Ka N’wina A Ku Voninge eTidyondzweni Ta Le Kaya Ta Bibele

11. Xana Yesu u vule yini malunghana ni ku kombisa ku vonakala ka hina, naswona hi yihi ndlela yin’wana yo endla sweswo evutirhelini bya hina?

¹¹ Yesu u byele valandzeri vakwe a ku: “N’wina mi ku vonakala ka misava. Muti a wu nge fihleki loko wu akiwe ehenhla ka ntshava. Vanhu va lumeka rivoni va ri veka ehenhla ka xo tlhandleka rivoni, ku nga ri ehansi ka xirhundzu xo pima, kutani ri voningela hinkwavo lava nga endlwini. Hi ku fanana ku voninga ka n’wina a ku vonakale emahlweni ka vanhu, leswaku va ta vona mintirho ya n’wina leyinene kutani va vangamisa Tata wa n’wina la nge matilweni.” (Matewu 5:14-16) Ku tikhoma ka hina lokunene ku nga vangela van’wana leswaku va vangamisa Xikwembu. (1 Petro 2:12) Naswona tanihi leswi hi hlanganyelaka hi tindlela to hambana-hambana eku vuleni ka evhangeli, sweswo swi hi pfulela tindlela to tala to kombisa ku vonakala ka hina. Xikongomelo xin’wana xa hina lexikulu i ku kombisa ku vonakala ka moya loku humaka eRitweni ra Xikwembu hi ku fambisa tidyondzo ta le kaya ta Bibele leti humelelaka. Leyi i ndlela ya nkoka yo hetisisa vutirheli bya hina hi xitalo. I swiringanyeto swihi leswi nga hi pfunaka ku fambisa tidyondzo ta Bibele leti khumbaka timbilu ta vanhu lava lavaka ntiyiso?

12. Xana xikhongelo xi fambisana njhani ni ntirho wo fambisa tidyondzo ta le kaya ta Bibele?

¹² Loko hi khongela eka Yehovha malunghana ni mhaka leyi hi kombisa ku navela ka hina lokukulu ko fambisa tidyondzo ta Bibele. Swi tlhela swi kombisa leswaku hi vona nkoka wa ku pfuna van’wana leswaku va va ni vutivi bya Xikwembu. (Ezekiyele 33:7-9) A hi kanakani leswaku Yehovha u ta hlamula swikhongelo swa hina ni ku katekisa matshalatshala ya hina lamakulu evutirhelini. (1 Yohane 5:14, 15) Kambe a hi khongeleli ntsena ku kuma munhu loyi hi nga dyondzaka Bibele na yena. Loko se hi kume dyondzo leyi tiyeke, ku khongela ni ku anakanyisisa hi swilaveko swo karhi swa xichudeni xolexo xa Bibele swi nga hi pfuna leswaku hi fambisa dyondzo yin’wana ni yin’wana hi ndlela leyi humelelaka.—Varhoma 12:12.

13. I yini lexi nga hi pfunaka ku fambisa tidyondzo ta le kaya ta Bibele leti humelelaka?

¹³ Leswaku hi fambisa tidyondzo ta le kaya ta Bibele leti humelelaka, hi fanele hi lunghiselela kahle eka dyondzo yin’wana ni yin’wana. Loko hi titwa hi nga faneleki, lexi nga ha pfunaka ku nga va ku xiya ndlela leyi mulanguteri wa Dyondzo ya Buku ya Vandlha a yi fambisaka ha yona dyondzo ya vhiki na vhiki. Minkarhi yin’wana hi nga ha famba ni vahuweleri va Mfumo lava veke ni vuyelo lebyinene eku fambiseni ka tidyondzo ta le kaya ta Bibele. Ina, hi fanele hi anakanyisisa swinene hi malangutelo ni madyondziselo ya Yesu Kreste.

14. Hi nga yi fikelela njhani mbilu ya xichudeni xa Bibele?

¹⁴ Yesu a a tsakela ku endla ku rhandza ka Tata wakwe wa le tilweni ni ku byela van’wana hi Xikwembu. (Pisalema 40:8) A a ri ni moya wo rhula naswona a a swi kota ku fikelela timbilu ta lava a va n’wi yingisa. (Matewu 11:28-30) Hikwalaho a hi tikarhateleni ku fikelela timbilu ta swichudeni swa hina swa Bibele. Leswaku hi endla tano, hi fanele hi lunghiselela dyondzo yin’wana ni yin’wana hi ri karhi hi anakanya hi swiyimo swa xichudeni xolexo. Hi xikombiso, loko xi kule xi nga tolovelananga na Bibele, hi nga boheka ku xi khorwisa leswaku Bibele i ntiyiso. Eka xiyimo xexo, swi le rivaleni leswaku hi ta boheka ku hlaya matsalwa yo tala hi tlhela hi ma hlamusela.

 Pfuna Swichudeni Leswaku Swi Twisisa Swifaniso

15, 16. (a) Hi nga xi pfuna njhani xichudeni lexi nga xi twisisiki xifaniso lexi tirhisiweke eBibeleni? (b) Hi nga endla yini loko wun’wana wa minkandziyiso ya hina wu tirhise xifaniso lexi xichudeni xo karhi xa Bibele swi xi tikelaka ku xi twisisa?

¹⁵ Xichudeni xa Bibele xi nga ha va xi nga tolovelananga ni xifaniso xo karhi lexi tirhisiweke eMatsalweni. Hi xikombiso, xi nga ha va xi nga swi twisisi leswaku Yesu a a vula yini loko a vulavula hi ku veka rivoni ehenhla ka xo tlhandleka rivoni. (Marka 4:21, 22) Yesu a a vulavula hi rivoni ra xikhale leri tirhisaka mafurha leri a ri ri ni ntambhu leyi pfurhaka. Rivoni rolero a ri tlhandlekiwa ehenhla ka nchumu wo hlawuleka kutani ri voninga endlwini. Leswaku u xi hlamusela kahle xifaniso xa Yesu swi nga ha lava u endla ndzavisiso ehansi ka nhloko-mhaka leyi nge “Lamp” ni leyi nge “Lampstand” eka buku yo tanihi leyi nge Insight on the Scriptures. * Kambe swa vuyerisa ku ya eka xichudeni xa Bibele u ri ni nhlamuselo leyi twisisekaka ni leyi nga ta tsakeriwa hi xichudeni!

¹⁶ Nkandziyiso lowu pfunetaka ku dyondza Bibele wu nga ha tirhisa xifaniso lexi xichudeni xo karhi swi xi tikelaka ku xi twisisa. Xi hlamusele kahle, kumbe u tirhisa xifaniso xin’wana lexi hlamuselaka yinhla leyi fanaka. Kumbexana nkandziyiso wo karhi wu hlamusela leswaku munghana lonene ni ntirhisano i swa nkoka evukatini. Leswaku ku kombisiwa mhaka leyi, ku nga ha va ku tirhisiwe xifaniso xa wanuna la tlangaka ehenhla ka nchinginya, a tshika ku khomelela eka wona kutani wu n’wi lahlela ekule, hi ntshembo wa leswaku mutlangi-kulobye u ta n’wi khoma a nga weli ehansi. Ematshan’weni ya sweswo, xifaniso lexi u nga xi tirhisaka leswaku u kombisa xilaveko xa munghana lonene ni ntirhisano ku nga va xa ndlela leyi vatirhi va mukelanaka ha yona loko va nyiketana mabokisi lawa va ma xikisaka elorini.

17. Hi nga dyondza yini eka Yesu malunghana ni swifaniso?

¹⁷ Leswaku u tirhisa xifaniso xin’wana swi nga ha lava leswaku u lunghiselela ka ha ri emahlweni. Kambe, yoleyo i ndlela yo kombisa leswaku ha khathala hi xichudeni xa hina xa Bibele. Yesu u tirhise swifaniso swo olova leswaku a hlamusela timhaka leti nonon’hwaka leswaku ti twala kahle. Dyondzo yakwe ya le Ntshaveni yi ni swikombiso swa mhaka leyi naswona Bibele yi kombisa leswaku ndlela leyi a a dyondzisa ha yona yi ve ni vuyelo lebyinene eka vayingiseri vakwe. (Matewu 5:1–7:29) Yesu u hlamusele swilo hi ku lehisa mbilu hikuva a a khathala swinene hi van’wana.—Matewu 16:5-12.

18. I yini lexi ringanyetiwaka malunghana ni matsalwa lama kombisiweke kunene etibukwini ta hina?

¹⁸ Ku khathala ka hina hi van’wana ku ta hi susumetela ku ‘kanerisana ni van’wana hi Matsalwa.’ (Mintirho 17:2, 3) Leswi swi lava leswaku u dyondza hi mbilu hinkwayo u ri karhi u khongela, u tlhela u yi tirhisa hi vutlhari minkandziyiso leyi humesiwaka hi “mulanguteri wo tshembeka.” (Luka 12:42-44) Hi xikombiso, buku leyi nge Vutivi Lebyi Yisaka eVuton’wini Lebyi Nga Heriki yi tshaha matsalwa yo tala. * Man’wana mo kombisiwa kunene hikwalaho ka leswi ndhawu yi nga yitsongo. Hi nkarhi wa dyondzo ya Bibele, i swa nkoka ku hlaya ni ku hlamusela man’wana ya matsalwa lama kombisiweke kunene. Phela, dyondzo ya hina yi sekeriwe eRitweni ra Xikwembu, naswona ri ni matimba lamakulu. (Vaheveru 4:12) Eka dyondzo yin’wana ni yin’wana yisa nyingiso eBibeleni, u ma tirhisa swinene matsalwa lama kumekaka eka tindzimana leti mi ti hlayaka. Pfuna xichudeni leswaku xi vona leswi Bibele yi swi vulaka hi dyondzo yo karhi kumbe xiendlo xo karhi. Ringeta ku xi komba ndlela leyi xi nga ta vuyeriwa ha yona loko xi yingisa Xikwembu.—Esaya 48:17, 18.

 Vutisa Swivutiso Leswi Tlhontlhaka Mianakanyo

19, 20. (a) Ha yini hi fanele hi tirhisa swivutiso swo lava ku vona vonelo ra munhu loko hi ri karhi hi fambisa dyondzo ya le kaya ya Bibele? (b) Ku nga endliwa yini loko mhaka yo karhi ya ha lava ku kambisisiwa?

¹⁹ Ndlela ya vutshila leyi Yesu a a tirhisa swivutiso ha yona yi pfune vanhu leswaku va anakanyisisa. (Matewu 17:24-27) Loko hi vutisa swivutiso leswi nga ta ka swi nga khomisi xichudeni xa Bibele tingana malunghana ni vonelo ra xona, tinhlamulo ta xona ti nga kombisa leswi xi swi anakanyaka hi mhaka yo karhi. Hi nga ha kuma leswaku xa ha namarhele mavonelo lama nga fambisaniki ni Matsalwa. Hi xikombiso, xi nga ha va xi pfumela eka Vunharhu-un’we. Eka ndzima 3, buku leyi nge Vutivi yi kombisa leswaku rito leri nge “Vunharhu-un’we” a ri kumeki eBibeleni. Buku leyi yi tshaha yi tlhela yi kombisa matsalwa lama swi vekaka erivaleni leswaku Yehovha u hambanile na Yesu ni leswaku moya lowo kwetsima a hi munhu kambe i matimba ya Xikwembu lama tirhaka. Ku hlaya ni ku bula hi tindzimana leti ta Bibele swi nga ha va swi enerile. Kambe ku vuriwa yini loko ka ha laveka leswi engetelekeke? Kumbexana endzhaku ka dyondzo leyi nga ta landzela, hi nga ha tinyika nkarhi hi bula hi ndlela leyi vuyerisaka hi mhaka leyi, hi ku tirhisa wun’wana wa minkandziyiso ya Timbhoni ta Yehovha, tanihi broxara leyi nge Xana U Fanele Ku Pfumela Eka Vunharhu-un’we? Endzhaku ka sweswo, hi nga ya emahlweni ni dyondzo hi tirhisa buku leyi nge Vutivi.

²⁰ A hi nge ndlela leyi xichudeni xi ku hlamulaka ha yona loko u xi vutisa xivutiso xa ku lava ku twa vonelo ra xona ya hlamarisa kumbe yi heta ni matimba. Loko ku vulavuriwa hi mhaka ya ku dzaha kumbe yin’wana yo tika leyi khumbaka xichudeni, hi nga ha ringanyeta leswaku hi ya emahlweni ni dyondzo kutani hi vulavula hi mhaka yoleyo endzhaku. Ku tiva leswaku xichudeni xa ha dzaha swi ta hi pfuna leswaku hi kuma rungula leri kandziyisiweke leri nga xi pfunaka leswaku xi endla nhluvuko wa moya. Loko hi ri karhi hi ringeta ku fikelela mbilu ya xichudeni, hi nga khongelela leswaku Yehovha a xi pfuna xi kula hi tlhelo ra moya.

21. Ku nga humelela yini loko hi endla leswaku madyondziselo ya hina ma pfumelelana ni swilaveko swo karhi swa xichudeni xa Bibele?

²¹ Loko hi lunghiselela kahle ni loko hi kombela mpfuno wa Yehovha, handle ko kanakana hi ta kota ku endla leswaku madyondziselo ya hina ma fambisana ni swilaveko swo karhi swa xichudeni xa Bibele. Loko nkarhi wu ri karhi wu famba, hi nga kota ku xi pfuna leswaku xi rhandza Xikwembu swinene. Hi nga tlhela hi kota ku endla leswaku xi xixima xi tlhela xi tlangela nhlengeletano ya Yehovha. Naswona a hi ku tsakisa ka swona loko xichudeni xa Bibele xi pfumela leswaku ‘Xikwembu xi le xikarhi ka hina hakunene’! (1 Vakorinto 14:24, 25) Hikwalaho, onge hi nga fambisa tidyondzo ta Bibele leti humelelaka kutani hi endla hinkwaswo leswi hi nga swi kotaka leswaku hi pfuna van’wana va va vadyondzisiwa va Yesu.

Xuma Lexi Faneleke Xi Khathaleriwa

22, 23. I yini lexi lavekaka leswaku hi hetisisa vutirheli bya hina hi xitalo?

²² Leswaku hi hetisisa vutirheli bya hina hi xitalo hi fanele hi titshega hi matimba lama humaka eka Xikwembu. Loko a vulavula hi vutirheli, Pawulo u tsalele Vakreste-kulobye lava totiweke a ku: “Hi ni xuma lexi eswibyeni swa vumba, leswaku matimba lama tlulaka lama tolovelekeke ma va ya Xikwembu, ku nga vi ya hina.”—2 Vakorinto 4:7.

²³ Ku nga khathariseki leswaku hi vatotiwa kumbe hi “tinyimpfu tin’wana,” hi fana ni swibya swa vumba leswi nga tiyangiki. (Yohane 10:16) Kambe, Yehovha a nga hi nyika matimba lama lavekaka leswaku hi hetisisa swiavelo swa hina ku nga khathariseki leswaku hi langutana ni mintshikilelo yihi. (Yohane 16:13; Vafilipiya 4:13) Hikwalaho, a hi tshembeni Yehovha hi ku helela, hi tlangela ntirho wa hina wa risima, naswona hi hetisisa vutirheli bya hina hi xitalo.

[Tinhlamuselo ta le hansi]

A Wu Ta Hlamurisa Ku Yini?

• Xana vakulu va nga endla yini leswaku va hetisisa vutirheli bya vona hi xitalo?

• Hi nga ku antswisa njhani ku humelela ka hina eku fambiseni ka tidyondzo ta le kaya ta Bibele?

• Xana a wu ta endla yini loko xichudeni xa Bibele xi nga xi twisisi xifaniso xo karhi kumbe xi lava rungula leri engetelekeke emhakeni yo karhi?

[Swivutiso Swa Dyondzo]

[Xifaniso lexi nga eka tluka 16]

Vakulu lava nga Vakreste va dyondzisa evandlheni va tlhela va pfuneta eku leteleni ka vapfumeri-kulobye evutirhelini

[Xifaniso lexi nga eka tluka 18]

Ku fambisa tidyondzo ta Bibele leti humelelaka i ndlela yin’wana yo kombisa ku vonakala ka hina