Xana Ku Nga Hlanganyeli Etipolitikini Swi Sivela Munhu Ku Kombisa Rirhandzu Ra Vukreste?

KU VA Mukreste, a swi vuli ntsena ku hlaya Bibele, u khongela ni ku yimbelela tinsimu to dzunisa hi Sonto. Kambe swi katsa ku endlela Xikwembu ni vanhu swo karhi. Bibele yi ri: “A hi veni ni rirhandzu, ku nga ri hi marito kumbe ririmi, kambe hi swiendlo ni ntiyiso.” (1 Yohane 3:18) Yesu a a khathala swinene hi vanhu, naswona Vakreste va lava ku n’wi tekelela. Muapostola Pawulo u khutaze vapfumeri-kulobye leswaku “nkarhi hinkwawo [va] va ni swo tala swo swi endla entirhweni wa Hosi.” (1 Vakorinto 15:58) Kambe, xana ntirho wa Hosi i yini? Xana wu katsa ku ringeta ku cinca mafumelo ya hulumendhe leswaku ku pfuneka swisiwana ni lava tshikilelekeke? Xana hi swona leswi Yesu a swi endleke?

Hambileswi Yesu a komberiweke leswaku a nghenelela etimhakeni ta politiki kumbe a yima ni vandla ro karhi, u arile. A nga lavanga ku twa  nchumu hi vulawuri lebyi Sathana a a n’wi tshembisa byona bya mimfumo hinkwayo ya misava, u arile ku holovisana hi mhaka yo hakela swibalo, naswona u arile loko ntlawa wo karhi lowu dumeke wu lava ku n’wi endla hosi. (Matewu 4:8-10; 22:17-21; Yohane 6:15) Kambe ku nga hlanganyeli ka yena etipolitikini a ku n’wi sivelanga ku endlela van’wana leswinene.

Yesu a a languta ntsena eka leswi nga ta vuyerisa vanhu hi masiku. Hambileswi ku phamela vanhu va ntlhanu wa magidi ni ku hanyisa lava vabyaka swi vuyeriseke vanhu va nga ri vangani swa xinkarhana, kambe loko ku ri tidyondzo takwe ti tise mikateko leyi nga heriki eka vanhu hinkwavo. Hikwalaho, Yesu u tiviwe a ri “Mudyondzisi” ku nga ri murhangeri wa matsima yo phalala. (Matewu 26:18; Marka 5:35; Yohane 11:28) U te: “Leswi ndzi velekeriweke swona, ni leswi ndzi teleke swona emisaveni i ku ta nyikela vumbhoni malunghana ni ntiyiso.”—Yohane 18:37.

Ku Dyondzisa Swo Antswa Ku Tlula Ku Nghenelela eTipolitikini

Ntiyiso lowu Yesu a wu dyondziseke a ku nga ri timhaka ta politiki. Dyondzo ya yena a yi vulavula hi Mfumo lowu yena hi yexe a nga ta va Hosi ya wona. (Luka 4:43) Mfumo lowu i hulumendhe ya le tilweni, kutani yi ta siva tihulumendhe hinkwato ta vanhu naswona yi ta tisa ku rhula loku nga heriki eka vanhu. (Esaya 9:6, 7; 11:9; Daniyele 2:44) Hikokwalaho, hi wona ntshembo wa xiviri eka vanhu. Xana ku twarisa ntshembo wo tano wa xiviri wa vumundzuku, a hi yona ndlela yo kombisa rirhandzu ra xiviri, ku ri na ku khutaza vanhu leswaku va tshembela eka vanhu leswaku hi vona va nga ta va nyika vumundzuku lebyinene? Bibele yi ri: “Mi nga tshembi vanhu va xiyimo xa le henhla, hambi ku ri n’wana wa munhu wa nyama, loyi a tsandzekaka ku ponisa. Moya wakwe wa huma, a tlhelela entshurini wa yena; hi siku rero miehleketo yakwe ya lova. Wa tsaka loyi Xikwembu xa Yakobe xi nga mupfuni wa yena, loyi ntshembo wakwe wu nga eka Yehovha Xikwembu xakwe.” (Pisalema 146:3-5) Ematshan’weni yo rhuma vadyondzisiwa vakwe leswaku va ya chumayela ndlela yo antswa leyi mimfumo yi faneleke yi fuma ha yona, Yesu u va dyondzise leswaku va ya chumayela “mahungu lamanene lawa ya mfumo.”—Matewu 10:6, 7; 24:14.

Lowu hi wona ‘ntirho wa Hosi’ lowu vachumayeri lava nga Vakreste va rhumiweke wona. Leswi lava nga ehansi ka Mfumo wa Xikwembu va faneleke va rhandzana, hikwalaho, Mfumo hi wona wu nga ta herisa vusiwana hi ku endlela vanhu swilo hi ku ringanana. (Pisalema 72:8, 12, 13) Hakunene lawa i mahungu lamanene naswona hi fanele hi chumayela ha wona.

Namuntlha, Timbhoni ta Yehovha ti endla ‘ntirho lowu wa Hosi’ ematikweni ya 235. Hi ku pfumelelana ni xileriso xa Yesu, ti xixima tihulumendhe hinkwato. (Matewu 22:21) Kambe ti tlhela ti yingisa marito lawa a ma byeleke valandzeri va yena loko a ku: ‘A mi xiphemu xa misava, kambe ndzi mi hlawule emisaveni, hikwalaho ka sweswo misava ya mi venga.’—Yohane 15:19.

Van’wana lava a va nghene hi nhloko etipolitikini va te ti thya ehansi, endzhaku ka loko va kambisise leswi Bibele yi swi dyondzisaka. N’watipolitiki un’wana wa Muntariyana, khale ka xirho xa vandla leri lawuriwaka hi kereke ya Catholic Action, u te: “Ndzi nghenele tipolitiki, hikuva a ndzi vona onge munhu u fanele a hoxa xandla swinene etimhakeni ta tiko ni ta ntshamisano.” Endzhaku ka loko a tshike ku va meyara wa doroba kutani a va Mbhoni ya Yehovha leswaku  a ta va muchumayeri wa Mfumo wa Xikwembu, u hlamusele xivangelo xa ku va matshalatshala ya van’watipolitiki lavanene ma nga tlhaveriwi hi dyambu. U te: “Misava yi le ka xiyimo lexi yi nga eka xona, ku nga ri leswaku vanhu lavanene a va ringetanga ku antswisa swiyimo swa ntshamisano, kambe hikwalaho ka leswi vanhu vo tala lavo biha va kandziyelaka matshalatshala ya vona lamanene.”

Ku va Vakreste va nga ngheneleli etipolitikini hikwalaho ka leswi va chumayelaka hi ntshembo lowu nga woxe wa ntiyiso eka vanhu, sweswo a swi va siveli ku pfuna vanhu van’wana hi tindlela tin’wana. Vanhu lava Vakreste va va pfunaka leswaku va va ehansi ka Mfumo wa Xikwembu va dyondza ku cinca malangutelo ya vona layo biha, ivi se va xixima vuhosi, va antswisa vutomi bya mindyangu ya vona ni ku va ni langutelo lerinene hi rifuwo. Xa nkoka ngopfu, Timbhoni ta Yehovha ti pfuna vanhu leswaku va tsakela vuxaka lebyikulu ni Xikwembu.

Vachumayeri va Mfumo wa Xikwembu va pfuna vanhu lava va tshamaka na vona. Ku tlula kwalaho, va dyondzisa vanhu leswaku va tshembela eka hulumendhe ya xiviri leyi nga ta tisa ku rhula loku nga heriki eka hinkwavo lava rhandzaka Xikwembu. Hikwalaho ka leswi Vakreste va namuntlha va nga ngheneleliki etimhakeni ta politiki, hi vona va nga kotaka ku nyika vanhu mpfuno wa xiviri lowu va wu lavaka namuntlha.

[Bokisi/Xifaniso lexi nga eka tluka 7]

Ndzi Fularhele Tipolitiki, Ndzi Sungula Ku Chumayela Hi Mfumo Wa Xikwembu

Loko Átila a ha ri mufana u dyondze eka vafundhisi va yena va muganga wa Belém eBrazil leswaku vukhongeri byi nga tirhisiwa ku lwisana ni ntshikilelo. A a tsaka ku twa hi ta vanhu lava hetelelaka va ntshunxekile entshikilelweni kutani va joyina vandla ra valweri va ntshunxeko, laha eka rona a dyondzeke ku hlela vanhu leswaku va macha ni ku lwisana ni mfumo.

Xin’wana lexi Átila a a xi tsakela a ku ri ku dyondzisa vana va vandla ra valweri va ntshunxeko, a tirhisa buku leyi a a nyikiwe yona leyi nge Listening to the Great Teacher. * Yi n’wi dyondzise hi ku tikhoma lokunene ni ku yingisa valawuri. Leswi swi endle Átila a tivutisa leswaku ha yini vanhu lava va seketelaka mhaka ya ku tirhisa vukhongeri hi xikongomelo xo lwisana ni ntshikilelo va nga tekeleli mahanyelo ya Yesu lamanene ngopfu, nileswaku ha yini van’wana va rivala hi vanhu lava tshikileriwaka loko se va kume xikhundlha. Hiloko a panulula eka vandla rero. Endzhaku ka sweswo, ku fike Timbhoni ta Yehovha ekaya rakwe kutani ti bula na yena hi Mfumo wa Xikwembu. A swi hlwelanga leswaku a kambisisa Bibele ni ku dyondza hi ntshunxeko wa xiviri wa vanhu lava tshikileriwaka.

Hi wona nkarhi wolowo, Átila u ye eka seminara ya Khatoliki leyi a yi bula hi vukhongeri ni tipolitiki. Muleteri u te: “Vukhongeri ni tipolitiki swa fambisana.” U tlhele a ya enhlanganweni eHolweni ya Mfumo. U vone ku hambana lokukulu! Hi xikombiso, a ku nga dzahiwi, ku nga nwiwi, kumbe ku endliwa misavu ya nhlambha. U endle xiboho xo joyina Timbhoni entirhweni wa tona wo chumayela, naswona a nga hlwelanga ku khuvuriwa. Sweswi se wa swi vona leswaku ha yini ku tirhisa vukhongeri hi xikongomelo xo lwisana ni ntshikilelo swi nga taka swi nga swi ntshunxi swisiwana ejokweni ra ntshikilelo.

[Nhlamuselo ya le hansi]

[Swifaniso leswi nga eka tluka 6]

Leswi Vakreste va nga ngheneleliki etimhakeni ta politiki, sweswo a swi va siveli ku pfuna vanhu van’wana