Siku Leri U Faneleke U Ri Tsundzuka

HI MADYAMBU ya le mahlweni ka siku leri a feke ha rona, Yesu Kreste u teke xinkwa xo pfumala comela ni xinwelo xa vhinyo yo tshwuka a swi hundzisela eka vaapostola vakwe kutani a va lerisa leswaku va swi tirhisa. U te: “Tshamani mi ri karhi mi endla leswi leswaku mi ndzi tsundzuka.”—Luka 22:19.

Nan’waka xiendlakalo xexo xi ta tsundzukiwa hi Sonto, April 4, endzhaku ka ku pela ka dyambu. Timbhoni ta Yehovha emisaveni hinkwayo ti ta hlengeletana hi madyambu wolawo ti endla nkhuvo lowu wa Xitsundzuxo hi ndlela leyi Yesu a leriseke ha yona. Hi ku rhamba hi ndlela yo hlawuleka leswaku u hlanganyela na tona. Hi kombela leswaku u vutisa Timbhoni ta Yehovha ta le ndhawini ya ka n’wina malunghana ni nkarhi ni ndhawu leyi nhlangano lowu wo hlawuleka wu nga ta khomeriwa eka yona.