Ku Endla Leswinene Eka Lava Lavaka Mpfuno

“A HI endleleni hinkwavo leswi nga swinene,” ku vula muapostola Pawulo, “kambe ngopfu-ngopfu lava nga swin’we na hina eripfumelweni.” (Vagalatiya 6:10) Timbhoni ta Yehovha emisaveni hinkwayo ti tikarhatela ku tirhisa nsinya wolowo wa nawu evuton’wini bya tona, ti endlela un’wana ni un’wana leswinene, ngopfu-ngopfu vapfumeri-kulobye. Leswi ha swi vona minkarhi yo tala loko ku ri ni xilaveko. A hi tekeni swikombiso leswi swa ha ku endlekaka ematikweni manharhu.

Hi December 2002, xihuhuri lexikulu xi hlasele tiko ra Guam, xi hunga hi rivilo ra 300 wa tikhilomitara hi awara. Makaya yo tala a ma onhiwile, man’wana a ma mbundzumuxiwe hi ku helela. Mavandlha ya kwalaho ma hatlise ma hlela mintlawa leyi a yi ta pfuna mindyangu ya Timbhoni leyi a yi onhakeriwe ngopfu. Rhavi ra le Guam ri rhumele swo aka ni vatirhi leswaku ku lunghisiwa makaya lama onhakeke naswona rhavi ra le Hawaii ri pfunetile. Ku nga si hela mavhiki ma nga ri mangani ku fike ntlawa wa vavatli va huma eHawaii va ta pfuneta hi ntirho wa ku pfuxeta, naswona vamakwerhu van’wana va le Guam va teke nkarhi wo wisa emintirhweni ya vona leswaku va ta pfuneta. Moya wa vona wo pfuna hi ntsako wu xiyiwe hi vanhu hinkwavo va ndhawu.

Ekusuhi ni doroba ra Mandalay, le Myanmar, ku sungule malangavi ya ndzilo ekusuhi ni Holo ya Mfumo. Kwala tlhelo a ku ri ni yindlu ya makwerhu wa xisati la holeke ni ndyangu wakwe. Moya a wu hungela emutini wa yena, kutani u tsutsumele eholweni a ya kombela mpfuno. Hi nkarhi wolowo, holo a yi ri eku pfuxetiweni kutani a ku ri ni vamakwerhu vo tala. A va hlamele ku hlangana ni makwerhu loyi wa xisati hikuva a va nga swi tivi leswaku u tshama endhawini yoleyo. Hi ku hatlisa vamakwerhu va pfunetile eku rhurhiseni ka nhundzu yi ya laha yi nga ta hlayiseka kona. Loko nuna wa yena loyi a nga riki Mbhoni a twe hi ta ndzilo lowu, u tsutsumele ekaya, hiloko a kuma vamakwerhu va ri karhi va gingiriteka emutini wa yena. A a tsakile swinene naswona moya wa yena a wu ehlile hikuva lavo leha tintiho va yiva loko swiyimo swi te tani. Rirhandzu leri ra vamakwerhu ri khutaze makwerhu wa xisati ni n’wana wa yena wa mufana leswaku va hlanganyela nakambe ni vandlha ra Vukreste naswona se va va kona eminhlanganweni hinkwayo.

Eka lembe ra ntirho leri hundzeke, vo tala eMozambhiki a va langutane ni ndlala hikwalaho ka dyandza ni ku pfumaleka ka ntshovelo. Rhavi ra kwalaho ra Timbhoni ta Yehovha ri lunghiselele swakudya hi xihatla leswaku ku pfuniwa lava pfumalaka. Swakudya a swi aviwa eTiholweni ta Mfumo, minkarhi yin’wana  swi aviwa endzhaku ka minhlangano. Makwerhu un’wana wa xisati loyi a nga riki na nuna u te: “Ndzi te eminhlanganweni ndzi tshikilelekile, ndzi nga tivi leswaku vana va mina ndzi ta va nyika yini loko hi tlhelela ekaya.” Mpfuno wa rirhandzu lowu a wu kumeke eka vamakwavo wu n’wi tiyisile. U te: “Eka mina a swi fana ni ku pfuka eku feni!”

Nakambe Timbhoni ti ‘endla leswi nga swinene’ hi tlhelo ra moya, hi ku byela van’wana rungula ra Bibele leri chavelelaka ni leri nyikaka ntshembo. Ti pfumelelana ni marito ya wanuna wo tlhariha wa khale lama nge: “Loko ku ri loyi a [yingisaka marito ya Xikwembu ya vutlhari], u ta tshama a sirhelelekile naswona a nge kavanyetiwi hi ku chava khombo.”—Swivuriso 1:33.

[Swifaniso leswi nga eka tluka 31]

1, 2. Ku aviwa ka swakudya swo pfuna lava pfumalaka eMozambhiki

3, 4. Xihuhuri xi onhe miti yo tala le Guam

[Swihlovo Swa Kona]

Child, left: Andrea Booher/FEMA News Photo; woman, above: AP Photo/Pacific Daily News, Masako Watanabe