Xilalelo Xa Hosi Xana Xi Tlangeriwa Hi Ndlela Yihi?

LOKO muapostola Pawulo la nga Mukreste, a yi hlamusela hi vuxokoxoko ndlela leyi Xilalelo xa Hosi xi tlangeriwaka ha yona, u ri: “Leswi ndzi swi hundziseleke ni le ka n’wina ndzi swi amukele eka Hosi, leswaku Hosi Yesu, evusikwini lebyi a a ta nyiketiwa ha byona u teke xinkwa, kuteloko a nkhensile, a xi phema, a ku: ‘Leswi swi vula miri wa mina hikwalaho ka n’wina. Tshamani mi ri karhi mi endla leswi leswaku mi ndzi tsundzuka.’ A endla hilaha ku fanaka ni hi xinwelo, endzhaku ka loko a dye xilalelo, a ku: ‘Xinwelo lexi xi vula ntwanano lowuntshwa hikwalaho ka ngati ya mina. Tshamani mi ri karhi mi endla leswi minkarhi hinkwayo loko mi xi nwa leswaku mi ndzi tsundzuka.’ Hikuva minkarhi hinkwayo loko mi dya xinkwa lexi ni ku nwa xinwelo lexi, mi hambeta mi huwelela rifu ra Hosi, yi kondza yi fika.”—1 Vakorinto 11:23-26.

Hilaha Pawulo a vulaka hakona, Yesu u sungule nkhuvo wa Xilalelo xa Hosi “evusikwini lebyi [Yesu] a a ta nyiketiwa ha byona” hi Yudasi Iskariyota eka varhangeri va vukhongeri bya Xiyuda, lava sindziseke leswaku Kreste a beleriwa hi Varhoma. Xilalelo xexo xi dyiwe nivusiku hi Ravumune wa March 31, 33 C.E. Yesu u fele emhandzini ya nxaniso hi Ravuntlhanu nindzhenga hi April 1. Leswi masiku ya khalendara ya Xiyuda a ma sungula nimadyambu ya siku rin’wana ma hela nimadyambu ya siku leri tlhandlamaka, Xilalelo xa Hosi ni rifu ra Yesu Kreste swi endleke hi siku rin’we—ku nga Nisani 14, 33 C.E.

Lava dyaka xinkwa ni ku nwa vhinyo a va fanele va tsundzuka Yesu hi ku ‘tshama va ri karhi va endla tano.’ Hi ku ya hi vuhundzuluxeri byin’wana, Yesu u te: “Endlani leswi leswaku mi ndzi tsundzuka.” (1 Vakorinto 11:24, The Jerusalem Bible) Xilalelo xa Hosi xi tlhela xi vitaniwa Xitsundzuxo xa rifu ra Kreste.

Ha Yini Hi Tsundzuka Rifu Ra Yesu?

Leswaku hi kuma nhlamulo, hi fanele hi twisisa leswi rifu leri ri vulaka swona. Yesu u fe a ri museketeri-nkulu wa vuhosi bya Yehovha. Hi ndlela yoleyo, u kombise leswaku Sathana a a hemba loko a vula leswaku vanhu va tirhela Xikwembu leswaku ku vuyeriwa vona vini. (Yobo 2:1-5; Swivuriso 27:11) Leswi Yesu a feke a ri munhu la hetisekeke, u tlhele a “nyikela moya-xiviri wakwe wu va nkutsulo wa lavo tala.” (Matewu 20:28) Loko Adamu a dyohela Xikwembu, u endle leswaku vanhu va lahlekeriwa hi vutomi lebyi hetisekeke ni lunghelo ro hanya hilaha ku nga heriki. Kambe “Xikwembu xi rhandze misava [ku nga vanhu] swinene xi kala xi nyikela hi N’wana  wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Kutani swi le rivaleni leswaku “hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.”—Varhoma 6:23.

Xisweswo rifu ra Yesu Kreste ri katsa tindlela timbirhi letikulu leti kombisaka rirhandzu—ku nga rirhandzu lerikulu leri Yehovha a ri kombeke vanhu hi ku nyikela N’wana wa yena ni rirhandzu leri Yesu a ri kombeke vanhu hi ku nyikela vutomi bya yena hi ku tirhandzela. Xitsundzuxo xa rifu ra Yesu xi kandziyisa tindlela letimbirhi ta rirhandzu. Leswi ku nga hina hi vuyeriwaka eka rirhandzu leri, xana a hi fanelanga hi kombisa leswaku ha ri tlangela? Ndlela yin’wana leyi hi nga kombisaka ha yona leswaku ha ri tlangela i ku va kona loko ku tsundzukiwa Xilalelo xa Hosi.

Leswi Xinkwa Ni Vhinyo Swi Vulaka Swona

Loko Yesu a sungula Xilalelo xa Hosi, u tirhise xinkwa ni xinwelo xa vhinyo tanihi swifanekiselo. Yesu u teke xinkwa, “kuteloko a nkhensile, a xi phema, a ku: ‘[Xinkwa lexi xi] vula miri wa mina hikwalaho ka n’wina.’” (1 Vakorinto 11:24) Xinkwa xexo a xi fanele xi phemeleriwa leswaku xi ta nyikiwa ni lavan’wana va dya hikuva a xi omile hileswi a xi endliwe hi mapa lama pfuviweke hi mati, ku nga cheriwanga comela. Hi ku ya hi Matsalwa, comela xi fanekisela xidyoho. (Matewu 16:11, 12; 1 Vakorinto 5:6, 7) Yesu a a nga ri na xidyoho. Hikwalaho miri wa yena wa nyama lowu hetisekeke a wu faneleka ku va gandzelo leri kutsulaka vanhu. (1 Yohane 2:1, 2) Kutani swa fanela leswaku xinkwa lexi fanekiselaka miri wa Kreste lowu nga riki na xidyoho xi va lexi pfumalaka comela!

Yesu u tlhele a nkhensa loko ku nga si nwiwa vhinyo leyo tenga yo tshwuka, kutani a ku: “Xinwelo lexi xi vula ntwanano lowuntshwa hikwalaho ka ngati ya mina.” (1 Vakorinto 11:25) Vhinyo yo tshwuka leyi nga exinwelweni yi fanekisela ngati ya Yesu. Tanihi leswi ngati ya tinkuzi ni swiphongo leswi a ku endliwa switlhavelo ha swona a yi tiyisa ntwanano wa Nawu lowu Xikwembu xi wu endleke ni rixaka ra Israyele hi 1513 B.C.E., ni ngati ya Yesu leyi chuluriweke loko a fa, yi tiyise ntwanano lowuntshwa.

I Vamani Lava Faneleke Va Dya?

Leswaku hi tiva lava faneleke va dya swifanekiselo swa Xitsundzuxo, hi fanele hi twisisa xilaveko xa ntwanano lowuntshwa ni leswaku i vamani lava khumbekaka eka xona. Bibele yi ri: “‘Maswivo! Masiku ma ta,’ ku vula Yehovha, ‘ndzi ta endla ntwanano lowuntshwa ni yindlu ya Israyele ni yindlu ya Yuda . . . Ndzi ta veka nawu wa mina endzeni ka vona, naswona ndzi ta wu tsala embilwini ya vona. Ndzi ta va Xikwembu xa vona, vona va ta va vanhu va mina. . . . Ndzi ta va rivalela xihoxo xa vona, ni xidyoho xa vona a ndzi nge he xi tsundzuki.’”—Yeremiya 31:31-34.

Ntwanano lowuntshwa wu endla leswaku vanhu va va ni vuxaka byo hlawuleka na Yehovha Xikwembu. Hikwalaho ka wona, ntlawa wo karhi wu va vanhu va yena na yena a va Xikwembu xa vona. Nawu wa Yehovha wu tsariwe endzeni ka vona, etimbilwini ta vona, kasi ni lava va nga riki Vayuda va ntumbuluko lava yimbeke, va swi kota ku nghena eka ntwanano lowuntshwa, va va ni vuxaka ni Xikwembu. (Varhoma 2:29) Luka, mutsari wa Bibele u tsale hi xikongomelo xa Xikwembu xa ku ‘hundzuluxela nyingiso wa xona ematikweni leswaku xi humesa eka wona vanhu va vito ra xona.’ (Mintirho 15:14) Hi ku ya hi 1 Petro 2:10, ‘a va nga ri tiko kambe sweswi i tiko ra Xikwembu.’ Matsalwa ma vula leswaku i “Israyele wa Xikwembu,” hi leswaku Israyele wa moya. (Vagalatiya 6:16; 2 Vakorinto 1:21) Kutani ke, ntwanano lowuntshwa i ntwanano lowu Yehovha Xikwembu a wu endleke na Israyele wa moya.

 Hi vusiku byo hetelela loko a ri ni vadyondzisiwa va yena, Yesu hi byakwe u tlhele a endla ntwanano wun’wana na vona. U te: “Ndzi endla ntwanano swin’we na n’wina, hilaha Tata wa mina a endleke hakona ntwanano wa mfumo swin’we na mina.” (Luka 22:29) Ntwanano lowu i wa Mfumo. Ntwanano lowu wa Mfumo wu endliwe ni vanhu va 144 000 lava nga hetisekangiki. Loko se va pfuxeriwe etilweni, va ta fuma na Kreste va ri tihosi ni vaprista. (Nhlavutelo 5:9, 10; 14:1-4) Xisweswo, Yesu Kreste u tlhele a endla ntwanano wa Mfumo ni lava Yehovha Xikwembu a endleke na vona ntwanano lowuntshwa. Hi vona ntsena lava nga ni mfanelo yo dya swifanekiselo swa Xilalelo xa Hosi.

Xana lava va nga ni mfanelo yo dya swifanekiselo swa Xitsundzuxo, va swi tivisa ku yini leswaku va ni vuxaka byo hlawuleka ni Xikwembu, nileswaku i vadyandzhaka na Kreste? Pawulo wa hlamusela: “Moya [lowo kwetsima] hi woxe wu nyikela vumbhoni swin’we ni moya wa hina [langutelo ra hina] leswaku hi vana va Xikwembu. Kutani loko hi ri vana, nakambe hi vadyandzhaka: vadyandzhaka hakunene va Xikwembu, kambe vadyandzhaka-kulobye na Kreste, ntsena loko hi xaniseka swin’we leswaku hi ta tlhela hi vangamisiwa swin’we.”—Varhoma 8:16, 17.

Xikwembu xi tota vadyandzhaka-kulobye na Kreste hi moya wa xona lowo kwetsima kumbe matimba ya xona lama tirhaka. Hi wona wu va tiyisekisaka leswaku i vadyandzhaka va Mfumo. Wu endla leswaku vatotiwa lava nga Vakreste va titwa va ri ni ntshembo wo ya hanya etilweni. Hinkwaswo leswi Bibele yi swi vulaka hi vutomi bya le tilweni va swi teka swi kongomisiwe eka vona. Tlhandlakambirhi, va tiyimiserile ku lahlekeriwa hi swilo hinkwaswo swa laha misaveni, ku katsa ni vutomi bya laha misaveni swin’we ni vuxaka hinkwabyo lebyi va nga na byona ni vanhu. Hambileswi Vakreste lava totiweke va swi tivaka leswaku vutomi bya laha misaveni byi ta tsakisa swinene loko se yi ri Paradeyisi, a va na wona ntshembo wo hanya eka yona. (Luka 23:43) Moya wa Xikwembu lowu tirhaka eka vona wu endla leswaku va va ni ntshembo lowu nga hundzukiki wo hanya etilweni, naswona tanihi leswi va nga kuceteriwiki hi mavonelo lama hoxeke ya vukhongeri bya mavunwa, swi fanerile leswaku va dya swifanekiselo swa Xitsundzuxo.

A hi nge munhu a nga tiyiseki kahle leswaku wa katseka eka ntwanano lowuntshwa ni le ka ntwanano wa Mfumo. Nakambe, a hi nge ni moya wa Xikwembu a wu n’wi seketeli leswaku i mudyandzhaka swin’we na Kreste? Loko swi ri tano, a nga fanelanga a dya swifanekiselo swa Xitsundzuxo. Hakunene Xikwembu a xi nge swi tsakeli leswaku munhu a tivula hosi ya le tilweni ni muprista hi vomu, kasi u swi tiva kahle leswaku a xi n’wi hlawulanga.—Varhoma 9:16; Nhlavutelo 22:5.

Xana Xi Tlangeriwa Kangani?

Xana rifu ra Yesu ri fanele ri tsundzukiwa vhiki ni vhiki kumbexana siku ni siku? Phela, Kreste u sungule Xilalelo xa Hosi kutani a dlayiwa a nga ri na nandzu hi Siku ra Paseka. Paseka a yi endliwa kan’we hi lembe, hi Nisani 14 naswona a yi tsundzuxa Vaisrayele hi ta ku kutsuriwa ka vona evuhlongeni aEgipta. (Eksoda 12:6, 14; Levhitika 23:5) Hikwalaho, rifu ra “Kreste la nga paseka ya hina” ri fanele ri tsundzukiwa kan’we hi lembe, ku nga ri vhiki ni vhiki kumbe siku ni siku. (1 Vakorinto 5:7) Loko Vakreste va endla nkhuvo wa Xilalelo xa Hosi, va wu endla hi ndlela leyi fanaka ni leyi Yesu a wu endleke ha yona loko a wu sungula.

Kutani, ma vula yini marito ya Pawulo lama nge: “Minkarhi hinkwayo loko mi dya xinkwa lexi ni ku nwa xinwelo lexi, mi hambeta mi huwelela rifu ra Hosi, yi kondza yi fika”? (1 Vakorinto 11:26) Eka ndzimana leyi, Pawulo u tirhise marito lama vulaka leswaku “nkarhi na nkarhi loko” kumbe “rini na rini.” Hikwalaho, a a vula leswaku  rini na rini loko Vakreste lava totiweke va dya swifanekiselo, va twarisa leswaku va ni ripfumelo exitlhavelweni xa Yesu lexi kutsulaka.

Vakreste lava totiweke a va fanele va tsundzuka rifu ra Kreste ‘kukondza a fika.’ Xiendlakalo lexi a xi ta hambeta xi tsundzukiwa ku fikela loko Yesu a fika a amukela valandzeri va yena lava totiweke etilweni, hi ku va pfuxela evuton’wini bya moya hi nkarhi wa “vukona” bya yena. (1 Vatesalonika 4:14-17) Leswi swi pfumelelana ni marito lawa Kreste a ma byeleke vaapostola va yena vo tshembeka va 11 a ku: “Loko ndzi ya mi lunghisela ndhawu, ndzi ta tlhela ndzi vuya kutani ndzi ta mi amukela ekaya mi va na mina, leswaku laha ndzi nga kona na n’wina mi va kona.”—Yohane 14:3.

Xana Xitsundzuxo Xi Na Mpfuno Wihi Eka Wena?

Xana u fanele u dya swifanekiselo swa Xitsundzuxo leswaku xitlhavelo xa Yesu xi ku pfulela ndlela yo kuma vutomi lebyi nga heriki laha misaveni? Doo! Bibele a yi si tshama yi vula leswaku vanhu lava chavaka Xikwembu vo kota Nowa, Abrahama, Sara, Isaka, Raveka, Yosefa, Muxe na Davhida, va fanele va dya swifanekiselo leswi loko se va pfuxiwile. Kambe, vona ni lavan’wana hinkwavo lava navelaka ku hanya emisaveni hilaha ku nga heriki, va ta fanela va kombisa leswaku va ni ripfumelo eka Xikwembu na Kreste ni le ka lunghiselelo ra Yehovha ra gandzelo ra Yesu leri kutsulaka. (Yohane 3:36; 14:1) Na wena, loko u lava ku kuma vutomi lebyi nga heriki, u fanele u kombisa ripfumelo ro tano. Ku va kona ka wena exitsundzuxweni lexi endliwaka lembe ni lembe xa rifu ra Kreste, ku ku tsundzuxa gandzelo rolero lerikulu naswona ku fanele ku kurisa ndlela leyi u ri tlangelaka ha yona.

Muapostola Yohane u kandziyise nkoka wa xitlhavelo xa Yesu loko a ku: “[Vatotiwa-kulorhi], ndzi mi tsalela swilo leswi leswaku mi nga tshuki mi endla xidyoho. Kambe, loko mani na mani a endla xidyoho, hi ni mupfuni eka Tatana, a nga Yesu Kreste, loyi a lulameke. Naswona yena i gandzelo ra ku vuyelelana ra swidyoho swa hina, kambe ku nga ri swa hina ntsena, ni swa misava hinkwayo.” (1 Yohane 2:1, 2) Swi fanerile leswaku vatotiwa va vula leswaku gandzelo ra Yesu i ra ku rivalela swidyoho swa vona. Kambe gandzelo leri ri tlhela ri tirha eka swidyoho swa misava hinkwayo, ri endla leswaku vanhu lava yingisaka va kota ku kuma vutomi lebyi nga heriki!

Xana u ta va u ri kona hi April 4, 2004, leswaku u ta tsundzuka rifu ra Yesu? Timbhoni ta Yehovha ti ta endla xitsundzuxo lexi emisaveni hinkwayo etindhawini leti ti hlanganaka eka tona. Loko wo va kona, u ta vuyeriwa hi ku rhiya ndleve eka nkulumo ya nkoka swinene ya Bibele. U ta tsundzuxiwa swilo swo tala leswi Yehovha Xikwembu na Yesu Kreste va hi endleleke swona. Nakambe u ta akeka emoyeni hi ku hlangana ni lava va tekaka Xikwembu na Kreste swin’we ni gandzelo ra Yesu leri kutsulaka, swi ri swa risima swinene. Kumbexana xiendlakalo lexi xi ta endla leswaku u swi navela swinene ku va un’wana wa lava va lavaka ku kombiwa musa lowu nga faneriwiki wa Xikwembu, kutani eku heteleleni u kuma vutomi lebyi nga heriki. U nga pfumeleli nchumu xi ku sivela. U va kona exitsundzuxweni lexi khumbaka mbilu swinene, lexi dzunisaka xi tlhela xi tsakisa Tata wa hina wa le tilweni, Yehovha Xikwembu.

[Xifaniso lexi nga eka tluka 5]

Rifu ra Yesu ri katsa tindlela timbirhi letikulu leti kombisaka rirhandzu

[Xifaniso lexi nga eka tluka 6]

Xinkwa xo kala comela ni vhinyo i swifanekiselo leswi faneleke swa miri ni ngati ya Yesu leyi nga riki na xidyoho