Liberia—Timhaka Ta Mfumo Ti Ya eMahlweni Hambileswi Ku Nga Ni Nyimpi

NYIMPI ya xin’wana-manana eLiberia se yi hete malembe yo tlula khume yi nga vhikeki. Loko lembe ra 2003 ri fika exikarhi, vapfukeri va mfumo se a va lwe va kala va ya boxeketa entsindza wa tiko lowu vuriwaka Monrovia. Timbhoni ta Yehovha to tala ti boheke ku komba makaya ya tona xikosi ti baleka, minkarhi yin’wana ti endla tano hi ku phindha-phindha. Swilo swa tona swi phangheteriwe ko tala.

Lexi vavisaka, loko nyimpi yi vambile entsindza, ku fe vanhu lava hlayiwaka hi magidi. Van’wana va vona a ku ri Timbhoni timbirhi, makwerhu wa xinuna ni wa xisati. Xana vamakwerhu lavan’wana va langutane njhani ni xihinga lexi, naswona ku endliwe yini leswaku va pfuniwa?

Ku Phalariwa Ka Lava Lavaka Mpfuno

Exikarhi ka maxangu lawa hinkwawo, hofisi ya rhavi ya Timbhoni ta Yehovha le Liberia yi simeke tindlela to phalala lava lavaka mpfuno. Ku lunghiseleriwe mphakelo wa swakudya, swilo swa xisekelo ni mirhi ya vutshunguri. Hi nkarhi lowu vapfukeri va mfumo a va lawula hlaluko, swakudya swi sungule ku kayivela. Rhavi ana se a ri swi lemuke ka ha ri emahlweni sweswo kutani a ri hlayise swakudya leswi a swi ta pfuna Timbhoni ta magidi mambirhi leti a ti balekele eTiholweni ta Mfumo entsindza hinkwawo. Vamakwerhu va ave swakudya leswi hi vukheta leswaku swi kumeka ku kondza hlaluko ri pfuriwa nakambe. Rhavi ra le Belgium ni ra le Sierra Leone ma rhumele mirhi ya vutshunguri hi swihaha-mpfhuka, ivi rhavi ra le Britain ni ra le Furwa ma rhumela swiambalo hi swikepe.

Hambileswi xiyimo a xi tika hi ndlela leyi, vamakwerhu va hlayise langutelo lerinene ni moya wa ntsako. Vo tala a va titwa ku fana ni makwerhu un’wana loyi a balekeke kanharhu ekaya rakwe. Makwerhu loyi u te: “Swiendlakalo leswi hi swona leswi hi tshamaka hi ri karhi hi chumayela ha swona; hi hanya emasikwini ya makumu.”

N’wangulo Lowu Veke Kona Eka Mahungu Lamanene

Hambileswi ku nga ni hasahasa etikweni hinkwaro, Timbhoni ti hambete ti va ni vuyelo lebyinene ensin’wini. Ku fikeleriwe nhlohlorhi leyintshwa ya vahuweleri va Mfumo va 3 879 hi January 2003, naswona hi February ku fambisiwe tidyondzo ta le kaya ta Bibele ta 15 227.

Vanhu va amukela mahungu lamanene handle ko ba mariri. Sweswo swi kombisiwa hi xiviko lexi humaka emutini wun’wana lowu nga edzonga-vuxa bya tiko. Vandlha ri kunguhate ku tlangela Xitsundzuxo xa rifu ra Kreste emutini lowukulu wa Bewahn, lowu nga empfhukeni lowu tekaka tiawara ta ntlhanu hi milenge ku suka laha va toloveleke ku hlangana kona. Loko vamakwerhu va nga si ya emutini lowu va ya rhambela vaaki va kona eXitsundzuxweni, meyara wa Bewahn u nyikiwe xiphephana xa xirhambo. Endzhaku u teke Bibele yakwe, a rhendzeleka ni muti a hlayela vaaki tsalwa leri kombisiweke exiphephanini, a va khutaza leswaku va ya eXitsundzuxweni. Kutani loko vahuweleri va fika, va kume leswaku ana se ntirho wa vona wu endliwile! Meyara kun’we ni vana vakwe  ni vasati va yena vambirhi, va yile eXitsundzuxweni. Ku ve ni vanhu va 27. Ku sukela enkarhini wolowo, meyara loyi u tshike Kereke ya Methodist, a sungula ku dyondza ni Timbhoni, a tlhela a ti nyika ndhawu yo aka Holo ya Mfumo eka yona.

Vonelo Lerintshwa

Mahanyelo ya vamakwerhu nakambe ma endle leswaku van’wana lava kanetaka ntiyiso va hundzula vonelo ra vona. Xiya xikombiso xa wanuna la vuriwaka Opoku. Phayona ro hlawuleka ri hlangane na yena ensin’wini kutani ri n’wi nyika magazini wa Xihondzo xo Rindza. Opoku u rhandze xihloko xin’wana eka magazini lowu kambe a a nga ri na mali. Phayona leri ri n’wi hlamusele leswaku magazini a wu xavisiwi kutani ri n’wi siyela wona, ivi ri endla malunghiselelo ya ku n’wi endzela nakambe. Loko phayona leri ri vuya, Opoku u ri vutisile a ku: “Xana wa ndzi tiva ke? Vunyingi bya vanhu va ka n’wina edorobeni leri ra Harper va ndzi tiva. Ndzi hlongole vana vo tala va nhlengeletano ya n’wina exikolweni!” Kutani u hlamusele leswaku a a ri nhloko ya xikolo xa le henhla edorobeni rero naswona u xanise vana va Timbhoni ta Yehovha hileswi a va nga lavi ku losa mujeko.

Hambiswiritano, swikombiso swinharhu swa rirhandzu ra Vukreste leri kombisiweke hi Timbhoni ta Yehovha swi endle leswaku Opoku a tlhela a kambisisa vonelo rakwe. Xo sungula, u vone Timbhoni ti khathalela un’wana wa tona loyi a a vabya swinene. Ti tlhele ti endla malunghiselelo ya leswaku a kuma vutshunguri etikweni rin’wana ra le kusuhi. Opoku a a anakanya leswaku makwerhu yoloye la vabyaka u fanele a ri “xikhulu” exikarhi ka Timbhoni, kambe u kume leswaku a a ri Mbhoni leyi tolovelekeke ntsena. Xa vumbirhi, hi va-1990, Opoku a a balekele etikweni ra Côte d’Ivoire. Siku rin’wana loko a ri ni torha u ye a ya xava mati eka jaha rin’wana. Opoku a a ri ni mali ya phepha kasi jaha leri a ri nga ri na cinci, hiloko ri nyika Opoku mati mahala. Endzhaku ko nyika Opoku mati lawa, jaha leri ri n’wi vutisile ri ku: “Xana u anakanya leswaku ku ta kala ku va ni nkarhi lowu vanhu vo fana na mina na wena va nga ta nyikana swilo mahala?” Xikan’we-kan’we Opoku u anakanye leswaku jaha leri ri fanele ri ri Mbhoni ya Yehovha, hiloko ri tiyisekisa leswaku swi tano. U khumbiwe swinene hi malwandla ni musa wa makwerhu loyi. Xo hetelela, ku navela ka phayona ro hlawuleka leswaku Opoku a teka magazini handle ko humesa mali swi n’wi tiyisekisile leswaku a a ri ni vonelo leri hoxeke hi Timbhoni naswona a a fanele a ri phela ehansi a ri seletela. U endle nhluvuko emoyeni naswona sweswi i muhuweleri la nga si khuvuriwaka.

Hambileswi vamakwerhu va le Liberia va ha kokaka exilogweni, va titshege hi Xikwembu naswona va hambeta va chumayela mahungu lamanene ya malunghana ni swiyimo leswinene leswi nga ta va kona ehansi ka vulawuri lebyi lulameke bya Mfumo wa Xikwembu. Yehovha a nge ku rivali ku tikarhata ka vona ni rirhandzu leri va ri kombisaka hikwalaho ka vito rakwe.—Vaheveru 6:10.

[Mimepe leyi nga eka tluka 30]

(Leswaku u vona rungula leri hleriweke hi ku helela, vona nkandziyiso wa kona)

MONROVIA

[Swifaniso leswi nga eka tluka 31]

Hi minkarhi ya mikitsikitsi, vanhu va Yehovha va phalala lava pfumalaka swakudya swa moya ni swa nyama