Mathwasana Ya Le Giliyadi Ma Famba Ma Ri Vatshoveri Lava Hisekaka!

“NTSHOVELO i wukulu, kambe vatirhi a hi vangani. Hikokwalaho, kombelani N’wini wa ntshovelo leswaku a rhumela vatirhi entshovelweni wakwe.” (Matewu 9:37, 38) Marito lawa a ma ri ni nhlamuselo yo hlawuleka eka swichudeni leswi thwasaka swa ntlawa wa vu-116 wa Xikolo xa Bibele xa Giliyadi xa Watchtower, loko swi ri karhi swi lunghiselela ku ya eswiavelweni swa swona swa vurhumiwa.

Hi Mugqivela, March 13, 2004, vanhu va 6 684 va hlengeletanile eNtsindza wa Dyondzo wa Watchtower le Patterson, eNew York ni le tindhawini tin’wana laha nongonoko lowu a wu kombisiwa hi thelevhixini, laha ntlawa lowu wu kumeke marito ya xikhutazo loko wu leriwa. Hinkwerhu xi nga hi pfuna xitsundzuxo xexo loko hi ri karhi hi tirha hi ku hiseka entshovelweni wa moya.

Marito yo pfula ya Theodore Jaracz, xirho xa Huvo leyi Fumaka tlhelo thwasana eka ntlawa wa vunkombo wa Giliyadi, ma kandziyise marito ya Yesu lama nge: “Fambani mi ya endla vanhu va matiko hinkwawo va va vadyondzisiwa.” (Matewu 28:19, 20) Marito wolawo a ma fanerile hakunene, tanihi leswi mathwasana lawa ma rhumeriwaka ematikweni ya 20! U tsundzuxe swichudeni leswaku xileriso lexi humaka eRitweni ra Xikwembu xi swi hlomise hi ku helela leswaku swi va vatirhi lava hisekaka entshovelweni wa nkoka swinene hi tlhelo ra moya.—Matewu 5:16.

Ndlela Ya Ku Va Vatshoveri Lava Vekaka Mihandzu

Xivulavuri xo sungula enongonokweni wolowo a ku ri Robert Wallen, loyi a a hoxa xandla swinene eka leswi endliwaka eXikolweni xa Giliyadi ku ringana malembe yo tala. Loko a vulavula hi xihloko lexi nge “Mfanelo Leyinene Ngopfu Ya Ntwela-vusiwana,” u byele swichudeni a ku: “Ntwela-vusiwana i ririmi leri ri nga twiwaka hi lavo fe tindleve ni lavo fe mahlo.” Yesu a a wu tiva nhlomulo lowu van’wana va langutaneke na wona naswona a a lava ku va kutsula eka wona. (Matewu 9:36) Swichudeni leswi swi lava tindlela to tala to endla hilaha ku fanaka—entirhweni wa swona wo chumayela, evandlheni, ekaya ra varhumiwa ni le vukatini bya swona. Xivulavuri xi va khutazile xi ku: “Kombisani mfanelo leyi ya ntwela-vusiwana loko mi ri karhi mi tirhela van’wana. Swi lava leswaku mi tikhoma kahle evuton’wini bya n’wina bya siku ni siku ekaya ra varhumiwa. Hikwalaho, tiyimiseleni ku ambala ntwela-vusiwana.”—Vakolosa 3:12.

Ku landzele Gerrit Lösch, xirho xa Huvo leyi Fumaka tlhelo thwasana ra ntlawa wa vu-41 wa le Giliyadi, yena a a tlhuvutsa nhloko-mhaka leyi nge “Vahuweleri Va Mhaka Ya Ku Ponisiwa.” (Esaya 52:7) Leswaku vanhu va pona loko xiyimiso lexa sweswi xa swilo xi lovisiwa, va fanele va kuma vutivi lebyi kongomeke bya Rito ra Xikwembu, va twarisa erivaleni ripfumelo ra vona kutani va khuvuriwa. (Varhoma 10:10; 2 Timotiya 3:15; 1 Petro 3:21) Hambiswiritano, xivangelo-nkulu xa ku huwelela mhaka ya ku ponisiwa a hi ku ponisa vanhu kambe i ku  dzunisa Xikwembu. Hikwalaho, Makwerhu Lösch u khongotele varhumiwa lava hi marito lawa: “Yisani rungula ra Mfumo evugimamusi bya misava, naswona vanani vahuweleri lava hisekaka va timhaka ta ku ponisiwa, hinkwaswo swi endleleni ku dzunisa Yehovha.”—Varhoma 10:18.

“Xana U Voninga Njhani Hi Tlhelo Ra Moya?,” lexi a ku ri xivutiso lexi muleteri wa le Giliyadi Lawrence Bowen a xi vutiseke. U kombetele eka marito ya Yesu lama tsariweke eka Matewu 6:22 kutani a khutaza swichudeni leswi thwasaka ku hlayisa tihlo ra swona ri “olova” leswaku swi ta “voninga hi tlhelo ra moya, xisweswo swi dzunisa Yehovha naswona swi pfuna ni vanhu-kulobye.” Ku sukela loko a sungule vutirheli byakwe, Yesu u veke xikombiso lexi hetisekeke emhakeni leyi hi ku tshama a ri karhi a ehleketa hi ku endla ku rhandza ka Xikwembu. Yesu u kote ku tiyisela miringo ya Sathana emananga hikwalaho ko ehleketa hi swilo leswinene leswi Tata wakwe a n’wi dyondziseke swona etilweni. (Matewu 3:16; 4:1-11) Yesu u kombise ku tshembela hi ku helela eka Yehovha loko a hetisisa leswi a n’wi rhumeke leswaku a swi endla. Hilaha ku fanaka, leswaku va swi kota ku langutana ni mintlhontlho leyi nga emahlweni, varhumiwa va fanele va ya emahlweni ni mikhuva leyinene ya ku dyondza Bibele ni ku tshembela eka Yehovha hi ku helela.

Mark Noumair, muleteri wa le Giliyadi tlhelo thwasana eka ntlawa wa vu-77 wa le Giliyadi, u gimete  ntlhandlamano lowu wa tinkulumo, a vulavula hi xihloko lexi nge “Hi Hina Lava eVokweni Ra Wena.” (Yoxuwa 9:25) U khutaze swichudeni leswaku swi tekelela langutelo ra Vagibiyoni va khale. Hambileswi Gibiyoni a ku ri “muti lowukulu . . . ni vavanuna va wona hinkwavo a va ri vanhu va matimba,” Vagibiyoni a va sindzisanga leswaku va tekiwa va tlakukile kumbe va langutela leswaku swilo swi endliwa hi ndlela ya vona. (Yoxuwa 10:2) Hi ku tirhandzela, va tirhe tanihi “varhoteri va tihunyi ni vaki va mati” ehansi ka nkongomiso wa Valevhi leswaku va seketela vugandzeri bya Yehovha. (Yoxuwa 9:27) Entiyisweni, swirho swa ntlawa lowu thwasaka swi byele Yoxuwa Lonkulu, Yesu Kreste swi ku, “Hi hina lava evokweni ra wena.” Sweswi, loko va ya eswiavelweni swa vona swa le matikweni mambe, va fanele va amukela ntirho wun’wana ni wun’wana lowu Yoxuwa Lonkulu a va nyikaka wona.

Mintokoto Ni Mimbulavurisano

Wallace Liverance, loyi a nga thwasa eka ntlawa wa vu-61 wa le Giliyadi tlhelo muleteri, u bule ni ntlawa wa swichudeni hi nhloko-mhaka leyi nge, “Pfula Matsalwa Hi Ku Helela.” Swi hlamusele ni ku kombisa hi xiviri mintokoto leyi swi yi tsakeleke ensin’wini hi nkarhi wa xikolo lexi. A swi lo dla, leswaku dyondzo ya swona leyi dzikeke ya Matsalwa etin’hwetini ta ntlhanu ta ndzetelo yi fikelele timbilu ta swona ni ku swi susumetela ku byela van’wana hileswi swi swi dyondzeke. (Luka 24:32) Eka xikolo lexi xa tin’hweti ta ntlhanu, xichudeni xin’wana xi swi kotile ku pfuna makwavo hi leswi a xi swi dyondza. Leswi swi khutaze makwavo ku lava vandlha ra kwalaho ni ku sungula ku dyondza Bibele. Sweswi u fanelekile ku va muhuweleri la nga khuvuriwangiki.

Endzhaku ka mintokoto leyi, Richard Ashe na John Gibbard va bule ni malandza ya Yehovha yo hlayanyana lama tshembekeke nkarhi wo leha, ku katsa ni valanguteri lava famba-fambaka lava a va tele ku ta kuma ndzetelo wo hlawuleka eNtsindza wa Dyondzo wa Watchtower. A a va thwase eka mintlawa leyi hundzeke ya Xikolo xa Giliyadi. Un’wana u vule leswaku Makwerhu Knorr u tshame a vula leswi eka ntlawa wa vona: “EGiliyadi mi ta dyondza swinene. Kambe loko u huma se u tikukumuxa, hi ta va hi tsandzekile. Hi lava mi huma mi ri ni rirhandzu.” Vamakwerhu lava famba-fambaka va khutaze ntlawa wolowo leswaku wu rhandza vanhu, wu khoma van’wana hi ndlela leyi Kreste a va khomeke ha yona ni ku amukela hi ku titsongahata xiavelo xin’wana ni xin’wana lexi wu nyikiwaka xona. Handle ko kanakana ku amukela ndzayo swi ta pfuna varhumiwa lavantshwa leswaku va veka mihandzu eswiavelweni swa vona.

Fambani Mi Ri Vatshoveri Lava Hisekaka!

Vayingiseri va ve ni lunghelo ro yingisela nkulumo leyi vekiweke hi Stephen Lett, xirho xin’wana xa Huvo leyi Fumaka. U nyikele nkulumo-nkulu ya nongonoko leyi a yi ri ni nhloko-mhaka leyi nge “Fambani Mi Ri Vatshoveri Lava Hisekaka!” (Matewu 9:38) Entshovelweni lowu tolovelekeke, nkarhi wo tshovela a wu talanga. Vatshoveri va fanele va kulula va n’watseka. Mawaku ndlela leyi swi nga swa nkoka ha yona enkarhini lowu wa makumu ya mafambiselo ya swilo! Entshovelweni lowukulu wa moya, vutomi byi le khombyeni. (Matewu 13:39) Makwerhu Lett u khutaze mathwasana leswaku ‘ma nga lolohi entirhweni,’ kambe ‘ma pfurha hi moya’ ni ku va “mahlonga ya Yehovha” entshovelweni lowu wu nga taka wu nga phindhiwi. (Varhoma 12:11) Xivulavuri xi tshahe marito ya Yesu lama nge: “Tlakusani mahlo ya n’wina mi languta masimu, ma basile leswaku ma tshoveriwa.” (Yohane 4:35) Hiloko xi khongotela mathwasana leswaku ma hisekela ntirho wa ku tshovela hi ku endla matshalatshala ya xiviri ya ku fikelela vanhu hi nkarhi lowu va kumekaka ha wona, ni lomu va kumekaka kona ni ku endla matshalatshala hinkwawo ya ku chumayela hi xitshuketa. Ku xalamukela minkarhi ya ku chumayela swi nga pfuna eku nyikeleni ka vumbhoni hi rixaladza. Yehovha i Xikwembu lexi hisekaka, naswona xi rindzele leswaku hinkwerhu hi xi tekelela naswona hi tirha hi matimba entshovelweni wa moya.—2 Tihosi 19:31; Yohane 5:17.

Loko a gimeta nongonoko, Makwerhu Jaracz, loyi a a ri mutshama-xitulu, u hlaye marungula lama humaka emarhavini yo hlayanyana kutani a nyika swichudeni tidiploma ta swona. Thwasana rin’wana ri hlaye papila leri tsariweke hi ntlawa, leri kombisaka ku tlangela loku humaka embilwini hi ndzetelo lowu va wu kumeke. Swi le rivaleni leswaku nongonoko wa lava thwasaka va ntlawa wa vu-116 wu endle leswaku hinkwavo lava a va ri kona kwalaho va tiyimisela swinene ku famba va ya va vatshoveri lava hisekaka.

[Bokisi leri nga eka tluka 25]

TINHLAYO TA NTLAWA

Nhlayo ya matiko lama yimeriweke: 6

Nhlayo ya matiko lawa va averiweke eka wona: 20

Nhlayo ya swichudeni: 46

Xiringaniso xa malembe: 34,2

Xiringaniso xa malembe entiyisweni: 17,2

Xiringaniso xa malembe evutirhelini bya nkarhi hinkwawo: 13,9

[Xifaniso lexi nga eka tluka 26]

Ntlawa Wa Vu-116 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.