Mhaka Ya Vutomi

Ku Titsona Swilo Switsongo Ku Hi Tisele Mikateko Leyikulu

HI KU VULA KA GEORGE NA ANN ALJIAN

Mina ni nsati wa mina a hi nga lorhi leswaku siku rin’wana hi ta pfuka hi tirhise rito leri nge “kondlo” ematshan’weni ya leri nge “mudyondzisi.” A hi nga lorhi leswaku loko hi ri emalembeni ya va-60 hi ta va hi kamana ni maletere lama nga tolovelekangiki loko hi ringeta ku vulavula ni vanhu vo huma le Vuxa Mpfungwe. Kambe sweswo swi endleke eka mina na Ann eku heleni ka va-1980. U nge hi ku hlamusela leswaku ku titsona swilo switsongo hi ku famba ka malembe swi hi tisele mikateko yo tala hi ndlela yihi.

NDZI velekiwe endyangwini lowu davukeke le Armenia, lowu a wu nghena Kereke ya Armenia. Ann a a ri Murhoma Khatoliki. Loko hi tekana hi 1950 u amukele tidyondzo ta vukhongeri bya mina na mina ndzi amukela ta vukhongeri bya yena. Mina a ndzi ri ni malembe ya 27 kasi Ann a a ri ni malembe ya 24. Hi ye hi ya tshama efleteni leyi a yi ri ehenhla ka ndhawu leyi a yi ri bindzu ra mina ro hlantswa swiambalo le Dorobeni ra Jersey, exifundzheni xa New Jersey, eU.S.A. Hi nkarhi wolowo a ndzi ri ni malembe ya kwalomu ka mune ndzi ri ni bindzu leri.

Hi 1955 hi xave yindlu yo xonga ya tikamara tinharhu ta byetlelo le Middletown, eNew Jersey. Yindlu yoleyo a yi ri empfhukeni lowu endlaka tikhilomitara ta kwalomu ka 60 ku suka laha a ndzi tirhela kona masiku ya tsevu hi vhiki. Masiku hinkwawo a ndzi fika ekaya nivusiku. Timbhoni ta Yehovha a ndzi hlangana na tona loko ti pfa ti ndzi endzela laha a ndzi tirhela kona kutani ti ndzi siyela tibuku to dyondza Bibele. Tibuku ta kona a ndzi ti hlaya hi ku tiyimisela lokukulu. Hambileswi bindzu ra mina a ri koxa nkarhi ni nkhathalelo lowukulu, ndzi sungule ku yi xixima swinene Bibele.

Endzhakunyana ndzi kume leswaku xitichi xa xiya-ni-moya xa Watchtower lexi vuriwaka WBBR,  a xi haxa tidyondzo ta Bibele loko ndzi ya entirhweni ni loko ndzi vuya. Ndzi rhiye ndleve swinene eka tidyondzo leti, naswona ku tsakela ka mina ku kurile swinene lerova ndzi kombela ku endzeriwa hi Timbhoni. Hi November 1957, George Blanton u fike ekaya ra mina kutani a sungula ku dyondza Bibele na mina.

Ndyangu Wa Hina Wu Va eVugandzerini Byin’we Lebyi Tengeke

Xana Ann u titwise ku yini hi mhaka leyi? Mi nge yena a mi byela.

“Eku sunguleni a ndzi nga lavi ku twa nchumu. Loko George a ri karhi a dyondza Bibele a ndzi tshamela ku kavanyeta lerova a kala a ya dyondzela kun’wana, tin’hweti ta nhungu hinkwato. Hi nkarhi wolowo, George u sungule ku ya eminhlanganweni hi Sonto eHolweni ya Mfumo. Kutani ndzi sungule ku swi vona leswaku a a tinyiketerile edyondzweni yakwe ya Bibele hikuva rero a ri ri siku rakwe ra ku wisa. Kambe u hambete a va wanuna tlhelo tatana lonene, hiloko ndzi sungula ku vona swilo hi ndlela yin’wana. Entiyisweni, minkarhi yin’wana loko ndzi ri karhi ndzi sulasula xitafulana a ndzi teka magazini wa Xalamuka! lowu George a a wu siya kwalaho, kutani ndzi wu hlaya loko ndzi nga voniwi hi munhu. Minkarhi yin’wana George a a ndzi hlayela swihloko swa Xalamuka! leswi a swi nga vulavuli hi vukhongeri hi ku kongoma, kambe leswi minkarhi hinkwayo a swi vulavula hi Muvumbi.

“Siku rin’wana nimadyambu loko George a ha ye a ya dyondza Bibele na Makwerhu Blanton, ndzi teke buku leyi n’wana wa hina wa malembe mambirhi, ku nga George a yi vekeke exitafulanini xa le tlhelo ka mubedo wa mina. A yi vulavula hi ntshembo malunghana ni lava feke. Hambileswi a ndzi karhele, ndzi sungule ku yi hlaya hikuva a ndza ha ku feriwa hi kokwa wa mina wa xisati, kutani a ndzi ri ni gome lerikulu. Hi ku hatlisa ndzi vone ntiyiso wa Bibele lowu ndzi wu twisiseke kahle wa leswaku vafi a va le ku xanisekeni endhawini yin’wana naswona a va ta tlhela va hanya enkarhini lowu taka loko ku pfuxiwa vafi. Ndzi bulumukile ndzi tshama kunene emubedweni, ndzi hlaya buku leyi hi mahika ndzi tlhela ndzi khwatihata tinhla leti a ndzi lava ku ti komba George loko a vuya edyondzweni yakwe ya Bibele.

“Nuna wa mina a a nga swi kholwi leswi a swi vonaka. Loko a huma ekaya a ndzi nga lavi ku twa nchumu hi dyondzo yakwe, kambe loko a vuya u kume ndzi nga ha tikoti hi ntsako hikwalaho ka ntiyiso lowu hlamarisaka wa Bibele lowu ndzi wu dyondzeke! Hi vulavule hi Bibele ku kondza ku va nkarhi wa mahlamba-ndlopfu. George u ndzi hlamusele xikongomelo xa Xikwembu malunghana ni misava. Hi vusiku byebyo ndzi n’wi kombele leswaku a hamba a dyondzela ekaya leswaku na mina ndzi va kona.

“Makwerhu Blanton u ringanyete leswaku ni vana va va kona hi nkarhi wa dyondzo. Hina a hi vona onge va ha ri vatsongo swinene, tanihi leswi un’wana a a ri ni malembe mambirhi, un’wanyana a ri ni mune wa malembe. Hambiswiritano, Makwerhu Blanton u hi hlayele buku ya Deteronoma 31:12, leyi nge: ‘Hlengeletani vanhu, vavanuna ni vavasati ni vana . . . , leswaku va yingisa nileswaku  va dyondza.’ Hi amukele xitsundzuxo xexo hi mbilu yo basa hi tlhela hi pfuna vana leswaku na vona va hlamula hi nkarhi wa dyondzo ya Bibele. A hi lunghiselela swin’we, kambe a hi nga va byeleteli leswi va faneleke va hlamurisa swona. Hi anakanya leswaku leswi swi pfune vana va hina leswaku va teka ntiyiso va wu endla wa vona. A hi nge xi rivali nikatsongo xitsundzuxo lexi Makwerhu Blanton a hi nyikeke xona leswaku hi pfuna ndyangu wa hina wu kula emoyeni.”

Mintlhontlho Leyi Laveke Leswaku Hi Titsona Swo Karhi

Leswi se a hi dyondza Bibele swin’we, ku tangunuke mintlhontlho leyintshwa leyi a hi fanele hi langutana na yona. Tanihi leswi bindzu ra mina a ri ri ekule swinene, hakanyingi a ndzi fika ekaya hi awara ya kaye nimadyambu. Hikwalaho ka sweswo, a ndzi nga koti ku ya eminhlanganweni exikarhi ka vhiki, kambe a ndzi ya hi Sonto ntsena. Hi nkarhi wolowo, Ann a a va kona eminhlanganweni hinkwayo naswona a a endla nhluvuko hi xihatla. Na mina a ndzi lava ku va kona eminhlanganweni hinkwayo ndzi tlhela ndzi fambisa dyondzo ya ndyangu leyi akaka. A ndzi swi lemuka leswaku ndzi fanele ndzi lahlekeriwa hi swin’wana. Kutani ndzi fikelele xiboho xa ku hunguta nkarhi wa bindzu ra mina, hambileswi a swi ta vula ku lahlekeriwa hi tikhasimendhe tin’wana.

Sweswo swi pfunile swinene. A hi teka dyondzo ya ndyangu yi ri ya nkoka ku fana ni minhlangano leyin’wana ya ntlhanu leyi a yi khomiwa vhiki ni vhiki eHolweni ya Mfumo. Dyondzo ya ndyangu a hi yi vula nhlangano wa vutsevu. Kutani hi yi vekele siku ni nkarhi wa yona—Ravunharhu hi 8:00 nimadyambu, vhiki na vhiki. Minkarhi yin’wana loko hi heta ku hlantswa swibye endzhaku ko lalela, un’wana wa hina a hi tsundzuxa a ku, “Nkarhi wa ‘nhlangano’ se wu fikile!” Loko ndzi hlwerile a ndzi kuma Ann a sungule ku fambisa dyondzo, ivi ndzi ya emahlweni loko ndzi fika.

Nchumu wun’wana lowu hi tiyiseke emoyeni ni ku kondletela vun’we endyangwini a ku ri ku hlaya ndzimana ya siku swin’we nimixo. Hambiswiritano, sweswo a swi nga olovi. Un’wana ni un’wana a a pfuka hi nkarhi wa yena. Hi vulavule hi mhaka leyi kutani hi twanana leswaku hinkwerhu hi pfuka hi nkarhi wun’we, hi fihlula hi 6:30 nimixo, kutani hi kambisisa ndzimana ya siku swin’we. Sweswo swi pfunile swinene. Loko vana va hina va kurile, va tihlawulele ku ya tirha eBethele. A swi kanakanisi leswaku mabulo lawa ya siku ni siku ma pfunetile eka vumoya bya vona.

Malunghelo Lawa Hi Ma Kumeke eNdzhaku Ko Khuvuriwa Ma Lave Leswaku Hi Titsona Swo Tala

Ndzi khuvuriwe hi 1962, naswona endzhaku ko fambisa bindzu ra mina malembe ya 21, ndzi ri xavisile kutani ndzi kuma ntirho lowu a wu ta ndzi pfumelela ku va kusuhi ni ndyangu wa mina leswaku hi tirhela Yehovha swin’we. Sweswo swi hi tisele mikateko yo tala. Hinkwerhu hi tivekele pakani ya ku nghenela ntirho wa nkarhi hinkwawo. Pakani yoleyo hi sungule ku yi fikelela eku sunguleni ka va-1970, loko mativula ya hina Edward a va mutirheli kumbe phayona ra nkarhi hinkwawo loko a ha ku heta tidyondzo ta le xikolweni xa le henhla. Swi nga si ya kwihi, n’wana wa hina George u sungule ntirho wa vuphayona, a landzeriwa hi Ann endzhakunyana. Va ndzi khutazile swinene hi vunharhu bya vona, hikuva a va ndzi hlamusela mintokoto leyi va veke na yona ensin’wini. Hi hlanganile tanihi ndyangu hi vulavula malunghana ni ndlela leyi hi nga tioloviselaka vutomi ha yona leswaku hinkwerhu hi hlanganyela entirhweni wa nkarhi hinkwawo. Hi fikelele xiboho xa ku xavisa yindlu. Se a hi ri ni malembe ya 18 hi tshama endlwini yoleyo naswona vana va hina va kulele kona. A hi ri rhandza swinene kaya ra hina, kambe Yehovha u katekise xiboho xa hina xa ku yi xavisa.

Edward u vitaniwe eBethele hi 1972, kutani George a vitaniwa hi 1974. Hambileswi mina na Ann a hi va kumbuka swinene, a hi nga tshameli ku anakanya hi ndlela leyi a swi ta tsakisa ha yona ku va na vona ekusuhi, hi va vona va teka vasati va  tlhela va va ni vana. Ematshan’weni ya sweswo, swi hi tsakisile leswi vana va hina a va tirhela Yehovha eBethele. * Hi pfumelelana ni marito ya Swivuriso 23:15, leyi nge: “N’wananga, loko mbilu ya wena yi tlharihile, mbilu ya mina yi ta tsaka.”

Hi Teka Vuphayona Byo Hlawuleka

Tanihi leswi vana va hina a va ri eBethele hi vumbirhi bya vona, hina hi ye emahlweni ni ntirho wa vuphayona. Kutani siku rin’wana hi 1975, hi kume papila leri a ri hi rhamba leswaku hi ya va maphayona yo hlawuleka ensin’wini leyi nga aviwangiki le Clinton County, eIllinois. Sweswo swi hi siye hi hlamele! A swi vula leswaku hi fanele hi rhurha eNew Jersey, laha a hi ri kusuhi ni vana va hina eNew York, ni laha vanghana ni maxaka ya hina a ma ri kona. Hambiswiritano, eka hina xexo a xi ri xiavelo xo huma eka Yehovha, kutani hi titsone swo karhi ivi hi kuma mikateko leyintshwa.

Endzhaku ka tin’hweti to hlayanyana hi ri ensin’wini leyi nga aviwangiki, hi sungule ku khoma minhlangano eholweni ya tiko le Carlyle, eIllinois. Kambe a hi lava ndhawu leyi a hi ta hlangana eka yona hi nga kavanyetiwi hi munhu. Makwerhu wa kwalaho ni nsati wakwe va kume ndhawu leyi nga ni yindlu leyitsongo leyi hi koteke ku yi qacha. Hi basise yindlu leyi ehandle ni le ndzeni ivi hi hamba hi hlanganela eka yona, hambileswi a yi ri yitsongo. A hi yi rivali hanci leyi a yi vonaka yi hlamala loko yi hi vona. A yi hamba yi hlometela hi fasitere yi vona leswi hi swi endlaka enhlanganweni wa hina!

Hi ku famba ka nkarhi ku simekiwe Vandlha ra Carlyle, naswona swa hi tsakisa leswi hi hoxeke xandla eku simekiweni ka rona. Hi pfuniwe hi mpatswa wa maphayona lowa ha riki wuntshwa, Steve na Karil Thompson, lava na vona va teke va ta tirha nsimu yoleyo leyi nga aviwangiki. Va ka Thompson va tshame kwalaho malembe ma nga ri mangani ivi endzhaku va ya eXikolweni xa Bibele xa Giliyadi xa Watchtower kutani va kuma xiavelo xa ku va varhumiwa eAfrika Vuxa, laha va nga entirhweni wo famba-famba.

Swi nga si ya kwihi, xindhawana xa hina xo hlanganyela eka xona xi sungule ku pfumala ni vuphelo bya marha, kutani a hi lava holo leyikulu. Makwerhu la hi pfuneke ni nsati wakwe eku sunguleni u tlhele a hi pfuna hi ku xava ndhawu leyi a yi fanelekela Holo ya Mfumo. Hi tsake swinene loko malembe ma nga ri mangani endzhaku, hi rhambiwa eku nyiketeleni ka Holo ya Mfumo leya ha ku akiwaka eCarlyle! Ndzi ve ni lunghelo ra ku nyikela nkulumo ya ku nyiketela holo leyi. Xiavelo xo ya kwalaho ku ve ntokoto wo hlawuleka ni nkateko lowu humaka eka Yehovha.

Hi Pfulekeriwa Hi Nsimu Leyintshwa

Hi 1979 hi kume xiavelo lexintshwa xo ya eHarrison le New Jersey. Kwalaho hi tirhe malembe ya kwalomu ka 12. Hi nkarhi wolowo hi sungule ku dyondza Bibele ni wansati un’wana wa Muchayina, naswona sweswo swi hi pfulele ndlela yo dyondza ni vanhu van’wana vo tala va Machayina. Hi  nkarhi wolowo, hi kume leswaku ku ni magidi ya swichudeni ni mindyangu ya Machayina leyi tshamaka endhawini ya ka hina. Hikwalaho, hi khutaziwe leswaku hi dyondza Xichayina. Hambileswi a swi vula ku heta nkarhi wo karhi hi siku hi dyondza ririmi leri, sweswo swi endle leswaku hi va ni tidyondzo to tala ta Bibele leti tsakisaka ni vanhu va Machayina lava a va ri endhawini ya ka hina.

Emalembeni wolawo, ku humelele swilo swo tala leswi hlekisaka, ngopfu-ngopfu loko hi ringeta ku vulavula Xichayina. Siku rin’wana Ann u titivise tanihi “kondlo” ra Bibele ematshan’weni ya “mudyondzisi” wa Bibele. Marito ya kona ma yelana ngopfu. N’wini wa muti u n’wayiterile ivi a ku: “Nghenani. Ndzi ta va ndzi sungula ku vulavurisana ni kondlo ra Bibele.” Ni sweswi ha ha khoma xo tika hi ririmi leri.

Endzhaku hi averiwe ku ya endhawini yin’wana eNew Jersey laha hi koteke ku ya emahlweni hi tirha nsimu ya Machayina. Endzhakunyana hi komberiwe ku rhurhela le Boston, eMassachusetts, laha ntlawa wa Machayina a wu ri ni malembe manharhu wu ri eku kuleni. Hi ve ni lunghelo ra ku seketela ntlawa lowu eka malembe ya nkombo lama hundzeke naswona swi hi tsakisile loko hi wu vona wu va vandlha hi January 1, 2003.

Mikateko Ya Vutomi Bya Ku Titsona Swo Karhi

Eka Malakiya 3:10, hi hlaya hi ta xirhambo xa Yehovha xa leswaku vanhu vakwe va nyikela hi magandzelo ni switlhavelo swa vona leswaku a va chululela mikateko yakwe ku kondza ku nga ha vi na xilaveko. Hi tshike bindzu leri a ndzi ri rhandza ngopfu. Hi xavise kaya ra hina leri a hi ri rhandza swinene. Naswona hi pfumele ku lahlekeriwa ni hi swilo swin’wana. Kambe swilo swo tano a hi nchumu loko swi ringanisiwa ni mikateko leyi hi yi kumeke.

Kunene, Yehovha u hi chululele mikateko leyikulu! Swi hi tsakisile swinene ku vona vana va hina va amukela ntiyiso, swi hi tsakisile ku hlanganyela entirhweni wa nkarhi hinkwawo lowu ponisaka vutomi, naswona hi lemuke ndlela leyi Yehovha a khathalelaka swilaveko swa hina ha yona. Kunene, ku titsona swilo switsongo swi hi tisele mikateko leyikulu!

[Nhlamuselo ya le hansi]

[Xifaniso lexi nga eka tluka 25]

Louise na George Blanton va ri na Ann hi 1991

[Xifaniso lexi nga eka tluka 26]

Holo ya Mfumo eCarlyle, yi nyiketeriwe hi June 4, 1983

[Xifaniso lexi nga eka tluka 27]

Hi ri ni Vandlha ra Machayina lera ha ku simekiwaka eBoston

[Xifaniso lexi nga eka tluka 28]

Hi ri na Edward, Connie, George na Grace