Xana Swa Boha Leswaku U Va Xirho Xa Vukhongeri Byo Karhi?

‘A SWI bohi leswaku ndzi va xirho xa vukhongeri byo karhi kumbe leswaku ndzi hamba ndzi ya ekerekeni, leswaku ndzi va munhu la pfumelaka eka Xikwembu!’ Leyi i ndlela leyi vanhu vo tala va titwaka ha yona hi ku va xirho xa kereke kumbe vukhongeri byo karhi. Kahle-kahle, van’wana va vula leswaku va titwa va ri ekusuhi ni Xikwembu loko va ri karhi va tivalangela ntumbuluko ku tlula loko va ri ekerekeni. Namuntlha, swi tolovelekile ku twa vanhu va vula leswaku ku pfumela eka Xikwembu a swi kali swi lava leswaku munhu a va xirho xa ntlawa wo karhi wa vukhongeri.

Kambe, van’wana a va kumani na yona mhaka yoleyo. Va yima hi ra leswaku i swa nkoka leswaku munhu a va xirho xa vukhongeri byo karhi ni ku hamba a tihlanganisa na byona, handle ka sweswo a nge amukeleki eka Xikwembu. Kutani ke, mhaka ya ku va xirho xa vukhongeri byo karhi a hi ya vanhu lava endlaka ndzavisiso wa ta vukhongeri ntsena, i ya nkoka eka vanhu hinkwavo. Nakambe, leswi vuxaka bya hina ni Xikwembu byi katsekaka, xana a hi swinene ku kumisisa leswaku xona xi ri yini emhakeni leyi? I yini leswi hi nga swi kumaka eRitweni ra xona, ku nga Bibele, malunghana ni mhaka leyi?

Ndlela Leyi Xikwembu Xi Tirhisaneke Ha Yona Ni Vanhu eNkarhini Lowu Hundzeke

Emalembeni ya kwalomu ka 4 400 lama hundzeke, ku ve ni ndhambi leyi funengeteke misava hinkwayo. Mhaka leyi a yi nga ta rivaleka hi ku olova naswona emisaveni hinkwayo vanhu va ni mintsheketo leyi vulavulaka hi ndhambi leyi. Hambileswi mintsheketo ya kona yi hambanaka hi vuxokoxoko byo karhi, kambe yi ni vuxokoxoko byo tala lebyi fanaka, ku katsa mhaka ya leswaku ku pone vanhu ni swiharhi swi nga ri swingani ntsena.

Xana vanhu lava poneke Ndhambi leyi, ko va vanhu lava veke ni njombo kutani va pona ndzoviso hi xiwelo? Bibele a yi kombisi swona sweswo. Lexi xiyekaka, Xikwembu a xi tivisanga mani na mani hi ku ta ka Ndhambi. Ematshan’weni ya  sweswo, xi byele Nowa, loyi yena a tsundzuxeke vanhu lava a a hanya exikarhi ka vona hi ku ta ka Ndhambi.—Genesa 6:13-16; 2 Petro 2:5.

Munhu a a ta pona ntsena loko a ri xiphemu xa ntlawa lowu naswona a tiyimiserile ku amukela nkongomiso lowu Xikwembu xi wu nyikeke Nowa. Hambi ku ri swiharhi leswi poneke Ndhambi hi ku nghena engalaveni, swi pone hikwalaho ko pfuniwa hi ntlawa lowu. Nowa u nyikiwe swiletelo leswi kongomeke swa leswaku a endla malunghiselelo yo ponisa swiharhi.—Genesa 6:17–7:8.

Endzhaku ka malembe-xidzana yo hlayanyana, vatukulu va Nowa lava va nga vana va Seme, va tikume va ri mahlonga aEgipta. Kambe, Xikwembu a xi tiyimisele ku va ntshunxa kutani xi va yisa etikweni leri xi ri tshembiseke Abrahama kokwa wa vona. Ni le ka xiendlakalo lexi, mhaka leyi a yi byeriwanga mani na mani kambe yi sungule yi byeriwa lava va hlawuriweke leswaku va va varhangeri va vona—ku nga Muxe ni makwavo Aroni. (Eksoda 3:7-10; 4:27-31) Endzhaku ka loko va ntshunxiwile evuhlongeni aEgipta tanihi ntlawa, va nyikiwe Nawu wa Xikwembu loko va fika eNtshaveni ya Sinayi kutani va hleriwa va va tiko ra Israyele.—Eksoda 19:1-6.

Muisrayele ha wun’we a a ta swi kota ku pona ntsena loko a fambisana ni ntlawa lowu hlawuriweke hi Xikwembu a tlhela a landzelela nkongomiso wa lava va vekiweke ku rhangela ntlawa lowu. Ku tlhele ku endliwa malunghiselelo ya leswaku Vaegipta van’wana lava a va amukeleka eka Xikwembu, va tihlanganisa ni ntlawa lowu. Loko Vaisrayele va suka aEgipta, vanhu lava va fambe na vona, naswona leswi swi endle leswaku va kuma mikateko ya Xikwembu.—Eksoda 12:37, 38.

Kutani, hi lembe-xidzana ro sungula, Yesu u sungule ntirho wakwe wo chumayela, a hlengeleta vanhu a va endla vadyondzisiwa vakwe. U tirhe na vona tanihi ntlawa, hambileswi minkarhi yin’wana a a pfa a khathalela vanhu vo karhi hi ku kongoma hi ku ya hi swilaveko swa vona. Loko a vulavula ni vaapostola vakwe va 11, Yesu u te: “Hi n’wina mi khomeleleke swin’we na mina emiringweni ya mina; kutani ndzi endla ntwanano swin’we na n’wina, hilaha Tata wa mina a endleke hakona ntwanano wa mfumo swin’we na mina.” (Luka 22:28, 29) Endzhakunyana, moya wo kwetsima wa Xikwembu wu fike ehenhla ka vadyondzisiwa loko va hlengeletanile va ri ntlawa.—Mintirho 2:1-4.

Swikombiso leswi swi yi veka erivaleni mhaka ya leswaku eminkarhini ya khale Xikwembu minkarhi hinkwayo a xi tirha ni vanhu va xona tanihi ntlawa. Vanhu va nga ri vangani lava Xikwembu xi va tirhiseke hi ku kongoma—ku nga Nowa, Muxe, Yesu ni van’wana—a xi va rhuma ku yisa rungula ra xona eka ntlawa wo karhi lowu hlanganeke. Swi le rivaleni leswaku Xikwembu xi endla hi ndlela leyi fanaka eka malandza ya xona namuntlha. Handle ko kanakana, leswi swi tlakusa xivutiso lexi: Xana swi enerile ku va xirho xa vukhongeri byo karhi? Hi ta hlamula xivutiso lexi xa nkoka eka xihloko lexi landzelaka.

[Xifaniso lexi nga eka tluka 4]

Ku sukela khale, Xikwembu a xi tirhisana ni vanhu va xona tanihi ntlawa