U Lwisane Ni Ndzingo Hi Ku Pfuniwa Hi Bibele

Namuntlha ku ni miringo yo tala emisaveni. A swi olovi ku namarhela milawu ya Bibele. Hi xikombiso, swi nga ha tika ku yingisa ndzayo ya Bibele leyi nge: “Balekelani vumbhisa.”—1 Vakorinto 6:18.

Mbhoni yin’wana ya Yehovha leyi hi nga ta yi vitana Sebastian, a yi tirha ekhampanini ya le Scandinavia le Poland. A a fanele a lwa hi matimba leswaku a tshama a tshembekile.

Swi tivekile leswaku Sebastian i Mbhoni ya Yehovha. Leswi valanguteri vakwe a va tlangela ku gingiriteka kakwe ni vumunhu byakwe lebyinene, va n’wi nyike malunghelo yo hambana-hambana. Hambiswiritano, ku kumeke leswaku malunghelo lawa a ma ta katsa ku va kona eminhlanganweni ya ntirho laha a ku va ni vuhungasi lebyi thyakeke.

Swi nga si ya kule Sebastian u sungule ku kanakana. “Mulanguteri wa mina wa swi tiva leswaku ndzi Mbhoni ya Yehovha. Hi swona swi endlaka leswaku a ndzi tshemba a tlhela a titshega hi mina. Loko ndzo ala ku ya, ndzi ta heleriwa hi ntirho, lowu swi ndzi tikeleke swinene ku wu kuma. Ku vuriwa yini loko ndzo ya hlalela ntsena?”

Kutani Sebastian u kume leswaku a ku languteriwe leswi engetelekeke eka yena. A a ta fanela a hlela leswaku vanhu va le matikweni man’wana lava teleke timhaka ta bindzu ekhampanini ya ka vona va kuma tinghwavava leti va nga ta famba na tona nimadyambu. Xana a a ta endla yini?

Sebastian u anakanye ku ya tsundzuxa mulanguteri wakwe hi langutelo rakwe leri sekeriweke eBibeleni malunghana ni ku tikhoma loko biha. Swi nga si ya kule swi ve erivaleni leswaku ntirho lowu a wu n’wi faneli Sebastian ni leswaku ku nga ri kungani a a ta boheka ku wu tshika. U kume ntirho lowuntshwa lowu a wu holela mali yitsongo kambe a wu nga ri na miringo yo tano. Sweswi u ni ripfalo leri baseke.

Xana a wu ta endla yini loko un’wana a ku sindzisa ku hlanganyela eku tikhomeni loko biha kumbe a lava leswaku u pfumelelana ni mukhuva wo tano? Xana a wu ta tiyimisela ku teka goza ra ku lwela ku endla leswinene? Sweswo hi leswi endliweke hi Yosefa wa khale, hilaha swi tsariweke hakona eka Genesa 39:7-12.