Va Katekile Lava Vangamisaka Xikwembu

“Ma ta nkhinsama emahlweni ka wena, Wena Yehovha, naswona ma ta vangamisa vito ra wena.”—PISALEMA 86:9.

1. Ha yini hi kota ku dzunisa Xikwembu ku tlula ntumbuluko lowu nga hanyiki?

YEHOVHA u lulameriwa hi ku dzunisiwa hi ntumbuluko wakwe hinkwawo. Hambileswi ntumbuluko wakwe lowu nga hanyiki wu n’wi dzunisaka wu miyerile, hina vanhu hi ni vuswikoti bya ku anakanya, ku twisisa, ku tlangela ni ku gandzela. Hikwalaho, mupisalema u byela hina loko a ku: “Huwelelani eka Xikwembu hi ku hlula, n’wina hinkwenu va misava. Ku yimbeleleleni miloti ku vangama ka vito ra xona. Vangamisani ku dzuneka ka xona.”—Pisalema 66:1, 2.

2. I vamani lava amukeleke xileriso xa ku vangamisa vito ra Xikwembu, naswona ha yini?

² Vanhu vo tala a va pfumeli eka Xikwembu kumbe a va lavi ku xi dzunisa. Hambiswiritano, ematikweni ya 235, Timbhoni ta Yehovha to tlula timiliyoni ta tsevu ti kombisa leswaku ti vona “timfanelo ta [Xikwembu] leti nga vonakiki” eka swilo leswi xi swi endleke naswona ti ‘twe’ vumbhoni lebyi nga vulavuriki bya ntumbuluko. (Varhoma 1:20; Pisalema 19:2, 3) Hi ku dyondza Bibele, nakambe ti tive Yehovha ti tlhela ti n’wi rhandza. Pisalema 86:9, 10 yi vule ka ha ri emahlweni yi ku: “Matiko hinkwawo lawa u ma endleke ma ta ta, ma ta nkhinsama emahlweni ka wena, Wena Yehovha, naswona ma ta vangamisa vito ra wena. Hikuva u lonkulu naswona u endla swilo swo hlamarisa swinene; u Xikwembu, wena u ri wexe.”

3. “Ntshungu lowukulu” wu endla “ntirho wo kwetsima nhlikanhi ni vusiku” hi ndlela yihi?

³ Hilaha ku fanaka, Nhlavutelo 7:9, 15 yi vulavula hi “ntshungu lowukulu” wa vagandzeri lowu “[endlelaka Xikwembu] ntirho wo kwetsima nhlikanhi  ni vusiku etempeleni ya xona.” A swi vuli swona leswaku Xikwembu xi koxa malandza ya xona leswaku ma hambeta ma xi dzunisa ni ku etlela ma nga etleli, kambe vagandzeri va xona i nhlengeletano ya misava hinkwayo. Kutani loko ematikweni man’wana byi sikurile, malandza ya Xikwembu lama nga etlhelweni lerin’wana ra misava ma va ma ri eku chumayeleni. Kutani ku nga vuriwa leswaku dyambu a ri peli eka lava va vangamisaka Yehovha. Ku nga ri khale, “hinkwaswo leswi hefemulaka” swi ta humesa marito ya swona swi dzunisa Yehovha. (Pisalema 150:6) Kambe hi nkarhi lowu fanaka, xana un’wana ni un’wana wa hina a nga endla yini leswaku a vangamisa Xikwembu? Hi swihi swiphiqo leswi hi nga langutanaka na swona? Naswona hi yihi mikateko leyi nga ta kumiwa hi lava va vangamisaka Xikwembu? Leswaku hi kuma nhlamulo, a hi kambisiseni rungula ra Bibele ra mayelana ni Vaisrayele va nyimba ya Gadi.

Mphikamakaneta Ya Khale

4. Hi wihi ntlhontlho lowu langutaneke ni nyimba ya Gadi?

⁴ Emahlweni ko nghena eTikweni leri Tshembisiweke, Vaisrayele va nyimba ya Gadi va kombele mpfumelelo wo tshama etindhawini leti nga ni madyelo lamanene evuxeni bya Yordani. (Tinhlayo 32:1-5) Ku tshama kwalaho a swi ta vula ku hlangavetana ni swiphiqo leswikulu. Tinyimba leti tshameke evupela-dyambu a ti ta sirheleriwa hi Nambu wa Yordani—lowu hi ntumbuluko a wu ta sivela masocha ya valala ku nghena. (Yoxuwa 3:13-17) Hambiswiritano, malunghana ni tindhawu ta le vuxeni bya Yordani, The Historical Geography of the Holy Land, hi George Adam Smith yi ri: “Hinkwato [a ti] andlalekile naswona a ku nga ri na nchumu lexi a xi sivela vanhu ku nghena eka tona, tanihi leswi a ti ri ehenhla ka rivala lerikulu ra Arabiya. Hikwalaho a va tshama va ri ekhombyeni ra ku hlaseriwa hi vatsendzeleki lava nga ni ndlala, laha van’wana va vona a va khitikana hi xitalo lembe na lembe va fika va teka madyelo.”

5. Yakobe u khutaze vatukulu va Gadi leswaku va endla yini loko va hlaseriwa?

⁵ Xana nyimba ya Gadi swi yi fambele njhani ehansi ka ntshikilelo wo tano lowu phikelelaka? Eka madzana ya malembe emahlweni ka kwalaho, kokwa wa vona Yakobe loyi a a ri kusuhi ni ku fa u profetile a ku: “Loko ku ri Gadi, vuthu ra vaphangi ri ta n’wi hlasela hi xitshuketa, kambe yena u ta hlasela va le ndzhaku hi xitshuketa.” (Genesa 49:19) Loko u languta marito wolawo ro sungula, ma nga twala ma heta matimba. Kambe kahle-kahle a ma lerisa Vagadi leswaku va tilwela loko va hlaseriwa. Yakobe u va tiyisekisile leswaku loko va endla tano, vahlaseri va vona a va ta tlhelela endzhaku bya mbyana leyi khondleke ni ncila, ivi Vagadi va va hlongorisa hinkwavo.

Swiphiqo Leswi Kongomaneke Ni Vugandzeri Bya Hina Namuntlha

6, 7. Xiyimo xa Vakreste namuntlha xi yelana njhani ni xa nyimba ya Gadi?

⁶ Ku fana ni nyimba ya Gadi, Vakreste namuntlha  va langutane ni mintshikilelo ya mafambiselo ya Sathana; a hi na nsirhelelo wa masingita lowu hi sivelaka ku langutana na yona. (Yobo 1:10-12) Vunyingi bya hina hi boheka ku kamana ni mintshikilelo ya le xikolweni, ya ku kuma swo tihanyisa ha swona ni ya ku kurisa vana. Nakambe hi kamana ni mintshikilelo ya munhu hi xiyexe ni ya le mintlhavekweni. Van’wana va boheka ku tiyisela “mutwa enyameni” hikwalaho ka vulema kumbe vuvabyi lebyikulu. (2 Vakorinto 12:7-10) Van’wana va kamana ni mintlhaveko ya ku titwa va nga ri nchumu. “Masiku ya khombo” ya vudyuhari ma nga sivela Vakreste lava kuleke ku tirhela Yehovha hi ku hiseka loku a va ri na kona eku sunguleni.—Eklesiasta 12:1.

⁷ Nakambe muapostola Pawulo u hi tsundzuxa leswaku “hi [dodombisana] ni mavandla lama hombolokeke ya moya, etindhawini ta le tilweni.” (Vaefesa 6:12) Hi tshama hi jameriwe hi “moya wa misava,” moya wa ku xandzuka ni nkucetelo wa mahanyelo yo biha lama hoyozeriwaka hi Sathana ni madimona yakwe. (1 Vakorinto 2:12; Vaefesa 2:2, 3) Ku fana na Lota loyi a a chava Xikwembu, na hina namuntlha hi nga karhatiwa hi swilo swa manyala leswi vanhu lava hi hanyaka na vona va swi vulaka ni ku swi endla. (2 Petro 2:7) Nakambe Sathana u kota ku hi hlasela hi ku kongoma. Sathana u lwisana ni masalela ya vatotiwa, “lava hlayisaka swileriso swa Xikwembu naswona va nga ni ntirho wa ku nyikela vumbhoni mayelana na Yesu.” (Nhlavutelo 12:17) Nakambe Sathana u hlasela “tinyimpfu tin’wana” ta Yesu hi ku ti yirisa ni ku ti xanisa.—Yohane 10:16.

Xana U Fanele U Tinyiketa Kumbe U Tilwela?

8. Xana hi fanele hi angurisa ku yini loko Sathana a hi hlasela, naswona ha yini?

⁸ Xana hi fanele hi angurisa ku yini loko Sathana a hi hlasela? Ku fana ni nyimba ya khale ya Gadi, hi fanele hi tiya emoyeni hi tilwela hi ku ya hi vukongomisi bya Xikwembu. Lexi vavisaka, van’wana va sungule ku tinyiketa loko va vona nyimpi ya vutomi yi hisa, va honisa vutihlamuleri bya vona bya timhaka ta moya. (Matewu 13:20-22) Mbhoni yin’wana yi vule leswi landzelaka malunghana ni xivangelo xa ku va vo tala evandlheni ra ka vona va xwa eminhlanganweni: “Vamakwerhu va karhala. Vutomi byi va komba maxangu.” Kunene, vanhu namuntlha va ni swivangelo swo tala swa ku karhala. Hikwalaho, swa olova ku tikuma u languta vugandzeri bya Xikwembu byi ri khwarha kumbe ndzhwalo wo tika. Kambe, xana rero i langutelo lerinene?

9. Ku amukela joko ra Kreste swi tisa ku phyuphya hi ndlela yihi?

⁹ Anakanya hi leswi Yesu a swi byeleke mintshungu ya le nkarhini wakwe leyi na yona a yi tshwumuriwe tinhamu hi majoko ya vutomi: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa.” Xana Yesu a a vula leswaku munhu a a ta phyuphyisiwa hi ku tshika ku tirhela Xikwembu? Ku hambana ni sweswo, Yesu u te: “Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya.” Joko i nchumu wa mhandzi kumbe nsimbi lowu pfunaka munhu kumbe xiharhi ku koka ndzhwalo wo tika. I mani loyi a a ta rhandza ku rhwala joko ro tano? Xana a hi na mindzhwalo leyi ana se yi hi ‘tikelaka’? I ntiyiso, kambe tsalwa ra Xigriki nakambe ri swi veka hi ndlela leyi: “Nghena ejokweni ra mina swin’we na mina.” Anakanya ha swona: Yesu u tinyiketela ku hi pfuna leswaku hi koka ndzhwalo wa hina! A hi boheki ku wu koka hi ri hexe.—Matewu 9:36; 11:28, 29, nhlamuselo ya le hansi ya NW; 2 Vakorinto 4:7.

10. Hi byihi vuyelo bya matshalatshala ya hina ya ku vangamisa Xikwembu?

¹⁰ Loko hi amukela joko ra ku va mudyondzisiwa, kahle-kahle hi va hi lwisana na Sathana. Yakobo 4:7 ya hi tshembisa: “Mi kaneta Diyavulosi, kutani u ta mi balekela.” Hambiswiritano, sweswo a hi matlangwana. Ku tirhela Xikwembu swi lava ku tikarhata swinene. (Luka 13:24) Kambe Bibele ya hi tshembisa eka Pisalema 126:5: “Lava va byalaka mbewu hi mihloti va ta tshovela hi ku huwelela ka ku tsaka.” Ina, Xikwembu lexi hi xi gandzelaka xi ni moya wa ku tlangela. I “muhakeri wa lava va xi lavaka hi mbilu hinkwayo,” naswona xi katekisa lava va xi vangamisaka.—Vaheveru 11:6.

Ku Vangamisa Xikwembu Tanihi Vachumayeri Va Mfumo

11. Ntirho wa nsimu wu hi sirhelela njhani eka minhlaselo ya Sathana?

¹¹ Yesu u lerisile a ku: “Hikokwalaho fambani mi ya endla vanhu va matiko hinkwawo va va vadyondzisiwa.” Ku chumayela hi yona ndlela leyikulu yo nyika Xikwembu “xitlhavelo xa ku dzunisa.” (Matewu  28:19; Vaheveru 13:15) “Mahavelo hinkwawo” ma katsa ku ‘vehela swihlomo swa mahungu lamanene ya ku rhula emilengeni ya hina’—hi tisirhelela eka minhlaselo ya Sathana. (Vaefesa 6:11-15) Ku dzunisa Xikwembu ensin’wini i ndlela leyinene yo tiyisa ripfumelo ra hina. (2 Vakorinto 4:13) Swi hi pfuna ku veka mianakanyo ya hina ekule ni swilo leswi nga akiki. (Vafilipiya 4:8) Ku hlanganyela ensin’wini swi hi pfulela ndlela ya ku akana ni vagandzeri-kulorhi.

12, 13. Xana mindyangu yi nga vuyeriwa njhani hi ku hlanganyela nkarhi na nkarhi entirhweni wa nsimu? Kombisa.

¹² Nakambe ntirho wa nsimu wu nga va nchumu lowu phyuphyisaka loko wu endliwa hi xindyangu. Entiyisweni vana va lava vuhungasi lebyinene. Hambiswiritano, nkarhi lowu ndyangu wu wu hetaka ensin’wini a wu fanelanga wu va lowu phirhaka. Vatswari va nga endla leswaku wu tsakisa hi ku letela vana va vona leswaku va kota ku chumayela kahle ensin’wini. Xana a hi swona leswaku vana va tsakela swilo leswi va kotaka ku swi endla kahle? Vatswari va nga pfuna vana leswaku va tsakela nsimu loko va va anakanyela, va papalata ku va koxa swo tala.—Genesa 33:13, 14.

¹³ Ku tlula kwalaho, ndyangu lowu dzunisaka Xikwembu swin’we wu va ni vuxaka lebyikulu. Anakanya hi makwerhu un’wana loyi a tshikiweke hi nuna wakwe loyi a a nga ri mupfumeri, kutani a sala ni vana va ntlhanu. U boheke ku ya lava ntirho wa ku tihanyisa leswaku a wundla vana vakwe. Xana u sale a hele matimba lerova a namba a rivala hi vumoya bya vana vakwe? Wa tsundzuka: “Ndzi tikarhatele ku dyondza Bibele ni tibuku leti fambisanaka na Bibele kutani ndzi ringeta ku tirhisa leswi a ndzi swi dyondza. Nkarhi na nkarhi a ndzi famba ni vananga eminhlanganweni ni le ntirhweni wa nsimu. Xana vuyelo bya matshalatshala ya mina byi ve byihi? Vana lava hinkwavo va ntlhanu va khuvuriwile.” Ku hlanganyela hi xitalo ensin’wini swi nga ku pfuna na wena eka matshalatshala ya wena ya ku kurisa vana “hi ku tshinya ni nkongomiso wa mianakanyo wa Yehovha.”—Vaefesa 6:4.

14. (a) Xana vantshwa va nga xi dzunisa njhani Xikwembu exikolweni? (b) I yini lexi nga pfunaka vantshwa leswaku va nga “khomiwi hi tingana hi mahungu lamanene”?

¹⁴ N’wina vantshwa, xana mi vangamisa Xikwembu hi ku chumayela exikolweni loko swi pfumeleriwa etikweni ra ka n’wina, kumbe, xana mi tshika ku chumayela hi ku chava vanhu? (Swivuriso 29:25) Mbhoni ya malembe ya 13 ya le Puerto Rico yi tsarile yi ku: “A swi ndzi khomisi tingana ku chumayela exikolweni hikuva ndza swi tiva leswaku leswi ndzi swi chumayelaka i ntiyiso. Etlilasini minkarhi hinkwayo ndzi yimisa voko ndzi hlamusela leswi Bibele yi vulaka swona emhakeni yo karhi. Loko ndzi ri ni nkarhi, ndzi ya elayiburari ndzi ya hlaya buku leyi nge Vantshwa.” * Xana Yehovha u ma katekisile matshalatshala yakwe? Wa vika: “Minkarhi yin’wana vadyondzi-kulorhi etlilasini va ndzi vutisa swivutiso va tlhela va kombela kopi ya buku leyi.” Loko ku ri leswaku a wu kanakana ku chumayela hi ndlela yo tano, kumbexana u fanele u kumisisa “ku rhandza ka Xikwembu loku nga kunene ni loku amukelekaka ni loku hetisekeke” hi ku tikarhata edyondzweni ya wena n’wini. (Varhoma 12:2) Loko u tiyiseka leswaku leswi u swi dyondzeke i ntiyiso, a wu nge “khomiwi hi tingana hi mahungu lamanene.”—Varhoma 1:16.

‘Nyangwa Leyi Pfulekeleke’ Ntirho

15, 16. Hi yihi “nyangwa leyikulu leyi yisaka entirhweni” leyi Vakreste van’wana va ngheneke eka yona, naswona vuyelo byi ve byihi?

¹⁵ Muapostola Pawulo u tsale leswaku a a pfulekeriwe hi “nyangwa leyikulu leyi yisaka entirhweni.” (1 Vakorinto 16:9) Xana swiyimo swa wena swi nga ku pfumelela ku ndlandlamuxa vutirheli bya wena? Hi xikombiso, ku nghenela ntirho wa vuphayona  bya nkarhi hinkwawo swi lava ku tirha tiawara ta 70 hi n’hweti entirhweni wo chumayela, kasi ku nghenela vuphayona bya nkarhinyana swi lava ku tirha tiawara ta 50. Hi ntolovelo maphayona ma tlangeriwa hi Vakreste-kulobye hikwalaho ka ntirho lowu ma wu endlaka hi ku tshembeka. Kambe ku va ma heta nkarhi wo tala ensin’wini a swi endli leswaku ma va lama hlawulekeke ku tlula vamakwavo lavan’wana evandlheni. Ku ri na sweswo, ma hlakulela moya lowu Yesu a wu khutazeke loko a ku: “Hi mahlonga lama nga pfuniki nchumu. Leswi hi nga swi endla hi leswi a hi fanele ku swi endla.”—Luka 17:10.

¹⁶ Vuphayona byi lava ku titshinya, ku hleleka ni ku tiyimisela ku titsona swo karhi. Kambe mikateko ya kona i yikulu. “Ku kota ku tamela Rito ra Xikwembu hi mfanelo i nkateko lowukulu,” ku vula muntshwa un’wana loyi a nga phayona la vuriwaka Tamika. “Loko u phayona, Bibele u yi tirhisa swinene. Sweswi loko ndzi ya ensin’wini ndzi kota ku tsundzuka matsalwa lama faneleke munhu un’wana ni un’wana loyi ndzi vulavulaka na yena.” (2 Timotiya 2:15) Phayona rin’wana leri vuriwaka Mica ri ri: “Ku vona ndlela leyi ntiyiso wu khumbaka vutomi bya vanhu ha yona i nkateko wun’wana lowu hlamarisaka.” Muntshwa un’wana la vuriwaka Matthew na yena u vulavula hi ntsako wa “ku vona munhu a amukela ntiyiso. A xi kona xin’wana lexi tisaka ntsako wo fana ni wolowo.”

17. Mukreste un’wana u yi hlule njhani mianakanyo yakwe leyi hoxeke hi vuphayona?

¹⁷ Xana u anakanya hi ku nghenela ntirho wa vuphayona? Kumbexana wa swi rhandza kambe u titwa u nga faneleki. Makwerhu un’wana wa xisati la ha riki muntshwa la vuriwaka Kenyatte u te: “A ndzi ri ni mianakanyo leyi hoxeke hi vuphayona. A ndzi vona ndzi nga faneleki. A ndzi nga swi koti ku lunghiselela swingheniso kumbe ku kombisana ni vanhu hi Matsalwa.” Kambe vakulu va avele phayona leri nga ni ntokoto leswaku ri tirha na yena. Kenyatte u ri: “Ndzi swi tsakele ngopfu ku tirha na makwerhu yoloye wa xisati. Sweswo swi endle leswaku ndzi navela ku nghenela ntirho wa vuphayona.” Kumbexana na wena u nga navela ku nghenela ntirho wa vuphayona loko u khutaziwa ni ku leteriwa.

18. Hi yihi mikateko leyi nga kumiwaka hi lava va ngheneleke ntirho wa vurhumiwa?

¹⁸ Ntirho wa vuphayona wu nga ku pfulela ni malunghelo man’wana. Hi xikombiso, mimpatswa yin’wana leyi tekaneke yi nga fanelekela ku leteriwa ntirho wa vurhumiwa ivi yi rhumeriwa ematikweni man’wana yi ya chumayela kona. Varhumiwa va boheka ku tolovelana ni swiyimo swa tiko lerintshwa, kumbexana va dyondza ririmi lerintshwa,  mahanyelo lamantshwa ni swakudya leswintshwa. Kambe mikateko ya kona i yikulu swinene. Mildred, loyi a nga murhumiwa la nga ni ntokoto le Mexico u ri: “A ndzi si tshama ndzi tisola hi xiboho xa mina xa ku va murhumiwa. I nchumu lowu a ndzi wu navela ku sukela loko ndza ha ri ntsongo.” Xana u vuyeriwe hi ndlela yihi? “Loko ndza ha ri ekaya a swi nga ndzi oloveli ku kuma dyondzo ya Bibele. Laha ndzi va ni swichudeni leswi fikaka ni le ka mune leswi sungulaka ku huma nsimu hi nkarhi wun’we!”

19, 20. Vo tala va kume mikateko hi ndlela yihi hi ku nghenela ntirho wa Bethele, wa ku aka marhavi ya le matikweni man’wana ni hi ku ya eXikolweni xa Ndzetelo wa Vutirheli?

¹⁹ Mikateko leyikulu yi kumiwa ni hi lava va nga entirhweni wa le Bethele etihofisini ta marhavi ta Timbhoni ta Yehovha. Sven, loyi a nga makwerhu la ha riki muntshwa wa le Jarimani, u vula leswi landzelaka hi ntirho wakwe wa le Bethele: “Ndzi anakanya leswaku ndzi endla ntirho wa risima swinene. Ingi ndzi tirhise vutshila bya mina emisaveni. Kambe sweswo a swi ta fana ni ku vekisa mali ebangi leyi nga kusuhi ni ku wa.” Kunene, ku tirha u nga holi i ku titsona swo karhi. Kambe Sven u ri: “Loko u chayisa entirhweni, wa swi tiva leswaku swilo hinkwaswo leswi u swi endleke siku rero u swi endlele Yehovha. Kutani sweswo swi ku nyika moya ‘wo hlamarisa.’”

²⁰ Vamakwerhu van’wana va ve ni nkateko wa ku ya aka marhavi ya le matikweni man’wana. Mpatswa wun’wana lowu tirheke ematikweni ya nhungu wu tsale wu ku: “Vamakwerhu va tiko leri va ni moya lowunene. Ku famba ka hina swi ta vula ku tshoveka timbilu—naswona ti ta va ti ‘tshoveka’ ra vunhungu. Hi ve ni ntokoto lowunene!” Nakambe ku ni Xikolo xa Ndzetelo wa Vutirheli. Xi nyikela vuleteri bya moya eka vamakwerhu lava fanelekaka, lava nga si tekaka. Makwerhu un’wana la thwaseke exikolweni lexi u tsarile a ku: “Ndzi pfumala marito ya ku mi nkhensa hikwalaho ka xikolo lexi dyondzisaka swonghasi. A yi kona nhlengeletano yin’wana leyi nga endlaka matshalatshala yo tano ya ku dyondzisa.”

21. I ntlhontlho wihi lowu Vakreste hinkwavo va langutanaka na wona loko va ri karhi va tirhela Xikwembu?

²¹ Ina, hi pfulekeriwe hi malunghelo yo tala. Kunene, vo tala va hina a hi nge swi koti ku ya tirha eBethele kumbe etikweni rin’wana. Yesu hi byakwe u pfumerile leswaku Vakreste a va ta tswala “mihandzu” leyi nga ringaniki hi ku tala, hikwalaho ka swiyimo leswi hambanaka. (Matewu 13:23) Kutani tanihi Vakreste, ntlhontlho lowu hi langutaneke na wona i ku vuyeriwa hi xitalo eka xiyimo xa hina—hi hlanganyela hilaha hi nga kotaka hakona entirhweni wa Yehovha. Loko hi endla tano, hi ta va hi vangamisa Yehovha, naswona hi nga tiyiseka leswaku u ta tsaka hakunene. Anakanya hi Ethel, makwerhu la kuleke la tshamaka ekaya ra vadyuhari. U chumayela nkarhi na nkarhi eka vanhu lava a tshamaka na vona kwalaho, naswona u chumayela ni hi ku tirhisa riqingho. Hambileswi a tsaneke emirini, u endla ntirho wakwe hi moya-xiviri hinkwawo.—Matewu 22:37.

22. (a) Hi tihi tindlela tin’wana leti hi nga vangamisaka Xikwembu ha tona? (b) Hi wihi nkarhi wo hlawuleka lowu hi wu languteleke?

²² Kambe tsundzuka leswaku ku chumayela ko va ndlela yin’wana ya ku vangamisa Yehovha. Loko hi veka xikombiso hi mahanyelo ya hina ni ndlela leyi hi langutekaka ha yona entirhweni wa ku tihanyisa, exikolweni ni le kaya, hi ta va hi tsakisa mbilu ya Yehovha. (Swivuriso 27:11) Swivuriso 28:20 ya hi tshembisa: “Munhu wa swiendlo swo tshembeka u ta kuma mikateko yo tala.” Hikwalaho hi fanele hi ‘byala hi xitalo’ entirhweni lowu Xikwembu xi hi nyikeke wona, hi ri karhi hi tiva leswaku hi ta kuma mikateko yo tala. (2 Vakorinto 9:6) Loko hi endla tano, hi ta va ni lunghelo ra ku hanya enkarhini wo hlawuleka loko “hinkwaswo leswi hefemulaka” swi ta vangamisa Yehovha hi ndlela leyi n’wi fanelaka hakunene!—Pisalema 150:6.

[Nhlamuselo ya le hansi]

Wa Tsundzuka Xana?

• Vanhu va Yehovha va n’wi tirhela “nhlikanhi ni vusiku” hi ndlela yihi?

• I ntlhontlho wihi lowu nyimba ya Gadi yi langutaneke na wona, naswona sweswo swi va dyondzisa yini Vakreste namuntlha?

• Ntirho wa nsimu wu hi sirhelela njhani eka minhlaselo ya Sathana?

• Hi yihi ‘nyangwa leyi pfulekeke’ leyi van’wana va ngheneke eka yona, naswona va kume mikateko yihi?

[Swivutiso Swa Dyondzo]

[Xifaniso lexi nga eka tluka 15]

Tanihi Vagadi lava lwisaneke ni mintlawa ya vaphangi, Vakreste va fanele va lwisana ni minhlaselo ya Sathana

[Xifaniso lexi nga eka tluka 17]

Hi tsakela xinakulobye lexinene entirhweni wa nsimu

[Swifaniso leswi nga eka tluka 18]

Ntirho wa vuphayona wu nga hi pfulela malunghelo man’wana, ku katsa ni:

1. Ntirho wo aka marhavi ematikweni man’wana

2. Ntirho wa le Bethele

3. Ntirho wa vurhumiwa