Xana Wa Tiyisiwa Hi Rito Ra Xikwembu?

LOKO u weriwa hi miringo, xana u hlangavetana na yona hi ndlela yihi? Loko Yesu a ringiwa hi Sathana, u tsundzuke tsalwa leri faneleke, leri n’wi pfuneke ku langutana ni miringo yo tano. (Matewu 4:1-11) Hilaha ku fanaka, loko Hosi Davhida a weriwe hi miringo, u tiyisiwe hi Rito ra Xikwembu. U te: “Loko miehleketo ya mina leyi ndzi karhataka yi tele endzeni ka mina, nchavelelo wa wena wu sungule ku vukarha moya-xiviri wa mina.”—Pisalema 94:19.

Hilaha ku fanaka, ku tsundzuka tsalwa leri hi ri rhandzaka swi nga hi chavelela kumbe swi hi tiyisa nhlana loko hi hlangana ni miringo. Hi xikombiso, Rex, la nga ni malembe ya 89 hi vukhale, u ve muvuri wa evhangeli wa nkarhi hinkwawo ku sukela hi 1931. Kambe u ri: “Minkarhi yo tala loko ndzi nyikiwe xiavelo xo hlawuleka, a ndzi titwa ndzi nga faneleki.” Xana u hlangavetane njhani ni xiyimo xexo? “Ndzi tsundzuke tsalwa leri ndzi ri rhandzaka ra Swivuriso 3:5, leri nge: ‘Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini.’ Ku tsundzuka ni ku tirhisa tsalwa leri swi ndzi pfune ku endla swiavelo swa mina hi ndlela leyi humelelaka.”

Hambi ku ri vana lavatsongo, va vuyeriwa hi ku anakanya hi tsalwa leri va ri rhandzaka. Jack la nga ni malembe ya tsevu hi vukhale u vula leswaku Matewu 24:14 i tsalwa leri rhandzekaka eka yena. Tsalwa leri ri n’wi susumetela ku endla ntirho wo chumayela ni vatswari va yena. U ri: “Mugqivela wun’wana ni wun’wana ndzi tsakela ku famba ndzi ya chumayela swin‘we na manana, tatana na sesi wa mina.”

Ku fana na Yesu, xana nkarhi wun’wana u hlangana ni miringo leyi kongomeke ripfumelo ra wena? Kutani tsalwa ra Vafilipiya 4:13 ri nga va rin’wana ra matsalwa lama rhandzekaka eka wena. Ku fana na Hosi Davhida, xana u ni ‘miehleketo leyi ku karhataka’? Kutani ku tsundzuka Vafilipiya 4:6, 7 swi nga ku pfuna ku hlangavetana ni xiphiqo xo tano. Xana u pfa u anakanya leswaku ntirho wa wena eka Xikwembu a wu pfuni nchumu? Kutani ku tsundzuka 1 Vakorinto 15:58 swi ta ku tiyisa.

Hi ku tiva matsalwa lama faneleke hi nhloko, hi pfumelela Rito ra Xikwembu leswaku ri hi nyika matimba evuton’wini bya hina. (Vaheveru 4:12) Matsalwa yo tano lawa hi ma rhandzaka ma nga hi tiyisa ni ku hi chavelela.—Varhoma 15:4.