Ku Chumayela Hi Xitshuketa Le Mexico eNsin’wini Leyi Ku Vulavuriwaka Xinghezi

MUAPOSTOLA PAWULO u chumayele hi xitshuketa loko a ri le Atena a rindze vanakulobye lava a a famba na vona. Bibele ya vika: “A sungula ku kanerisana . . . ni lava a va tshuka va va kona endhawini ya ku xavisela siku rin’wana ni rin’wana.” (Mintirho 17:17) Loko Yesu a suka eYudiya a ya eGaleliya, u chumayele hi xitshuketa eka wansati wa Musamariya etlhelo ka xihlovo. (Yohane 4:3-26) Xana wa wu tirhisa nkarhi wun’wana ni wun’wana lowu ku pfulekelaka leswaku u vulavula hi mahungu lamanene ya Mfumo wa Xikwembu?

Ku chumayela hi xitshuketa swi fanerile swinene ensin’wini ya le Mexico leyi ku vulavuriwaka Xinghezi eka yona. Vavalangi va endzela tindhawu to wisela eka tona, swichudeni swa le yunivhesiti swi khitikana kunene, naswona vanhu va le matikweni man’wana lava humeke penceni le Mexico va heta nkarhi wa vona etiphakini ni le tikhefini. Timbhoni ta Yehovha to tala leti tivaka Xinghezi ti ni vuswikoti byo sungula mabulo ni vanhu vo tano. Kahle-kahle, ti tshama ti xalamukele ku vulavula ni un’wana ni un’wana la langutekaka a nga ri wa kwalaho tikweni kumbe la vulavulaka Xinghezi. A hi voneni leswaku va swi endlisa ku yini sweswo.

Hakanyingi Timbhoni leti humaka ematikweni man’wana leti tirhaka ensin’wini leyi ku vulavuriwaka Xinghezi eka yona, to titivisa eka vanhu lava vonakaka va nga ri va kwalaho kutani ti va vutisa leswaku va huma kwihi. Leswi swi endla leswaku va vutisa leswaku Mbhoni leyi yi endla yini eMexico, kutani swi yi nyika nkarhi wa ku vulavula hi tidyondzo ta Vukreste. Hi xikombiso, Gloria, loyi a tirhaka laha ku nga ni xilaveko lexikulu ensin’wini leyi ku vulavuriwaka Xinghezi eka yona le Oaxaca, u swi kuma swi n’wi olovela swinene ku sungula mabulo hi ndlela yoleyo. Loko Gloria a vuya eku chumayeleni hi xitshuketa endhawini ya mabindzu ya le dorobeni, u yimisiwe hi mpatswa lowu humaka eNghilandhi. Wansati wa kona u te: “Ndzi twa onge ndza lorha loko ndzi vona wansati wa muntima a famba eswitarateni swa Oaxaca!” Ematshan’weni yo hlundzuka, Gloria u lo hleka, kutani va sungula ku vulavula hi lexi n’wi endleke a ta eMexico. Wansati loyi u rhambe Gloria ekaya rakwe leswaku a ta nwa kofi. Endzhaku ko veka siku leri a va ta tlhela va hlangana ha rona, Gloria u fambisele wansati loyi timagazini ta Xihondzo xo Rindza ni Xalamuka!, kambe wansati loyi a nga pfumelanga ku ti teka, a vula leswaku yena a nga pfumeli leswaku Xikwembu xi kona. Gloria u vule leswaku u tsakela ku vulavula ni vanhu lava nga pfumeriki leswaku Xikwembu xi kona, naswona u ta tsakela ku twa vonelo rakwe hi xihloko lexi nge “Xana Ha Ti Lava Tindhawu To Gandzela Eka Tona?” Wansati loyi u pfumerile, a ku: “Loko wo ndzi khorwisa leswaku xi kona, u ta va u tirhe ngopfu.” Va bule hi swilo swo tala loko va ri karhi va tiphina hi kofi. Endzhakunyana mpatswa lowu wu tlhelele eNghilandhi, kambe va hambete va rhumelana marungula hi khompyuta.

 Gloria u tlhele a vulavurisana na Saron, xichudeni xa le Washington, D.C., loyi a a ri le Oaxaca a endla ntirho wo tirhandzela ni vavasati va kwalaho leswaku a hetisa master’s degree ya yena. Endzhaku ko bumabumela Saron hikwalaho ka ntirho wa yena lowunene, Gloria u hlamusele xivangelo xa ku va a ri eMexico. Sweswo swi endle leswaku ku va ni bulo lerinene hi Bibele ni hi leswi Xikwembu xi nga ta swi endlela vanhu hinkwavo, ku katsa ni swisiwana. Saron u vule leswaku swa hlamarisa leswaku a a nga si tshama a vulavula ni Timbhoni le United States, kambe munhu wo sungula ku hlangana na yena eMexico a ku ri Mbhoni ya Yehovha! Saron u pfumele ku dyondzeriwa Bibele a tlhela a sungula ku ya eminhlanganweni ya Vukreste xikan’we-kan’we.

Vanhu vo tala lava humaka ematikweni man’wana va rhurhele etindhawini to wisela eka tona ta le ribuweni ra lwandle le Mexico, va lava swiyimo swo yelana ni swa le paradeyisini. Laurel u tirhisa sweswo leswaku a sungula mabulo le Acapulco, a vutisa vanhu loko Acapulco yi fana swinene na paradeyisi ku tlula laha va humaka kona, ni leswaku i yini lexi va xi rhandzaka eka yona ndhawu leyi. Kutani a hlamusela leswaku ku nga ri khale misava hinkwayo yi ta va paradeyisi ya xiviri. Xingheniso lexi, lexi a xi tirhiseke eka wansati wa le Canada loyi a hlanganeke na yena ehofisini ya dokodela wa swiharhi xi yise eka dyondzo ya Bibele. Xana xingheniso lexi fanaka xi nga tirha laha u tshamaka kona?

‘Eswitarateni Ni Le Tindhawini Ta Mabindzu’

Hakanyingi bulo ri sunguriwa eswitarateni ni le tindhawini ta mabindzu hi ku vutisa xivutiso lexi nge: “Xana wa xi tiva Xinghezi?” Vanhu vo tala va le Mexico va xi tiva hikwalaho ka mintirho ya vona kumbe hikwalaho ka leswi va tshameke va tshama eUnited States.

Mpatswa lowu nga Timbhoni wu vulavurisane ni mukhegula loyi a a fambisiwa hi muongori hi xitulu xa lava lamaleke. Wu vutise mukhegula loyi loko a xi tiva Xinghezi. U vule leswaku wa xi tiva hikuva u tshame malembe yo tala eUnited States. U teke Xihondzo xo Rindza ni Xalamuka!, leswi a a nga si tshama a swi hlaya, kutani a va byela leswaku vito ra yena i Consuelo, a tlhela a va nyika ni adirese yakwe. Loko va n’wi endzela endzhaku ka masiku ya mune, va kume leswaku a a tshama ekaya ra vadyuhari kumbe valamari leri a ri languteriwa hi tinani ta Khatoliki. Eku sunguleni swi va tikerile ku hlangana na Consuelo hikuva tinani a ti nga va tshembi naswona a ti vula leswaku Consuelo a nge va amukeli. Mpatswa lowu wu lerise tinani leswaku ti byela Consuelo leswaku wu fikile naswona wu lava ku n’wi vona. Consuelo u amukele mpatswa lowu hi mandla mambirhi. Ku sukela hi nkarhi wolowo, mukhegula loyi wa malembe ya 86 hi vukhale u tsakela dyondzo ya Bibele ya nkarhi na nkarhi, ku nga khathariseki swivulavula swa tinani. U yile ni le minhlanganweni yin’wana ya Vukreste.

Swivuriso 1:20 yi ri: “Vutlhari bya ntiyiso byi hambeta byi huwelela hi matimba exitarateni. Byi hambeta byi humesa rito ra byona emintsendzeleni.” Xiya leswaku sweswo swi endlekise ku yini endhawini ya mabindzu ya San Miguel de Allende. Hi mixo wun’wana, Ralph u vulavule ni wanuna un’wana loyi a a tshame ebencini. Wanuna loyi u hlamarisiwe swinene hi ku fambiseriwa Xihondzo xo Rindza ni Xalamuka! kutani a byela Ralph ta vutomi byakwe.

A a ri socha hi nkarhi wa nyimpi ya le Vietnam, kutani u pfilunganyeke miehleketo hileswi a voneke vanhu vo tala swinene va fa. U susiwe laha nyimpi a yi hisa kona a yisiwa egovelweni. Loko a fika kwalaho u nyikiwe ntirho wo hlantswa  mintsumbu ya masocha lama feke leswaku yi lunghiseleriwa ku rhumeriwa eUnited States. Kutani, endzhaku ka malembe ya 30 a a ha tshamela ku lorha swilo swo chavisa naswona a a hanya hi ku chava. Hi mixo wolowo, loko a tshame endhawini ya mabindzu, a a ri eku khongeleni hi mbilu a kombela mpfuno.

Khale ka socha leri ri teke tibuku ri tlhela ri pfumela ku ta eHolweni ya Mfumo. Endzhaku ko ya enhlanganweni, u vule leswaku eka tiawara toleto timbirhi loko a ri eHolweni ya Mfumo, a a sungula ku va ni ku rhula endzhaku ka malembe ya 30. Wanuna loyi a a nga telanga ku ta tshama eSan Miguel de Allende, kambe u tsakele tidyondzo ta Bibele to hlayanyana leti a veke na tona a tlhela a va kona eminhlanganweni hinkwayo ku kondza a tlhelela ekaya. Ku endliwe malunghiselelo ya leswaku dyondzo yakwe yi yisiwa emahlweni.

Ku Chumayela Hi Xitshuketa eNtirhweni Ni Le Xikolweni

Xana entirhweni wa vula leswaku u Mbhoni ya Yehovha? Adrián, loyi a hakerisaka vaendzi eka tindhawu to wisa eka tona le Cape San Lucas, wa titivisa. Hikwalaho ka sweswo, mutirhi-kulobye la vuriwaka Judy u ri: “Emalembeni manharhu lama hundzeke, loko munhu a a lo vula leswaku ndzi ta va Mbhoni ya Yehovha, a ndzi ta va ndzi n’wi byele leswaku, ‘Sweswo swi nge pfuki swi endlekile!’ Kambe ndzi tibyele leswaku ndzi lava ku hlaya Bibele. Ndzi te, ‘A swi nge ndzi tikeli hikuva ndzi rhandza ku hlaya.’ Hambiswiritano, endzhaku ka loko ndzi hlaye matluka ya kwalomu ka tsevu, ndzi swi xiyile leswaku ndzi lava mpfuno. Munhu un’we ntsena loyi a ndzi anakanya leswaku u ta ndzi pfuna a ku ri mutirhi-kulorhi la vuriwaka Adrián. A ndzi swi tsakela ku vulavula na yena hikuva a ku ri yena ntsena munhu la xiximekaka entirhweni.” Xikan’we-kan’we Adrián u vule leswaku u ta ta ni ntombhi ya yena, ku nga Katie, va ta hlamula swivutiso hinkwaswo swa Judy. Katie u sungule dyondzo ya Bibele na yena, naswona swi nga si ya kule Judy u ve Mbhoni leyi khuvuriweke.

Ku vuriwa yini hi ku chumayela hi xitshuketa exikolweni? Timbhoni timbirhi a ti dyondza Xipaniya eyunivhesiti kambe ti xwile siku rin’wana leswaku ti ta ya enhlengeletanweni ya Vukreste. Loko ti tlhelela exikolweni, ti komberiwe ku hlamusela leswi a ti swi endla hi Xipaniya. Ti tirhise nkarhi wolowo ku nyikela vumbhoni hilaha ti nga kotaka hakona hi Xipaniya. Silvia, loyi a a ri mudyondzisi wa vona, u tsakisiwe swinene hi vuprofeta bya Bibele. U pfumele ku dyondzeriwa Bibele hi Xinghezi naswona sweswi i muhuweleri wa mahungu lamanene. Swirho swin’wana swa ndyangu wakwe na swona swa dyondzeriwa. Silvia u ri: “Ndzi kume leswi a ndzi swi lava vutomi bya mina hinkwabyo.” Ina, ku chumayela hi xitshuketa swi nga tswala mihandzu leyinene.

Ku Chumayela Hi Minkarhi Yin’wana

Ku va ni malwandla swi nga pfula nkarhi wa ku nyikela vumbhoni. Jim na Gail, lava tirhelaka le San Carlos, eSonora, va swi xiyile leswaku sweswo i ntiyiso. Wansati loyi a a tifamba-fambela ni timbyana ta yena hi 6:00 nimixo u yimile ivi a bumabumela jarata ra vona. Jim na Gail va n’wi vitanile leswaku a ta nwa kofi. A ku ri ro sungula evuton’wini bya yena emalembeni ya 60 a twa hi Yehovha ni hi ntshembo wa vutomi lebyi nga heriki. Ku sunguriwe dyondzo ya Bibele na yena.

 Adrienne na yena u khoma vanhu va le matikweni man’wana hi musa. A a ri ku dyeni ekhefini le Cancún loko jaha rin’wana ri ta eka yena kutani ri n’wi vutisa loko a huma eCanada. Loko a vule leswaku u huma kona, jaha leri ri vule leswaku rona ni mana wa rona a va ringeta ku pfuna ndzisana ya rona ya xisati ku tsala xitsalwana xa le xikolweni lexi vulavulaka hi vanhu va le Canada. Mana wa rona, loyi a a vulavula Xinghezi na yena u tile. Endzhaku ko hlamula swivutiso swakwe hi ku lehisa mbilu malunghana ni vanhu va le Canada, Adrienne u te: “Kambe ku ni xivangelo xa nkoka swinene lexi endleke leswaku ndzi suka eCanada ndzi ta laha—ndzi lava ku pfuna vanhu ku dyondza Bibele. Xana u nga swi tsakela?” Wansati loyi u vule leswaku a nga swi tsakela. Se a a ri ni malembe ya khume a tshike kereke yakwe naswona a a ringeta ku tihlayela Bibele hi yexe. U nyike Adrienne adirese yakwe ni nomboro ya riqingho ra yena, naswona ku sunguriwe dyondzo ya Bibele leyi tsakisaka.

‘Hoxa Xinkwa Xa Wena eHenhla Ka Mati’

Ku vulavula hi ntiyiso wa Bibele nkarhi wun’wana ni wun’wana hakanyingi swi pfula ndlela yo nyikela vumbhoni eka vanhu lava veke ni nkarhi wutsongo wo twa rungula ra Mfumo kumbe lava nga ri twangiki hi ku helela. Ekhefini leyi tshamaka yi tele hi vanhu le dorobeni leri nga ehlalukweni ra Zihuatanejo, Mbhoni yi rhambe vanhu vambirhi lava a va nga ri va le tikweni rero leswaku va ta tshama na yona etafuleni ra yona, tanihi leswi khefi a yi tele hi vanhu. Mpatswa lowu a wu ri ni malembe ya nkombo wu ri karhi wu tluta wu ya etindhawini to hambana-hambana. Wu vule leswaku a wu ti tsakeli Timbhoni ta Yehovha. Endzhaku ko hlangana na wona ekhefini, Mbhoni yi endzele mpatswa lowu ebyatsweni bya wona kutani yi wu rhamba leswaku wu ta ekaya ra yona. Wu teke timagazini to tlula 20 ni ntlhanu wa tibuku kutani wu tshembisa leswaku wu ta lava Timbhoni ehlalukweni leri wu nga ta yima eka rona.

Jeff na Deb va vone ndyangu lowu a wu ri ni n’wana wa nhwanyana wo saseka endhawini yo dyela eka yona edorobeni ra Cancún. Loko va bumabumele n’wana loyi, vatswari va yena va va rhambile leswaku va ta dya pizza swin’we na vona. Ku kumeke leswaku ndyangu lowu a wu huma eIndiya. A wu nga si tshama wu twa hi Timbhoni ta Yehovha hambi ku ri ku vona minkandziyiso ya hina. Wu suke endhawini ya mabindzu wu ri ni tibuku ta Timbhoni.

Ku humelele nchumu lowu fanaka exihlaleni lexi nga ekulenyana ni ribuwa ra Yucatán. Mpatswa lowa ha ku tekanaka wa Machayina wu kombele Jeff leswaku a wu teka swifaniso, hiloko a pfumela handle ka xiphiqo. U kume leswaku hambileswi se a wu ri ni malembe ya 12 wu tshama eUnited States, a wu nga si tshama wu vona Timbhoni ta Yehovha kumbe ku twelela hi tona! Ku landzele bulo leri tsakisaka. Jeff u wu khutaze ku ya lava Timbhoni loko wu fika ekaya.

Ku nga ha va ku ri ni xiendlakalo xo hlawuleka endhawini ya ka n’wina lexi nga endlaka leswaku u kota ku chumayela hi xitshuketa. Loko muungameri wa le United States a endzele muungameri wa le Mexico epurasini rakwe ra swiharhi ekusuhi ni le Guanajuato, vaviki va mahungu lava humaka emisaveni hinkwayo va tile va ta vika hi ta xiendlakalo lexi. Ndyangu wun’wana wa Timbhoni wu tirhise nkarhi lowu leswaku wu chumayela hi Xinghezi. Vanhu va angule kahle. Hi xikombiso, muviki un’wana wa mahungu a a vike hi tinyimpi to hlayanyana, to tanihi ya le Kosovo ni ya le Kuwait. Mutirhi-kulobye u fele emavokweni yakwe endzhaku ko baleseriwa hi munhu la tumbeleke. Loko a twa hi ta ku pfuxiwa ka vafi, muviki loyi wa mahungu u nkhense Xikwembu a ri karhi a khapa-khapa mihloti hileswi xi n’wi kombeke leswaku vutomi byi ni xikongomelo. U vule leswaku hambileswi a a nga ha ta tlhela a wu vona mpatswa lowu wa Timbhoni, a a nga ta ma rivala mahungu lamanene lama humaka eBibeleni.

Hilaha se hi swi voneke hakona, vuyelo bya ku chumayela koloko hakanyingi a byi tiviwi. Hambiswiritano, Hosi Solomoni wo tlhariha u te: “Cukumeta xinkwa xa wena evuandlalweni bya mati, hikuva u ta tlhela u xi kuma endzhaku ka masiku yo tala.” U tlhele a ku: “Byala mbewu ya wena nimixo, naswona u nga ri wisisi voko ra wena ku fikela nimadyambu; hikuva a wu swi tivi leswaku leswi swi ta lulama kwihi, laha kumbe lahaya, kumbexana haswimbirhi swi ta va leswinene.” (Eklesiasta 11:1, 6) Ina, “cukumeta xinkwa xa wena” hi ku hiseka ehenhla ka mati yo tala u tlhela u “byala mbewu ya wena” yo tala, hilaha Pawulo na Yesu swin’we ni Timbhoni ta manguva lawa ta le nsin’wini leyi ku vulavuriwaka Xinghezi ya le Mexico ti endleke hakona.