Hi Byihi Vukhongeri Lebyi U Nga Byi Hlawulaka?

‘VUKHONGERI byo hambana-hambana byo va tindlela to hambana leti yaka ndhawu yin’we. Ntiyiso hi leswaku Xikwembu i xin’we, a hi swona ke?’ Vanhu vo tala va pfumelelana na wona marito lawa, hikuva eka vona, hambiloko swi ri swa nkoka ku va xirho xa vukhongeri byo karhi, kambe a swi na mhaka leswaku munhu u hlawula vukhongeri byihi.

Mavonelo lawa ma vonaka ma nga ri na xihoxo loko u ma twa, hikuva i ntiyiso leswaku Xikwembu xa Matimba Hinkwawo i xin’we. (Esaya 44:6; Yohane 17:3; 1 Vakorinto 8:5, 6) Hambiswiritano, a hi fanelanga hi honisa ku hambana loku nga erivaleni—ku tikaneta loku nga kona—exikarhi ka vukhongeri byo tala lebyi vulaka leswaku byi tirhela Xikwembu xa ntiyiso. Bya hambana swinene hi mikhuva, tidyondzo ni swilaveko swa byona. Ku hambana loku i ku kulu swinene lerova lava va nga va vukhongeri byo karhi swa va nonon’hwela ku twisisa kumbe ku amukela leswi van’wana va swi dyondzisaka kumbe va swi pfumelaka.

Hi hala tlhelo, Yesu u te: “Xikwembu i Moya, naswona lava va xi gandzelaka va fanele ku gandzela hi moya ni ntiyiso.” (Yohane 4:24) Xana ku gandzela Xikwembu hi ntiyiso swi na yona ndhawu ya tidyondzo leti kanetanaka malunghana ni nhlamuselo ya Xikwembu, xikongomelo xa xona ni ndlela leyi xi lavaka vanhu va xi gandzela ha yona? Xana swa twala ku anakanya leswaku Xikwembu xa Matimba Hinkwawo a xi na mhaka leswaku hi xi gandzela njhani?

Vakreste Va Ntiyiso Va Khale Ni Va Sweswi

Vakreste va lembe-xidzana ro sungula minkarhi yin’wana a va nga swi voni hi tihlo rin’we swilo swo karhi. Hi xikombiso, loko a vulavula ni lava va le Korinto, muapostola Pawulo u te: “Vamakwerhu, ndzi paluxeriwe ta n’wina hi va yindlu ya ka Klowe leswaku ku ni timholovo exikarhi ka n’wina. Leswi ndzi vulaka swona hileswaku un’wana ni un’wana wa n’wina u ri: ‘Mina ndzi wa Pawulo,’ ‘Kambe mina ndzi wa Apolosi,’ ‘Kambe mina ndzi wa Khefasi,’ ‘Kambe mina ndzi wa Kreste.’”—1 Vakorinto 1:11, 12.

Xana Pawulo a a nga ri na mhaka ni timholovo leti? Xana un’wana ni un’wana wa vona a a tikhomele ndlela ya yena leyi yi yaka eku ponisiweni? Nikatsongo! Pawulo u tsundzuxile: “Ndza mi khongotela, vamakwerhu, hi vito ra Hosi ya hina Yesu Kreste leswaku hinkwenu mi vulavula hi ku twanana, ni leswaku ku nga tshuki ku va ni ku avana exikarhi ka n’wina, kambe mi hlangana hilaha ku faneleke emianakanyweni yin’we ni le ndleleni yin’we ya ku ehleketa.”—1 Vakorinto 1:10.

Hambiswiritano, vanhu a va sindzisiwi leswaku va pfumela dyondzo leyi fanaka. Leswi swi endleka ntsena loko vanhu va kambisisa timhaka kahle kutani va fikelela xiboho lexi fanaka, va tlhela va xi amukela. Xisweswo, ku va ni dyondzo ya wena n’wini ya Rito ra Xikwembu ni ku tiyimisela ku tirhisa leswi u swi dyondzaka, hi rona goza ra nkoka eku fikeleleni ka vun’we lebyi Pawulo a  vulavulaka ha byona. Xana byi kona vun’we bya muxaka lowu? Hilaha hi swi voneke hakona, i khale Xikwembu xi ri karhi xi tirhisana ni vanhu va xona tanihi ntlawa. Xana swa koteka ku vona ntlawa wolowo namuntlha?

Vuyelo Bya Ku Va Xirho Xa Ntlawa Lowu Amukeriwaka Hi Xikwembu

Mupisalema Davhida u tshame a vutisa a ku: “Oho Yehovha, i mani la nga ta va muendzi entsongeni wa wena? I mani la nga ta tshama entshaveni ya wena yo kwetsima?” Lexi i xivutiso lexi faneleke xi endla munhu a tiehleketa. Davhida u nyikela nhlamulo: “Hi loyi a fambaka a nga ri na xihoxo naswona a hanyaka hi ku lulama, la vulavulaka ntiyiso embilwini ya yena.” (Pisalema 15:1, 2) Ku twisisa Bibele kahle hi swona swi nga pfunaka munhu leswaku a vona vukhongeri lebyi fikelelaka swilaveko leswi swa Xikwembu. Loko munhu a tihlanganisa ni ntlawa wolowo, u ta kuma vanghana lavanene, lava gandzelaka Xikwembu hi vun’we, “hi moya ni ntiyiso.”

Timbhoni ta Yehovha ti swi kombisile leswaku swa koteka ku pfumela tidyondzo leti fanaka ni ku endla swilo hi vun’we emisaveni ya namuntlha leyi avaneke. Exikarhi ka vona ku ni vanhu lava khale a va ri swirho swa vukhongeri ni swa mintlawa ya miganga yo karhi. Van’wana va vona loko va nga si va Timbhoni a va kanakana vukona bya Xikwembu, naswona van’wana a va vula leswaku Xikwembu a xi kona. Kasi van’wana a va nga si tshama va byi tekela enhlokweni vukhongeri. Exikarhi ka vukhongeri, ndhavuko ni tidyondzo leti to hambana-hambana, ku hume vanhu lava sweswi va nga ni vun’we evugandzerini, vun’we lebyi nga riki kona byo fana na byona emisaveni ya namuntlha.

A ku na xin’wana xi va endlaka va va ni vun’we handle ka Rito ra Xikwembu ku nga Bibele. Hi nkarhi lowu fanaka, Timbhoni ta Yehovha ta swi xiya leswaku a ti fanelanga ti sindzisa vanhu leswaku va endla swilo hi ndlela yo karhi. Kambe ta ri tlangela lunghelo ro khutaza vanhu van’wana leswaku va dyondza Bibele leswaku yi va pfuna ku endla xiboho lexinene loko swi ta etimhakeni ta vugandzeri. Leswi swi endla leswaku vanhu vo tala va vuyeriwa hi ku gandzela Xikwembu “hi moya ni ntiyiso.”

Namuntlha, swa olova ku phasiwa hi minkucetelo yo biha. Hikwalaho, i swa nkoka ku hlawula vanghana lavanene. Bibele yi vula leswaku “loyi a fambaka ni vanhu vo tlhariha u ta tlhariha” ni leswaku “vunakulobye byo biha byi onha mikhuva leyi pfunaka.” (Swivuriso 13:20; 1 Vakorinto 15:33) Ku va exikarhi ka vanhu lava gandzelaka Xikwembu hi ntiyiso swi nyika munhu nsirhelelo. Hikwalaho, Bibele ya hi tsundzuxa: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:24, 25) Swa tsakisa swinene loko vanghana va ntiyiso, vamakwavo va moya, va pfunana hi rirhandzu leswaku va hetisisa vutihlamuleri bya vona eka Xikwembu!

Ottmar u pfumelelana na yona mhaka leyi. Hambileswi a kuriseriweke endyangwini wa Makhatoliki le tikweni ra Jarimani, u tshike ku ya ekerekeni. Loko a hlamusela u ri: “Nkarhi wun’wana ni wun’wana loko ndzi ya ekerekeni, a ndzi vuya ndzi nga pfunekanga hi nchumu.” Hambiswiritano, a nga tshikanga ku va ni ripfumelo eka Xikwembu. Hiloko siku rin’wana a hlangana ni Timbhoni ta Yehovha kutani a swi vona kahle leswaku hi tona ti nga malandza ya Xikwembu ya ntiyiso. U sungule ku vona nkoka wo ya laha ti hlengeletanaka kona. Sweswi u ri: “Ndzi ni ku rhula ka mbilu ni mianakanyo ku sukela loko ndzi tihlanganise ni nhlengeletano leyi ya misava hinkwayo. Sweswi ndzi kuma mpfuno leswaku ndzi yi twisisa kahle Bibele. Lowu i nchumu wa risima swinene eka mina.”

Xirhambo Eka Lava Va Lavisisaka

Vanhu lava nga ni mianakanyo yin’we, lava va khomisanaka tanihi ntlawa, va nga endla ntirho kahle swinene ku tlula vanhu lava va nga khomisaniki, un’wana ni un’wana a tiendlela swa yena. Hi xikombiso, Yesu loko a lela valandzeri vakwe u va nyike swiletelo leswi: “Fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona.”  (Matewu 28:19, 20) Xana ntirho lowu a wu ta humelela njhani loko a ku nga ri na nkongomiso kumbe vanhu lava hleriweke? Xana munhu a a ta swi kotisa ku yini ku hetisisa xileriso lexi xa Matsalwa, loko a a ringeta ku tirhela Xikwembu a ri yexe?

N’wexemu, Timbhoni ta Yehovha emisaveni hinkwayo ti hangalase tibuku ni swibukwana leswi sekeriweke eBibeleni swa 91 933 280 ni timagazini ta 697 603 247, hi ndlela leyi ti yise rungula ro huma eRitweni ra Xikwembu eka vanhu va madzana ya timiliyoni ematikweni ya 235. Lebyi i vumbhoni lebyi xiyekaka bya leswaku ntlawa lowu nga ni vun’we, lowu hlelekeke, wu nga endla leswikulu swinene ku tlula loko munhu un’wana ni un’wana a ringeta ku tiendlela swakwe a ri yexe!

Ku tlhandlekela eka tibuku ta Bibele leti ti ti fambiselaka vanhu, Timbhoni ta Yehovha ti tlhela ti dyondza Bibele ni vanhu mahala leswaku ti va pfuna va swi twisisa kahle leswi Xikwembu xi swi lavaka. Hi xiringaniso, n’wexemu ku fambisiwe tidyondzo ta Bibele ta 5 726 509 vhiki ni vhiki eka munhu ha un’we kumbe eka mintlawa yo karhi. Ndzetelo lowu wa Bibele wu pfuna vanhu va timiliyoni leswaku va kuma xisekelo lexi tiyeke loko va endla xiboho etimhakeni ta vugandzeri. Na wena wa rhambiwa leswaku u dyondza hi swilaveko swa Xikwembu leswi nga eBibeleni. Endzhaku ka sweswo u ta kota ku tihlawulela.—Vaefesa 4:13; Vafilipiya 1:9; 1 Timotiya 6:20; 2 Petro 3:18.

Loko u lava ku tsakisa Xikwembu, i swa nkoka leswaku u va xirho xa vukhongeri byo karhi—kambe ku nga ri ntlawa wa vukhongeri byin’wana ni byin’wana. U fanele u hlawula vukhongeri endzhaku ko kuma vutivi lebyi kongomeke bya Bibele, hayi hi ku tekeka kumbe ku twa mavarivari. (Swivuriso 16:25) Dyondza swilaveko swa vukhongeri bya ntiyiso. Swi pimanise ni tidyondzo ta vukhongeri bya wena. Endzhaku ka sweswo endla nhlawulo lowu faneleke.—Deteronoma 30:19.

[Swifaniso leswi nga eka tluka 7]

Timbhoni ta Yehovha ti ni vun’we exikarhi ka misava leyi avaneke