Xana Swi Fanerile Leswaku Hi Kombela Mpfuno Eka Tintsumi?

XANA swi fanerile leswaku hi kombela mpfuno eka tintsumi loko hi ri enhlomulweni? Vo tala va anakanya tano. Entiyisweni, New Catholic Encyclopedia yi ri: “Munhu a nga khongela . . . tintsumi . . . hi xikongomelo xa leswaku ti n’wi vulavulela ni Xikwembu.” Xana hi fanele hi khongela tintsumi leswaku ti hi vulavulela na xona?

Rito ra Xikwembu ri hi nyika mavito ya tintsumi timbirhi ntsena leti tshembekaka eka Xikwembu, ku nga Mikayele na Gabriyele. (Daniyele 8:16; 12:1; Luka 1:26; Yudha 9) Ku boxiwa ka mavito lawa eBibeleni swi hi lemukisa leswaku ntsumi yin’wana ni yin’wana i munhu wa moya loyi a nga ni vito rakwe, kutani ntsumi a hi matimba kumbe ntamu wo karhi ntsena. Kambe tintsumi tin’wana ti ale ku boxa mavito ya tona. Hi xikombiso, loko Yakobe a kombele ntsumi leyi n’wi endzeleke leswaku yi n’wi byela vito ra yona, ntsumi yoleyo yi arile ku n’wi byela rona. (Genesa 32:29; Vaavanyisi 13:17, 18) Bibele a yi na nxaxamelo wa mavito ya tintsumi, kutani sweswo swi sivela vanhu leswaku va nga ti xiximi hi ndlela ya ku ti gandzela.

Wun’wana wa mintirho ya tintsumi i ku hundzisela rungula ra Xikwembu eka vanhu. Kahle-kahle, rito ro sungula ra Xiheveru ni ra Xigriki leri hundzuluxeriweke ri va “ntsumi,” hi ku kongoma ri vula “murhumiwa.” Hambiswiritano, tintsumi a hi vahlanganisi lava hundziselaka swikhongelo swa vanhu exiluvelweni xa La nge Henhla-henhla. Xikwembu xi lava leswaku swikhongelo swi kongomisiwa eka xona hi vito ra N’wana wa xona Yesu Kreste, loyi a nga te: “Xin’wana ni xin’wana lexi mi xi kombelaka eka Tatana hi vito ra mina [u ta] mi nyika xona.”—Yohane 15:16; 1 Timotiya 2:5.

Yehovha Xikwembu a nga khomekanga ngopfu lerova a pfumala nkarhi wa ku hi yingisa loko hi khongela eka yena hi ndlela leyi amukelekaka. Bibele ya hi tiyisekisa yi ku: “Yehovha u le kusuhi ni hinkwavo lava n’wi vitanaka, eka hinkwavo lava n’wi vitanaka hi ntiyiso.”—Pisalema 145:18.